قربانی کے جانور سمیت کسی پرکوئی نیا ٹیکس نہیں لگایا، چیئرمین ایف بی آر  

فیصل آباد میں ریجنل آفس میں افسران سے خطاب کرتے ہوئے فیڈرل بورڈ آف ریونیو (ایف بی آر) کے چیئرمین شبر زیدی نے کہا کہ کاروباری لوگوں کی مشاورت سے نظام کو بہتر کیا جائے گا، حکومت نے کوئی نیا ٹیکس نہیں لگایا ہے، کوئی شخص بتائے کہ کون سا نیا ٹیکس لگا ہے۔۔؟؟ مہنگائی کی کچھ وجوہات میں ڈالر کی قدر میں اضافہ بھی ہے، ہماری خامی ہے کہ ٹیکس کے حوالے سے لوگوں کو بہتر طریقے سے آگاہی نہیں دی۔

چیئرمین ایف بی آرنے مویشی منڈی میں بکروں کی خریداری پر ٹیکس لگانے کی تردید کرتے ہوئے اسے افواہ قرار دیا، اور عوام سے اپیل کی کہ اس طرح کی خبروں کی پہلے تصدیق کرلیا کریں۔

انھوں نے کہا کہ ماضی میں زیرو ریٹنگ کے مختلف تجربات ہوچکے ہیں، ٹیکسٹائل کی موجودہ صورت حال کے مطابق زیرو ریٹنگ ختم کرنے کا فیصلہ کیا، ٹیکسٹائل کے مختلف سیکٹرز کے لوگوں سے پہلے بھی بات چیت ہوئی ہے، دورے کا مقصد صنعتکاروں کے تحفظات سننا اور دور کرنا ہے۔

انہوں نے کہا کہ 8 مئی سے چارج لینے کے بعد آرڈر کیا تھا کسی کا اکاؤنٹ فریز نہیں کریں گے، سیلز ٹیکس کی رجسٹریشن میں کرپشن تھی اسےآٹومیٹ کررہےہیں، تمام مسائل کاحل آٹومیشن ہے، جس کیلئے اب آسانیاں موجود ہیں۔

شبر زیدی نے کہا کہ شناختی کارڈ کی شرط پر مزاحمت کی وجہ کیا ہے یہ جاننا چاہتے ہیں۔؟؟

شناختی کارڈ کی ڈیمانڈ کوئی نئی چیز نہیں، قول وفعل میں کبھی تضاد نہیں رہا۔