پاک فوج کشمیریوں کی جدوجہد میں ان کے شانہ بشانہ کھڑی ہے،آرمی چیف

آئی ایس پی آر کے مطابق آرمی چیف جنرل قمر جاوید باجوہ کی زیر صدارت کنرل ہیڈ کوارٹرز راولپنڈی میں کور کمانڈرز کانفرنس منعقد ہوئی جس میں ایک نکاتی ایجنڈے پر غور اور مقبوضہ کشمیر کی صورتحال پر جائزہ لیتے ہوئے اس پر بحث کی گئی۔

آئی ایس پی آرکے مطابق کورکمانڈرز نے مسئلہ کشمیر پر بھارتی اقدامات مسترد کرنے کے حکومتی اقدامات کی مکمل حمایت کی۔ کور کمانڈرز کا کہنا تھا کہ پاکستان نے کبھی مقبوضہ کشمیر پر بھارتی تسلط کو قانونی بنانے والا آرٹیکل 370 یا 35 اے تسلیم نہیں کیا، اب بھارت نے خود ہی اس کھوکھلے بہانے کو ختم کردیا ہے۔

کورکمانڈرز کانفرنس سے خطاب میں آرمی چیف جنرل قمر جاوید باجوہ نے کہا کہ پاک فوج کشمیریوں کی جدوجہد میں ان کے شانہ بشانہ کھڑی ہے، پاک فوج اپنی اس ذمہ داری کو نبھانے کے لئے مکمل تیار ہے اور ہم اپنی ذمہ داریاں نبھانے کیلئے آخری حد تک جانے کو تیار ہیں۔

واضح رہے بھارت نے لائن آف کنٹرول پر کلسٹر بموں کا استعمال کیا جس کے بعد 3 روز قبل وزیراعظم عمران خان کی زیرصدارت قومی سلامتی کمیٹی کا اجلاس ہوا تھا جس میں ایل او سی اور بھارتی جارحیت کی شدید مذمت بھی کی گئی۔ جبکہ 5 اگست کو مودی حکومت کی جانب سے مقبوضہ کشمیر کی خصوصی حیثیت یکطرفہ طور پر ختم کردی گئی تھی جبکہ تمام کشمیری رہنما نظر بند اور مقبوضہ وادی میں کرفیو نافذ ہے۔