امریکی ایوان نمائندگان کی اسپیکر نینسی پلوسی نے صدرٹرمپ کے مواخذےکی کارروائی کااعلان کردیا ہے، اقوام متحدہ میں میڈیا سے گفتگو میں نینسی پلوسی کا کہنا تھا کہ صدرآئینی اقدارکی خلاف ورزی کررہے ہیں، صدرکو لازمی طورپر جواب دہ ہونا چاہیے، کوئی قانون سے بالاتر نہیں، ایوان نمائندگان کے ایک سو پینتیس ڈیموکریٹ ارکان صدرٹرمپ کے مواخذے کے حامی ہیں، مواخذے کو کامیاب بنانےکے لیے دوسو اٹھارہ ووٹوں کی ضرورت ہے۔
اسپیکر کے فیصلے پر امریکی حکمراں جماعت ریپبلکن پارٹی کے رہنماؤں نے صدر ٹرمپ کے مواخذے کی مخالفت کردی ہے، ری پبلکن پارٹی کےقائد میک کارتھی کا کہنا ہےکہ وقت آگیا ہے کہ عوام کو سیاست سے پہلےرکھا جائے، اور اس طرح کے معاملات صدر کے امور میں مداخلت پیدا کرسکتے ہیں۔
مواخذے کے اعلان کے بعد امریکی صدر ٹرمپ نے سماجی رابطے کی ویب سائٹ ٹویٹر پر ردعمل کا اظہارکرتے ہوئے کہا مواخذےکی کارروائی کااعلان وہراساں کرنے کے مترادف ہے، یاد رہے 13 سمتبر کو امریکی ایوان نمائندگان کی عدالتی کمیٹی نے صدرٹرمپ کے مواخذے سےمتعلق تحقیقات تیز کرنے کی منظوری دی تھی اور کہا تھا کہ تحقیقات کی روشنی میں قانون ساز فیصلہ کرسکیں گے کہ صدرٹرمپ کے مواخذے کی سفارش کی جائے یا نہیں۔