غیر ملکی خبررساں ادارے کے مطابق سونے کی کان بیٹھنے کا واقعہ لیبیا کی سرحد کے قریب افریقی ملک چاڈ کے تبیستی صوبے میں کوری بوگودی کے علاقے میں پیش آیا۔ میڈیا رپوٹس کے مطابق کان بیٹھنے کے واقعے میں 52 افراد ہلاک ہوئے جب کہ حکومتی اہلکاروں نے حادثے میں 30 افراد کی ہلاکت کا شبہ ظاہر کیا ہے۔
رپورٹس کے مطابق حادثے میں 37 افراد زخمی بھی ہوئے جن میں سے 21 افراد کی حالت تشویشناک ہے۔سیکیورٹی اور مائننگ سے تعلق رکھنے والے ایک ذرائع کا کہنا ہے کہ رواں برس جنوری میں لیبیا سے تعلق رکھنے والے عرب کان کنوں اور چاڈ کے آوڈئی کمیونٹی کے افراد کے درمیان فسادات میں درجنوں افراد ہلاک ہو گئے تھے۔
کوری بوگودی کا علاقہ 2012، 2013 میں سونے کی دریافت کے بعد سے مقامی، لسانی اورغیرملکی گروپوں کے درمیان لڑائی کا مرکز بنا ہوا ہے، اس علاقے میں واقعہ سونے کی کانوں میں ایک اندازے کے مطابق ہزاروں ٹن سونا موجود ہے جسس کی ملکیت کیلئے لڑائیاں عام ہیں، خیال کیا جارہا ہے کہ کان منہدم ہونے کے پیچھے بھی کسی مخالف گروپ کا ہاتھ ہوسکتا ہے۔