صوبہ پنجاب 2019 میں بھی مجرموں کے نرغے میں رہا۔ قتل، اغوا، خواتین سے زیادتی، چوری، ڈکیتی سمیت دیگر جرائم کے ہزاروں واقعات ہوئے، شہر ہو یا گاؤں ہر شخص عدم تحفظ کا شکار رہا۔
سال 2019 کے آغاز سے ہی وارداتوں کا سلسلہ ایسا شروع ہوا کہ سال کے آخر تک چلتا رہا۔
صوبے بھر میں کہیں چوری اور ڈ کیتی کی واردات ہوئی تو کہیں قتل وغارت اور اغوا کی وارداتیں کم نہ ہوئیں۔
سال بھر کے دوران متعدد خواتین زیادتی کا شکار ہوئیں تو کسی کی گاڑی چھن گئی اور کوئی موٹر سائیکل سے محروم ہوگیا۔
رپورٹ کے مطابق سال کے 365 دنوں میں صوبے بھر میں 3 ہزار 594 لوگوں کو موت کے گھاٹ اتار دیا گیا۔
اقدام قتل کے 9795 واقعات رونما ہوئے، لڑائی جھگڑوں کے 13040 واقعات میں ہزاروں شہری زخمی ہو گئے۔
اعداد و شمار کے مطابق اغوا کے 13300واقعات جبکہ 76 افراد کو تاوان کیلئے اغوا کیا گیا۔
خواتین کے ساتھ زیادتی کے واقعات کےا عداد و شمار کے مطابق 3420 خواتین کی عصمت دری کی گئی جبکہ 182 کو اجتماعی زیادتی کا نشانہ بنایا گیا۔
ڈی آئی جی ذوالفقار حمید کا کہنا ہے کہ آبادی اور بے روز گاری جرائم بڑھنے کی وجوہات ہیں۔
رپورٹ کے مطابق چوری و ڈکیتی کی 15020 وارداتوں میں ڈاکوؤں نے اودھم مچا ئے رکھا، 22200 وارداتوں میں کسی کو گاڑی تو کسی کو موٹر سائیکل سے محروم کر دیا گیا۔
2019 کے دوران لاہور شہر میں خود کش دھماکے سمیت دہشت گردی کے دو واقعات ہوئے، پولیس اہلکاروں سمیت 4 افراد شہید اور درجنوں زخمی ہوئے۔