خطیب قبلہ اول نے کہا ہے کہ صیہونی ریاست فلسطینی اراضی پر غاصبانہ قبضے کے لیےطاقت اور ریاستی وسائل کا وحشیانہ استعمال کرتے ہوئے فلسطینیوں کو بے دخل کرنے کی کوشش کررہی ہے۔
مسجد اقصیٰ کے امام وخطیب اور ممتازعالم دین الشیخ عکرمہ صبری نے صیہونی ریاستی دہشتگردی کے استعمال سے مقبوضہ بیت المقدس کے علاقے الشیخ جراح سے فلسطینیوں کی بے دخلی کو نسلی تطہیر قرار دیتے ہوئے کہا ہے کہ اسرائیلی ریاست کا بیت المقدس کے باشندوں کے ساتھ برتاؤ اور ارض مقدس کو یہودیانے کی سازشیں ناقابل قبول ہیں۔
الشیخ عکرمہ صبری نے شیخ جراح کے باشندوں کی اپنی زمین مقدس نہ چھوڑنے کے عزم کوخراج تحسین پیش کرتےہوئے کہا ہے کہ صیہونی آباد کاروں اور اسرائیلی حکام کو فلسطینیوں کو ان کے گھروں سے نکال باہر کرنے کا کوئی حق نہیں ۔
الشیخ صبری کا کہنا تھا کہ قابض اسرایل منصفانہ قوانین پر نہیں چلتا بلکہ فلسطینی اراضی پر غاصبانہ قبضے کے لیےطاقت کا وحشیانہ استعمال کرتے ہوئے ریاستی وسائل کا بھی بے دریغ استعمال کرتا ہے۔
انہوں نے کہا کہ اسرائیل القدس کی اراضی کو یہودیانے کے لیے جعلی قوانین اور ظالمانہ ہتھکنڈوں کا استعمال کر کے شہر ی آبادی کا نقشہ تبدیل کر رہا ہے۔
صہیونی آباد کاروں کا قبلہ اول پر دھاوا
صہیونی انتہاپسند یہودی آبادکاروں کے ایک گروہ نے اسرائیلی فوج کے سخت پہرے میں مسجد اقصٰی میں جوتوں سمیت داخل ہوکر ایک بارپھر مقدس مقامات کی بے حرمتی کی۔
گذشتہ روز قابض ریاست اسرائیل میں صہیونی شر پسند آباد کاروں کے گروہ نے مسجد اقصٰی میں داخل ہوکر مقدس مقامات کی بے حرمتی کی جبکہ مسجد اقصٰی میں روزے دار مسلمان نمازی درجنوں کی تعداد میں مسجد اقصٰی کے اندر تعینات تھے تاکہ وہ روزانہ کی بنیاد پر مسجد کی بے حرمتی کرنے والے یہودی آبادکاروں کا مقابلہ کریں اور انہیں بھاگنے پر مجبور کریں جس کے باعث صہیونی آباد کاروں اور فلسطینیوں کے مابین تصادم ہواتاہم اس موقع پر موجود صہیونی فوج نے جو آباد کاروں کی حفاظت پر معمور تھی ،فلسطینی مسلمانوں پر بندوق کے بٹوں سےشدید تشدد کیا۔
مقبوضہ فلسطین: صہیونی پولیس نے دمشق گیٹ سے رکاوٹیں ہٹادیں
مقبوضہ فلسطینی مسلمانوں کے مسلسل مظاہروں اور اپنے تاریخی ورثے کو صہیونی حکام کے قبضے سے بچانے کی فلسطینیوں کی کوششیں بالآخر کامیاب ہوئیں۔
گذشتہ روز قابض ریاست اسرائیل میں بیت المقدس شہر میں دمشق دروازے کے پاس کھڑی کی گئی صہیونی پولیس کی رکاوٹیں ہٹا للی گئیں جس کے بعد سے اب دوبارہ فلسطینیوں کو اس چوک تک رسائی حاصل ہو گئی ہےجو رمضان کا مہینہ شروع ہونے کے بعد سے لڑائی کا میدان بنا ہوا تھا۔
صہیونی پولیس کی جانب سےمقبوضہ بیت المقدس کے پرانے شہر کے داخلی دروازے سے رکاوٹیں ہٹانے کے بعد مشرقی یروشلم پلازا میں ہزاروں فلسطینیوں کا ہجوم اکٹھا ہوگیا اور نوجوانوں نے فلسطینی پرچم لہرائے ،ماہِ رمضان میں یہ مقام نماز تراویح کی ادائیگی کے لئے مقبول ہے۔
واضح رہے کہ مقبوضہ بیت المقدس میں پہلے سے پھیلی اشتعال انگیز کشیدگی، تیرہ اپریل کو ماہ رمضان کے آغاز پر تصادم میں تبدیل ہو گئی تھی۔
منبع: روزنامہ قدس