شفقنا ٹیکنالوجی: واٹس ایپ میں ایک ایسے فیچر کا اضافہ کیا جا رہا ہے جس کا تصور صارفین نے کبھی نہیں کیا تھا۔
درحقیقت یہ کوئی عام اپ ڈیٹ نہیں بلکہ یہ اس میسجنگ پلیٹ فارم کو ہمیشہ کے لیے بدل دینے والا فیچر ثابت ہوگا۔
واٹس ایپ میں ایسے فیچر کی آزمائش کی جا رہی ہے جس سے صارفین بغیر کسی ایپ کے بھی چیٹ کرسکیں گے۔
جی ہاں واقعی آپ نے درست پڑھا ہے۔
WABetaInfo کی رپورٹ کے مطابق واٹس ایپ کے اینڈرائیڈ ڈیوائسز کے لیے نئے بیٹا (beta) ورژن میں گیسٹ چیٹس نامی فیچر کی آزمائش کی جا رہی ہے۔
یہ بنیادی طور پر لنک پر مبنی چیٹ فیچر ہے جس کے لیے دیگر افراد کو آپ سے چیٹ کے لیے ایپ یا واٹس ایپ اکاؤنٹ کی بھی ضرورت نہیں ہوگی۔
بس لنک پر کلک کرکے وہ چیٹ میں شامل ہو جائیں گے، کوئی ایپ انسٹال کرنے کی ضرورت نہیں، کوئی سائن اپ نہیں کرنا ہوگا، یہ چیٹ اینڈ ٹو اینڈ انکرپٹڈ ہوگی۔
مگر اس میں صرف ٹیکسٹ میسجز کرنا ممکن ہوگا، کالز، میڈیا شیئرنگ اور گروپ چیٹس جیسے فیچر دستیاب نہیں ہوں گے۔
پھر بھی یہ واٹس ایپ کو ہمیشہ کے لیے بدل دینے والا فیچر ثابت ہوگا۔
مثال کے طور پر آپ شہر سے باہر سفر کرتے ہیں اور وہاں کسی مقامی فرد سے رابطہ کرنا چاہتے ہیں، مگر وہ واٹس اپ استعمال نہیں کرتا، تو روایتی ایس ایم ایس پر پیسے ضائع کرنے کی بجائے گیسٹ چیٹس سے آپ ایسا کرسکیں گے۔
بس مطلوبہ فرد کو لنک بھیجنا ہوگا اور پھر آپ ون آن ون تھریڈ میں چیٹ کرسکیں گے۔
گیسٹ چیٹس میں سب کچھ واٹس ایپ کے اندر ہی ہوگا کسی تھرڈ پارٹی سروس کی ضرورت نہیں ہوگی۔
صارفین یہ چیٹ لنک ٹیکسٹ، ای میل، سوشل میڈیا یا کسی بھی دیگر ذرائع سے شیئر کرسکیں گے۔
رپورٹ میں بتایا گیا کہ اس فیچر پر ابھی کام جاری ہے اور ابھی یہ بیٹا صارفین کو بھی دستیاب نہیں تو اسے کب تک تمام صارفین کے لیے متعارف کرایا جائے گا، یہ کہنا ابھی مشکل ہے۔
مگر پھر بھی یہ ایک کارآمد ٹول ثابت ہوگا جس سے آپ کسی سے بھی کہیں بھی واٹس ایپ چیٹ کرسکیں گے اور ایپ کی بھی ضرورت نہیں ہوگی۔
