غزہ نسل کشی: ترکیے نے اسرائیلی وزیر اعظم کے وارنٹ گرفتاری جاری کر دیے

شفقنا اردو: ترکیے نے اسرائیلی وزیراعظم بنیامین نیتن یاہو اور ان کی حکومت کے سینئر عہدیداروں کے خلاف نسل کشی اور انسانیت کے خلاف جرائم کے الزامات میں وارنٹ گرفتاری جاری کردیے۔

غیر ملکی خبررساں ایجنسی کے مطابق استنبول کے پراسیکیوٹر کے دفتر کی جانب سے جاری بیان کے مطابق مجموعی طور پر 37 اسرائیلی عہدیداروں کے نام فہرست میں شامل ہیں جن میں وزیرِ دفاع اسرائیل کاٹز، قومی سلامتی کے وزیر اتمر بن گویر اور فوج کے سربراہ لیفٹیننٹ جنرل ایال زمیر بھی شامل ہیں۔

بیان میں کہا گیا ہے کہ مذکورہ حکام نے غزہ میں منظم انداز میں نسل کشی اور انسانیت کے خلاف جرائم کا ارتکاب کیا ہے۔

ترک پراسیکیوٹر کے دفتر نے اپنے بیان میں ’ترک-فلسطینی دوستی اسپتال’ کا بھی حوالہ دیا۔ یہ غزہ میں ترکیے کا تعمیر کردہ ایک اسپتال تھا جسے مارچ میں اسرائیلی فضائی حملے میں تباہ کردیا گیا تھا۔

واضح رہے کہ ترکیے نے گزشتہ سال جنوبی افریقا کے اُس مقدمے میں بھی بطور فریق شمولیت اختیار کی تھی جو بین الاقوامی عدالتِ انصاف میں اسرائیل پر نسل کشی کے الزامات کے تحت دائر کیا گیا تھا۔