واٹس ایپ کا وہ خفیہ فیچر جس سے آپ کسی نمبر کو سیو کیے بغیر بھی مسیج بھیج سکتے ہیں

شفقنا ٹیکنالوجی: اگر آپ کسی کورئیر سروس کے فرد، کسی کیب ڈرائیور یا کسی بھی ایسے فرد جس سے آئندہ کبھی بات ہونے کا امکان نہ ہو، کو واٹس ایپ پر میسج کرتے ہیں تو ایک درد سر کا سامنا ہوتا ہوگا۔

واٹس ایپ کی جانب سے آپ کو میسج سے قبل اس فرد کا فون نمبر محفوظ کرنے کی ہدایت کی جاتی ہے۔

یہ اس میسجنگ پلیٹ فارم کی سب سے بڑی خامی ہے کیونکہ دیگر ایپس میں آپ آسانی سے کسی کو بھی میسج کرسکتے ہیں، مگر واٹس ایپ کی جانب سے لوگوں کو کانٹیکٹس میں شامل کرنے پر زور دیا جاتا ہے۔

اس کے نتیجے میں فون بک ایسے نمبروں سے بھر جاتی ہے جن سے کبھی رابطہ کرنے کی ضرورت نہیں ہوتی۔

مگر اچھی خبر یہ ہے کہ آپ کو ایسا کرنے کی ضرورت نہیں۔

واٹس ایپ میں کلک ٹو چیٹ کے نام سے ایسا فیچر موجود ہے جس کا علم بیشتر صارفین کو نہیں۔

اس فیچر یا ٹِرک سے آپ کسی بھی نمبر کو سیو کیے بغیر میسج بھیج سکتے ہیں اور یہ طریقہ واٹس ایپ موبائل ایپ اور واٹس ایپ دونوں میں کام کرتا ہے۔

یہ فیچر کیسے کام کرتا ہے؟
اس فیچر کے تحت نمبر کو کانٹیکٹ میں محفوظ کرنے کی بجائے آپ کو بس ایک لنک بنانا ہوتا ہے۔

جب اس لنک پر کلک کیا جاتا ہے تو آپ سیدھے ایک واٹس ایپ چیٹ ونڈو میں پہنچتے ہیں جو اس فرد کے نمبر سے جڑی ہوتی ہے، یعنی مزید کچھ کرنے کی ضرورت نہیں۔

یہ فیچر واٹس ایپ کا اپنا ہے کسی تھرڈ پارٹی ایپ کی ضرورت نہیں۔

تو اسے کیسے استعمال کریں؟
اس کے لیے آپ کو مطلوبہ فرد کے مکمل فون نمبر کی ضرورت ہوتی ہے اور اس کے شروع میں کنٹری کوڈ کا اضافہ کرنا ہوتا ہے۔

کنٹری کوڈ اور فون نمبر کے درمیان کوئی اسپیس، بریکٹ یا ڈیش کا استعمال نہیں کرنا ہوتا۔

مثال کے طور پر +92xxxxxxxxxx کی بجائے 92xxxxxxxxxx لکھنا ہوگا۔

مگر نمبر سے پہلے https://wa.me/ کا اضافہ کرنا ہوگا اور ایک سلیش ایڈ کرکے نمبر لکھنا ہوگا۔

یعنی اس طرح https://wa.me/92xxxxxxxxxx لکھنا ہوگا۔

اس لنک کو اپنے واٹس ایپ نمبر کی چیٹ پر محفوظ کرلیں اور ضرورت پڑنے پر پہلے کاپی کریں اور نمبر کو تبدیل کرکے سینڈ بٹن پر کلک کریں اور پھر لنک پر کلک کریں، ایسا کرنے سے مطلوبہ چیٹ ونڈو اوپن ہو جائے گی۔