سربراہی اجلاسوں کے لیے رائج ظاہری طور پر روایتی سفارتی آداب کا خیال نہ رکھنے پر پاکستان کے وزیرِ اعظم عمران خان کو سوشل میڈیا میں شدید تنقید کا نشانہ بنایا جا رہا ہے۔
وائٹ ہاؤس کے سابقہ مشیر پیٹر لیوئے نے جمعہ کے روز سماجی رابطے کی ویب سائٹ ٹوئٹر پر عمران خان کی ایک ویڈیو پوسٹ کرتے ہوئے یہ تبصرہ کیا کہ ’پاکستانی فیاض اور عزت دینے والے لوگ ہیں۔ مجھے اس رویے کی بالکل سمجھ نہیں آئی۔‘
Ugh. Pakistanis are such a generous and respectful people. I don’t get this behavior at all. https://t.co/eII949sloO
— peter lavoy (@peter_lavoy) June 14, 2019
ویڈیو شنگھائی تعاون تنظیم کے کرغزستان میں منعقد ہونے والے سربراہی اجلاس کی افتتاحی نشست کی ہے جس میں ممبر ممالک کے سربراہان کو کانفرنس ہال میں یکے بعد دیگرے مدعو کیا جا رہا ہے۔
Prime Minister of #Pakistan @ImranKhanPTI's Arrival with other World Leaders at Invitation of President of Kyrgyzstan for Opening Ceremony 19th Meeting of the Council of the Heads of State of the Shanghai Cooperation Organization in Bishkek Kyrgyzstan (13.06.19)#SCOSummit2019 pic.twitter.com/fYdKYN3Fv7
— PTI (@PTIofficial) June 13, 2019
مختلف ممالک کے وزرا اور دیگر ذمہ داران پہلے سے ہال میں موجود ہیں جبکہ عمران خان سے پہلے مدعو کیے گئے سربراہانِ مملکت بھی موجود ہیں جو باری باری ہال میں داخل ہونے والے سربراہان کو خوش آمدید کہنے کے لیے اپنی اپنی نشستوں پر کھڑے ہیں۔
عمران خان کو مدعو کرنے کا اعلان کیا جاتا ہے اور وہ آتے ہی اپنی نشست پر براجمان ہو جاتے ہیں اس بات سے قطعِ نظر کے ان سے پہلے آنے والے سربراہان اور ہال میں موجود دیگر افراد اپنی نشستوں پر کھڑے استقبال میں مصروف ہیں۔
عمران خان کے بعد بھی تین مزید سربراہان بشمول روسی صدر پوٹن ہال میں تشریف لاتے ہیں مگر خان صاحب اپنی نشست پر بیٹھے تسبیح کے دانے گھماتے رہتے ہیں۔
منگولیا کے سربراہ سب سے آخر میں تشریف لاتے ہیں اور ان سے پہلے ہال میں داخل ہونے والے بیلا روس کے صدر کی نشست عمران خان کی نشست کے ساتھ ہے۔
جیسے ہی بیلا روس کے صدر اپنی نشست کے قریب پہنچتے ہیں تو عمران خان کھڑے ہونے کی کوشش کرتے ہیں مگر بیلا روس کے صدر انھیں ہاتھ کے اشارے سے بیٹھنے کا مشورہ دیتے ہیں۔