صدر مملکت ڈاکٹر عارف علوی نے یوم عاشور کے موقع پر قوم کے نام پیغام میں کہا کہ شہادت امام حسینؓ انسانیت کی فتح، اسلامی اصولوں کی سربلندی ہے،ڈاکٹر عارف علوی نے کہا کہ 10 محرم کی اسلامی تاریخ میں ایک ممتازحیثیت ہے، نواسہ رسول نے شہادت پاکراس دن کو تا قیامت انمٹ کردیا۔صدر مملکت نے کہ حق و باطل کی لڑائی اس دور میں بھی جاری ہے، ایثار و قربانی کے جذبے کو فروغ دینے کی ضرورت پہلے سے کہیں زیادہ ہے۔
انہوں نے کہا کہ عہد کریں ہم اسلامی روایات کی پاسداری، ملکی ترقی کے لیے کام کریں گے، انتہاپسندی، عدم برداشت کے سدباب کے لیے کسی بھی اقدام سے دریغ نہ کریں۔ڈاکٹر عارف علوی نے کہا کہ دعاگو ہوں کہ اللہ پاکستان کو امن، ترقی، خوشحالی سے ہمکنارفرمائے،اللہ یوم عاشورکےاصل پیغام قربانی کے جذبے کو ہماری زندگیوں میں شامل فرمائے۔
جبکہ وزیر اعظم عمران خان نے یوم عاشور کے موقع پر قوم کے نام اپنے پیغام میں کہا کہ آج حرمت والے مہینے محرم الحرام کی 10 تاریخ ہے، دنیا بھر کے مسلمان حضرت امام حسینؓ کی لازوال قربانی کی یاد تازہ کرتے ہیں۔
وزیر اعظم نے کہا کہ تاریخ اسلام میں یوم عاشور کی الگ اور خاص اہمیت ہے۔ یہ رفعت و بلندی امام عالی مقام کی شہادت اور واقعہ کربلا کی بدولت حاصل ہوئی۔ کربلا کا معرکہ یاد دلاتا ہے کسی قربانی سے دریغ نہیں کیا جاسکتا۔ بچوں جوان بیٹوں اور بھائیوں کو راہ خدا میں نچھاور کرنا سر بلندی ہے۔انہوں نے کہا کہ جذبہ شبیری ایمان و یقین، سچائی اور اصول پرستی کی روایت کو جلا بخشتا ہے۔ واقعہ کربلا اسلام کے ابدی پیغام اور جذبہ قربانی کی آبیاری کا سر چشمہ ہے۔ میرے نزدیک اسوہ حسینؓ کا پیغام ہر قلب سلیم کے لیے ہے۔
وزیر اعظم کا کہنا تھا کہ انسان جان جان آفریں کے سپرد کر کے قرآن کے الفاظ کی عملی تصویر بن جائے، قرآن میں ہے کہ اے نفس مطمئنہ اپنے رب کی طرف لوٹ آ کہ تو اس سے راضی ہو۔ جذبے سے سرشار ہو کر ہی ہم اقوام عالم میں قابل ذکر کردار ادا کر سکتے ہیں۔وزیر اعظم عمران خان نے کشمیر میں بھارتی سامراج سے برسرِ پیکار عوام کی قربانیوں کو خراج تحسین پیش کرتے ہوئے کہا کہ کشمیریوں نے حق پر قائم رہتے ہوئے سنت امام حسینؓ کو زندہ رکھا۔ کربلا کی طرح کشمیر بھی معرکہ حق و باطل کی ایک عظیم مثال ہے۔