وزیراعظم عمران خان اور برطانوی اپوزیشن لیڈر جرمی کوربن کے درمیان ہونے والی گفتگو میں اقوام متحدہ کاخطاب موضوع بحث بنا، دونوں رہنماؤں نے کشمیر کی تازہ صورت حال پر تشویش کا اظہار کیا۔جرمی کوربن کا کہنا تھا کہ پاکستانی وزیراعظم سے ٹیلی فونک گفتگو ہوئی، عمران خان نے کشمیر کی صورت حال پر اپنی تشویش سے آگاہ کیا۔ ان کا کہنا تھا کہ اقوام متحدہ پاک بھارت مذاکرات یقینی بناسکتا ہے، تنازع کا کوئی بھی سیاسی حل کشمیریوں کے انسانی حقوق کا ضامن ہونا چاہیے۔
خیال رہے کہ وزیراعظم عمران خان نے اقوام متحدہ میں تاریخی خطاب کیا، اس دوران انہوں نے کشمیر کا مقدمہ رکھا اور دنیا کو بھارتی جارحیت سے آگاہ کیا۔وزیراعظم عمران خان نے کہا کہ مودی کو اس کے غرور نے اندھا کردیا ہے، کرفیو اٹھنے کے بعد کشمیرمیں خون کی ندیاں بہیں گی، اقوام متحدہ کو کشمیریوں کو حق خود ارادیت دلانا پڑے گا۔
وزیراعظم عمران خان نے اقوام متحدہ کی جنرل اسمبلی میں تاریخی خطاب کرتے ہوئے کہا کہ کیا مودی سمجھتا ہےکہ کرفیو کے بعد کشمیری خاموشی سےاسے قبول کرلیں گے، کرفیو اٹھنے کے بعد کشمیر میں خون کی ندیاں بہیں گی، بھارت مقبوضہ کشمیر میں فوری کرفیو اٹھائے اور سیاسی قیدیوں کو رہا کرے۔