فاٹا میں لڑکیوں کا ڈگری کالج تعمیر نہیں ہوگا ، سپریم کورٹ کا فیصلہ

چیف جسٹس نے کہا کہ ہائیکورٹ نے ایڈیشنل پولیٹیکل ایجنٹ کا سیکریٹری پلاننگ اینڈ ڈویلپمنٹ کو خط لکھنے پر فیصلہ کیا تھا ، ہائیکورٹ کیسے کہہ سکتی ایک ماہ میں عملدرآمد کروایا جائے۔ چیف جسٹس نے سخت ریمارکس دیتے ہوئے کہا کہ حکومت نے وسائل اور پالیسیوں کو مدنظر رکھتے ہوئے کام کرنا ہوتے ہیں، ایڈیشنل پولیٹیکل ایجنٹ کے خط پر ہائیکورٹ حکومت کو کیسے مجبور کر سکتی ہے۔انہوں نے کہاکہ اگر آج ہائیکورٹ کا فیصلہ برقرار رکھا تو غلط مثال قائم ہو جائے گی۔ ہم سپریم کورٹ میں کوئی غلط مثال قائم کرنا نہیں چاہتے، ہائیکورٹ کے فیصلے سے لگتا ہے کہ حکومت بے بس ہوگئی تھی۔ ہم سب چاہتے ہیں کہ قبائلی علاقوں میں بچیوں کے لیے کالجز اور اسکولز بنائے جائیں لیکن کالجز اور اسکولز بنانا حکومت کا کام ہے۔