حکومت سندھ نے اسلحہ لائسنس کے اجرا پر عائد پابندی اٹھا لی ہے۔ اس ضمن میں صوبائی حکومت نے باقاعدہ نوٹی فکیشن بھی جاری کردیا ہے۔
ذرائع کے مطابق صوبائی سیکریٹری داخلہ ڈاکٹر محمد عثمان کی جانب سے جاری نوٹی فکیشن میں کہا گیا ہے کہ وزیر اعلیٰ سندھ سید مراد علی شاہ کی کی منظوری کے بعد صوبے میں اسلحہ لائسنس کے اجرا پر عائد پابندی فوری طور پر اٹھائی لی گئی ہے۔
نوٹی فکیشن کے تحت سندھ آرمز رولز 2018 کے رول 4.1 کے تحت غیر ممنوعہ بور کے کمپیوٹرائزڈ لائسنس کے اجرا کا ماہانہ کوٹہ بھی بحال کردیا گیا ہے۔
نوٹی فکیشن میں مؤقف اختیار کیا گیا ہے کہ مقررہ ماہانہ کوٹے کے مطابق صرف غیر ممنوعہ بور کے اسلحہ کے کمپیوٹرائزڈ لائسنس جاری کیے جائیں گے۔ لائسنس حاصل کرنے کے لیے سندھ آرمز ایکٹ 2013 اور سندھ آرمز رولز 2018 میں درج ضروریات پوری کرنا لازمی ہوں گے۔
اسلحہ لائسنس کے اجرا پر 2013 میں وزیر اعلیٰ سندھ نے ایپکس کمیٹی کی سفارش پر پابندی لگائی تھی۔