بھارت: کسانوں کا دہلی تا جے پور روڈ بلاک کرنے کا اعلان

بھارتی میڈیا کے مطابق بھارت بھر کے کسانوں نے احتجاج میں تیزی لاتے ہوئے آج دہلی تا جے پور روڈ کو بلاک کرنے کا اعلان کیا ہے۔

بھارتیہ کسان یونین کے رہنما بلبیر ایس راجے وال نے کہا ہے کہ آج کسان دہلی تا جے پور ہائی وے کو بلا ک کر دیں گے اور اسے ٹول فری کریں گے۔

کسان رہنما کا یہ بھی کہنا تھا کہ ڈپٹی کلیکٹروں کے دفتروں اور بی جے پی رہنماؤں کے گھروں کے باہر بھی مظاہرے کیئے جائیں گے۔

ملک گیر احتجاج کی اپیل پر مختلف شہروں سے کسانوں کی آمد کا سلسلہ بھی جاری ہے۔

دوسری جانب کانگریس رہنما راہول گاندھی نے سوشل میڈیا پر مظاہروں کے دوران 11 کسانوں کے دم توڑنے کی خبر شیئر کرتے ہوئے لکھا ہے کہ زرعی قوانین کو ختم کرنے کے لیے مزید کتنی قربانیاں دینا ہوں گی۔

بھارتی میڈیا کے مطابق کسانوں نے 14 دسمبر کو ملک گیر احتجاج کی کال دے رکھی ہے۔

بھارتی کسانوں کی احتجاجی تحریک یورپ بھی پہنچ گئی

بھارت میں نئے زرعی قوانین کے خلاف کسانوں کا احتجاج شدت اختیار کرتا جا رہا ہے اور اب بھارتی کسانوں کی یہ احتجاجی تحریک یورپ بھی پہنچ گئی ہے۔

 بھارتی کسان اور سکھ کمیونٹی ملک کے اندر اور باہر سراپا احتجاج ہیں اور اس ضمن میں پیرس میں بھی سکھ کمیونٹی کی جانب سے احتجاجی ریلی نکالی گئی۔

کورونا وائرس کی وبا،  سماجی فاصلے اور خراب موسم کے باوجود سکھ کمیونٹی کی ایک بہت بڑی تعداد احتجاجی ریلی میں موجود تھی ریلی میں بچے خواتین کی بھی ایک بڑی  تعداد موجود تھی۔

ریلی  نے ایفل ٹاور سے پیرس میں انڈین سفارت خانے تک احتجاجی مارچ کیا جبکہ ریلی میں  موجود سکھ کمیونٹی کے احتجاجی مظاہرین کا کہنا تھا کہ بھارت کی موجودہ حکومت سکھوں کے ساتھ امتیازی سلوک کر رہی ہے۔ ہم   بھارت میں پنجابی  کسانوں کو انصاف دلوانے کے لیے یہاں جمع ہوئے ہیں۔

مظاہرین نے کہا کہ نئے زرعی قوانین سکھ کمیونٹی کے خلاف ہیں اور مودی حکومت کے برسر اقتدار میں آنے  کے بعد بھارت میں اقلیتوں کے مسائل میں اضافہ ہوا ہے۔

احتجاجی مظاہرین نے ہاتھوں میں بینر اور پلے کارڈ بھی اٹھائے ہوئے جن پر بھارتی حکومت کی کسان دشمن پالیسی، اور بھارتی  حکومت کے خلاف الفاظ تحریر ہیں جبکہ مظاہرین مودی مردہ باد  کے نعرے  لگا رہے تھے۔

مظاہرین کا کہنا ہے کہ اگر بھارتی حکومت کسان دشمن اور سکھ مخالف پالیسی ترک نہیں کرتی تو یہ تحریک کوئی اور رُخ بھی اختیار کر سکتی ہے۔