اقوام متحدہ کے ادارے، بین الاقوامی چلڈرن ایمرجنسی فنڈ (یونیسیف) کے مطابق سالِ نو کے پہلے دن پاکستان میں 14 ہزار 161 بچوں کی پیدائش متوقع ہے۔
دنیا بھر میں موجود افراد آج (یکم جنوری کو) صرف نئے سال کا جشن ہی نہیں منائیں گے بلکہ اپنے گھر آئے ننھے مہمانوں کا استقبال بھی کریں گے۔
یونیسیف کی رپورٹ کے مطابق سال 2021 کے پہلے دن دنیا بھر میں 3 لاکھ 71 ہزار 504 بچوں کی پیدائش متوقع ہے جن میں پاکستان میں پیدا ہونے والے بچے، مجموعی تعداد کا 3.8 فیصد ہوں گے۔
سال کے پہلے دن بچوں کی پیدائش کے تخمینے کے لیے یونیسیف نے اہم رجسٹریشن اور قومی سطح پر گھروں میں کیے جانے والے سروے میں لگائے گئے ممالک میں ہونے والی یومیہ اور ماہانہ پیدائش کے تخمینوں کا استعمال کیا۔
یونیسیف نے یکم جنوری 2021 کو پیدا ہونے والے بچوں اور ان کی متوقع عمر کا تخمینہ لگانے کے لیے بچوں کی سالانہ تعداد اور ان کی متوقع عمر سے متعلق حال ہی میں نظرثانی شدہ اقوام متحدہ کے عالمی آبادی کے امکانات (2019) کا استعمال کیا۔
سالِ نو کے موقع پر بحرالکاہل کے جزیرہ نما ملک فجی میں 2021 کے پہلے بچے کی پیدائش ہوگی۔
عالمی سطح پر بچوں کی پیدائش کی کُل تعداد میں سے نصف بچے 10 ممالک میں ہی پیدا ہوں گے، ان میں پاکستان چوتھے نمبر پر ہے جبکہ سالِ نو کے پہلے روز سب سے زیادہ بچوں کی پیدائش بھارت میں ہوگی۔
یونیسیف کے مطابق یکم جنوری کو بھارت میں 59 ہزار 995، چین میں 35 ہزار 615، نائیجیریا میں 21 ہزار 439، پاکستان میں 14 ہزار 161، انڈونیشیا میں 12 ہزار 336، ایتھوپیا میں 12 ہزار 6، امریکا میں 10 ہزار 312، مصر میں 9 ہزار 455، بنگلہ دیش میں 9 ہزار 236 اور جمہوریہ کانگو میں 8 ہزار 640 بچوں کی پیدائش متوقع ہے۔
سالِ نو پر پید ا ہونے والے بچوں کی متوقع اوسط عمر کا تخمینہ لگ بھگ 73 برس لگایا گیا ہے۔
پاکستان میں یونیسیف کی نمائندہ آئڈا گرما نے کہا کہ ‘یہ ہم سب کے لیے ایک مشکل سال رہا ہے اور دنیا میں نئی زندگیوں کا خوش آمدید کہنے کے علاوہ نیا سال شروع کرنے کا شاید کوئی بہتر طریقہ نہیں۔
انہوں نے کہا کہ 2020 کے چیلنجز اور 2021 کے مواقع کے ساتھ ہمارے پاس اب وقت ہے کہ دنیا کو رہنے لیے بہتر جگہ بنایا جائے، آج پیدا ہونے والے اس دنیا کے وارث ہوں گے جو آج ہم ان کے لیے بنانا شروع کریں گئ۔
2021 کے پہلے بچے کی سال شروع ہونے کے 7 سیکنڈ بعد پیدائش
بچوں کی صحت، تعلیم و نشو و نما سے متعلق کام کرنے والے اقوام متحدہ (یو این) کے ذیلی ادارے یونائیٹڈ نیشنز چلڈرنز فنڈ (یونیسیف) کے اندازوں کے مطابق اس بار سال نو کے موقع پر دنیا بھر میں 3 لاکھ ہزار بچوں کی پیدائش متوقع ہے۔
یہ تمام بچے سال کے پہلے دن میں دنیا بھر میں پیدا ہوں گے جب کہ صرف پاکستان میں ہی سال کے پہلے دن 14 ہزار بچوں کی پیدائش کا امکان ہے۔
لیکن ہم آپ کو یہاں سال 2021 میں پیدا ہونے والے پہلے بچے سمیت ان بچوں سے متعلق دلچسپ معلومات فراہم کر رہے ہیں، جو نیا سال شروع ہونے کے 7 سیکنڈ سے لے کر 15 منٹ کے اندر پیدا ہوئے۔
نئے سال کا آغاز دنیا میں سب سے پہلے وسطی بحریہ اوقیانوس، بحرالکاحل اور مائیکرونیشیا کے علاقوں میں ہوتا، جہاں نیوزی لینڈ، آسٹریلیا جیسے ممالک بھی واقع ہیں اور سال کے ابتدائی واقعات بھی وہیں رپورٹ ہوتے ہیں۔
ان خطوں یا ممالک میں پاکستان سے کم از کم 8 گھنٹے قبل ہی نیا سال شروع ہوجاتا ہے۔
نشریاتی ادارے پیسفک ڈیلی نیوز کے مطابق بحرالکاحل کے خطے مائیکرونیشیا کی جزیرے نما ریاست گوام میں سال 2021 کا پہلا بچہ پیدا ہوا، جو کہ نیا سال شروع ہونے کے محض 7 سیکنڈ بعد پیدا ہوا۔
گوام اگرچہ بحرالکاحل میں واقع ہے، تاہم وہ امریکا کے زیر انتظام ایک خود مختار ریاست ہے اور اس کا شمار امریکی ریاستوں میں نہیں ہوتا۔
جس وقت گوام میں سال 2021 کا پہلا بچہ پیدا ہوا، اس وقت امریکا میں 2020 کا آخری دن تھا۔
اسی طرح سال 2021 کا نیوزی لینڈ میں پیدا ہونے والے پہلا بچہ نیا سال شروع ہونے کے محض 12 منٹ بعد پیدا ہوا۔
نیوزی لینڈ کی ویب سائٹ اسٹف ڈاٹ کو کے مطابق نیا سال شروع ہونے کے محض 12 منٹ بعد ریاست تاراناکی کے شہر ہویرا میں ملک کے پہلے بچے کی پیدائش ہوئی۔
نیوزی لینڈ دنیا کا وہ پہلا معروف ملک ہے، جہاں نیا سال سب سے پہلے شروع ہوتا ہے، اس لیے زیادہ تر لوگ وہیں پیدا ہونے والے بچے کو نئے سال میں پیدا ہونے والے پہلے بچے کے طور پر بھی جانتے ہیں۔
رپورٹ میں بتایا گیا کہ اگرچہ ملک کا پہلا بچہ نیا سال شروع ہونے کے محض 12 منٹ بعد رات کو 12 بج کر 12 منٹ پر پیدا ہوا، تاہم جلد ہی دوسرے بچے کی پیدائش بھی ہوئی اور 5 منٹ کے وقفے کےبعد وہاں ایک اور بچہ بھی دنیا میں آیا۔
رپورٹ میں بتایا گیا کہ نئے سال میں پہلے لڑکے کی پیدائش ہوئی جب کہ 12 بج کر 17 منٹ میں تاراناکی ریاست کے ایک اور ہسپتال میں ایک لڑکی کی پیدائش ہوئی۔
اسی طرح دارالحکومت آکلینڈ کے ایک ہسپتال میں 12 بج کر 45 منٹ میں نئے سال کے تیسرے بچے کی پیدائش ہوئی اور وہاں بھی لڑکی پیدا ہوئیں۔
نیوزی لینڈ کے بعد نئے سال کا آغاز روس کے بحرالکاحل میں موجود جزائر میں ہوا، جس کے بعد نئے سال کا آغاز آسٹریلیا میں ہوا اور وہاں بھی ممکنہ طور پر کچھ بچوں کی پیدائش نئے سال کے پہلے 30 منٹ میں ہی ہوئی ہو گی۔
منبع: ڈان نیوز