پاکستان کے صوبہ خیبرپختونخوا میں کئی دن سے قبائل کے درمیان جاری جھڑپوں میں کم از کم 15 افراد ہلاک ہو گئے ہیں۔
خبر رساں ادارے اے ایف پی کے مطابق ان جھڑپوں کے دوران فریقین نے ایک دوسرے کے خلاف مارٹر گولوں سمیت بھاری اسلحے کا استعمال کیا۔
ضلع کرم میں تعینات ایک سینیئر انتظامی آفیسر نے اے ایف پی کو بتایا کہ ’یہ جھگڑا دو قبائل کے درمیان زمین کے تنازع سے شروع ہوا۔ ان میں سے ایک قبیلہ سنی جبکہ دوسرا شیعہ مسلک سے تعلق رکھتا ہے۔ بعد میں یہ فرقہ وارانہ لڑائی کی شکل اختیار کر گیا۔‘
انہوں نے بتایا کہ سنیچر کے بعد سے اب تک کم از کم 15 افراد ہلاک ہو چکے ہیں۔
پاکستان کی سرکاری خبر رساں ایجنسی اے پی پی کے مطابق ان جھڑپوں میں لگ بھگ 20 افراد زخمی ہوئے ہیں۔
ضلع کرم میں رواں برس جولائی میں ان دو قبائل کے درمیان ہونے والی خونی جھڑپوں میں 35 افراد ہلاک جبکہ 130 سے زائد ہوئے تھے اور اس کے بعد ایک جرگے کے فیصلے کے نتیجے میں فریقین کے درمیان جنگ بندی ہو گئی تھی۔
بشکریہ: اردو نیوز
