پچھلے ایک سال سے اسرائیل فلسطینیوں کے خلاف وحشیانہ جنگ چھیڑ ے ہوئے ہے، حماس، حزب اللہ اور دیگر مزاحمتی گروہوں کو نشانہ بنانے کے نام پر غزہ پر چھ ایٹمی بموں کے برابر بم گرا چکاہے۔حالیہ ہفتوں میں اسرائیل نے حزب اللہ کی زیادہ تر عسکری اور سیاسی قیادت کو بھی ختم کر دیا ہے۔ تاہم، شاید سب سے زیادہ چونکا دینے والی بات یہ ہے کہ نہ حماس اور نہ ہی حزب اللہ کو شکست ہوئی ہے۔مشرق وسطیٰ میں متعدد محاذوں پر سفاکانہ، غیر متناسب اور بڑھتی ہوئی جنگ ابھی ختم نہیں ہوئی، جس کے نتیجے میں اس کے نتائج کا اندازہ لگانا مشکل ہے۔ بہر حال، پیچھے مڑ کر دیکھا جائے تو اسرائیل کی قلیل مدتی فوجی کامیابیاں اہم تزویراتی شکستوں کے ساتھ جڑی ہوئی ہیں۔ہم اس کا تجزیہ شروع کرتے ہیں اسرائیل کے فوجی نظریے کے خاتمے سے۔
نہ ختم ہونے والی جنگ
خود اپنےآپ کو نقصان پہنچاتے ہوئے ، اسرائیل کی اپنی حکومت نے اپنے فوجی نظریے کے کلیدی اصول یعنی مختصر اور موثر جنگوں کو کمزور کیا ہے۔تنازعہ کے ایک سال بعد، اسرائیل ایک وسیع تر اسٹریٹجک تعطل کا شکار ہے، جو ایک کثیر محاذ جنگ سے دوچار ہے جس کے خاتمے کے کوئی آثار نظر نہیں آتے۔ فوج تھک چکی ہے، اور بہت سے ریزروسٹ(محفوظ دستے) اس بظاہر نہ ختم ہونے والے تنازع میں لڑائی کے ایک نئے دور کے لیے پکارے جانے کا جواب دینے سے گریزاں ہیں۔
فوجی کارروائیوں نے قلیل مدتی حکمت عملی سے کامیابیاں حاصل کی ہیں، جن میں حزب اللہ کے عسکری رہنماؤں کو ہلاک کرنا، غزہ میں حماس کو کمزور کرنا اور غزہ اور مصر کے درمیان رفح کراسنگ پر کنٹرول حاصل کرنا شامل ہے۔لیکن ان کے نتیجے میں طویل مدتی اسٹریٹجک کامیابیاں نہیں ہوئیں۔ فوجی لحاظ سے اسرائیل اپنی ڈیٹرنس صلاحیت کو بحال کرنے میں ناکام رہا ہے۔ وزیر اعظم بنجمن نیتن یاہو کی حکومت نے حماس کو تباہ کرنے سمیت اپنے مقرر کردہ جنگی مقاصد میں سے کوئی بھی حاصل نہیں کیا ہے۔ تمام یرغمالیوں کو رہا کرانا؛ شمالی اسرائیل میں مسلسل گولہ باری سے بے گھر ہونے والے باشندوں کی اپنے گھروں کو واپسی۔
حماس اب بھی غزہ کے بیشتر حصے پر قابض ہے، جب کہ جبالیہ اور خان یونس جیسی جگہوں پر اسرائیلی فوجیں مزید فوجی چھاپے مارنے کے لیے واپس لوٹ رہی ہیں، یہ وہ علاقے ہیں جو پہلے حماس سے "آزاد” سمجھے جاتے تھے۔ 100 سے زائد اسرائیلی یرغمالی قید میں ہیں۔
لبنان میں، حزب اللہ، اسرائیل کی توقع اور مطالبات کے مطابق دریائے لیتانی کے شمال میں پیچھے ہٹنے کے بجائے، روزانہ ڈرون اور میزائلوں سے اسرائیلی فوجی مقامات کو نشانہ بنا رہی ہے۔ شمالی اسرائیل کے تقریباً 70,000 رہائشی بدستور بے گھر ہیں۔ خلاصہ یہ کہ حماس اور حزب اللہ دونوں کو شکست تسلیم کرنے پر مجبور نہیں کیاجا سکا ہے، اور تنازعہ بغیر کسی واضح حل کے جاری ہے۔
مزید برآں، 2024 میں اسرائیل کے فوجی اخراجات پچھلے سال کے مقابلے میں دو گنا زیادہ ہوں گے۔ اس اضافے کا ایک اہم حصہ "آئرن ڈوم” کے دفاعی نظام، توپ خانے اور ریزروسٹوں کی تنخواہوں کی وجہ سے ہے۔”راکٹ اکانومی” کا تصور بھی زیادہ توجہ حاصل کر رہا ہے، کیونکہ اسرائیل کے انٹرسیپٹر میزائل ان پراجیکٹائل سے کہیں زیادہ مہنگے ہیں جنہیں وہ نشانہ بناتے ہیں۔
اسرائیلی ذرائع کے مطابق، ایران کے لیے لاگت کا تناسب اس کے حق میں کم از کم تین بمقابلہ ایک ہے۔ حزب اللہ، حماس یا یمن کے حوثیوں کی طرف سے داغے گئے سستے ڈرونز اور راکٹوں کو روکنے کے دوران اسرائیل پر مالی دباؤ اور بھی شدید ہوتا ہے۔
اپنی جنگ کی پوری تاریخ میں، اسرائیل کبھی بھی اپنے اتحادیوں، بنیادی طور پر امریکہ کی فوجی مدد پر اس سے زیادہ انحصار نہیں کیا ہے۔ اس کی وجہ یہ ہے کہ اسرائیل کی زیادہ تر جارحانہ اور سب سے زیادہ تباہ کن فائرنگ کی طاقت کا انحصار باقاعدہ امریکی سپلائی اور بیک اپ پر ہے۔
معاشی زوال
اس کے فوجی نظریے کے خاتمے کے علاوہ، پچھلے سال نے یہ دکھایا ہے کہ اسرائیل کی معیشت بدتر صورت حال کی طرف موڑ لے رہی ہے۔ 2023 کی آخری سہ ماہی میں، خاص طور پر غزہ پر جنگ کے آغاز کے بعد کے ہفتوں میں، اسرائیل کی مجموعی گھریلو پیداوار (جی ڈی پی) 20.7 فیصد (سالانہ بنیادوں پر) سکڑ گئی۔
یہ شدید کمی بنیادی طور پر نجی کھپت میں 27 فیصد کمی، برآمدات میں کمی اور غیر ملکی اور ملکی سرمایہ کاری میں زبردست کمی کی وجہ سے ہوئی۔ اس دوران، عمارتی اور تعمیراتی کام رک گیا ہے، جبکہ سیاحت کی صنعت کو زائرین کی کمی اور آمدنی میں بڑی کمی کا سامنا کرنا پڑا ہے۔ کاروباری سروے کمپنی CofaceBDI کے مطابق، اس سال تقریباً 60,000 اسرائیلی کمپنیاں بند ہو جائیں گی۔
مزید برآں، اسرائیل کی کریڈٹ ریٹنگ کو متعدد بار کم کیا گیا ہے، موڈیز کی طرف سے تازہ ترین کمی کے ساتھ، جس نے ریٹنگ کو دو درجے کم کر کے، "A2” سے "Baa1” کر دیا، حزب اللہ کے ساتھ تنازعات میں اضافے کی وجہ سے منفی نقطہ نظر کے ساتھ۔
بینک آف اسرائیل کے مطابق، اور 2023-2025 کی مدت کے لیے جنگی اخراجات کا تخمینہ اب 55.6 بلین ڈالر لگایا گیا ہے۔
سفارتی تنہائی
اسرائیل کا تیسرا اسٹریٹجک چیلنج عالمی سطح پر اس کی سفارتی تنہائی ہے۔ پچھلے سال 7 اکتوبر سے، کم از کم نو ممالک – ترکی، اردن، بحرین، کولمبیا، ہونڈوراس، چلی، جنوبی افریقہ، چاڈ اور بیلیز – نے اسرائیل کے ساتھ اپنے سفارتی تعلقات کو منقطع کیایا گھٹا دیا ہے۔مزید برآں، اسپین، ناروے، آئرلینڈ اور سلووینیا سمیت نو مزید ممالک نے فلسطین کی ریاست کو باضابطہ طور پر تسلیم کر لیا ہے۔
پچھلے کچھ سالوں میں مشرق وسطیٰ میں اسرائیل کی سفارتی حکمت عملی کے مرکز میں خطے کے عرب ممالک کے ساتھ تعلقات کو "معمول پر لانے” کی کوششیں اب ممکنہ طور پر مستقل طور پر روک دی گئی ہیں۔مثال کے طور پر سعودی عرب کے ولی عہد محمد بن سلمان نے گزشتہ ماہ کہا تھا کہ ان کا ملک آزاد فلسطینی ریاست کے بغیر اسرائیل کے ساتھ سفارتی تعلقات قائم نہیں کرے گا۔ یہ تبدیلی اسرائیلی خارجہ پالیسی کے لیے ایک اہم دھچکا ہے، جو روایتی طور پر علاقائی ریاستوں کے ساتھ سفارتی تعلقات قائم کرنے پر مرکوز رہی ہے۔
دریں اثنا، فلسطین کے لیے بین الاقوامی حمایت میں اضافہ ہو رہا ہے، جس کا ثبوت گزشتہ سال 7 اکتوبر سے اقوام متحدہ کی جنرل اسمبلی کی قراردادوں سے ملتا ہے۔مئی میں، 143 رکن ممالک نے اقوام متحدہ میں فلسطین کے حقوق کو بڑھانے کے حق میں ووٹ دیا، جب کہ صرف نو ممالک- بشمول مائیکرونیشیا، پلاؤ، ناورو، اور پاپوا نیو گنی- نے اس کے خلاف ووٹ دیا (اسرائیل کے حق میں)۔ یہ تضاد عالمی سطح پر اسرائیل کی سفارتی حیثیت کو واضح کرتا ہے۔
اسرائیل کی ساکھ گر رہی ہے۔
اسرائیلی وزیر اعظم بنجمن نیتن یاہو کی بڑھتی ہوئی جنگ نے ان کے ملک کے امیج کو شدید نقصان پہنچایا ہے۔ یہاب ریاست کی 76 سالہ تاریخ میں اپنے کم ترین مقام پر ہے۔دو اہم پیش رفتیں سامنے آتی ہے: پہلی، بین الاقوامی فوجداری عدالت کے پراسیکیوٹر نے نیتن یاہو اور وزیر دفاع یوو گیلنٹ کے خلاف "جنگی جرائم اور انسانیت کے خلاف جرائم” کے الزامات عائد کیے ہیں۔دوسرا، اقوام متحدہ کی اعلیٰ ترین عدالت، بین الاقوامی عدالت انصاف، نے یہ قابل فہم پایا ہے کہ اسرائیل کے اقدامات نسل کشی کے مترادف ہو سکتے ہیں۔ یہ عمل مسلسل جاری ہے۔
اسرائیل کو عوامی حمایت میں بھی نمایاں کمی کا سامنا ہے، یہاں تک کہ ان ممالک میں بھی جو اس کے مضبوط ترین اتحادی ہیں۔ 21 سے 23 جنوری 2024 تک کیے گئے YouGov اور The Economist پول سے پتہ چلتا ہے کہ 2020 کے امریکی انتخابات میں امریکی صدر جو بائیڈن کے ووٹروں میں سے نصف کا خیال ہے کہ اسرائیل "فلسطینی شہریوں کی نسل کشی کا ارتکاب کر رہا ہے۔”
یہ سروے، جس میں 1,664 امریکی شہری شامل تھے، اسرائیل کے وحشیانہ اقدامات کے حوالے سے عوامی تاثرات میں گہری تبدیلی کو اجاگر کرتا ہے۔
فرار کی تلاش میں
ایک حتمی، اہم نکتہ یہ ہے کہ 7 اکتوبر کے بعد ملک چھوڑنے والے اسرائیلیوں کی تعداد میں 285 فیصد اضافہ ہوا۔
اسرائیل کے تمام فوجی، اقتصادی، سفارتی، سماجی اور قانونی چیلنجز نیتن یاہو کی قیادت میں بڑھتی ہوئی اور کبھی نہ ختم ہونے والی جنگ میں شدت اختیار کر سکتے ہیں۔مزید برآں، کنٹر انسائٹس (Kantar Insights) اور پبلک براڈکاسٹر کان ( public broadcaster Kan.)کے مطابق، تقریباً ایک چوتھائی اسرائیلیوں نے گزشتہ ایک سال کے دوران ملک چھوڑنے کا میلان ظاہر کیا ہے۔ستم ظریفی یہ ہے کہ اسرائیل اپنی اکثریتی آبادی کے لیے خطرناک ترین ریاستوں میں سے ایک بنتا جا رہا ہے – اس وژن کے برعکس جو اسرائیل کے بانیوں نے ریاست کے قیام کے وقت رکھا تھا۔
اسرائیل کے تمام فوجی، اقتصادی، سفارتی، سماجی اور قانونی چیلنجز نیتن یاہو کی قیادت میں بڑھتی ہوئی اور کبھی نہ ختم ہونے والی جنگ میں شدت اختیار کر سکتے ہیں۔ جب ایک آدمی کی سیاسی بقا باقی تمام چیزوں پر فوقیت اختیار کر لیتی ہے تو اکثر معاملات اس طرح ختم ہو جاتے ہیں۔
شفقنا اردو
جمعرات، 10 اکتوبر 2024
نوٹ: شفقنا کا اس تحریر کے مندرجات سے متفق ہونا ضروری نہیں
