انتخابات سے قبل نیتن یاہو فلسطینیوں پر کیا مظالم ڈھارہاہے؟ جمیل اختر

سعید عاید اپنے مویشیوں کے ریوڑ کی نگہبانی کر رہے ہیں، جو بھوک اور پیاس سے نڈھال ہیں۔ مقبوضہ مغربی کنارے کی وادیِ اردن میں واقع رس الاحمر کی بدو برادری پچھلے دو ہفتوں سے اسرائیلی محاصرے کی سنگین صورتحال سے دوچار ہے۔ ستمبر کے وسط سے اس علاقے کا بیرونی دنیا سے رابطہ مکمل طور پر کٹا ہوا ہے، کیونکہ اسرائیلی افواج فلسطینیوں کی اراضی پر ایک نئی رکاوٹ کھڑی کرنے میں مصروف ہیں۔ اس نئی حدبندی میں فوجی گشت کے لیے ایک سڑک، خندقیں اور حفاظتی پشتے شامل ہیں۔

جب سے راستوں کی بندش کا سلسلہ شروع ہوا ہے، فلسطینیوں کی نقل و حرکت بری طرح مفلوج ہو کر رہ گئی ہے۔ وہ رات کی تاریکی میں سرگرم ہونے پر مجبور ہیں، جہاں وہ اسرائیلی فوجیوں اور آباد کاروں کی نظروں سے بچنے کے لیے اندھیرے کا فائدہ اٹھاتے ہوئے گدھوں پر پانی، چارہ اور دودھ منتقل کرتے ہیں۔

 عائد نے الجزیرہ کو بتایا کہ گزشتہ تین دنوں سے اس بستی میں پانی کا ایک قطرہ تک نہیں پہنچ سکا ہے، کیونکہ اسرائیلی افواج نے ان تمام راستوں کو سیل کر دیا ہے جہاں سے مقامی لوگ اپنی ضرورت کا سامان لایا کرتے تھے۔ عائد کا کہنا تھا کہ ”صورتحال انتہائی دگرگوں ہے۔ ہم مکمل محاصرے میں ہیں، اور مویشی اتنے طویل عرصے تک پانی اور خوراک کے بغیر زندہ نہیں رہ سکتے۔ ہمارے پاس 15,000 مویشی ہیں، اور ہمیں ڈر ہے کہ اس سخت ناکہ بندی کے باعث وہ سب مر جائیں گے۔“

راس الاحمر 300 نفوس پر مشتمل ایک گاؤں ہے جہاں تقریباً 50 خاندان آباد ہیں، جو 1970ء کی دہائی سے گلہ بانی اور مویشیوں کے سہارے زندگی بسر کر رہے ہیں۔ عائد نے بتایا کہ فروری سے اسرائیلی آباد کاروں کے حملوں میں شدید تیزی آئی ہے—جو کہ پورے مغربی کنارے میں فلسطینیوں کے خلاف جاری منظم تشدد کا حصہ ہے—اور انہوں نے آباد کاروں پر الزام لگایا کہ وہ مقامی آبادی کو یہاں سے بے دخل کر کے ان کی زمینوں پر قبضہ کرنا چاہتے ہیں۔

انہوں نے مزید کہا کہ ”ہمیں مویشیوں کی چوری، اپنے ڈیروں پر حملوں، مکینوں پر تشدد اور گھروں کی توڑ پھوڑ کا سامنا رہا ہے۔ یہ سب کچھ تقریباً روز کا معمول بن چکا تھا، اس کے باوجود ہم نے اپنی زمین چھوڑنے سے انکار کر دیا۔ اب وہ ہمیں یہاں سے ہجرت کرنے پر مجبور کرنے کے لیے ہمارا مکمل گھیرائو کر چکے ہیں۔“

محاصرے کے باعث مقامی باشندوں کو درپیش سب سے بڑا چیلنج طبی سہولیات تک محدود رسائی ہے، جو خاص طور پر بوڑھوں کے لیے تشویش کا باعث ہے۔ دوسری طرف، مویشیوں، بالخصوص نومولود جانوروں میں بیماریاں تیزی سے پھیل رہی ہیں۔ ویٹرنری (جانوروں کے ڈاکٹروں) کی ٹیمیں اس علاقے تک پہنچنے اور جانوروں کا علاج کرنے سے قاصر ہیں، جس کی وجہ سے جانوروں کی ہلاکتیں بھی رپورٹ ہوئی ہیں۔ اسرائیل کا قائم کردہ فوجی حصار—جسے وہ سکیورٹی وجوہات کی بنا پر ‘کریمسن تھریڈ’ (Crimson Thread) کا نام دیتا ہے—شمالی وادیٔ اردن میں تقریباً 20 کلومیٹر (12 میل) تک پھیلا ہوا ہے، اور اس کی چوڑائی 50 میٹر (165 فٹ) تک ہے۔ جاریہ سال کے اوائل میں اس کی تعمیر میں مزید توسیع کی گئی، جس کے دوران خندقیں کھودی گئیں اور زرعی اراضی کو بلڈوزر سے مسمار کیا گیا، جس سے کنوؤں، پانی کے نیٹ ورکس اور گرین ہاؤسز کو شدید نقصان پہنچا۔ مغربی کنارے میں اسرائیلی زمینی پالیسیوں پر نظر رکھنے والی تنظیم ‘کیرم ناووت’ (Kerem Navot) کے مطابق، اسرائیلی فوج نے تقریباً 115 ہیکٹر اراضی پر قبضہ کر لیا ہے، جس میں سے 85 فیصد زمین فلسطینیوں کی نجی ملکیت ہے۔

راس الاحمر اور اس کے قریبی دیہی علاقے عاطوف کے ولیج کونسل کے سربراہ عبداللہ بشارات نے، جو خود بھی اس فوجی ناکہ بندی کا سامنا کر رہے ہیں، الجزیرہ کو بتایا کہ اسرائیلی محاصرے کے باعث گاڑیوں کی آمد و رفت بند ہونے کی وجہ سے 51 اسکولی بچے دو ہفتوں سے کلاسوں میں حاضر ہونے سے محروم ہیں۔ بشارات نے مزید بتایا کہ اتوار کے روز اسرائیلی افواج نے ولیج کونسل کا ایک ٹریکٹر ضبط کر لیا اور اس کے ڈرائیور کو اس وقت حراست میں لے لیا جب وہ راس الاحمر میں جانوروں کے لیے چارہ اور پانی لے جا رہا تھا۔ انہوں نے دکھ بھرے لہجے میں کہا، "ہم نے انسانی حقوق کی تنظیموں سے بھی رابطہ کیا، لیکن بدقسمتی سے کوئی بھی اس محاصرے کو توڑنے میں کامیاب نہ ہو سکا۔ وہاں سینکڑوں لوگ کرب و اذیت کا شکار ہیں، جن میں اکثریت خواتین اور بچوں کی ہے۔”

وسیع تر تناظر
وادیِ اردن میں آباد بدوؤں اور چرواہا برادریوں کو نشانہ بنانا دراصل اس بڑھتے ہوئے جبر و تسلط کا حصہ ہے، جس کا مقصد ان کے مال مویشیوں اور چراگاہوں تک رسائی کا گھیرا تنگ کر کے انہیں اپنی زمینیں چھوڑنے پر مجبور کرنا ہے۔ اس مذموم مہم میں یہودی آباد کاروں کا تشدد، رہائشی ڈھانچوں کا مسمار کیا جانا اور آمد و رفت کے راستوں کی ناکہ بندی جیسے ہتھکنڈے شامل ہیں۔ اقوامِ متحدہ کے انسانی ہمدردی کے امور کے رابطہ دفتر (OCHA) کے مطابق، مغربی کنارے میں بدو اور چرواہے وہ مظلوم ترین طبقات ہیں جنہیں بے دخلی اور نقل مکانی کے شدید ترین خطرات لاحق ہیں۔

سال 2023 میں جب اسرائیل نے غزہ میں خوں ریز نسل کشی کا آغاز کیا اور 7 اکتوبر کے حماس حملے کے بعد مغربی کنارے پر اپنے مظالم تیز کر دیے، تب سے اب تک مغربی کنارے کی درجنوں فلسطینی بستیاں جزوی یا مکمل طور پر اجڑ چکی ہیں۔ اقوامِ متحدہ کے ادارے (OCHA) کی رپورٹ کے مطابق، جنوری 2023 سے اب تک کم و بیش 130 فلسطینی برادریوں کو اپنے گھر بار چھوڑنے پڑے، جن میں سے 48 بستیاں صفحۂ ہستی سے مکمل طور پر مٹ گئیں—انہی میں وہ 12 بستیاں بھی شامل ہیں جو محض جنوری سے اگست کے درمیانی عرصے میں اجاڑی گئیں۔

اسی ادارے کے اعداد و شمار بتاتے ہیں کہ 2023 سے اب تک بے گھر ہونے والے مجموعی طور پر 6,400 سے زائد فلسطینیوں میں سے اکیلے سال 2026 میں ہی 2,500 سے زائد افراد یہودی آباد کاروں کے حملوں اور آمد و رفت کی پابندیوں کے باعث دربدر ہو گئے۔ اب جبکہ 27 اکتوبر کو ہونے والے اسرائیلی انتخابات سر پر ہیں، فلسطینی تجزیہ کاروں اور انسانی حقوق کے علمبرداروں کا ماننا ہے کہ زمین پر نافذ کیے جانے والے یہ غاصبانہ اقدامات ایک ایسی مستقل تلخ حقیقت کو جنم دے رہے ہیں جو اگلی حکومت کے آنے کے بعد بھی برقرار رہے گی۔

بدوؤں کے حقوق کے لیے سرگرم تنظیم ‘البيدر’ کے چیئرمین حسن ملیحات نے الجزیرہ سے گفتگو کرتے ہوئے کہا کہ ایسا دکھائی دیتا ہے کہ یہودی آباد کار انتخابات سے قبل بدو برادریوں کی بے دخلی کی مہم میں تیزی لا رہے ہیں۔

ملیحات کا کہنا تھا کہ اسرائیل کا بنیادی مقصد زیادہ سے زیادہ فلسطینیوں کو ان کے وطن سے نکالنا اور ان کی زمینوں پر غاصبانہ قبضہ جمانا ہے۔ انہوں نے مزید کہا، "راس الاحمر کے قریب بنائی جانے والی سڑک کا مقصد ‘سکیورٹی’ کے بہانے علاقے کی زمین پر تسلط قائم کرنا اور فلسطینی بستیوں کو چھوٹے چھوٹے جغرافیائی حصوں میں بانٹ کر انہیں ایک محدود دائرے میں قید کر دینا ہے۔”

ایک نئی حقیقت

مبصرین کا خیال ہے کہ فلسطینی آبادیوں کے خلاف ان اسرائیلی اقدامات کی اہمیت محض ان کے فوری اور ظاہری اثرات تک ہی محدود نہیں ہے، بلکہ یہ ایسی آبادیاتی، جغرافیائی اور حفاظتی تبدیلیاں پیدا کر رہے ہیں جو مستقبل میں شاید کبھی بدلی نہ جا سکیں۔ خواہ انتخابات کے بعد اسرائیل کا سیاسی منظرنامہ ہی کیوں نہ بدل جائے۔ اسرائیلی امور کے ماہر، عادل شدید نے الجزیرہ سے گفتگو کرتے ہوئے کہا کہ اسرائیل اس وقت مغربی کنارے میں فلسطینی زمین پر غیر معمولی حد تک اپنا تسلط قائم کر چکا ہے۔ انہوں نے کہا کہ فلسطینی اب چھوٹے، بکھرے ہوئے اور کٹے ہوئے علاقوں میں رہنے پر مجبور ہیں، جہاں کے حفاظتی، فوجی اور معاشی امور سمیت روزمرہ کی زندگی کی تمام جزئیات پر بھی اسرائیل کا مکمل کنٹرول ہے۔

ان کا کہنا تھا کہ یہ تبدیلی صرف جغرافیائی حدود تک محدود نہیں ہے، بلکہ اس کا ایک مقصد مغربی کنارے میں موجود غیر قانونی اسرائیلی بستیوں کو اس حد تک معمول کا حصہ بنانا ہے کہ انہیں ایک عارضی وجود یا بدلنے والی حقیقت کے بجائے اس خطے کے تنوع اور ساخت کا ایک لازمی اور مستقل حصہ سمجھا جانے لگے۔ انہوں نے مزید کہا، "اس بدلاؤ کے ساتھ ہی یہ تاثر بھی جڑ پکڑ رہا ہے کہ اب مغربی کنارے کو نہ تو فلسطینی علاقہ سمجھا جاتا ہے اور نہ ہی متنازع زمین، بلکہ اسے ایک ایسی سرزمیں کے طور پر دیکھا جاتا ہے جہاں یہودیوں کو امن و سلامتی کے ساتھ رہنے کا پورا حق حاصل ہے۔”

عادل شدید نے اس نکتے پر بھی زور دیا کہ یہی نظریہ اسرائیلی ریاست کے اس رویے کا تعین کرتا ہے جو وہ مغربی کنارے میں موجود اسرائیلی اور فلسطینی آبادیوں کے ساتھ روا رکھتی ہے۔ چنانچہ اسرائیلی آباد کاروں کو ایک ایسے طبقے کے طور پر پیش کیا جاتا ہے جسے تحفظ کی ضرورت ہے، جبکہ فلسطینیوں کو روز بروز محض ایک سیکورٹی خطرے کے طور پر دیکھا جا رہا ہے۔ انہوں نے کہا، "یہی منطق زمین اور زندگی کے بنیادی عناصر سے برتاؤ کے معاملے میں بھی لاگو ہوتی ہے۔ مثال کے طور پر، ایک درخت کو بھی یہودی برادری کو نشانہ بنانے کے لیے ایک ممکنہ ذریعے کے طور پر دیکھا جا سکتا ہے؛ نتیجہ یہ کہ اس فریم ورک کے تحت، درخت کو کاٹ ڈالنے کو ایک ایسا حفاظتی اقدام سمجھا جاتا ہے جس میں کسی مداخلت کی گنجائش نہیں ہوتی۔”

عادل شدید کے مطابق اس صورتحال نے مغربی کنارے میں اسرائیلی فوج اور پولیس کے کردار کے بارے میں بھی نقطہ نظر کو بدل دیا ہے۔ ان کا کہنا تھا کہ سیکورٹی فورسز کا کام اب آباد کاروں کی فلسطینیوں پر جارحیت کو روکنا نہیں رہا، بلکہ اس کے برعکس اب ان کا اصل مقصد آباد کاروں کو نام نہاد "فلسطینی خطرے” سے بچانا سمجھا جانے لگا ہے۔

انہوں نے واضح کیا کہ "یہ نئی حقیقت موجودہ اسرائیلی حکومت تک محدود نہیں ہے۔ بلکہ یہ ایک ایسا متحرک عمل بن چکی ہے جو انتخابات کے نتائج سے قطع نظر، ان کے بعد بھی برقرار رہے گا۔”

 

شفقنا اردو

جمعتہ المبارک، 9 اکتوبر 2026

نوٹ: شفقنا کا اس تحریر کے مندرجات سے متفق ہونا ضروری نہیں

Share This Article

تازه ترین