اردو ادب

وہ غالباً 8 جنوری 2012 کی دھندلکی شام تھی۔ جب اچانک میرے موبائل پر اس کا میسیج آیا ” اگر تم فارغ ہو تو کال کرلوں؟” اس سے پہلے کہ میں رپلائی ٹائپ کرتی اس کا فون آگیا۔ حال احوال کے بعد وہ نان سٹاپ بولنے لگا “میں تمہیں دیکھنے کو ترس گیا ہوں اور اپنی اس نوکری کی مصروفیات سے شدید تنگ ہوں۔ میری چھٹی کی درخواست منظور ہوگئی ہے میں جمعہ کو آرہا ہوں اور مجھے تم سے بہت سی باتیں کرنی ہیں۔” میں خوشی اور استعجاب کے مراحل میں تھی کچھ بول ہی نہ پائی۔ وہ میری خاموشی سے گویا ہوا “تمہارے لئے کیا لاؤں؟” میں سوچ میں پڑ گئی کہ میں تو آج بھی اس کے نام پر بیٹھی ہوں۔ بنا کسی رابطے کے آٹھ سال جو اس کے ہجر اور انتظار میں گزار دیے۔ “تم کن سوچوں میں کھوگئی  ہو؟ “اور میرے کسی بھی جواب کا انتظار کئے بغیر بولا۔۔۔۔۔ کچھ نہیں کہتے ہوئے بات کو ٹالا اور انتظار کے ایک نئے باب کا آغاز ہوا۔

زیادہ نہیں اسے دیکھے صرف آٹھ سال ہی تو ہوئے تھے اگر ہماری اس وقت شادی ہوجاتی تو بچے سکول جانے کی عمر کے ہوتے۔ میں سوچنا نہیں چاہتی تھی لیکن میرا ذہن رکنے کا نام ہی نہیں لے رہا تھا۔ میری آنکھوں کے سامنے ہر گزرا ہوا لمحہ فلم کی طرح چلنے لگا۔ مختلف تہوار، آتے جاتے موسم، زندگی کی تبدیلیاں ۔۔۔۔ ہر وہ لمحہ جب مجھے اس کی ضرورت تھی لیکن وہ کہیں اپنی زندگی میں مصروف تھا۔ اور پتا نہیں کیسے میری محبت اس کے دل میں پھر سے جاگ اٹھی۔ میں اس وقت خوشی سے زیادہ الجھی ہوئی تھی کہ اب تو اس نے شادی بھی کرلی ہے بچے بھی ہیں میری طرف تعلق بڑھانے کا مقصد کیا ہوسکتا ہے۔ جب وہ رابطے میں نہیں تھا تب یک طرفہ محبت نے مجھے زندہ رکھا اور اب اس کی واپسی ایک الجھن کے ساتھ ایک ڈر بھی تھا کہ پتا نہیں زندگی میں کیا ہوگا۔ کیا پتا وہ اس آخری ملاقات میں تعلق شاید ہمیشہ کیلئے ختم کرنا چاہتا ہے۔ انہی خدشات میں تین دن گزر گئے اور جمعہ کا دن آپہنچا جس دن وہ آرہا تھا۔ میں اپنی روٹین کے مطابق ہی دفتر پہنچی۔ پورا دن انتظار کرتی رہی گمان ہونےلگا کہ سردیوں کے چھوٹے دن اتنے لمبے ہوگئے ہیں کہ دن گزارنا مشکل لگنے لگا۔ پورا دن اسی ادھیڑبن میں گزر گیا کہ اس کو دیکھتے ہی کیا حالت ہوگی۔

شام چھ بجے اس کی پھر سے کال آئی میں ڈر سی گئی کہ کہیں اس نے اپنا آنا ملتوی نہ کردیا ہو لیکن میرے خدشات کے برعکس اس نے کہا کہ میں تمہارے دفتر کی پارکنگ میں تمہارا انتظار کررہا ہوں گاڑی کا نمبر میسیج کردیتا ہوں۔ میں اس سے پہلے ہی اپنا کام سمیٹ چکی تھی۔ کمپیوٹر آف کرکے میں اپنے کیبن سےباہر نکلی۔ باہر آکر بہت غور سے پارکنگ پہ نظر ڈالی تو کچھ سمجھ نہ سکی۔ اتنا خیال نہ آیا کہ فون پر اس کا میسج ہی دیکھ لوں جس میں اس نے گاڑی کا نمبر بھیجا تھا۔ اچانک کار پارکنگ کے ایک کونے میں کھڑی گاڑی کے ڈبل انڈیکیٹر ایک لمحے کو روشن ہوئے اور میں اس کی جانب چل پڑی۔ ذہن میں ایک بار پھر فلم چلنے لگی کہ اس وقت اس کے پاس کاواساکی موٹر سائیکل تھی اب اس نے ترقی کرلی ہے اور ایک لگژری گاڑی کا مالک ہے۔ دل نے اطمینان کا سانس لیا کہ وہ اپنی زندگی میں اسٹیبلش ہورہا ہے کتنی کم فہم ہوں میں یہ نہیں سوچا کہ اس نے گھر بسا لیا صاحبِ اولاد ہوگیا۔۔۔۔صرف میں ہی ہوں جو وہیں کھڑی ہے جہاں سے اس نے رستہ بدلا تھا۔

میں نے کار کا دروازہ کھولا تو اس کے چہرے پہ وہی ملکوتی مسکان دیکھی جسے دیکھ کر میں گھائل ہوئی تھی۔ حال احوال کے بعد اس نے گاڑی سٹارٹ کی اور ہم ایک نئی سمت کی جانب چل پڑے۔ نہ اس نے زبان سے کچھ کہا نہ میں نے کچھ پوچھا۔ میں بالکل خاموش تھی گاڑی کو مین سڑک پر لاکر اس نے مجھے پکارا میں جیسے کسی طویل سپنے سے جاگی اور اس کی جانب دیکھنے لگی۔ وہ میری جانب دیکھ رہا تھا اس نے میرا ہاتھ تھامنے کو اپنا دایاں ہاتھ بڑھایا میں نے بغیر کسی توقف کے اپنا ہاتھ بڑھا دیا۔ ہاتھ تھام کر وہ ایک ہاتھ سے گاڑی ڈرائیو کرنے لگا۔ گاڑی میں ادھورے ہم سفر مکمل خاموشی کے ساتھ اجنبیوں کی طرح سفر کررہے تھے۔ اس نے خود ہی بات شروع کی ” تم ہاتھ تھامنا بھول چکی ہو؟” مجھے نہیں معلوم یہ سوال تھا، رائے تھی یا کیا تھا۔ میں صرف یہ جواب دے پائی “مجھے ہاتھ تھامنے کی عادت نہیں رہی۔” کیونکہ۔۔۔۔۔۔۔ میرے جذبات سے عاری چہرے پہ وہ اپنے نام کے رنگ تلاشنے کی کوشش میں بار بار میری جانب دیکھتا۔
جلد ہی ہم اپنی اگلی منزل کی جانب آگئے یہ ایک بڑا سا میس نما گھر تھا جہاں اس کی کمپنی نے اپنے ملازمین کو ٹھہرایا تھا۔ میں اس کے قدموں کے چھوڑے ہوئے نشانوں پر چلتے ہوئے اس کے کمرے کی جانب بڑھنے لگی۔ نیچے کہیں لابی میں گانا چل رہا تھا۔۔۔۔۔
ابھی مجھ میں کہیں تھوڑی باقی سی ہے زندگی
جگی دھڑکن نئی جاناں زندہ ہوں میں تو ابھی
کچھ ایسی لگن اس لمحے میں ہے وہ لمحہ میرا ہے کہاں
خوشیاں چُوم لوں کہ رو لوں ذرا مرجاؤں کہ جی لوں ذرا

اس ایک لمحے کے سپنے میں پچھلے آٹھ سال سے دیکھ رہی تھی کہ کبھی تو ہماری ملاقات ہو۔۔۔۔ کبھی تو وہ مجھے ایک لمحے کیلئے دِکھ جائے۔ میں اس ایک لمحے میں اپنی تشنگی بجھا دوں۔ کمرے میں ٹھنڈے ماحول نے ہمارے جذبات مزید ٹھنڈے کردئیے۔ اتنے میں چائے آگئی۔۔۔۔ اس کی جانب متوجہ ہونے کے بجائے میں خاموشی سے چائے بنانے لگی۔ میرے ہاتھ سے چائے لے کر وہ میرے سامنے بیٹھ گیا۔ پہلے گھونٹ کے بعد اس نے میری طرف دیکھ کے کہا کہ تمہیں اب تک یاد ہے کہ میں چائے میں کتنی چینی لیتا ہوں۔ اب وہ باقاعدہ گفتگو کا آغاز کررہا تھا ۔ میں نے بات کا کوئی جواب نہ دیا۔۔۔۔

بات سے بات چلی وہ اپنی ازدواجی تعلقات کے مسائل، اولاد، والدین کے بارے میں بات کرتا رہا  تھا۔ اور میں ایک خاموش سامع کی طرح اسے سن رہی تھی۔ میری خاموشی اسے عجیب لگ رہی تھی “شاید تمہیں میری باتوں میں اور ہوسکتا ہے مجھ میں کوئی دلچسپی نہیں رہی۔” اس بات نے گویا میرے اندر کی محبت کو بھسم ہی کردیا ” ہاں! اب مجھے شاید تم میں دلچسپی نہیں رہی۔ تم چائے پی رہے تھے اور میں تمہیں دیکھ رہی تھی اور ان باتوں کے دوران تم نے اس چائے کے کپ کے تیرہ گھونٹ بھرے ہیں بس اتنی سی دلچسپی ہے تم میں مجھے۔۔۔۔” میری آواز بھر آئی۔

وہ پینتیس منٹ کی ملاقات اور چائے کا کپ آج بھی بہت بھاری ہے اس لئے آج بھی میں ہمیشہ چائے کے دو کپ ہی پیتی ہوں ایک اپنا اور ایک اتنی ہی مٹھاس والا چائے کا دوسرا کپ اپنی ادھوری محبت کے نام کا۔

مغربی ادب سے ترجمہ

مترجم : احمد اخلاق خان

لوگ صبح سے جمع ہونے لگے تھے‘ آنے والوں کی قطار مسلسل لمبی ہوتی جا رہی تھی۔ بڑے چوک میں ٹریفک کنٹرول کرنے والے خودکار سگنل اور روبوٹ سپاہی موجود تھے‘ مگر ٹریفک نہیں تھا کیونکہ آج عام تعطیل تھی۔ تعطیل کے موضوع پر رات ٹی‘ وی پر ایک فلم بھی دکھائی گئی تھی‘ فلم نے شہریوں کا جوش وخروش بہت بڑھا دیا تھا۔ لوگ دُور دُور سے آرہے تھے۔ خود کار بسیں سیکڑوں سواریاں لاتی جا رہی تھیں۔ آج جشن تھا۔ اب یہ جشن سال میں دو یا تین بار ہی منایا جاتا تھا۔ اِس موقع پر دکانیں بند رہتی تھیں اور لوگوں کو راشن ایک دن قبل دے دیا جاتا تھا۔
نوجوانوں اور بزرگوں کے درمیان ایک چھوٹا سا بچّہ بھی کھڑا تھا۔ طویل قطار میں دُور سے اُس کی شکل نظر نہیں آرہی تھی۔ موسم ٹھنڈا تھا۔ سورج نکلے زیادہ دیر نہیں ہوئی تھی اس لیے دھوپ میں ابھی گرمی نہیں تھی۔بچے نے اپنی سرخ نیکر کی جیب سے چیونگم نکالی‘ یہ چیونگم دن بھر استعمال کے باوجود میٹھی رہتی تھی‘ وہ اُسے چبانے لگا۔ سردی سے اُس کی ناک سرخ ہو رہی تھی۔ ”تم اتنی جلدی کیسے جاگ گئے بیٹے؟“ بچے کے پیچھے کھڑے ایک بے حد موٹے شخص نے منحنی آواز میں پوچھا۔
”میں بھی سب کچھ دیکھنا چاہتا ہوں۔“ بچے نے اپنے ہاتھ رگڑتے ہوئے کہا۔
”تمہاری عمر ابھی اِس ہجوم میں کھڑے ہونے کی نہیں ہے۔ تم جا کر کھیلتے کیوں نہیں؟ اپنی جگہ کسی اور کو دے دو۔“ موٹا بولا۔
”بچے کو کھڑا رہنے دو۔“ سامنے سے ایک بوڑھے نے غرّا کر کہا۔ ”دیکھتے نہیں‘ یہ کتنے شوق سے آیا ہے۔“
”ٹھیک ہے‘ ٹھیک ہے۔“ موٹا گھبرا گیا۔ ”میں تو صرف اس لیے کہہ رہا تھا کہ اتنا چھوٹا بچہ یہاں کیسے آگیا۔“
”مجھے یہ بچہ باذوق نظر آتا ہے۔“ بوڑھے نے شفقت سے بچے کو دیکھا۔’تمہارا نام کیا ہے؟“
”ٹام۔“ بچے نے بتایا۔
”بہت خوب ۔“ بوڑھے نے بلند آواز سے کہا۔ ”دیکھنا‘ یہ ننّا منا ٹام پورے خلوص سے اُس پر تھوک کے دکھائے گا‘ ہے نا ٹام؟“
قطار میں کھڑے ئے لوگ ہنسنے لگے پھر باتوں میں مصروف ہو گئے۔ ایک پستہ قد شخص گرما گرم کافی بیچ رہا تھا۔ دس ڈالر فی مگ‘ مگر کافی خریدنے والے بہت کم تھے۔ فاضل رقم تھی کس کی جیب میں؟ حکومت عوام کو ہر ضرور ت فراہم کرتی تھی‘ لیکن کافی جیسی فضولیات کے لیے کسی کو کچھ نہیں ملتا تھا۔
ٹام نے نیکر کی جیبوں میں ہاتھ ڈا ل لیے اور آگے جھانک کر یکھا۔ اُسے کے آگے دو ڈھائی سو لوگ ہوں گے اور پیچھے ہزاروں لوگ۔ وہ خوش نصیب تھا کہ صبح صبح یہاں آکر کھڑا ہو گیا ورنہ جگہ نہ ملتی۔ اُس نے بوڑھے سے سوال کیا۔ ”لوگ کہتے ہیں کہ وہ مسکراتی ہے؟“
”ہاں۔“ بوڑھے نے زہر خند سے تصدیق کی۔
”اور سنا ہے اُسے کینوس پر آئل پینٹ سے بنایا گیا ہے؟“
”ہاں۔“ بوڑھے نے کہا۔ ” اِسی باعث مجھے شبہ ہے کہ وہ اصلی نہیں ہے۔ میرے علم کے مطابق مدّتوں قبل اُسے لکڑی پر بنایا گیا تھا۔“
ننھے ٹام نے اضطراب اور بے یقینی سے پوچھا۔ ”یہ بھی سنا ہے کہ وہ چار پانچ سو سال پُرانی ہے؟“
”شاید اس سے بھی زیادہ پُرانی۔ ویسے نہ معلوم‘ یہ کون سا سَن ہے۔ “ بوڑھا بڑبڑایا۔
”یہ بیس سوا کتالیس ہے۔“ ٹام نے تیزی سے جواب دیا۔
”ہاںلیکن یہ تو سرکاری اعداد ہیں۔ ہو سکتا ہے ‘ یہ جھوٹ ہو۔ ممکن ہے‘ صحیح سَن تین ہزار ہو یا چار ہزار ہو۔ تاریخ نے ہمارے ساتھ بڑا دھوکا کیا ہے‘ ہمیں بہت دکھ پہنچائے ہیں۔ تاریخ سے ہم سب کو نفرت ہے۔ “ بوڑھے کی آواز بلندہوتی گئی۔ آس پاس کے حاضرین نے اُس پر گہری نگاہ ڈالی۔
کچھ دیر خاموشی رہی پھر ٹام نے پوچھا۔ ”ہم اُسے کتنی دیر میں دیکھ سکیں گے؟“
” بس بیٹے! تھوڑی سی دیر میں۔“ بوڑھے نے کہا۔ ”اُسے ایک چبوترے پر رکھا گیا ہے۔ چبوترے کے گرد رسّیوں کا حلقہ ہے۔ رسّیا ںاس لیے باندھی گئی ہیں کہ ہم میں سے کوئی مشتعل ہو کر اُس پر حملہ نہ کر بیٹھے۔ ہم قطار میں باری باری اُس کے سامنے سے گزریں گے اور یاد رکھنا ٹام! اُسے پتھروغیرہ مارنے کی ضرورت نہیں ہے۔“ ٹام نے اثبات میں سر ہلاکے اِدھر اُدھر دیکھا۔ سورج آہستہ آہستہ بلند ہو رہا تھا۔ ہوا میں اب ٹھنڈک نہیں رہی تھی۔ تماشائی اپنے اپنے کوٹ اُتار رہے تھے۔
”ہم قطار میںکیوں کھڑے ہیں؟ “ ٹام نے بھولپن سے دریافت کیا۔ ”ہم اُس پر تھوکنے کیوں آئے ہیں؟“
بوڑھے نے آسمان پر نگاہ کی۔” اس کی بہت سی وجوہ ہیں ننّے! یہ سب نفرت کا کھیل ہے۔ وہ نفرت جو ہمیں اپنے ماضی سے ہے ‘ ماضی کی ہر چیز سے ہے۔ ماضی ہی نے‘ تو ہمیں اس حال کو پہنچایا ہے۔ شہر آدمیوں سے اور سڑکیں ٹریفک سے بھری ہوئی ہیں۔ ہماری زمینیں تاب کاری کے سبب بنجر ہیں۔ ایٹمی حملوں نے یہ مٹی فصلوں سے محروم کر دی ہے۔ ہمیں گزری ہوئی صدیو ںسے نفرت ہے ۔ سمجھ رہے ہو نا؟“ ٹام نے اقرار میں گردن ہلائی۔ اُس کی نظروں میں اب بھی تجسّس تھا۔ بوڑھے کی آنکھوں سے وحشت جھانکنے لگی۔ ”اس ماضی کے باعث ہم ایک کمزور نسل بن گئے ہیں۔ فضا میں پھیلی ہوئی جوہری تاب کاری نے ہمارا جسمانی نظام کمزور کر دیا ہے۔ ہم سگریٹ نہیں پی سکتے‘ شراب نہیں پی سکتے‘ ہمیں اُسی خوراک پر اکتفا کرنا پڑتا ہے جوحکومت دیتی ہے۔ یہ سب کچھ ہمارے ماضی کے سبب ہے۔ خون کے دباﺅ کی وجہ سے ہم بہت زیادہ اشتعال میں نہیں آسکتے‘ بہت زیادہ خوش نہیں ہو سکتے۔ ہمارے ماضی نے ہمیں نحیف‘ لاغر اور بے بس بنا دیا ہے۔ اب ہم صرف یہ جشن منا سکتے ہیں۔“
ننّے ٹام نے پھر سر ہلایا۔ اُسے یاد آیا کہ گزشتہ جشن کے دوران اُنھوں نے اِسی چوک پر تمام کتابیں جلا دی تھیں‘ کتابوں میں عجیب وغریب افسانے‘ ناول اور ڈرامے تھے۔ اور اُس سے پہلے جو جشن ہوا تھا اُس میں اُنھوں نے تمام شاعری نذرِ آتش کر دی تھی۔ صدیوں پرانی شاعری‘ قدیم نسخے اور مجلّد دیوان۔ ہر مرتبہ اُسے یہی بتایا گیا تھا کہ یہ سب ماضی کی یادگاریں ہیں۔ ماضی ‘ جس سے صرف نفرت کی جا سکتی ہے۔ یہ سبق اُسے اتنی دفعہ پڑھایا گیا تھا کہ ازبر ہو چکا تھا۔ اُس کی ماں اُس سے کہتی تھی کہ کئی سال پہلے کے جشن میں دنیا کے آخری اخبار کی آخری کا پیاں تباہ کر دی گئی تھیں اور ایک اور جشن میں موسیقی کے کیسٹ جلائے گئے تھے‘ اُن میں بیتھوون‘ موزارٹ اور نہ جانے کون کون سے موسیقاروں کی دُھنیں محفوظ تھیں۔
قطار چیونٹیوں کی رفتار سے آگے بڑھ رہی تھی۔ چار پانچ منٹ بعد کہیں وہ ایک قدم آگے بڑھتے۔ سورج آسمان پر سفر کر رہا تھا۔ آخر ٹام چبوترے کے پاس پہنچ گیا‘ اُس کے گرد مضبوط رسیّوں کا حلقہ تھا اور چاروں کونوں پر خوںخوار قسم کے سپاہی کھڑے تھے‘ سورج سر پر آچکا تھا‘ لوگ بے حال تھے۔ بوڑھے کے پورے چہرے پر وحشت اور بے پناہ نفرت تھی۔ وہ جلد سے جلد آگے بڑھ کر اپنی نفرت کا اظہار کرنا چاہتا تھا۔
رسیّوں کے حلقے میں چبوترے پر ایک قدیم تصویر آویزاں تھی‘ ایک مشہور شاہ کار۔ بوڑھے نے پوری قوت سے اُس پر تھوکا۔ اُس کی ہر حرکت سے گہری اور شدید نفرت جھلک رہی تھی۔ ”ہم سب تم سے نفرت کرتے ہیں۔“ بوڑھے نے چِلّا کر بے جان تصویر سے کہا۔ اُس کی باتیں قریب کھڑے لوگوں اور پولیس والوں کے لیے دل چسپی کا باعث تھیں۔ سب کو خوشی تھی‘ سب کے جذبات یہی تھے‘ سب نفرت میں مبتلا تھے مگر ٹام گنگ کھڑا تھا۔
تصویر ایک عورت کی تھی‘ عورت کے ہونٹوں پر مسکراہٹ تھی۔ ٹام اُسے دیکھتا رہا۔ بوڑھے نے اُسے شہہ دی۔ ” تھوکو ٹام! تھوکو۔“ مگر ٹام کا حلق خشک تھا۔ تصویر اُسی کو دیکھ رہی تھی۔ عورت اُسے دیکھ کر مسکرا رہی تھی۔ ”تھوکو ٹام!“ بوڑھا چیخا۔”یہ ہمارا قابلِ نفرت ماضی ہے۔ اسی نے ہمیں تباہ کیا ہے۔ آگے بڑھو میرے بچے!“
”یہ…. یہ….“ ٹام کی آواز سرگوشی سے زیادہ نہیں تھی۔ ”یہ….کتنی پیاری…. “ اُس کی آواز کسی نے نہ سنی۔
بوڑھے نے مجنونانہ انداز سے ہاتھ فضا میں لہرایا۔ ”اچھا تمہاری طرف سے میں اس پر تھوکتا ہوں۔“
ٹام جیسے کچھ نہیں سُن رہا تھا‘ کچھ نہیں دیکھ رہا تھا۔ عورت اُسے دیکھ رہی تھی اور مسکرا رہی تھی۔ مسکراہٹ نے گویا یہ منظر‘ یہ ماحول اور یہ پوری دنیا لپیٹ میں لے لی تھی۔ ہر طرف‘ ہر چیز مسکرا رہی تھی۔ ٹام کو یا دآیا‘ کسی نے اُسے بتایا تھا کہ اِس تصویر کا نام مونالیزا ہے۔ ایک صدی قبلِ اسے عظیم فن پارہ سمجھا جاتا تھا۔
”توجہ توجّہ ۔“ ہنگامے میں کوئی چلایا۔ اچانک خاموشی چھا گئی۔
ایک پولیس افسر کوئی سفید کاغذ ہاتھ میں لیے ایک چبوترے پر کھڑا تھا۔ سب لوگ ہمہ تن گوش ہو گئے۔ ” حاضرین! ایک اعلان سُنیے۔ حکّام نے فیصلہ کیا ہے کہ یہ نفرت انگیز تصویر فی الفور مجمع کے حوالے کر دی جائے تاکہ وہ اسے تباہ کر کے ا پنے جذبات….“
معلن کی آواز کان پھاڑ دینے والے شور میں گم ہو گئی۔لوگوں کا ایک طوفان آگے بڑھا اور تصویر پر ٹوٹ پڑا۔ ٹام تنکے کی طرح ہوا میں اُچھلا‘ ہجوم میں اُس کی سرخ نیکر کبھی کبھی نظر آجاتی۔ بے شمار ہاتھ تصویر کی طرف بڑھ رہے تھے۔ ٹام رسیّوں سے اُلجھ کر لوگوں کے ساتھ تصویر کے پاس جا گرا۔ ایک لات اُس کی کمر پر لگی۔اُسے ساری دنیا گھومتی محسوس کی۔ پھر اُس کے ہاتھ کینوسک ے کسی ٹکڑے پر پڑے۔ اُس نے پوری قوت سے وہ ٹکڑا کھینچا۔ کینوس پھٹنے کی آواز آئی۔ اُسی وقت ایک آدمی اُس سے ٹکرایا۔ ٹام کینوس کے چھوٹے سے ٹکڑے سمیت پاگلوں کی طرح لڑتے‘ چیختے ہجوم سے باہر جا گرا۔ وہ اُٹھا‘ بھاگا‘ کسی اور سے ٹکرا کر پھر گرا اور پھر اُٹھ کر بھاگا۔ اُس کی نیکر مٹی سے اَٹ گئی تھی۔ اُس کے معصوم چہرے پر دُھول اور آنسوﺅں کی لکیریں تھیں‘ وہ روتا رہا اور بھاگتا رہا۔ کینوس کا ٹکڑا اُس نے ہاتھوں میں بھینچ رکھا تھا۔
کمرے میں ٹیلی وژن پر خبریں آرہی تھیں”…. عوام نے اعلان ہوتے ہی بھرپور نفرت سے مونا لیزا تباہ وبرباد کر دی‘ یہ اُس عہد کی یادگار تھی جس نے ہمیں اور ہماری نسل کو کہیں کا نہ چھوڑا۔ اطلّاعات کے مطابق اب اُس پینٹنگ کا نام ونشان بھی باقی نہیں رہا۔“
ٹام سیڑھیوں پر اندھیرے میں بیٹھا تھا۔ آسمان پر چاند تھا۔ گھر میں شمسی توانائی سے بتیاں جل رہی تھیں مگر چاندنی اُن سے کہیں زیادہ سکون بخش تھی۔ درجہ حرارت پر قابو پائے ہوئے گھروں کے مقابلے میں باہر سردی تھی‘ مگر بہت خوش گوار تھی۔ ٹام نے چاندنی اور سردی میں کینوس کا ٹکڑا کھولا۔ یہ اُس تصویر کے ہونٹ تھے‘ تصویر کے مسکراتے ہوئے ہونٹ…. زمین پر مسکراہٹ بچا لی گئی تھی‘ محفوظ کر لی گئی تھی۔
ٹام نے چاند پر ایک نظر ڈالی اور کینوس کا ٹکڑا احتیاط سے تہ کر کے واپس جیب میں رکھ لیا۔ انہوں نے مونالیزا تباہ کر دی مگر اُس کی مسکراہٹ محفوظ تھی۔

مترجم : محمد ذیشان

وائیکو Wei Guکافی عرصے سے کسی ایسی مناسب لڑکی کی تلاش میں تھا جس سے وہ شادی کر سکے، لیکن اس کی کوششیں بار آور ثابت نہیں ہو رہی تھیں کیونکہ اس بارے میں وہ اپنے مقرر کردہ معیار سے نیچے اترنے پر تیار نہ تھا۔
یہ Tang Dynastyمیں 807 ءکی بات ہے۔ وہ رشتے کی تلاش میں سنگھو پہنچا اور وہاں جنوبی دروازے کے باہرواقع ایک چھوٹی سی سرائے میں ٹہرگیا۔ یہاں اسے ایک شخص نے رشتے کی امید دلائی تھی۔ اس شخص نے وائیکو سے کہا تھا کہ سنگھو کے کنگ شنگ Songchengمندر میں صبح کے وقت اس سے مل لے۔ وہاں وہ ایک حسین، دولت مند اور ہم مرتبہ لڑکی سے اس کےرشتے کی بات طے کرادے گا۔ وائیکو کے لیے یہ بہت بڑی خوشخبری تھی۔ اس خوشی میں وائیکو ساری رات سو نہ سکا اورعلی الصباح سرائے سے نکل کر مندر کی طرف چل دیا۔
جس وقت وہ سرائے سے نکلا تھا، اس وقت سورج اُفقِ مشرق سے نمودار نہ ہوا تھا اور وسیع و عریض زردیمائل آسمان پر ایک کٹا ہوا چاند دمک رہا تھا۔ جب وہ مندر کے قریب پہنچا تو اس نے مندر کی سیڑھیوں پر ایک بوڑھے شخص کو بیٹھے دیکھا جو چاند کی دھندلی روشنی میں کوئی کتاب پڑھنےمیں مشغول تھا۔ (چینی دیومالا میں اس بوڑھے کا نام یو لاؤ Yue Lao ہے ، یو لاؤ کے معنی ہیں چاند کے نیچے بیٹھا بوڑھا old man under the moon، اسے شادیوں کا دیوتا بھی کہتے ہیں۔) بوڑھے کے قریب ہی سیڑھیوں پر ایک چھوٹا سا تھیلا بھی رکھا تھا۔ اس نے بوڑھے کے پیچھے کھڑے ہو کر شانے پر سے جھانکتے ہوئے اس کتاب کو پڑھنے کی کوشش کی ۔ بوڑھے کی کتاب کسی عجیب سے رسم الخط میں لکھی ہوئی تھی، کسی ایسی زبان میں جو کم از کم وائیکو کی نظر سے کبھی بھی نہیں گزری تھی۔
‘‘بابا! کیا آپ بتائیں گے کہ یہ کتاب کس زبان میں لکھی ہوئی ہے؟’’وائیکو نے پوچھا‘‘مجھے بہت سی زبانیں آتی ہیں لیکن میں حیران ہوں، اس کی تحریر ان سب سے مختلف ہے۔’’
‘‘بے شک اس کتاب کی زبان تمہارے لیے اجنبی ہوگی’’بوڑھے نے مسکرا کر جواب دیا۔‘‘کیونکہ یہ کتاب کسی دنیاوی زبان میں نہیں لکھی گئی۔’’
‘‘پھر یہ زبان کون سی ہے؟’’
‘‘تم ایک فانی انسان ہو’’بوڑھے نے کہا‘‘اور یہ کتاب لا فانی روحوں کی زبان میں لکھی گئی ہے۔’’
‘‘خوب ۔’’ وائیکو نے کہا ۔‘‘گویا آپ خود بھی کوئی روح ہیں لیکن آپ یہاں بیٹھے کیا کر رہے ہیں….؟’

‘‘اس وقت یہاں میری موجودگی نہایت ضروری تھی۔’’ بوڑھے نے جواب دیا۔‘‘دیکھو نا، تم وقت سےبہت پہلے یہاں آپہنچے ہو، رہا میں، تو میرا کام ہی یہ ہےکہ میں اپنے دائرہ کار اور اپنے فرائض سے متعلق انسانی معاملات کی جانچ پڑتال کرتا رہوں۔ چنانچہ میں ان کے نام اور پتوں کی پڑتال دن کے اسی حصے میں کرتا ہوں۔’’
وائیکو نے دلچسپی لیتے ہوئے کہا‘‘کون کون سے انسانی مسائل آپ کے دائرہ کار سے تعلق رکھتے ہیں….؟’’
بوڑھے نے جواب دیا‘‘شادی بیاہ کے مسئلے۔’’
‘‘خوب !’’وائیکو کی دلچسپی کچھ اور بڑھ گئی‘‘گویا میں بالکل صحیح ہوں جو آپ کے پاس پہنچا ہوں۔ مجھے آپ ہی کی ضرورت تھی ۔میں کافی عرصے سے شادی کے لئے ایک موزوں لڑکی کی تلاش میں ہوں لیکن ابھی تک ناکام ہوں۔ اس وقت یہاں میری موجودگی بھی اسی لئے ہے۔ ایک شخص نے مجھ سے وعدہ کیا ہےکہ وہ ایک انتہائی حسین لڑکی سے میری شادی کرادے گا۔
بابا!اب ذرا بتائیے تو کیا اس مرتبہ میں کامیاب ہوجاؤں گا….؟’’
‘‘تمہارا نام اور پتہ کیا ہے…؟’’
بوڑھے نے کتاب کے اوراق الٹتے پلٹتے ہوئے دریافت کیا۔
وائیکو نے اسے اپنا نام اور پتہ بتایا۔ بوڑھا چند لمحوں تک اپنی کتاب کے اوراق الٹتا پلٹتا رہا۔ پھر ایک صفحے پر رُک کر کچھ دیکھنے لگا۔ پھر بولا….‘‘نوجوان! تم یہاں جس لڑکی کے ساتھ شادی کی امید میں آئے ہو یہ ممکن نہیں ۔ شاید تم یہ بات نہیں جانتے کہ انسانوں کی شادیاں تو پہلے ہی سے مقدر میں لکھ دی جاتی ہیں، میری اس کتاب میں ان کے سارے اندراجات موجود ہیں، میں اس کتاب میں دیکھ رہا ہوں کہ ابھی تمہاری شادی میں بہت دیر ہے کیونکہ تمہاری ہونے والی بیوی ابھی بہت کم عمر ہے اور اس کی شادی عمر کے اٹھارویں برس میں تمہارے ساتھ انجام پائے گی۔ تم بےفکر رہو۔’’
‘‘بے فکر رہوں….؟؟’’وائیکو نے اُلجھتے ہوئے کہا۔‘‘گویا آپ یہ کہنا چاہتے ہیں کہ مجھے ا بھی کئی سالوں تک کنوارا ہی رہنا پڑے گا۔’’
‘‘بالکل…!’’بوڑھے نے غیر مبہم لہجے میں کہا۔ ‘‘کیونکہ تمہاری تقدیر کا لکھا ہمیں یہی بتا رہا ہے۔’’
‘‘گویا میں جس لڑکی کے سلسلے میں یہاں آیا ہوں، وہاں رشتہ نہ ہوسکے گا….!’’وائیکو، کو وحشت ہو رہی تھی۔
وائیکو عجیب الجھن میں مبتلا ہوگیا۔ اس کی سمجھ میں نہیں آرہا تھا کہ وہ بوڑھے کی بات پر یقین کرے یا نہ کرے۔ اچانک اس کی نظر بوڑھے کے تھیلے پر پڑی….‘‘اور یہ آپ کے تھیلے میں کیا ہے؟’’اس نے بےچینی سے پوچھا۔
‘‘ریشم کی لال ڈوریاں۔’’بوڑھے کے چہرے پر معصوم مسکراہٹ بکھر گئی۔‘‘یہ ڈوریاں بھی میرے فرائض کے ایک حصے سے تعلق رکھتی ہیں۔ میں اس کتاب سے ہر جوڑے کے بارے میں معلومات حاصل کرتا رہتا ہوں، جونہی دنیا میں کوئی بچہ یا بچی پیدا ہوتی ہے اور کتاب مجھے ان کی بابت یہ بتاتی ہے کہ آئندہ چل کر یہ دونوں میاں بیوی بنیں گے تو میں رات میں وہاں پہنچ جاتا ہوں اور ریشم کی ان ڈوریوں سے ان دونوں کے پیروں کو ایک ساتھ باندھ دیتا ہوں ۔ جب میں ایک بار گرہ لگا دیتا ہوں تو پھر اسے کوئی بھی نہیں کھول سکتا۔ یہاں تک کہ دونوں کے مرتبے کا فرق بھی نہیں کھول سکتا یعنی چاہے ان دونوں میں سے کوئی ایک بڑے گھرانے میں پیدا ہو، ۔ دونوں کے درمیان ہزاروں میل کی دوری ہو ، حالات کی پیچیدگیاں بھی ان کے درمیان حائل نہیں ہو سکتیں اور آخر دونوں کی شادی ہو کر ہی رہتی ہے۔ ریشم کی ڈوریوں کی گِرہ کو کوئی نہیں کھول سکتا۔’’
‘‘خوب’’وائیکو نے حیرت سے کہا‘‘تو آپ نے یقیناً میرے پیر بھی باندھ دیے ہوں گے….؟’’
‘‘بالکل…!’’
‘‘وہ بچی۔ وہ جو آپ کے بقول میری بیوی بنے گی، آج کل کہاں ہے….؟’’
‘‘وہ بچی ایک ایسی عورت کے گھر پل رہی ہے جو سبزیاں بیچتی ہے۔ وہ عورت روزانہ صبح بازار میں دکان لگاتی ہے۔ اگر تم اس سے ملنا چاہتے ہو تو میرے ساتھ چلو، اس کی رہائش یہاں سے کچھ زیادہ دور نہیں ہے۔ چلو وہ جگہ میں تمہیں دکھائے دیتا ہوں۔’’اب صبح نمودار ہورہی تھی اور وہ وائیکو کا ملاقاتی ابھی تک ٖغائب تھا۔
‘‘تم اس کا انتظار نہ کرو۔ وہ نہیں آئے گا۔’’بوڑھے نے اسے دوست کے نہ آنےکا یقین دلایا۔ وائیکو کو بوڑھے کی باتوں میں بڑا لطف آرہا تھا، وہ اٹھا اور بوڑھے کے ساتھ چل دیا۔ راستے میں بوڑھے نے کہا۔‘‘مجھے اپنا کام بے حد پسند ہے۔ ریشم کی یہ لال ڈوریاں بھی عجیب ہوتی ہیں۔ بچے اور بچیاں دونوں اپنے اپنے گھروں میں ایک دوسرے کے وجود سے بے نیاز پروان چڑھتے رہتے ہیں اور پھر جب وقت آتا ہے تو وہ نظامِ قدرت کے تحت ایک دوسرے کی محبت کے اسیر ہوجاتے ہیں۔ وہ خود سے کچھ نہیں کرسکتے۔ کبھی کبھی ایسا بھی ہوتا ہے کہ ان دونوں کے درمیان کسی اور لڑکی یا لڑکے کا وجود حائل ہوجاتا ہے۔ اور اس صورت میں ریشم کی ان ڈوریوں کی بندش کے باعث باغی دو قدم بھی بڑھانے سے قاصر رہتا ہے اور اوندھے منہ گر پڑتا ہے۔ میں نے ایسے واقعات بار بار دیکھے ہیں۔’’
اب بازار بہت نزدیک آچکا تھا اور وہاں آہستہ آہستہ راہگیروں کی بھیڑ بھاڑ بڑھتی جارہی تھی۔ بوڑھے نے اپنے پیچھے پلٹ کر وائیکو کو دیکھا اور کہنے لگا ….
‘‘میرے پیچھے پیچھے چلتے رہو۔وہ ادھر دیکھو….’’
بوڑھا ایک چھوٹی سی سبزی کی دکان کی طرف اشارہ کر رہا تھا۔ دکان پر ایک ادھیڑ عمر عورت بوسیدہ اور گندے کپڑوں میں ملبوس بیٹھی ہوئی تھی۔ عورت کے قریب ہی ایک بچی سوئی تھی ،جسے اُس نے اپنا آنچل اوڑھا رکھا تھا۔ عورت کی بینائی کمزور تھی اور وہ مشکل ہی سے کچھ دیکھ سکتی تھی۔
بوڑھے نے کہا۔‘‘ یہ بچی تمہاری بیوی بنے گی۔’’
وائیکو کو غصہ آگیا، یہ کیا مذاق ہے…..؟اُس نے سوچا اور بیزاری سے بولا‘‘بڑے میاں! آپ ضرور مذاق کر رہے ہیں….؟’’
‘‘یہ مذاق نہیں، مقدر کی بات ہے۔’’بوڑھے نے کہا ‘‘اسے اس حال میں دیکھ کر بد قسمت مت سمجھو۔ اس بچی کے ستارے بہت اچھے ہیں۔ یہ طے ہے کہ اس کی شادی تمہارے ساتھ ہوگی۔ یہ بڑی آرام دہ اور عیش و عشرت کی زندگی گزارے گی اور آخر عمر میں اپنے بیٹے کی بدولت کافی عزت و شہرت بھی حاصل کرے گی۔’’وائیکو نے ایک بار پھر اس بچی کی طرف دیکھا جو ایک استخوانی ڈھانچے کی مانند دکھائی دے رہی تھی۔ اسے اندر سے سخت کراہیت سی محسوس ہوئی۔ وہ یقیناً اس مسئلے پر بوڑھے سے اُلجھ پڑتا مگر جب اس نے مڑ کر دیکھا تو پتہ چلا کہ بوڑھا وہاں موجود نہیں ہے۔ خدا معلوم وہ اچانک کس طرف غائب ہوگیا تھا۔
وائیکو اس بازار سے اپنے سرائے کی طرف تنہا رخصت ہوا کیونکہ وہ آدمی بھی جس سے ملنے وہ یہاں آیا تھا اسے نہیں ملا۔ وائیکو کا دماغ مسلسل سوچ رہا تھا کہ آیا وہ بوڑھے کی باتوں پر اعتبار کرے یا نہ کرے۔
‘‘میں ایک عالم ہوں…’’اس نے سوچا۔‘‘بالفرض محال مجھے اپنے مرتبے کے مطابق کوئی عورت نہیں مل سکتی تو بھی میں کسی اداکار وغیرہ سے تو بآسانی شادی کرسکتا ہوں….’’ اور اس نے اس مسئلے پر جتنا زیادہ سوچا۔ننھی بچی سے اس کی نفرت میں اور اضافہ ہوتا گیا۔ وہ ذہنی طور پر اس بات کو قبول کرنے کے لیے بالکل تیار نہ تھا۔ اس نے دل میں کہا۔‘‘ہونہہ، کہاں میں اور کہاں ایک سبزی فروش کی گندی لڑکی۔’’وہ ساری رات اسی ادھیڑ بن میں رہا اور ٹھیک سے سو بھی نہ سکا۔
دوسری صبح وہ اپنے نوکر کو لے کر اس بازار میں گیا اور اسے کچھ رقم دے کر ہدایت دی کہ وہ سبزی فروش کی بچی کو قتل کردے۔
نوکر تعمیلِ حکم میں گھات میں لگ گیا اور موقع پاتے ہی لڑکی پر وار کیا اور بھاگ کھڑا ہوا۔ چاقو لگتے ہی لڑکی نے چیخنا شروع کردیااور عورت نے‘‘قتل کردیا….قتل کردیا۔’’کی آوازوں سے بازار سر پر اٹھا لیا۔ اس ہنگامے میں موقع پا کر وائیکو بھی اپنے نوکر سمیت اس بھیڑ سے صاف نکل گیا۔
‘‘کیا رہا؟’’وائیکو نے آگے جاکر اس سے پوچھا۔‘‘کیا تم کامیاب رہے؟’’
‘‘میں یقین سے کچھ نہیں کہہ سکتا جناب۔’’نوکر نے تذبذب کے لہجے میں کہا ‘‘چاقو تو یقیناً اسے لگا ہے لیکن کہاں؟ یہ میں نہیں کہہ سکتا۔ ہو سکتا ہے کہ وہ مر ہی جائے۔’’
وائیکو نے وہ شہر اسی دن چھوڑ دیا اور دارالحکومت چلا گیا۔ وہاں اس نے ایک اور رشتے کی بات کی لیکن ناکامی اٹھا کر بے حد دل برداشتہ ہوگیا اور طے کرلیا کہ وہ شادی کا خیال دل میں نہ لائے گا۔ کوئی تین سال بعد اس کی خواہش پھر جاگی اور ایک اچھے اور با رسوخ خاندان میں ایک قبول صورت لڑکی سے اس کی منگنی طے پا گئی۔ اس کے دوستوں نے اسے مبارک باد کے خطوط بھیجے لیکن شادی کے دن ایک عجیب بات ہوگئی۔ اچانک معلوم ہوا کہ لڑکی نے خودکشی کرلی ہے، یہ لڑکی دراصل کسی دوسرے مرد سے محبت کرتی تھی۔
اس واقعہ کے کوئی دو سال بعد….کسی کام سے اس کا نواحی بستی میں سے گزر ہوا، وہاں اسے ایک کسان کی نوجوان لڑکی دکھائی دی۔ لڑکی بڑی معصوم اور خوش شکل تھی اور وائیکو نے اسے پہلی ہی نظر میں پسند کر لیا۔ یہ رشتہ حاصل کرنا بے حد آسان تھا۔ چنانچہ بات چیت طے کر کے وہ شہر واپس چلا گیا اور جب شادی کی نیت سے وہ گاؤں واپس آیا تو پتہ چلا کہ کسان کی لڑکی اچانک فالج کا شکار ہوگئی ہے۔ اور اس طرح ایک بار پھر اس کی شادی ٹل گئی۔
اب وائیکو اپنی عمر کے 28سال پورے کر چکا تھا اس واقعے کے کئی سال بعد واقعی اسے ایک ایسی لڑکی مل گئی جسے ہر اعتبار سے اس کے جوڑ کا کہا جا سکتا تھا۔ یہ لڑکی بھی وائیکو کی طرح پڑھی لکھی اور ادبی مزاج کی مالک تھی۔ اس کا خاندان بھی اونچا اور وہ صورت شکل کی بھی اچھی تھی۔ ان کے درمیان کوئی رقیب بھی حائل نہ تھا۔ شادی میں ابھی صرف دو ہی دن باقی رہ گئے تھے کہ اچانک لڑکی کا پیر پھسلااور وہ دومنزلہ عمارت کی سیڑھیوں سے کچھ اس طرح گری کہ جانبر نہ ہوسکی….
یوں لگتا تھا کہ قدرت ہر قدم پر اس کی مخالفت کر رہی ہے، اس کی مایوسیوں کا کوئی ٹھکانا نہ رہ گیا تھا۔ شادی کی کوششوں کے سلسلے میں یہ آخری واقعہ تھا، اس کے بعد وائیکو اتنا دل برداشتہ اور مایوس ہوا کہ اس نے شادی کے سلسلے میں ہر کوشش سے ہاتھ اٹھا لیا۔ان دنوں وہ شانگھو کے علاقے کی عدالت میں بطور افسر تعینات تھا۔ اب وہ اپنا بیشتر وقت کام میں صرف کرتا تھا اور شاید یہی وجہ تھی کہ مجسٹریٹ اس پر ضرورت سے زیادہ مہربان رہنے لگا تھا۔ وائیکو کی مستعدی اور دیانتداری نے مجسٹریٹ کو کچھ اتنا متاثر کیا کہ ایک دن اس نے وائیکو کو بلا کر ایک پیش کش کردی۔ اس نے کہا۔‘‘وائیکو اگر تم پسند کرو تو میں تم سے اپنی بھتیجی کی شادی کرنے کو تیار ہوں۔’’
اس وقت وائیکو کی عمر چالیس سے بھی اوپر تھی اور اسے پے در پے ناکامیوں کی وجہ سے شادی کی کوئی تمنا بھی نہ تھی….مجسٹریٹ وانگ تائی Wang Tai (ژیانگ ژوXiangzhou کا گورنر ) کی کمسن بھتیجی کے ساتھ اس کا کوئی میل بھی نہ تھا۔ پھر بھی مجسٹریٹ کی وجہ سے اسے حامی بھرنا ہی پڑی لہٰذااس نے ہاں کردی۔
وائیکو کو اس شادی میں ذرا بھی دلچسپی نہیں تھی، اسی وجہ سے اس نے اپنی ہونے والی بیوی کی شکل اس وقت تک نہیں دیکھی، جب تک کہ وہ بیاہ کر گھر میں نہ آگئی۔ جب اس نے اپنی بیوی کی شکل دیکھی تو اسے خاصا اطمینان ہوگیا کیونکہ یہ لڑکی خاصی خوبصورت تھی اور حلیم الطبع بھی لگتی تھی اور اس میں ایک اچھی رفیقۂ حیات کی جملہ خصوصیات پائی جاتی تھیں۔صرف اتنا ہی نہیں، اس کا مزاج بھی ادبی تھا اور وہ پڑھی لکھی بھی تھی۔ اس کے بال سنوارنے کا ایک مخصوص انداز تھا اور وہ اپنے بالوں کو کچھ اس طرح سنوارتی کہ داہنی طرف کے بالوں کا ایک بڑا حصہ اس کی بھنووں کے ذرا اوپر ماتھے کو پوری طرح چھپا لیتا تھا۔ وائیکو اپنی بیوی کے اس خاص انداز کو کافی دنوں تک محسوس کرتا رہا اور اس میں کسی قسم کی تبدیلی نہ پا کر ایک دن اس نے اپنی بیوی سے دریافت کیا۔
‘‘میری سمجھ میں نہیں آتا کہ تم اپنے بال ہمیشہ اسی ایک انداز میں کیوں بناتی ہو۔ میرا خیال ہے کہ اگر تم اس طریقے میں کچھ تبدیلی کرلو، تب بھی تم خوبصورت نظر آؤ گی۔’’
جواب میں اس کی بیوی نے بالوں کو ایک طرف ہٹا کر وہ حصہ اس کے سامنے کردیا۔ بھنووں کے اوپر پیشانی پر ایک بدنما زخم کا نشان بنا ہوا تھا۔
‘‘اوہ….’’وائیکو نے کہا۔‘‘تمہیں یہ زخم کیسے لگا؟’’
‘‘میں اس وقت چھوٹی تھی۔’’ لڑکی نے کہا۔‘‘میرے والد کا انتقال ہوچکا تھا اور پھر انہی دنوں میری ماں اور بھائی بھی چل بسے۔ مجھے میری آیا نے اپنے پاس رکھ لیا۔ میرا کوئی قریبی عزیز بھی شہر میں موجود نہ تھا۔ میری آیا سبزیاں بیچ کر گزر بسر کرتی تھیں اور ہر وقت مجھے اپنے پاس رکھتی تھیں۔ وہ ایک بے حد نیک عورت تھیں۔ ایک روز وہ مجھے لٹا کر کسی اور کام میں لگی ہوئی تھیں کہ اچانک کوئی بدمعاش ادھر آیا اور بلاوجہ چاقو سے مجھ پر وار کر کے بھاگ گیا۔ اس کا چاقو میرے سر میں اچٹتا ہوا لگا تھا۔ میری قسمت اچھی تھی کہ میں بچ گئی۔ یہ اسی کا نشان ہے۔ جب سے میں نے ہوش سنبھالا تو زخم کے اس بد نما داغ کو چھپانے کے لیے ہمیشہ اسے بالوں کے اندر رکھتی ہوں۔’’
‘‘کیا اس آیا کی بینائی کمزور تھی….؟’’وائیکو نے حیرت سے پوچھا
‘‘ہاں اسے کم نظر آتا تھا۔’’لڑکی نے چونک کر کہا۔’’مگر تم کو یہ کیسے معلوم ہوا….؟’’
‘‘یہ بڑا لمبا قصہ ہے۔’’وائیکو نے افسردگی سے کہا….پھر اس نے پوری داستان دہرادی۔ اس کے بعد وائیکو نے پوچھا ‘‘لیکن جب تم اپنی آیا کے پاس پرورش پا رہی تھیں تو یہ تمہارے مجسٹریٹ چچا کہاں تھے….؟’’
لڑکی نے جواب دیا‘‘یہ ان دنوں کہیں اور تھے، پھر جب میں آٹھ سال کی ہوگئی تو میرے چچا کو کہیں سے میرا پتہ چلا اور انہوں نے میری آیا سے مجھے واپس لے لیا۔ آیا بھی مرتےدم تک میرے ساتھ ہی رہی۔’’
وائیکو نے بوڑھے کی بابت سوچتے ہوئے آپ ہی آپ کہا….‘‘تو بڑے میاں تم نے سچ ہی کہا تھا کہ انسانوں کی شادیاں آسمانوں ہی میں مقرر کر دی جاتی ہیں۔’’
چند سالوں کے بعد ان کے ہاں لڑکا پیدا ہوا جو بڑا ہوکر کسی اعلیٰ عہدے پر فائز ہوا اور اس کی وجہ سے وائیکو اور اس کی بیوی نے بڑی شہرت اور عزت حاصل کی۔
گویا بوڑھے فرشتے کی یہ دوسری پیشنگوئی بھی درست ہی ثابت ہوئی۔

[ چین کے تینگ دورTang Dynastyحکومت کے وائیکو Wei Gu اور یو لاؤ Yue Lao کی یہ داستان old man under the moon دراصل ایک چینی لوک کہانی ہے جسے کئی مصنفین نے اپنے اپنے انداز سے تحریر کیا ہے۔]

افسانہ

اخلاص اور محبتوں میں ڈوبا ہوا خاندان، امّی چولہے کے سامنے کھڑی روٹیاں بیل رہی ہیں ۔ چچی جان چٹائی پر بیٹھی سبزی کاٹ رہی ہیں ۔ رُخسانہ پھوپھی دھوبن کو کپڑے دے رہی ہیں ۔ دادی امّاں تخت پر بیٹھی پان لگارہی ہیں ۔ دادا جان بازار سے سودا سلف لانے جاچکے ہیں ۔دالان میں چھوٹے چھوٹے پنگوڑوں میں رضیہ اور الطاف ہاتھ پیر مار رہے ہیں ۔ ابّا جان اخبار کی تازہ خبروں میں اُلجھے ہوئے ہیں اور چچا جان آئینے کے سامنے کھڑے بال سنوار رہے ہیں ۔ رحیمن بوا صحن میں برتن مانج رہی ہے ۔ صحن کے ایک کونے میں بکریاں ممیا رہی ہیں ۔ مُرغیاں زمین کُرید رہی ہیں اور کچھ فاصلے پر کھڑا ٹامی دُم ہلا رہا ہے ۔
یہ سارا منظر ٹکڑوں ٹکڑوں میں جمع ہوتا ہے اور پھر ساکت ہوجاتا ہے ۔ کچھ دیر اُسی طرح رُکا رہتا ہے اور پھر آہستہ آہستہ دھندلا جاتا ہے ۔
۔۔۔۔۔۔۔۔۔۔۔۔۔
منّو میاں روتے ہوئے گھر میں داخل ہوتے ہیں ۔
گھٹنے کے پاس پاجامہ کھسک گیا ہے ۔ خون کا ایک چھوٹا سا دھبّہ اُبھر آیا ہے ۔
” منّو میاں اسکول کی سیڑھیوں پر سے گِر گئے ہیں ۔۔۔! “ رمضانی اِطلاع دیتے ہوئے اُن کا بستہ کھوٹی سے ٹا نگتا ہے ۔
ساری نگاہیں برق رفتار منّو میاں کی جانب دوڑتی ہیں ۔
” ہائے میرا بچّہ ۔۔۔ ! “ امّی جان بے تحاشہ دوڑتی ہوئی آتی ہیں اور گود میں اُٹھالیتی ہیں ۔
” منّو میاں کیسے گِر گئے ۔۔۔ ؟ “ چچی جان رمضانی پر برس رہی ہیں ۔ رخسانہ پھو پھی صحن سے زخمِ حیات کا پتہ لے کر دوڑتی ہوئی آتی ہیں ۔
” ہائے ہائے ۔۔۔ یہ اسکول والے خدا جانے اتنی سیڑھیاں بنواتے کیوں ہیں ۔۔۔؟ “ دادی امّاں بھی کسی طرح منو میاں کے پاس پہنچ گئی ہیں ۔
منّو میاں ہنوز ٹُھنک رہے ہیں ۔
کوئی اُن کے سر پر ہاتھ پھیر رہا ہے ۔
کوئی اُنھیں پنکھا جھل رہا ہے ۔
اُن کے سامنے ٹافیوں کا انبار لگ گیا ہے ۔
رخسانہ پھو پھی معمولی زخم کو صاف کر کے زخمِ حیات کا پتہ باندھ رہی ہیں ۔ منو میاں کے چہرے پر مسکراہٹ آجاتی ہے ۔
یہ منظر بھی کچھ دیر جھلملاتا ہے اور پھر آہستہ آہستہ معدوم ہوجاتا ہے ۔
۔۔۔۔۔۔۔۔۔۔۔۔۔۔۔۔۔
برسات کا موسم ٹ رِم جھم پھواریں برس رہی ہیں ۔ ٹھنڈی ہوائیں چل رہی ہیں ۔ صحن پانی سے بھر گیا ہے ۔ باورچی خانے میں اینگٹھی پر مکئی کے بُھٹے بُھنے جا رہے ہیں ۔ کھپریل کی چھت سے کہیں کہیں پانی ٹپک رہا ہے ۔
دالان میں تخت پر دادا جان آنکھیں موندے حُقّہ گُڑ گُڑا رہے ہیں ۔ ابّا جان اور چچا جان ابھی تک دفتر سے واپس نہیں آئے ۔ رخسانہ پھو پھی دوڑ دوڑ کر بُھنے ہوئے بُھٹّے ایک ایک تک پہنچا رہی ہیں ۔ امّی جان اور چچی جان آپس میں گفتگو کر رہی ہیں ۔
منّو میاں کاغذ کی ناو
¿وں سے ایک بحری بیڑہ تیار کر چکے ہیں ۔ اُن کے عقب میں رضتہ اور الطاف کھڑے ہیں ۔ دادی اماں مسلسل ٹوک رہی ہیں کہ بچّوں کو روکو ، پانی میں بھیگ جائیں گے تو بیمار ہوجائیںگے ۔ صحن کی جانب قدم اُٹھانے کے لیے منو میاں مچل رہے ہیں ۔ دادی امّاں اُنھیں ڈپٹ رہی ہیں ۔ وہ تصّور میں اُنھیں منہ چڑھاتے ہیں اور پھر رخسانہ پھو پھی کی جانب ملتجی نظروں سے دیکھتے ہیں ۔ وہ دوڑی دوڑی اُن کے پاس پہنچتی ہیں اور دوسرے ہی لمحے بحری بیڑہ روانہ ہوجاتا ہے ۔ منّو میاں تالیاں بجاتے ہیں ۔ امّی جان کے چہرے پر مسکراہٹ کِھل اُٹھتی ہے ۔ چچی جان اپنی جگہ سے چیخ رہی ہیں ، ” ارے پائینچے تو اُوپر کرلو ۔ بھیگ جائیں گے تو آفت آجائینگی ۔ ۔۔ ! “
ہنسی مذاق کے پھوارے چھوٹ رہے ہیں ۔
دادی امّاں کا موڈ خراب ہوگیا ہے ۔ وہ ہر ایک کی طرف غصیلی نظروں سے دیکھ رہی ہیں لیکن سب ہی کا موڈ شوخ ہوگیا ہے ۔
امّی جان اور چچی جان آنکھوں آنکھوں میں کچھ اِشارے کرتی ہیں ۔ رخسانہ پھو پھی کی آنکھیں بھی خوشی سے چھلک اُٹھی ہیں ۔ اور پھر دادی امّاں اور دادا جان کو چھوڑ کر گھر کے سارے ہی افراد صحن میں پہنچ گئے ہیں اور رِم جھم پھواروں کا لطف اُٹھارہے ہیں ۔
دادی امّاں غُصّے کے مارے پن کُٹّی میں تیز تیز پان کوٹ رہی ہیں ۔
پورا منظر آنکھوں کے فریم میں ٹھہر گیا ہے اور پھر تھمے ہوئے پانی میں جیسے ہی کوئی کنکری گِرتی ہے اور ارتعاش اُن سارے بننے والی تصویروں کو غائب کرنے لگتا ہے ۔ ایسے ہی یہ منظر بھی غائب ہوجاتا ہے ۔
۔۔۔۔۔۔۔۔۔۔۔۔۔۔۔۔۔۔۔
پتہ نہیں امّی جان اور ابّا جان کے درمیان کب حُجّت ہوگئی ہے ۔ امّی جان شرمندہ شرمندہ سی ہیں ۔ ابّاجان فجر کی نماز سے فراغت پانے کے بعد دوبارہ بِستر پر لیٹ گئے ہیں ۔ امّی جان بے سبب بار بار کمرے میں چکّر لگارہی ہیں ۔ کسی نہ کسی بہانے اپنی موجودگی کا احساس دِلا رہی ہیں لیکن ابّا جان گھڑی کی سوئیوں کو بِنا مقصد گھور رہے ہیں ۔
سامنے ٹیبل پر چائے اور بٹر ویسے ہی پڑے ہیں ۔
ناشتے کے دستر خوان پر ابّا جان کی غیر مو
¿جودگی کو سبھی محسوس کرتے ہیں ۔ امّی جان سے سوالات پوچھے جا رہے ہیں لیکن جواب میں اُن کے چہرے کا رنگ فق ہو گیا ہے اور آنکھوں میں اُمڈے ہوئے آنسوں آپ ہی آپ ضبط ہوجاتے ہیں ۔
دادی امّاں کی پیشانی پر فِکر مند لکیریں اُبھرتی ہیں ۔
پورے گھر میں ایک تناو
¿ کی سی کیفیت ہے ۔ امّی جان ابّا جان کا پسندیدہ حلوا تیار کر رہی ہیں ۔ دادی امّاں ابّا جان کے پاس بیٹھی ہیں اور اُن کے سر پر ہاتھ پھیرتے ہوئے پوچھ رہی ہیں ، ” بیٹے کیا تمہاری طبعیت خراب ہے ۔۔۔؟ “
ابّا جان مسکراکر اُن کی طرف دیکھتے ہیں ، ” نہیں تو ۔۔۔ ؟ “
” پھر تم ناشتے کے لیے کیوں نہیں آئے ۔۔۔؟ “
ابّا جان خاموش ہیں ۔
” بھابھی جان آپ کے لیے حلوا تیار کر رہی ہیں۔! “ چچی جان بھی وہاں پہنچ گئی ہیں ، ” بھائی میاں بیچاری صبح سے بہت ہی اُداس ہے ۔ ۔۔ کیا ہوگیا آپ کو ۔۔۔؟ “
” مجھے نہیں کھانا ہے حلوا ۔۔۔! “ ابّا جان کا روکھا سا جواب فضاءمیں بلند ہوتا ہے ۔
” ارے ۔ ! “ دادی امّاں پچکارتی ہیں ، ” بیٹے یہ کُفرانِ نعمت ہے ۔۔۔ اللہ ناراض ہوتا ہے ۔“
” بھائی میاں۔۔۔ ! “ رخسانہ پھو پھی ابّا جان کے پائینتی کھڑی ہیں ، ” میں آپ کے لیے ٹماٹر کی چٹنی تیار کرتی ہوں ۔ وہ تو آپ بہت شوق سے کھاتے ہیں ۔ “
ابّا جان کے چہرے پر پھیکی سی مسکراہٹ نمودار ہوتی ہے ۔
” چل اُٹھ ۔۔۔! “دادی امّاں اُنھیں ٹھوکا دیتی ہیں ، ” چھوٹی بہن کو کیوں ناراض کرتا ہے ۔۔! “
” اچھا بھائی میاں مجھ سے کہیے میں کیا بناو
¿ں آپ کے لیے ۔۔۔؟ “ چچی جان سوال کرتی ہیں ۔
سارے فِکر مند چہرے ابّا جان کو تک رہے ہیں ۔ اچانک ان کے چہرے کی پھیکی مسکُراہٹ مسرت میں تبدیل ہو جاتی ہے ۔
” دُلہن بیگم دستر لگاو
¿۔۔۔ ! “ دادی امّاں کا حُکم جاری ہوتا ہے اور پھر دستر خوان سج جاتا ہے ۔ ابّا جان کھانا کھا رہے ہیں ۔ سب اُنھیں گھیرے ہوئے ہیں اور حلوا اُن کا حلق میٹھا کر رہا ہے ۔ سب کے چہروں پر خوشی کھِل اُٹھتی ہے ۔
یہ منظر بھی ٹھہر جاتا ہے ۔ کچھ دیر تک جِھلملاتا ہے اور پھر جِس طرح ہوا کے بگولے سوکھے پتوں کو اُڑالے جاتے ہیں آنکھوں سے یہ منظر بھی اُسی طرح اُڑ گیا ۔
۔۔۔۔۔۔۔۔۔۔۔۔۔۔۔۔
گھر کے باہر تانگے کھڑے ہیں ۔ کوچوان پردے لگا رہے ہیں ۔ گھر میں سب بن سنور رہے ہیں ۔ایک دوسرے سے آنکھوں آنکھوں میں اِشارے ہو رہے ہیں ۔ خوشی کی لہر گھر پر چھائی ہوئی ہے ۔ دادی امّاں پان کوٹ رہی ہیں ۔ دادا جان اپنے پان کا انتظار کر رہے ہیں ۔ رخسانہ پھو پھی جلدی جلدی بال سنوار رہی ہیں ۔
” یہ سب لوگ آج کہاں جارہے ہیں ۔۔۔؟ “ دادا جان دادی امّاں سے دریا فت کرتے ہیں ۔ ، ” وحید میاں کے کسی دوست کے گھر میلاد کی محفل ہے ۔ “
دادی امّاں کا یہ جملہ رخسانہ پھو پھی کے کانوں سے ٹکراتا ہے ۔ اُن کے چہرے پر مسکراہٹ پھیل جاتی ہے اور وہ دِل ہی دِل میں بڑ بڑاتی ہیں ، دادا جان یہ محفلِ میلاد کی تیاری نہیں ہے ۔ ہم لوگ فلم مغلِ آعظم دیکھنے جا رہے ہیں ۔
” ارے بھئی تیار ہوئے یا نہیں ۔۔۔؟ “ ابّا جان کی آواز گونجتی ہے ۔
” بھابھی جان چلیے بھی ۔ ۔۔ اگر محفلِ میلاد شروع ہوگئی تو ابتدائی حصّہ چھوٹ جائے گا ۔۔۔ اور پھر کیا خاک مزہ آئیگا ۔۔۔؟ “
امّی جان ہنس پڑتی ہیں ۔ چچی جان برقعہ پہن چُکی ہیں ۔ امّی جان اپنی چپل تلاش رہی ہیں ۔ رخسانہ پھو پھی کا سر دوپٹّے سے ڈھپ جاتا ہے اور چچا جان گھر سے باہر قدم اُٹھاتے ہیں ۔
تانگے موہن ٹاکیز کی طرف دوڑنے لگتے ہیں اور اندر سے گُھٹی گھُٹی آوازیں نکل رہی ہیں ۔ بسم اللہ بسم اللہ بسم اللہ ۔۔۔
یہ منظر بھی ڈوبتے سورج کی طرح اُفق کی دھلیز پر کچھ لمحے ٹھہر جاتا ہے اور پھر ذہن کا اسکرین دُھل جاتا ہے ۔
گھر میں سنّاٹا ڈسنے لگتا ہے اور کوئی بھٹکی ہوئی چِڑیا اچانک کمرے میں داخل ہوکر پھڑ پھڑانے لگتی ہے ۔
۔۔۔۔۔۔۔۔۔۔۔۔۔۔۔۔۔
گھر کے باہر نوبت بج رہی ہے ۔ آخر دادا جان قاضیِ شہر جو ہیں ۔ حمّام میں نہانے کے لیے نمبر لگے ہوئے ہیں ۔ امّی جان سوئیاں اُبال رہی ہیں ۔ چچی جان شیر خورمے کا سامان تیار کر رہی ہیں ۔ رخسانہ پھوپھی خالی سماور میں پانی اونڈھیل رہی ہیں ۔ سماور کی نالی سانچے کوئلوں سے دہک رہی ہے ۔ دادی امّاں اپنی نگرانی میں رحیمن بُوا سے فرش بچھوا رہی ہیں ۔ ابّا جان غسل کرچکے ہیں ۔ چچا جان اپنا تولیہ ڈھوندھ رہے ہیں ۔ دادا جان کی وقفے وقفے سے آواز اُبھر رہی ہے ، ” ارے میاں جلدی کرو ۔اگر قاضی اور اُس کے گھر والے ہی عیدگاہ دیر سے پہنچیںگے تو عام لوگوں پر اس کا کیا اثر پڑےگا۔۔۔؟ “
رخسانہ پھو پھی منّو میاں کی شیروانی کے بٹن لگا رہی ہیں ۔ باورچی خانے سے میٹھی میٹھی خوشبو مہک رہی ہے ۔ دادی امّاں تخت پر سوار ہوگئی ہیں اور اُن کے ہاتھ تیزی سے پان کے بیڑے تیار کر رہے ہیں ۔ آج چھوٹوں کو عیدی کے ساتھ ہی ساتھ پان کھانے کی بھی اجازت ہے ۔ ورنہ عام دنوں میں پان کھانے پر سزا ملتی ہے ۔
گھر کے باہر بستی کے لوگ جمع ہوگئے ہیں ۔ سب کے چہروں سے خوشی جھلک رہی ہے ۔ آگے نوبت بج رہی ہے اور پیچھے دادا جان کی قیادت میں قافلہ عیدگاہ کی جانب روانہ ہوگیا ہے ۔
یہ منظر بھی بہت دیر تک یونہی ساکِت رہا ۔ پھر نوبت کی آوازیں بند ہوگئیں ۔ قافلے کے افراد کم ہوتے گئے اور پھر یہ منظر بھی ڈوب گیا ۔
۔۔۔۔۔۔۔۔۔۔۔۔۔۔۔۔
” امّی جان ۔۔۔منّو بھائی کا غُصہ ابھی تک نہیں اُترا ۔۔۔۱“ چھوٹی بہن رضیہ نے اطلاع دی ۔
” کیا مشکل ہے ۔ یہ لڑکا بہت ہی ضدّی ہوگیا ہے ۔۔۔! “ امّی جان اپنی جگہ سے اُٹھ کھڑی ہوئیں ۔
” ہاں ۔۔۔! بچپن ہی سے تم نے اُسے سر چڑھا رکھا ہے ۔۔۔! “ ابّا جان نے دوبارہ اخبار کے صفحات میں اپنے آپ کو جھونک دیا ، ” گریجویٹ ہوگیا ہے لیکن عقل نام کو نہیں ہے ۔ “
” تم چپ رہو جی ۔۔۔! “ امّی جان سیدھے منو بھائی کے کمرے میں داخل ہوتی ہیں ، ” دیکھو بیٹے کھانا کھالو ۔ کہہ تو رہی ہوں کہ بندوق دلادوں گی ۔۔۔ بس ذرا صبر کرو ۔۔۔ ! “
منّو میاں پلنگ پر اوندھے پڑے ہیں ۔
” ارے منو میاں مان بھی جاو
¿ ۔۔۔! “ چچی جان بھی وہاں آجاتی ہیں ، ” دیکھو میں تمہارے لیے گاجر کا حلوا لے کر آئی ہوں ۔۔۔! “
منّو میاں اُسی طرح پلنگ پر اوندھے پڑے رہے۔
” منّو سے مُنیر ہوگیا لیکن حرکتیں وہی ہیں ۔۔۔! “ ابّا جان نے زور سے کھنکھارا ۔
” ارے بچّے اگر ضدّ نہ کریں تو کون کرے گا ۔۔۔؟ “ دادی امّاں لکڑی ٹیکتے ہوئے وہاں پہنچتی ہیں ، ” بندوق ہی تو چاہیے نا ۔۔۔؟ میں دِلا دیتی ہوں ۔۔۔! “ دادی امّاں نے روپوں سے بھری تھیلی منو میاں کے سامنے رکھ دی ۔
” سچ دادی امّاں ۔۔۔؟ “ منیر میاں ایکدم خوشی سے اُچھل جاتے ہیں ۔
” ہاں ۔۔۔ مگر پہلے تجھے کھانا کھانا پڑے گا ۔۔۔! “
اور پھر کئی فائر گونجتے ہیں ۔
یہ منظر بھی آنکھوں میں فریز ہوجاتا ہے اور کچھ ہی دیر کے بعد آپ ہی آپ تحلیل ہوجاتا ہے ۔
۔۔۔۔۔۔۔۔۔۔۔۔۔۔۔
” مُنیر میاں یہ کھڑ کی سے کیا تاک جھانک کرتے رہتے ہو ۔۔۔؟ “ چچی جان نے کان کھینچا ، ” لگتا ہے اب تمہارا بیاہ کردینا چاہیے ۔۔۔! “
” ہاں ۔۔۔ ! “ منیر میاں نے شرارت بھری مسکراہٹ کے ساتھ جواب دیا ، ” لیکن رخسانہ پھو پھی کی طرح نہیں ۔ “
” کیوں ۔۔۔؟ “ چچی جان کی آنکھیں حیرت سے پھیل جاتی ہیں ، ” اُس کی شادی میں کیا خرابی تھی ۔۔۔ ؟ “
” ارے وہ بھی کوئی شادی تھی ۔نہ اُن کی مرضی پوچھی گئی اور نا ہی شادی سے پہلے اُنھیں پھو پھا صاحب کو دکھایا گیا ۔ بس دُلہن بنادیا تھا و
¿پ لوگوں نے ، اور وہ بیچاری روتی بسورتی سسرال چلی گئیں ۔ “
” سن لڑکے ۔۔۔! “ چچی جان نے مصنوعی غصّے سے کہنا شروع کیا ، ” شادی پر ہر لڑکی روتی ہے لیکن دولہا کے ساتھ جانے پر نہیں ، بلکہ مائیکے کے چھوٹنے کے غم میں ۔۔۔ دیکھا نہیں تم نے ۔۔۔وہ اپنی سسرال میں کس قدر خوش ہے ۔۔۔! “
منیر میاں لاجواب ہوگئے ۔
” لیکن تیری شادی تو میں اپنی پسند سے کرونگی ۔۔“
” لگتا ہے مجھے پھر ایک بار اور روٹھنا پڑے گا ۔ “
دونوں کا قہقہہ فضا میں بلند ہوتا ہے ۔
پھر شہنائیاں گونج اُٹھیں ۔ منیر میاں اپنی پسند کی بیوی لے آئے اور سارا گھر خوشیوں سے بھر گیا ۔
یہ منظر بھی جس طرح اُبھرا تھا اُسی طرح اُبلتے دودھ کی طرح خود ہی بیٹھ گیا ۔
پتہ نہیں یادوں کے جگنو آج میری آنکھوں میں کیسے در آئے ہیں ۔ جانے کتنے ہی منظر میری آنکھوں میں اُبھرے اور ڈوب گئے ۔۔۔ اور پھر وہ مناظر بھی میں نے دیکھے جو میرے چاہنے نہ چاہنے سے پرے وقت نے مجھے دکھایا ۔ سارا خاندان بکھر گیا ۔ دادا جان تو پہلے ہی رخصت ہوگئے تھے پھر دادی امّاں بھی چلی گئیں ۔ اس کے بعد اِسی آبائی گھر میں پہلی بار دو چولہوں سے آگ روشن ہوئی اور وہ وہ چیزیں نظر آنے لگیں جنھیں پہلے کبھی کسی نے دیکھا بھی نہیں تھا ۔ دیکھتے ہی دیکھتے آبائی گھر فروخت ہوگیا ۔ سارا شیرازہ بکھر گیا ۔ چچا جان شالیمار کالونی کے ایک فلیٹ میں منتقل ہوگئے اور ہم لوگ روشن پور میں آباد ہوگئے ۔۔۔ اب نہ ابّا جان باقی ہیں اور نا ہی امّی جان ۔۔۔ کل شام بیوی سے ان بن ہوگئی تھی ۔تب سے تنہا بھوکا پیاسا پلنگ پر اوندھا پڑا ہوں ۔ منانے والی کوئی آواز میرے کانوں تک نہیں پہنچ رہی ہے کیونکہ مقابل کے کمرے میں ناراض بیوی اور بچّے ٹی۔ وی دیکھ رہے ہیں اور میں انتظار کر رہا ہوں کہ کوئی چُپکے سے آکر مجھے منا لے ۔

ملزم ۔۔۔!
کیا تم اس بات کا اقرار کرتے ہو کہ تم ایک بےحیا، بےشرم انسان ہو۔ تم سڑکوں پر ایسے پھٹے ہوئے کپڑے پہنے پھرتے ہو، جس میں تمہارا بدن نہیں چھپتا۔ تم اپنے ننگے بدن کی نمائش کرنے گرلز کالج کے سامنے بیٹھے رہتے ہو۔ تمہیں دیکھ کر کالج کی لڑکیاں شرم سے مونہہ چھپا لیتی ہیں۔
تم نے اپاہج ہونے کا بہانہ کر کے اپنے کنبہ کی ذمہ داری چھوڑ دی ہے۔
تم نے اپنے بچے کے ہاتھ سے روٹی چھین کر اسے دھکیل دیا تھا!
تم ایک پیشہ ور قاتل ہو۔
تم نے اب تک چار قتل کیے ہیں۔
ایک سیاسی لیڈر کو اس لیے مار ڈالا تھا کہ اس نے اپنا کام تم سے کروا کے صرف سو روپے کا نوٹ تمہیں دینا چاہا تھا۔
تم نے ایک حلوائی کا قتل اس لیے کیا تھا کہ وہ سڑ جانے والی مٹھائیاں کوڑے میں پھینک رہا تھا۔
تم نے ایک پجاری کو اس لیے مار ڈالا تھا کہ تمہارا نام عبدالخالق ہے اور اس نے تمہیں مندر کا پرساد دینے سے انکار کر دیا تھا۔
تم نے ایک منسٹر کا قتل اس لیے کیا تھا کہ منسٹر بننے کے بعد اس نے بھیک مانگنے کو جرم قرار دیا تھا۔
تم ایک ڈھونگ رچانے والے بہروپیے ہو۔
تمہیں جو سیاسی پارٹی اپنے ساتھ لے جائے تم اس کے ساتھ چلے جاتے ہو۔
تمہارا کوئی مذہب نہیں ہے۔ تمہارا نام عبدالخالق ہے، لیکن تم کبھی مسجد نہیں گئے۔
تم دھوکے باز ہو۔ جب کوئی تمہیں بھیک دیتا ہے تو تم ان پیسوں پر تھوک کر واپس کر دیتے ہو۔
تم کپڑوں کی ایک شاندار دکان کے سامنے بیٹھے رہتے ہو۔ تمہارے بدن کی گندگی اور وحشت ناک صورت دیکھ کر دکان میں آنے والے کسٹمرس لوٹ جاتے ہیں۔ کئی بار تمہیں وہاں سے اٹھایا گیا، مگر تم باز نہیں آتے۔
تم انسان نہیں، کتے ہو۔ سڑکوں کے آوارہ کتوں کے ساتھ کچرے کے ڈھیر میں چھپی ہوئی ہڈیاں اور غلاظت بھرے کاغذ چباتے ہو۔
تم کتوں کے بچوں کے ساتھ فٹ پاتھ پر سوتے ہو۔
بولو ۔۔۔ جواب دو ناں!

چپ رہنے کا فن خوب سیکھا ہے تم نے ۔۔!
تم نے چیف منسٹر کی کار پر پتھر پھینکا جس سے ان کا ڈرائیور زخمی ہو گیا۔
تم سڑکوں پر پرائم منسٹر اور پریزیڈنٹ کو گالیاں دیتے ہو۔
تم اپنے آپ کو پریزیڈنٹ سے بھی بڑا آدمی سمجھتے ہو۔
کیا تم نہیں جانتے کہ ملک کے صدر سے اپنے آپ کو بڑا سمجھنا ایک حماقت ہے ۔۔۔!
تم ایک مداری کی طرح بازار میں جہاں بیٹھتے ہو، اپنے آس پاس بھیڑ جمع کر لیتے ہو۔ تمہارے بیوی بچے تمہیں پہچاننے سے انکار کرتے ہیں۔
ڈاکٹری رپورٹ سے ظاہر ہوتا ہے کہ تم پاگل نہیں ہو۔ اس لیے تمہیں کسی اسپتال میں نہیں رکھا جا سکتا۔
تم بھکاری نہیں ہو، اس لیے کوئی دھرم شالہ، کوئی ہوم تمہیں رکھنے کو تیار نہیں ہے۔
تم پاگل ہونے کا ڈھونگ رچاتے ہو، آسمان پر پتھر پھینکتے ہو اور کہتے ہو ہر دکھ اوپر سے آتا ہے۔
کیا تم اپنی صفائی میں کچھ کہنا چاہتے ہو ۔۔۔؟
یاد رکھو کہ جج صاحب کے سامنے تمہیں اقرار کرنا ہوگا کہ سچ کے سوا تم کچھ نہ کہو گے۔
کیا تم نیک چلن بھکاریوں کی طرح بھیک نہیں مانگ سکتے تھے ۔۔۔؟
اتنے قتل کر سکتے ہو ، مگر دو گز کپڑا کہیں سے چرا کے اپنا تن نہیں ڈھانک سکتے تھے؟

جواب دو ۔۔۔!

تمہاری خاموشی تمہارا جرم ثابت کر رہی ہے!!

“می لارڈ ۔۔۔ ملزم کا ندامت سے جھکا ہوا سر اور اس کی خاموشی اس بات کا ثبوت ہے کہ ملزم اپنے جرم کا اقرار کرتا ہے۔”

“می لارڈ !
اس کیس کے ختم ہونے سے پہلے میں کچھ کہنا چاہتا ہوں۔”

“تم کون ہو ۔۔۔؟ کس کے وکیل ہو ۔۔۔؟”

“میں قانون، مذہب، تہذیب، سماج، سب کی وکالت کر رہا ہوں۔ می لارڈ! میں چاہتا ہوں کہ اس مجرم کو ایسی کوئی سزا نہ دی جائے کہ یہ ختم ہو جائے ۔۔۔ اگر یہ ختم ہو گیا تو دنیا کا ہر مسئلہ ختم ہو جائے گا۔ ہم بھیک کسے دیں گے؟ رحم کس پر کریں گے؟ خدا کے خوف سے ڈرنے والے کہاں سے لائیں گے؟ اگر آج اسے پھانسی دے دی گئی تو سپریم کورٹ کی ضرورت نہیں رہے گی۔
می لارڈ! مجھے یہ بات کہنے کی اجازت دیجیے کہ مجرم کا وجود ہماری بقا کے لیے ضروری ہے ۔۔۔
اس کے لیے عمر قید کی سزا ہی مناسب ہے!!”

 میں نے 16 مئی 2019 کی شام کو طارق کے ووڈلینڈ، ہیوسٹن کے مکان کی لائبریری کی ایک الماری کھولی تو ایک قطار میں رکھے جاسوسی ناولوں کو دیکھ کر مارٹن کوارٹر نمبر 195/3 کراچی کے کمرے کی ایک کرسی یاد آ گئی جہاں آٹھویں کلاس گورنمنٹ ہائی اسکول سیالکوٹ کے طالبعلم کے ہاتھ میں ابن صفی کا لکھا ہوا جاسوسی ناول ہوا کرتا تھا اور وہ اردگرد سے بے خبر ناول پڑھنے میں منہمک ہوتا۔ گرمیوں کی چھٹیاں اپنی بہن کے گھر گزارنے سیالکوٹ سے کراچی گیا ہوا وہ بچہ میں ہی تھا۔ اسکول سے ملا ہوم ورک کرنے اور گلی محلے کے بچوں کے ساتھ کھیلنے کے بعد میں اپنی ایک آنہ پاکٹ منی کو جیب میں ٹٹول کر قریبی لائبریری سے عمران سیریز کا جاسوسی ناول لاتا اور ایک مخصوص کرسی سنبھال لیتا جسے اس وقت چھوڑتا جب ابن صفی کے ناول کی لذت مجھے سرشار کر چکی ہوتی۔

آٹھویں کلاس سے عمران سیریز اور جاسوسی دنیا سے قائم ہونے والا تعلق کالج اور یونیورسٹی کی تعلیم مکمل ہونے تک بلاتعطل قائم رہا لیکن پھر مصروفیات زمانہ اور غم روزگار نے ابن صفی سے رابطہ پس پشت ڈال دیا۔ جب میں نے پیسہ یا پھر آنہ لائبریری سے رشتہ قائم کیا تھا تو ابن صفی کی کتابیں الٰہ آباد سے شائع ہوتی تھیں اور تب وہ بھی انڈیا ہی میں رہتے تھے اور پھر وہ کراچی منتقل ہوئے تو ایک دو جعلی عمران اور جاسوسی دنیا کے مصنف بھی میدان میں آئے لیکن کہاں ابن صفی اور کہاں جعلساز۔ ابن صفی کی جاسوسی کتب کے کردار ان کی کتب سے محبت کرنیوالوں کے فیملی ممبر بن کر ان کے ذہنوں میں رہتے اور ان کی الماریوں میں رہائش پذیر ہوتے ہیں۔ جب طویل عرصہ کے بعد ابن صفی کے ناول میری الماری سے غائب ہونے شروع ہوئے تو معلوم ہوا کہ انھوں نے صرف کمرہ بدلا ہے اور خوشی ہوئی کہ بہت سے نایاب نسخے طارق کی امریکا والی الماری میں موجود ہیں بلکہ تعداد میں بھی کئی گنا زیادہ اور بہتر حالات میں رکھے ملتے ہیں۔

ایک دلچسپ بات کا ذکر کروں کہ کئی نامور ادیب اور دانشور اپنی محفلوں اور گفتگو میں ابن صفی کا ذکر اسلیے نہیں کرتے کہ وہ اسے وہ مقام دینے سے کتراتے ہیں جو اس کے پاس بلاشبہ ہے پھر ایک اور بات کہ یہ بزعم خود بلند مقام وہ رائٹر ہیں جن کی کتب کے ایک یا دو ایڈیشن چھپے ہونگے جب کہ ابن صفی کے جاسوسی ناولوں کے ایڈیشن اس کی وفات کے 39 سال کے بعد بھی آج تک چھپتے چلے جا رہے ہیں اور ہر پبلشر انھیں بغیر اجازت شائع کرتا پایا جاتا ہے جب کہ نامور ادیبوں نے ابن صفی کی بیشتر کتب پڑھ رکھی ہیں۔ ابن صفی جن کا اصل نام اسرار احمد ہے، 1928 میں الٰہ آباد انڈیا میں پیدا ہوئے۔ انھیں اسکول کے دنوں ہی سے ادبی ذوق وشوق تھا۔ شروع میں انھوں نے شاعری سے تعلق رکھا اور اسرار ناروی کے نام سے غزل گوئی کرتے رہے۔ ان کی نظمیں اور غزلیں مقامی رسائل میں چھپتی رہیں۔ چوبیس سال کی عمر میں انھوں نے پہلا ناول ’’دلیر مجرم‘‘ کے نام سے جاسوسی کی دنیا کے لیے لکھا جو اس سیریز کا پہلا ناول تھا۔ وہ تقسیم ہند سے پہلے ہی اپنی دو سیریز جاسوسی دنیا اور عمران سیریز کے نام سے شروع کر کے ہندو پاک کے ہردلعزیز جاسوسی ناول نگاروں کے مصنف کے طور پر مشہور ہو چکے تھے۔

ان کے ناول الٰہ آباد ہی میں چھپتے اور دونوں ملکوں میں پڑھے جاتے۔ عمران سیریز سے شائع ہونے والا ان کا پہلا ناول ’’خوفناک عمارت‘‘ بھی انھی دنوں الٰہ آباد سے شائع ہوا جو پاکستان کے بُک اسٹالز اور لائبریریوں میں دستیاب تھا۔ 1956 کے اسکولوں کی موسم گرما کی چھٹیوں کے دن تھے جب کراچی میں مجھے ابن صفی کا ناؤل مارٹن کوارٹرز کی مارکیٹ کی ایک لائبریری میں ملا اور پھر عمران سیریز اور جاسوسی دنیا کے ناول آیندہ کئی دہائیوں تک باقاعدگی سے میرے زیرمطالعہ رہے۔ اگر آج بھی کوئی ان کے لکھے ہوئے ناول خریدنا چاہے تو اردو بازار لاہور کا چکر لگا لے جہاں ان کی دونوں سیریز کی پہلے ناول سے ان کے آخری ناول تک کی ناقص اور اعلیٰ کوالٹی کی پبلش ہوئی کتب موجود ہیں۔ ابن صفی نے 1950 میں اپنی دونوں کتب کو اکٹھا کر کے اسرار پبلی کیشنز کے نام سے ادارہ قائم کر لیا تھا۔ انھوں نے جاسوسی دنیا کے نام سے 124 اور عمران سیریز کے نام سے 120 یعنی کل 244 ناول لکھے۔ پہلے ناول کی اشاعت سے وفات تک 40 سال میں اڑھائی سو کے قریب کتب لکھ لینا اور وہ بھی ایک سے بڑھ کر ایک، ناولسٹ کے کمال کی مثال ہے۔

وقت گزرنے اور رائٹر کے گزر جانے کے 39 سال بعد اور پڑھنے والوں کی دلچسپیوں میں تبدیلی کے ساتھ کتب کی اشاعت یعنی ایڈیشنز میں کمی واقع ہو جاتی ہے لیکن زندہ کتابوں کے ساتھ ایسا نہیں ہوتا۔ ویسے دنیا میں بہت سے نامور ادیبوں کی زندہ کتب کی بیشمار مثالیں موجود ہیں جو اس دنیا سے گزر جانیوالوں کو اپنی ادبی اور سائنسی تخلیقات کے ذریعے صدیوں سے زندہ رکھے ہوئے ہیں۔ ابن صفی کی کتب جو یہاں طارق کی الماری میں دیکھیں، ان کے نام پڑھ کر یاد آیا کہ انھیں پاکستان میں کئی لوگوں کی ذاتی لائبریریوں میں بھی دیکھا ہے۔ چند ایک کے نام جو Telly ہوتے نظر آئے، یہ تھے، دلیر مجرم، شفق کے پجاری، ہیروں کا فریب، نیلی روشنی، آسیبی دنیا، بد روح، بھیانک آدمی، سرخ قیامت، پاور پلے، کالی تصویر۔

ابن صفی کی تصنیفات کو اگر انگریزی الفاظ میں بیان کیا جائے کہ ان میں دلچسپی کی کیا چیزیں پائی جاتی ہیں تو وہ ہیں Mystery، Adventure، Suspence اور Violence ایک ہی ناول میں دلچسپ انداز میں ان چار کا ملاپ پڑھنے والے کو کہانی میں Absorb کر لیتا ہے اور وقتی تفریح مہیا کرتا ہے۔ اسی وجہ سے ان کی اشاعت قائم ہے۔ اسی لیے جب سے Huston آنا ہوا ہے ایک ناول روزانہ پڑھتے ہوئے اسکول کی گرمیوں کی چھٹیاں اور آٹھویں جماعت کا زمانہ یاد آ کر دستک دے کر چہرے کو مسکراہٹ سے روشن کر دیتا ہے اور کبھی نہیں کہتا کہ:

یادِ ماضی عذاب ہے یارب
چھین لے مجھ سے حافظہ میرا