مفتی عزیز الرحمان نے دوران تفتیش طالبعلم سے جنسی زیادتی کا اعتراف کر لیا ہے۔ مفتی نے تفتیش میں انکشاف کیا ہے کہ ویڈیو میری ہی ہے جو صابر شاہ نے چھپ کر بنائی۔ مفتی عزیز نے ابتدائی بیان میں کہا ہے کہ طالب علم صابر کو پاس کرنے کا جھانسہ دے کر اپنی ہوس کا نشانہ بنایا۔ مفتی عزیزالرحمان نے مزید کہا کہ ویڈیو وائرل ہونے کے بعد میں خوف اور پریشانی کا شکار ہو گیا تھا۔ چنانچہ میرے بیٹوں نے صابر شاہ کو دھمکایا اور اسے کسی سے بات کرنے سے روکا۔ تاہم صابر شاہ نے منع کرنے کے باوجود ویڈیو وائرل کر دی۔ مفتی عزیز الرحمان نے کہا ہے کہ میں مدرسہ چھوڑنا نہیں چاہتا تھا اس لیے وضاحتی ویڈیو بیان جاری کیا۔ اس دوران مدرسے کے منتظمین مجھے مدرسہ چھوڑنے کا کہہ چکے تھے۔ ملزم کے مطابق مقدمہ درج ہونے کے بعد ٹاؤن شپ، شیخوپورہ اور فیصل آباد میں شاگردوں کے پاس ٹھہرتا رہا، میری اور بیٹوں کی فون لوکیشن ٹریس ہوتی رہی، اس دوران میانوالی میں چھپا ہوا تھا کہ پولیس نے گرفتار کرلیا۔
انسپکٹر جنرل پولیس پنجاب انعام غنی نے ایک ٹویٹ میں اس معاملہ کو ٹیسٹ کیس بنانے کا اعلان کرتے ہوئے کہا ہے کہ ’ہم اس معاملے کی سائنٹیفک پیشہ وارانہ تحقیقات کریں گے اور ملزم کے خلاف مقدمہ قائم کر کے عدالت سے اسے سزا دلوائیں گے۔ ہم اپنے بچوں کو ایسے جنسی درندوں سے بچانا چاہتے ہیں اور مستقبل میں معاشرے کو محفوظ رکھنا چاہتے ہیں‘ ۔ ملک کے سب سے بڑے صوبے کے پولیس سربراہ کا یہ بیان اس لحاظ سے خوش آئند ہے کہ اس میں بچوں کے خلاف جنسی جرائم کو سنجیدگی سے لینے اور ایسے جرائم میں ملوث ہونے والے افراد کو ان کے سماجی رتبہ سے قطع نظر قانون کے مطابق سزا دلوانے کا اعلان کیا گیا ہے۔
تاہم اس کے ساتھ ہی آئی جی پولیس کے بیان کے حوالے سے یہ بات بھی نوٹ کی جا سکتی ہے کہ پولیس نے اس کارروائی کا آغاز سوشل میڈیا پر یکے بعد دیگرے متعدد ویڈیو عام ہونے اور ملزم کی طرف سے ’وضاحتی ویڈیو‘ جاری ہونے کے کئی روز بعد کیا تھا۔ جرم پتہ لگتے ہی پولیس فوری طور سے ایکشن میں نہیں آئی تھی۔ اسی طرح انعام غنی کے ٹویٹ کے اس پہلو سے بھی مکمل اتفاق ممکن نہیں کہ کسی ایک معاملہ میں ملوث ایک شخص کو سزا دلوانے سے اس قوم کے بچے محفوظ ہوجائیں گے یا معاشرہ کی تطہیر کا فرض پورا کر لیا جائے گا۔
کس قدر افسوس ناک بات ہے کہ مدرسہ کی انتظامیہ اور دیگر افراد کی لاتعلقی کے علاوہ اس معاملہ میں ملک کے دینی رہنماؤں کی خاموشی اور بے اعتنائی بھی تکلیف دہ امر ہے۔ خاص طور سے اس حقیقت کی روشنی میں کہ ملزم عزیز الرحمان سیاسی طور سے بھی متحرک تھا اور جمیعت علمائے اسلام (ف) کا عہدے دار بھی رہا ہے۔ معاملہ کھلنے پر اگرچہ جمیعت علمائے اسلام (ف) لاہور کے سیکرٹری جنرل نے ضرور عزیز الرحمان کی پارٹی رکنیت معطل کرنے کا اعلان کیا ہے لیکن اس کے ساتھ ہی یہ کہہ کر کہ ’تحقیقات مکمل ہونے تک رکنیت معطل رہے گی‘ اسے معاف کرنے کا دروازہ بھی کھلا رکھا گیا ہے۔ بلکہ بیان سے یہی تاثر ملتا ہے جیسے عزیز الرحمان کی بے گناہی کا ثبوت بھی سامنے آ سکتا ہے۔ یہ کہنے میں مضائقہ نہیں ہے کہ جرم ثابت ہونے تک کسی کو قصور وار قرار نہیں دیا جا سکتا لیکن ملک میں اسلامی انقلاب برپا کرنے کی داعی جے یو آئی کو اس معاملہ کے سیاسی اور سماجی پہلو کا بھی اندازہ ہونا چاہیے تھا۔
دوسری جانب پاکستان میں معاشرتی انحطاط کا یہ عالم ہے کہ اس واقعے کے خلاف نہ تو کہیں احتجاج ہوا ہے اور نہ ہی کہیں جلوس نکلا ہے۔ چونکہ معاملہ ستر برس کے باریش مفتی صاحب کا ہے اس لیے سب کی زبانوں پر آبلے پڑ گئے ہیں، یکایک ہمارے دوستوں کے قلم کی سیاہی بھی خشک ہو گئی ہے، وہ مذہبی رہنما جو چھوٹے سے چھوٹے معاملے میں بھی ہماری گوشمالی کا کوئی موقع ہاتھ سے نہیں جانے دیتے تھے اب یوں خاموش ہو گئے ہیں جیسے کچھ ہوا ہی نہ ہو، اب کہیں سے یہ تاویل بھی نہیں آ رہی کہ اگلے روز آنے والا زلزلہ دراصل اس مکروہ گناہ کا نتیجہ تھا اور تو اور اب کسی کو سورۃ لوط کی آیات بھی یاد نہیں آ رہیں۔۔ اگر اس قسم کا واقعہ کسی با پردہ لڑکی کے ساتھ مغربی طرز کے کسی کالج میں پیش آیا ہوتا اور ملزم کلین شیو ہوتا تو اب تک ’انصاف‘ ہو چکا ہوتا۔ مگر یہاں حال یہ ہے کہ مفتی صاحب نے ڈنکے کی چوٹ پر ایک ویڈیو بیان ریکارڈ کروایا ہے جس میں وہ بدکاری کی توجیہہ دیتے ہوئے فرما رہے ہیں کہ ’اس فعل کے دوران کوئی جبر نہیں ہے اور یہ (لڑکا) آزادانہ اپنا ویڈیو خود بنا رہا ہے‘ ۔ انا للہ و انا الیہ راجعون۔
جب بھی اس قسم کا معاملہ سامنے آتا ہے تو مذہبی جھکاؤ رکھنے والے ہمارے دوستوں کی جانب سے فوراً کچھ تاویلات سامنے آ جاتی ہیں جو کچھ اس قسم کی ہوتی ہیں کہ ’ہم نے تو واقعے کی مذمت کر دی ہے، پولیس نے ایف آئی آر کاٹ دی ہے، اب قانون اپنا راستہ لے گا، ہم کب اس کا دفاع کر رہے ہیں، عدالت سے ملزم کو سزا مل جائے گی لہذا اس ایک واقعے کی آڑ میں مدرسوں کو بدنام نہ کیا جائے، اس سے کہیں زیادہ گھناؤنے واقعات مغرب میں ہوتے ہیں۔‘ وغیرہ۔ جب ایسا کوئی پرتشدد واقعہ ہوتا ہے تو پھر ہم محض یہ کہہ کر خود کو بری الذمہ نہیں کر سکتے کہ یہ بات قابل مذمت ہے تاوقتیکہ ہمارے قلم سے اسی طرح پھنکارتے ہوئے الفاظ نہ نکلیں جیسے شدت پسندانہ بیانیہ تشکیل کرتے وقت نکلتے تھے۔ یہ دلیل درست ہے کہ محض چند واقعات کی آڑ میں مدرسوں میں کو بدنام نہیں کیا جانا چاہیے مگر پھر یہی رعایت جدید اسکولوں کو بھی ملنی چاہیے، اس وقت تو ہم سب مغرب زدہ کہہ کر ان تعلیمی اداروں پر پل پڑتے ہیں جب ایسا کوئی واقعہ وہاں رپورٹ ہوتا ہے۔
معذرت کے ساتھ، ان تاویلات میں کوئی دم نہیں۔ یہ کہنا کہ ہم کب اس واقعے کا دفاع کر رہے ہیں یا ہم اس کی مذمت کر چکے ہیں، کافی نہیں۔ اگر کوئی اس واقعے کی مذمت نہیں کرے گا تو کیا اس کا دفاع کرے گا؟ یہ تو ایمان کا سب سے کمزور درجہ ہے۔ یہ درست ہے کہ ایف آئی آر کٹ چکی اور قانون اپنا راستہ لے گا مگر کیا یہی روش ہم دیگر معاملات میں بھی اپناتے ہیں؟ باقی معاملات میں تو ہم خود قانون ہاتھ میں لے کر بندے کو ’کیفر کردار‘ تک پہنچاتے ہیں، شہر کا شہر مفلوج کر دیتے ہیں، پولیس کے جوان شہید کر دیتے ہیں، اقلیتوں کی بستیوں کو آگ لگا دیتے ہیں، اب قانون کا سبق کیوں یاد آ گیا؟ لیکن چلیے اچھی بات ہے، امید ہے کہ آئندہ باقی معاملات میں بھی یہ سبق یاد رہے گا۔
مفتی عزیز الرحمان کے معاملہ میں تفتیش کے دوران پولیس کو اس پہلو پر غور کرتے ہوئے ان تمام افراد کے خلاف بھی کارروائی کرنی چاہیے جو مختلف مراحل پر اس جرم سے آگاہ تھے لیکن اس کے بارے میں پولیس کو شکایت کرنے اور معلومات فراہم کرنے میں ناکام رہے۔ اس کے علاوہ متعلقہ مدرسہ میں تعلیم پانے والے ان تمام طالب علموں سے بھی استفسار کرنے کی ضرورت ہے جو عزیز الرحمان سے تعلیم پاتے رہے تھے۔ جنسی جرم کے عادی شخص کے ہاتھ کسی بھی معصوم تک پہنچ سکتے ہیں۔ اس معاملہ میں بھی یہ دیکھنے کی ضرورت ہے کیا صرف ایک نوجوان ہی عزیز الرحمان کی زیادتی کا نشانہ بنا تھا یا کچھ دوسرے بچوں کو بھی ایسی ہی شکایت ہے۔ ان دو پہلوؤں پر کام کرنے سے ہی مستقبل میں جنسی ہوس میں ملوث افراد کو کسی ناجائز حرکت سے روکنے کا اہتمام کیا جاسکتا ہے۔
اسی طرح درسگاہوں میں جنسی زیادتی چونکہ ایک سنگین مسئلہ ہے، اس لئے ایک ٹھوس واقعہ سامنے آنے کے بعد قومی منظر نامہ پر متحرک اور فعال علمائے کرام کا اخلاقی و دینی فرض تھا کہ وہ اس ذہنیت اور جرم کے خلاف آواز بلند کرتے۔ مگر جس طرح اس معاملے پر خاموشی اخیتار کی گئی ہے وہ بہت افسوس ناک ہے ۔ ریپ ایک سنگین جرم ہے چاہے کوئی مفتی کرے یا عام آدمی اور اگر عام آدمی کے لیے قانون ہے تو مفتی صاحب کے لیے بھی وہی قانون ہے۔ اگر فتوی بریگیڈ دیگر افراد کے اس طرح کے جرم پر ملک میں پرتشدد مظاہرے کرتے ہیں تو اس معاملے میں بھی کرنے چاہیے تھے۔ مگر یہ خاموشی ان کی اخلاقی پستی کی مظہر ہے۔
پیر، 21 جون، 2021
شفقنا اردو
ur.shafaqna.com
نئے ورلڈ آرڈر میں پاکستان کے مقام کا تعین کا اندازہ کوئی بھی شخص کر سکتا ہے۔ پاکستان کی حالیہ پالیسی ظاہر کرتی ہے کہ ایک ایسی ریاست جو مذہب کو تمام چیزوں سے بالاتر تصور کرتی ہے وہ چین اور امریکہ کے مابین متوازن رستے کی تلاش میں ہے۔ ایک ایسا ایٹمی ملک جس کا نظام تعلیم سائنس کی بجائے رٹا اور قرآن کو حفظ کرنے پر مشتمل ہو یقینی طور پر بیجنگ اور واشنگٹن کے لیے کسی خاص اہمیت کا حامل نپیں ہے۔ پاکستان ایک طویل عرصے سے چین کے ساتھ گہرے دوستانہ تعلقات اور سٹرٹیجک پارٹنرشپ کا دعوی کرتا ہے تاہم اب پاکستان ایک آزادانہ رستے کی تلاش میں ہے۔ اسلام آباد اور بیجنگ کے مابین تعلقات میں اضافہ اس وقت دیکھنے میں آیا جب چین نے پاک چین اقتصادی راہدری کے منصوبے میں 60 بلین ڈالر کی خطیر سرمایہ کاری کی۔ جو کہ چین کے بیلٹ اینڈ روڈ منصوبے کی بنیاد ہے۔ جس میں توانائی، ٹرانسپورٹیشن اور انفرا سٹرکچر کے بہت سارت منصوبے شامل ہیں۔ بیلٹ اینڈ روڈ منصوبے کے تحت توانائی، انفراسٹرکچر اور ٹرانسپورٹیشن جیسے منصوبوں کے بوجھ تلےدبے پاکستان کو بہت احتیاط سے کام لینا ہوگا۔
اس بات کو مدنظر رکھتے ہوئے کہ سی پیک شاید پاکستان کو میری ٹائم اور لینڈ ٹرانسپورٹیشن مرکز بنا سکے پاکستان نے حال ہی میں سعودی عرب کے ساتھ گوادر میں 10 بلین ڈالر کی آئل ریفائنری پیٹرو کیمیکل کمپلیکس بنانے کا معاہدہ کیا ہے۔دونوں ممالک کراچی کی بندرگاہ کو متبادل کے طور پر دیکھ رہے ہیں۔ گوادر پورٹ کئی سالوں سے پیچیدگیوں کا شکار ہے۔ بندرگاہ کی تعمیر کئی مرتبہ روکی جا چکی ہے جس کی ایک وجہ صوبہ بلوچستان کی بلوچ قوم پرست آبادی کی بڑھتی ہوئی ناراضی ہے ۔ مقامی افراد کی جانب سے احتجاج کے بعد بندرگاہ کے گرد باڑ لگانے کا عمل روک دیا گیا تھا۔
کراچی میں ریفائنری کی تعمیر چین کی اس امید کو زک پہنچا سکتی ہے کہ گوادار بحیرہ عرب کی اولین بندرگاہ بن کر ابھرے۔ اس کے علاوہ گوادر بندرگاہ پر شبہات کی وجہ سے ہی زمینی طور پر گھرے ہوئے ممالک تاجکستان اور افغانستان چاہ بہار کی طرف دیکھ رہے ہیں۔ ابتدائی طور پر سعودی ولی عہد محمد بن سلمان کے 2019 میں دورہ پاکستان کے دوران اس ریفائنری کی تعمیر گوادر کے مقام پر ہی ہونا طے پائی تھی۔ تاہم بعد میں سعودی عرب نے ائک فزیبیلٹی رپورٹ میں دعوی کیا کہ گوادر میں پائپ لائن اور ٹرانسپورٹیشن انفرا سٹرکچر کی قلت کی وجہ سے ریفائنری کا قیام ممکن نہیں ہے اور اس طرح یہ ریفائنری کراچی سے الگ ہو جائے گی جو کہ تیل کی سپلائی کا گڑھ ہے۔
اسی طرح امریکہ کے افغانستان سے مکمل انخلا کے بعد پاکستان ممکنہ طور پر افغانستان پر نظر رکھنے کے لئے امریکی افواج کو اڈے بھی فراہم کر دے۔ اگرچہ ابھی تک امریکہ اور پاکستان اس پر متفق نہین ہوسکے تاہم اگر ایسا ہو گیا تو چین اس پر لازمی اپنا رد عمل دے گا۔ اسی طرح پاکستان کی سرحد چین کےشورش زدہ صوبے زنجیانگ کے ساتھ لگتی ہےجو کہ ایغور ترک مسلمانوں کا گڑھ ہے۔ چین کو خدشہ ہے کہ پاکستانان چند ممالک میں سے ہے جہاں شروع کے ایام میں ایغور مسلمانوں کے خلاف چینی مظالم پر آواز اٹھائی گئی تھی، وہاں سے جنگجو گروپ دوبارہ پاکستان کو لانچنگ پیڈ بنا کر چین میں پرتشدد کارروائیاں نہ شروع کر دیں۔
پاکستان کے حوالے سے چین اور امریکہ میں یہ تاثر دوبارہ ابھر رہا ہے کہ پاکستان میں جنگجو دوبارہ سر اٹھا رہے ہیں کیوں کہ پاکستان نے جو تعلیمی اصلاحات نافذ کی ہیں اس کے تحت پرائمری سطح سے لے کر جامعات تک اسلامی سلیبس کا نفاذ کیا جائے گا۔ نقادوں کا دعوی ہے کہ اس سلیبس میں 30 فیصد حصہ مذہب پر مشتمل ہوگا۔
حکومتی جماعت کے ایک رکن پارلیمنٹ محمد بشیر خان کا کہنا ہے کہ پاکستان ایک نظریاتی اسلامی ملک ہے اور ہمیں مذہبی تعلیم کی ضرورت ہے۔ میں محسوس کرتا ہوں کہ ہمارا سلیبس ابھی تک مکمل طور پر اسلامی نہیں ہے اور ہمیں اس کی اسلامائزیشن کی مزید کوشش کرنی چاہیے اور اپنے شہریوں کی اخلاقی اور نظریاتی تربیت کے لیےزیادہ سے زیادہ مذہبی مواد کی تعلیم دینی چاہیے۔ پارلیمنٹ ممبر کی اس گفتگو سے یہ ظاہر ہوتا ہے کہ پاکستان امت مسلمہ میں قیادت کے کردار کے لیے کوشاں ہے جیسا کہ سعودی عرب، عرب امارات ، ترکی ، ایران اور انڈونیشیا سافٹ مذہبی قوت کے حصول کے لیے کوشاں ہیں۔
تعلیمی اصلاحات درحقیقت عمران خان کی امت مسلمہ کے ترجمان بننے کی کوششوں کو مہمیز دے گی۔ وزیر اعظم عمران خان نے حال ہی میں فرانسیسی صدر ایمانویل میکرون پر اسلامو فوبیا کو ہوا دینے کا الزام لگایا ہے اور مطالبہ کیا ہے کہ فیس بک مسلمان مخالف خیالات پر پابندی عائد کرے۔ نقادوں کا کہنا کہ اس طرح کا نصاب ایک ایسے معاشرے کی تشکیل کا سبب بنے گا جو کہ عدم برداشت کا نمونہ ہوگا۔
ممتاز ماہر تعلیم روبینہ سہگل کا کہنا ہے کہ جب ریاست خود کو کسی ایک فقے یا مذہب کی ایک تشریح کے ساتھ خود کو جوڑتی ہے تو یہ فرقہ وارانہ فسادات کا رستہ کھول دیتی ہےجو کہ تشدد میں بدل سکتا ہے۔ حقیقت یہ ہے کہ ایک ایسا یکساں نصاب جو کہ صنفی بنیاد ، فرقہ وارانہ اور طبقاتی بنیادوں پر ہو محض سماجی اختلافات، اقلیتوں کے حقوق کو کمزور کرنے اور وفاقیت کے اصول کو پامال کرنے کا سبب بنے گی۔
سابق سینیٹر فرحت اللہ بابر نے خبردار کیا ہے کہ یکساں نصاب تعلیم مدارس کے اساتذہ کا تعلیمی اداروں میں داخلے کا رستہ ہموار کرے گا۔ یہ بات واضح ہے کہ اکثر مدارس کے طلبا کی تعلیم فرقہ وارانہ بنیادوں پر ہے تو تصور کریں کہ ان مدارس کے اساتذہ اگر مین سٹریم تعلیمی اداروں میں داخل ہو گئے تو کیا ہوگا
پیر، 21 جون 2021
شفقنا اردو
ur.shafaqna.com
وزیراعظم عمران خان نے امریکی خفیہ ادارے سی آئی اے کو افغانستان میں کارروائیوں کے لیے پاکستانی اڈے استعمال کرنے کے امکان کو سختی سے مسترد کر دیا ہے۔پاکستانی وزیراعظم نے امریکی نیوز ویب سائٹ ایکسیس (Axios) کو دیے گئے خصوصی انٹرویو میں کہا: ’افغانستان سے امریکی افواج کے انخلا کے بعد پاکستان سرحد پار سے انسداد دہشت گردی مشنز کے لیے امریکہ کو اپنی سرزمین پر اڈے استعمال کرنے کی ہرگز اجازت نہیں دے گا۔‘اس سے قبل پاکستانی وزیر خارجہ شاہ محمود قریشی بھی متعدد بار کہہ چکے ہیں کہ افغانستان سے امریکی فوج کے انخلا کے بعد کوئی فوجی اڈے پاکستان منتقل نہیں ہوں گے۔
واضح رہے کہ رواں برس 11 ستمبر تک افغانستان سے تمام امریکی افواج کے انخلا کا وقت قریب پہنچ چکا ہے اور ایسی صورت حال میں عدم استحکام کے شکار اس ملک میں انسداد دہشت گردی اور انٹیلی جنس صلاحیتوں کو برقرار رکھنا جو بائیڈن انتظامیہ کے لیے ایک اہم سوال بن گیا ہے لہذا اس صورت حال میں پاکستانی اڈوں کی امریکہ کے لیے اہمیت بڑھ جاتی ہے۔غیر ملکی افواج کا حتمی انخلا ایک ایسے وقت میں ہو رہا ہے جب کئی صوبوں میں طالبان اور افغان فورسز کے مابین لڑائی کی شدت میں اضافہ ہوا ہے۔ ایسے میں خدشہ ہے کہ انخلا کے بعد طالبان افغانستان فوج پر غلبہ پا لیں گے کیوں کہ ان کا زیادہ تر انحصار نیٹو کی حمایت، ان کی انٹیلی جنس، رسد اور خصوصاً امریکی فضائی مدد پر تھا۔یہی وجہ ہے کہ بائیڈن انتظامیہ پاکستان کے علاوہ وسطی ایشیا میں بھی افغانستان کے اندر دہشت گردوں کے نیٹ ورکس پر نظر رکھنے اور انٹیلی جنس برقرار رکھنے کے لیے اڈووں کی تلاش میں ہے۔
دوسری جانب پاکستان کا جمعہ کو کہنا تھا کہ افغانستان کے دارالحکومت کابل میں بین الاقوامی ہوئی اڈے کی سیکیورٹی کے لیے اسلام آباد کے تعاون کی کوئی تجویز زیرِ غور نہیں ہے۔ پاکستان کے دفترِ خارجہ کے ترجمان زاہد حفیظ چوہدری کا یہ بیان ایک ایسے وقت میں سامنے آیا ہے جب ترکی کے صدر رجب طیب ایردوان نے گزشتہ ہفتے نیٹو اجلاس کے موقع پر پریس کانفرنس میں کہا تھا کہ ترکی کو غیر ملکی فورسز کے انخلا کے بعد افغانستان میں سیکیورٹی مشن کے لیے امریکہ کے ساتھ ساتھ پاکستان اور ہنگری کا تعاون بھی درکار ہو گا۔زاہد حفیظ چوہدری نے جمعرات کو معمول کی نیوز بریفنگ کے دوران صحافیوں کو بتایا کہ کابل ایئر پورٹ کی سیکیورٹی کے لیے پاکستان کا تعاون فراہم کرنے کی تجویز زیرِ غور نہیں ہے۔ البتہ افغان امن عمل کے لیے اسلام آباد مناسب کردار ادا کرنے لیے پُر عزم ہے۔اس حوالے سے مبصرین کا کہنا ہے کہ پاکستان اور ترکی کے قریبی تعلقات کے باوجود غیر ملکی افواج کے انخلا کے بعد افغانستان میں اسلام آباد کا کسی بھی سیکیورٹی مشن کے لیے فوجی تعاون فراہم کرنے کا امکان کم ہی ہے۔
وزیر اعظم کی طرف سے افغانستان میں دہشت گردی کی نگرانی کے لئے امریکہ کو کسی بھی قسم کی سہولت دینے سے دوٹوک انکار کوبھی افغان طالبان کے اس مؤقف کی تائید کے طور پر ہی دیکھا جانا چاہئے کہ طالبان افغان سرزمین کو کسی دوسرے ملک کے خلاف استعمال کرنے کے خلاف ہیں۔ اسی طرح ہمسایہ ممالک کو بھی افغانستان میں مداخلت کی پالیسی سے گریز کرنا چاہئے ورنہ اس کے سنگین نتائج سامنے آئیں گے۔ افغان طالبان کا یہ بیان ان امریکی کوششوں کے بعد سامنے آیا تھا جن کے مطابق امریکہ افغانستان سے فوجوں کے انخلا کے بعد پاکستان سے دہشت گردی کی نگرانی کے لئے بعض سہولتوں کا تقاضہ کررہا ہے۔ امریکی وزارت دفاع کے نمائیندے نے امریکی سینیٹ کو مطلع کیا تھا کہ پاکستان اس مقصد کے لئے فضائی و زمینی دسترس دینے پر آمادہ ہے۔
اس بیان کو عام طور سے یوں سمجھا گیا تھا کہ پاکستان پھر سے امریکہ کو فضائی و زمینی اڈے فراہم کرسکتا ہے تاکہ وہ افغانستان سے نکلنے کے بعد بھی وہاں دہشت گردی کے تدارک کے لئے ضروری کارروائی کرسکے۔ پاکستانی وزارت خارجہ نے اس امریکی بیان پر براہ راست تو کوئی تبصرہ نہیں کیا تھا لیکن ان خبروں کی تردید کی گئی تھی کہ پاکستان میں امریکہ کو فوجی اڈے فراہم کئے جاسکتے ہیں۔ شاہ محمود قریشی نے سینیٹ سے خطاب میں واضح کیا تھا کہ امریکہ کو پاکستان میں اڈے دینے کا کوئی منصوبہ نہیں ہے۔
اس حوالے سے البتہ یہ بات نوٹ کی جانی چاہئے کہ دفتر خارجہ نے امریکہ کو اڈے دینے کے بارے میں قیاس آرائیوں کو افسوسناک قرار دیتے ہوئے جو بیان جاری کیا تھا اس میں یہ بھی کہا گیا تھا کہ پاکستان اور امریکہ کے درمیان 2001سے ایئر لائن آف کمیونی کیشن (اے ایل او سی) اور گراؤنڈ لائنز آف کمیونی کیشن (جی ایل او سی) کوآپریشن کا معاہدہ موجود ہے۔ پاکستان نے امریکہ کے ساتھ کوئی نیا معاہدہ نہیں کیا۔ پاکستان سے افغانستان کی نگرانی کے سوال پر ہونے والی سیاسی بیان بازی کے باوجود اس بات کی وضاحت سامنے نہیں آسکی ہے کہ 2001 میں امریکہ کے ساتھ فضائی اور زمینی تعاون کے جو معاہدے کئے گئے تھے، وہ بدستور کیوں برقرار ہیں اور کیا ان معاہدوں کے تحت امریکہ افغانستان میں کارروائی کے لئے پاکستان کی فضائی حدود یا زمینی مواصلات استعمال کرنے کا مجاز نہیں ہوگا؟
وزیر خارجہ یا وزیر اعظم کی طرف سے امریکہ کو اڈے نہ دینے اور پاکستانی سرزمین سے افغانستان میں حملہ کرنے کی اجازت نہ دینے کی بات درست بھی ہو تو ان معاہدوں کی موجودگی میں کوئی نہ کوئی بیچ کا راستہ ضرور موجود ہوگا جس کے بارے میں نہ تو بات کی جارہی ہے اور نہ ہی اس کی تفصیلات منظر عام پر ہیں۔ تاآنکہ پاکستان 20 سال پرانے ان دونوں معاہدوں کو ختم کرنے کا اعلان کردے۔ تب ہی ان سرکاری بیانات کو درست مانا جاسکے گا کہ پاکستان افغانستان پر حملے کے لئے امریکہ کو کوئی سہولت نہیں دے گا۔
سوال یہ ہے کہ پاکستان اگر امریکہ کو اڈے نہ بھی فراہم کرے اور امریکہ اپنے بحری بیڑوں یا بھارتی اڈوں کو استعمال کرتے ہوئے افغانستان کی نگرانی کرے اور کسی انتہائی صورت میں وہیں سے مناسب عسکری کارروائی کرے تو کیا ان معاہدوں کی موجودگی میں امریکہ کو ایسے حملوں کے لئے پاکستانی فضائی حدود استعمال کرنے سے انکار کیا جاسکے گا؟ اگر ایسا نہیں ہوسکتا تو پاکستان کی طرف سے امریکہ کو اڈے نہ دینے کی پرجوش باتیں بے معنی اور غیر متعلقہ ہوجائیں گی۔ اگر امریکہ کو ایسی ضمانت بھی فراہم نہیں کی جارہی تو افغان امن کے لئے خدمات کے عوض امریکہ سے ’مراعات‘ کی جو امیدیں باندھی گئی ہیں ، ان کا کیا ہوگا۔ حالات کی خرابی کے بارے میں افغان طالبان کی دھمکی کو بھی اس امکان کی روشنی میں پرکھنے کی ضرورت ہے۔ اس قسم کے کسی منصوبہ میں پاکستان کی شمولیت کی سب سے بھاری قیمت بھی پاکستان کو ہی ادا کرنا پڑے گی۔
لاہور پولیس نے مدرسے کے طالب سے مبینہ بدفعلی کی ویڈیو وائرل ہونے کے بعد جمعیت علمائے اسلام لاہور کے نائب امیر اور جامعہ منظور الاسلامیہ کے برطرف عہدیدار مفتی عزیز الرحمٰن کے خلاف مقدمہ درج کرلیا۔ سوشل میڈیا پر وائرل ہونے والی ویڈیو میں مفتی عزیز الرحمٰن کو ایک لڑکے سے مبینہ بدفعلی کرتے دیکھا جاسکتا ہے۔ 17 جون کو درج پہلی انفارمیشن رپورٹ (ایف آئی آر) کے مطابق متاثرہ طالب علم نے بتایا کہ اسے جامعہ منظور الاسلامیہ میں 2013 میں داخلہ ملا تھا۔ انہوں نے کہا کہ امتحانات کے دوران مفتی عزیز الرحمٰن نے ان پر اور ان کے دوست طالب علم پر امتحان کے دوران کسی اور کو امتحان دلانے کا الزام لگایا تھا۔ انہوں نے شکایت میں کہا کہ اس کے ساتھ ہی مجھ پر وفاق مدارس میں 3 سال تک امتحانات دینے پر پابندی عائد کردی گئی۔ شکایت کنندہ نے کہا کہ انہوں نے مفتی عزیز الرحمٰن سے معاف کردینے کی التجا کی۔ متاثرہ لڑکے نے کہا کہ مفتی عزیز الرحمٰن نے کہا کہ اگر جنسی حرکتوں سے انہیں ‘خوش’ کردوں تو کچھ سوچ سکتے ہیں۔ شکایت کنندہ نے مزید کہا کہ ان کے پاس جنسی زیادتی کا نشانہ بننے کے سوا کوئی چارہ نہیں تھا۔ ان تمام الزامات کے جواب میں مفتی صاحب کا مؤقف یہ ہے کہ انہیں نشہ پلا کر یہ کام کیا گیا ہے۔
تاہم لال مسجد کے خطیب جو کہ خود بھی دہشت گرد کارروائیوں میں ملوث رہے ہیں کا کہنا ہے کہ مولانا عزیز الرحمان صاحب کی جو ویڈیو شائع ہوئی ہے، اگرچہ انہوں نے کہا ہے کہ مجھے نشہ پلا کر یہ سب کچھ کیا گیا ہے، لیکن جو ویڈیو کے اندر ہم نے مجبوراً دیکھی، علما نے بھی دیکھی، مفتیان کرام نے بھی دیکھی، وہ بھی یہ بات کہہ رہے ہیں کہ ایسا نہیں ہے۔ یہ ویڈیو نشہ پلا کر نہیں ہے۔ ان کی حرکات و سکنات بتا رہی ہیں کہ وہ گندے کام میں خود شریک ہیں۔ “اس لیے ہمارا مطالبہ یہ ہے کہ پہلے پاکستان میں قرآن و سنت کو نافذ کیا جائے۔ اور شرعی عدالتیں پورے ملک میں قائم کی جائیں۔ اور سب سے پہلے سزا مولانا عزیز الرحمان کو دی جائے۔ اور شرعی سزا۔ مختلف سزائیں ہیں ایک یہ کہ اوپر عمارت سے گرایا جائے تو ہمارا مطالبہ یہ ہے کہ ان کو مینار پاکستان سے نیچے گرا دیا جائے۔ مولانا صاحب کے اس طرح کی سزا دینے کے مطالبے کو داد نہ دینا سراسر زیادتی ہوگی مگر اس کے ساتھ ساتھ مولانا صاحب نے جو اپنا مدعا بیان کیا ہے وہ بھی قابل غور ہے ۔ خیر کاش مفتی صاحب نشہ آور چائے پہ الزام دھرنے سے پہلے کسی صاحب عقل ودانش سے مشورہ ہی کر لیتے جو انہیں بتاتے کہ نشہ آور اشیا اس قسم کی سرگرمیوں کے لئے سم قاتل ہوتی ہیں۔ حسیات کا یہ کھیل ہوش اور جوش کے ساتھ ہی کھیلا جا سکتا ہے سو آپ کا یہ بیان دوسرے لفظوں میں آپ کی بدنیتی کا اقرار ہی ہے۔
مفتی عزیز الرحمان کے سکینڈل نے مدارس میں بچوں کے تحفظ کو نکتہ بحث بنا دیا ہے۔ اس معاملے پر عوامی ردعمل نہایت شدید تھا مگر علمائے کبار کی جانب سے ایک مکمل اور مہیب خاموشی دکھائی دی۔ دینی حلقوں سے جڑے نوجوانوں نے اس معاملے پر عوام کے ساتھ کھڑے ہو کر سخت سزا کا مطالبہ کیا۔ ان کی رائے یہی دکھائی دی کہ وہ مسجد و مدرسے کو یوں بدنام کرنے پر مفتی عزیز الرحمان سے شدید ناراض ہیں۔ لبرل کیمپ کا ردعمل اس پر یہ تھا کہ اگر صبا قمر کے مسجد وزیر خان میں فوٹو شوٹ پر اسے توہین مسجد اور توہین شعائر کا مرتکب گردان کر بلاسفیمی کا مقدمہ درج کیا گیا تھا تو کیا مفتی عزیز الرحمان کا فعل اس سے کئی گنا بڑی توہین نہیں ہے؟ مقدس اوراق ہاتھ میں پکڑ کر ایسا فعل کرتے ہوئے کیا شعائر اللہ کی توہین نہیں ہوئی؟ ملالہ کے ایک جملے پر جیسا طوفان اٹھایا گیا تھا ویسا ردعمل مفتی عزیز الرحمان کے معاملے پر کیوں دکھائی نہیں دے رہا؟ کیا وجہ تھی کہ طالب علم کے بیان کو سنجیدگی سے نہیں لیا گیا، اس کی ویڈیو دیکھنے کے باوجود بھی وفاق المدارس عربیہ اور جامعہ منظور الاسلامیہ والے یہی کہتے رہے کہ انہیں ویڈیو پر نہیں مفتی عزیز الرحمان کی پاکدامنی پر یقین ہے حتیٰ کہ سکینڈل سوشل میڈیا پر پھٹ پڑا۔
لیکن مدارس اور علما کو یوں کٹہرے میں کھڑا کر دینے والے واقعے پر علمائے کبار کی خاموشی مایوس کن ہے۔ نہ تو مفتی اعظم پاکستان کہلانے والے مولانا رفیع عثمانی کا کوئی بیان دکھائی دیا، نہ ان کے جلیل القدر بھائی مولانا تقی عثمانی کچھ بولے، نہ خود کو شیخ الاسلام قرار دینے والے علامہ طاہر القادری کہیں دکھائی دیے، نہ جمعیت علمائے اسلام کی مرکزی قیادت نے اس معاملے پر بات کی، نہ جماعت اسلامی کی صف اول کی لیڈر شپ کا موقف سنائی دیا، نہ ہی مولانا ساجد میر نے اپنا بیان دیا۔ اہل تشیع کو تو چلیں شک کا فائدہ دیا جا سکتا ہے کہ اس معاملے کے فرقہ وارانہ رنگ اختیار کرنے کے خوف سے انہوں نے خاموشی بہتر سمجھی، مگر سنی علمائے کبار کیوں نہیں بتاتے کہ وہ مدارس کے طلبا اور پاکستان کے بچوں کے ساتھ کھڑے ہیں یا مفتی عزیز الرحمان کے؟ کیا وہ مفتی عزیز الرحمان کو بچانا چاہتے ہیں یا بچوں کو؟ انہوں نے مفتی شہاب الدین پوپلزئی اور علامہ ہشام الہی ظہیر جیسی جرات کیوں نہیں دکھائی؟ یہ تو گویا ایک مجرمانہ سی خاموشی ہے۔
سوال یہ ہے کہ یہ تو ایک سکینڈل تھا جو منظر عام پر آگیا۔ ایک طالب علم نے جرات کی اور معاملہ سامنے آگیا۔ ایسے کتنے ہی کیسز دبا دیے جاتے ہیں۔ کے پی کے کے ایک مدرسے کا واقعہ آج بھی تازہ ہے جس میں بچوں کو جنسی دردندگی کےد وران ایک ملا نے قتل کر دیا تھا مگر کیا ہوامعاملہ دبا دیا گیا۔ سوال یہ ہے کہ مدارس میں بسنے والے ان مذہبی ٹھیکیداروں کو کون پوچھے گا؟ بات یہی ہے کہ علما کی اس پر خاموشی کیوں ہے؟ کیا اس طرح کا فعل کسی اور سے ذد ہوا ہوتا تو یہی علما اب تک خاموش بیٹھے ہوتے۔ مذہبی اجارہ داری کو قائم رکھنے کے لیے یہی علما فتوے بانٹتے ہیں، ایک دوسرے کو کافر قرار دیتے ہیں مگر جب بات اپنے پر آتی ہے تو مکمل سکوت۔ دوغلا پن بھی کیسا ہے۔
ہفتہ، 19 جون 2021
شفقنا اردو
ur.shafaqna.com
بالاخر شہباز شریف صاحب نے بجٹ میں اپنی تقریر مکمل کر ہی لی۔ گزشتہ روز قومی اسمبلی کے سیشن سے آدھا گھنٹہ قبل سپیکر قومی اسمبلی نے ایک پریس کانفرنس میں کہا کہ اپوزیشن کے ساتھ معاملات طے پاگئے ہیں۔ جب ان سے پوچھا گیا کہ یہ معاملات کیسے حل ہوئے ہیں اور کیا لے دے ہوئی ہے تو وہ اس سوال کا جوب گول کر گئے او رکہا کہ وہ اس معاملے میں ٖغیر جانب دار رہنا چاہتے ہیں۔ جب ان سے یہ پوچھا گیا کہ آپ نے کچھ لوگوں پر پابندی لگائی تھی جب کہ بعض لوگ ایسے بھی تھے جو میزوں پر چڑھ کر نعرے مار رہے تھے اور کاپیاں پھاڑ رہے تھے مگر ان پر پابندی نہیں لگائی گئی جس سے لگتا ہے کہ آپ غیر جانبدار ہر گز نہیں ہیں کیوں کہ ان میں سے وفاقی وزراء بھی تھے تاہم وہ اس سوال کا جواب بھی گول مول کر گئے۔ اپوزیشن کا کہنا تھا کہ ہمیں سپیکر نے یقین دہانی کرائی ہے کہ جو متنازعہ قانون سازی ہوئی ہے ہم اس پر نظر ثانی کریں گے اس لیے ہم نے خیر سگالی کے طور پر ڈپٹی سپیکر کے خلاف عدم اعتماد کی تحریک کو واپس لے رہے ہیں حالانکہ اپوزیشن تو کہہ رہی تھی کہ وہ سپیکر کے خلاف بھی عدم اعتماد کی تحریک لا رہے ہیں۔ اگر قاسم سوری کے خلاف یہ تحریک واپس نہ ہوتی تو آج اس پر بحث ہوتی۔
یہاں یہ بات بھی دلچسپ ہے کہ آج پاکستان تحریک انصاف کے پارلیمانی پارٹی کے اجلاس کی صدارت پرویزخٹک نے کی اور اجلاس میں علی نواز اعوان اور شیریں مزاری کے مابین اچھی خاصی نوک جھونک بھی ہوئی۔ حقیقت یہ ہے کہ قومی اسمبلی کے اجلاس کے دوران جو کچھ ہوا اس میں ساری بدنامی تحریک انصاف کی ہوئی ہے اور تحریک انصاف کے جو منتخب نمائندے ہیں وہ خوش نہیں ہیں مگر وہ بے بس ہیں کیونکہ پاکستان تحریک انصاف کے اندر مختلف دھڑے ہیں جس کی وجہ سے پارٹی کے اندر بھی جنگ جاری ہے۔ تاہم یہ بات درست ہے کہ اب عمران خان کی تقریر کے دوران اپوزیشن خاموش رہے گی کیونکہ دونوں طرف سے معاملات طے پا گئے ہیں۔ تاہم اس سارے کھیل میں اپوزیشن نے ایک مرتبہ پھر حکومت کو نہ صرف اپنے ملک میں بلکہ پوری دنیا میں بدنام کردیا ہے اور اپوزیشن اپنی حکمت عملی میں کامیاب رہی ہے۔
بعض تجزیہ نگاروں کا کہنا ہے کہ پی ٹی آئی وہی کھیل کھیل رہی تھی جو گزشتہ دو برس چوہدری پرویز الہی نے پنجاب میں کھیلا تھا۔ گزشتہ برس پرویز الہی صاحب نے ہلڑ بازی کا الزام لگاتے ہوئے اپوزیشن کے کچھ ممبران پر پابندی لگا دی تھی وہ اجلاس میں ںہیں آسکتے جس پر اپوزیشن نے اجلاس کا بائیکاٹ کر لیا جس سے حکومت نے با آسانی بجٹ پاس کروا لیا اور اب پی ٹی آئی قومی اسمبلی میں یہی چاہتی ہے کہ کسی طرحٰ اپوزیشن اجلاس کا بائیکاٹ کر لے اور وہ اسمبلی سے باہر چلی جائے اور وہ آرام سے اپنا بجٹ پاس کروالیں۔ جہاں تک عدم اعتماد کی بات ہے تو اپوزیشن نے عدم اعتماد میں 172 ووٹ پورے کرنے تھے جو مشکل تھے تاہم بجٹ میں حکومت کو بھی اپنے ووٹ پورے کرنے ہوتے ہیں اور حکومت کے لیے اتنا آسان نہیں ہے۔ اس لیے حکومت چاہتی ہے کہ کسی بھی طرح اپوزیشن اجلاس کا بائیکاٹ کر لے کیونکہ حکومت کو پتا ہے کہ بہت سارے لوگ ان سے ناراض ہیں ترین گروپ اور عامر لیاقت چن ایک مثالیں ہیں۔
یہاں بہت ہی دلچسپ بات یہ ہے کہ اس سے قبل اپوزیشن کو بائیکاٹ کے لیے باقاعدہ خلائی مخلوق کی جانب سے ہدایات دی جاتی تھیں او رپنجاب میں اپوزیشن کے بائیکاٹ کے پیچھے بھی سکرپٹ ہوتا تھا مگر چونکہ اس مرتبہ اپوزیشن کو کسی نے کہا ہی نہیں کہ وہ اجلاس کا بائیکاٹ کریں ؟ وہ تحریک انصاف کے ڈر سے ہرگز بائیکاٹ کرنے والے نہیں مگر جب تک خلائی مخلوق نہیں کہتی بائیکاٹ نہیں ہوگا۔ کیونکہ اپوزیشن تو چاہتی ہی ہنگامہ ہے مگر اب ایسا لگ رہا ہےکہ اپوزیشن کو بائیکاٹ کا حکم مل چکا ہے اس لیے اپوزیشن خاموشی سے حکومت کے ساتھ معاہدے پہ تیار ہوگئی تھی۔ تاہم یہ بات طے ہے کہ حکومت کسی طور بھی بجٹ منظور کروانے کی پوزیشن میں نہیں ہے۔ اگرچہ اپوزیشن نے اس بجٹ کو جعلی بجٹ قرار دیا ہے اور شہباز شریف نے بڑے آسان بیانیے میں اس بجٹ کو جھوٹا قرار دے دیا۔
اس سارے قضیے میں ایک خاص بات یہ بھی رہی ہے کہ اس سارے جھگڑے میں نہ صرف عوام بلکہ پاکستانی اور بین الاقوامی میڈٰیا کی تمام ترتوجہ بجٹ سے ہٹ کر صرف اور صرف پارلیمنٹ میں ہونے والے جھگڑے پر مرکوز ہو کر رہ گئی اور بجٹ ایک ثانوی چیز بن کر رہی گئی کیونکہ حکومت کسی بھی طور اس بجٹ کو درست ثابت نہیں کر سکتی تھی۔ حکومت نے جو کچھ کیا اس کو حملہ آور دفاع کہا جائے تو غلط نہ ہوگا بجائے حکومت اپنے بجٹ کی صفائیاں دیتی اور ایک ایک اعدادشمار پر بحث کراتی اس نے تمام تر تنقید کر رخ ہی ایک اور طرف موڑ دیا ہے۔ یعنی حکومت نے اپوزیشن پر حملہ کر دیا ہے۔ اس کا ایک مقصد عمران خان کو اپوزیشن کے غصے اور شور سے محفوظ رکھنا ہے کیونکہ عمران خان صاحب کو توہین تو ہر گز پسند نہیں ہے۔ اور اگر یہ سٹریٹیجی عمران خان کی تقریر کو روکنے کے لیے تھی تب بھی حکومت کامیاب رہی ہے کیونکہ اب اپوزیشن اور حکومت کے مابین معاہدہ طے پاگیا ہے وہ ایک دوسرے کی تقاریر پر خاموش رہیں گے۔ مگر اس سے دنیا بھر میں جو امیج بنا ہے وہ نہایت شرمناک رہا ہے۔
حقیقت یہ ہے کہ اس سارے کھیل میں اپوزیشن نے بھی کچھ نہ کچھ فائدہ حاصل کر لیا ہے اور اسی طرح حکومت نے بھی بہت کچھ حاصل کر لیا ہے مگر شکست اور تذلیل صرف پاکستان کی ہوئی ہے ۔ امیج تو پاکستان کا خراب ہوا ہے۔ مگر پاکستان کے منتخب نمائندوں کو پاکستان سے کیا؟
جمعتہ المبارک، 18 جون 2021
شفقنا اردو
ur.shafaqna.com
امریکہ ا فغانستان سے انخلا کے بعد سرزمین پر دہشت گردوں کو نشانہ بنانے کے صلاحیت کے حصول کے لیے آپشنز تیزی سے کھو رہا ہے۔ 2 مئی کو پاکستان ائیر فورس کے افسران نے مغربی صوبے بلوچستان کے ایک گرد آلود قصبے نصیر آباد کا دورہ کیا۔ بلوچستان ، ایران اور اففانستان کے ساتھ ملحقہ سرحد رکھتا ہے۔مقامی افراد کے مطابق یہ دورہ اس لیے کیا گیا کہ وہاں نئی ائیر بیس کے مقام کا تعین کیا جا سکے۔ نصیر آباد شمسی ائیر بیس سے زیادہ دور نہیں اور 2011 تک امریکہ اس ائیر بیس کو دہشت گردوں پر ڈرون حملوں کے لیے استعمال کرتا رہا ہے۔
نئے ائیر بیس کی خبریں اس وقت آنا شروع ہوئیں جب امریکہ افغانستان سے انخلا کے بعد کسی ایسے ملک یا خطے کی تلاش میں ہے جہاں سے وہ افغانستان پر باآسانی نظر رکھ سکے۔ اس لیے فورا ہی یہ فرض کر لیا گیا کہ نصیر آباد ائیر بیس کا منصوبہ پاکستانی فضا کے استعمال کی امریکی درخواست پر بنایا گیا ہے تاکہ امریکہ افغانستان میں داعش اور القاعدہ پر نظر رکھ سکے اور انہیں بھر پور طریقے سے نشانہ بنا سکے۔ تاہم پاکستان کے وزیر اعظم شاہ محمود قریشی نے واضح طور امریکہ کو اڈے دینے کی مخالفت کی ہے۔ پاکستان ائیر فورس نے بھی نئی ائیر بیس کی تلاش کو معمول کی کارروائی قرار دیا ہے۔ پاکستان کابینہ کے ایک سینئیر رکن کا کہنا ہے کہ جب تک عمران خان وزیر اعظم ہیں امریکہ کو کئی اڈہ نہیں ملے گا۔
پرانا روگ
عمران خان جو 2018 میں اقتدار میں آئے اور اقتدار سے قبل اور بعد میں وہ امریکہ کی پاکستان اور افغانستان میں مداخلت کے سخت خلاف تھے اور اس بات کی توقع ہےکہ وہ اس موقف سے پیچھے نہیں ہٹیں گے۔ 2012 میں اپوزیشن رہنما کے طور عمران خان نے ڈرون حملوں پر احتجاج کرتے ہوئے ہزاروں افراد پر مشتمل ایک ریلی اسلام آباد سے قبائلی علاقوں تک نکالی تھی۔ نسٹ یونیورسٹی اسلام آباد سے منسلک سیکورٹی تجزیہ نگار طغرل یامین کا کہنا ہے کہ پاکستان نے ماضی میں امریکہ سے تعاون کرتا رہا ہے مگر اس کی سیاسی طور پر اسے بھاری قیمت چکانا پڑی۔ امریکہ نے تاحال پاکستان کی جانب سے اڈوں کی فراہمی پر انکار کو عوامی سطح پر تسلیم نہیں کیا۔ پاکستان میں ممکنہ ڈرون اڈے کے حصول کے ایک سوال کے جواب میں امریکہ کے قومی سلامتی کے مشیر جیک سلوین نے میڈیا کو بتایا کہ امریکہ عسکری، سفارتی اور انٹیلی جنس چینلز پر تعمیری گفتگو کر چکا ہے۔ 6 جون کو نیویارک ٹائمز نے رپورٹ کیا کہ امریکی انٹلی جنس ایجنسی کے سربراہ ولیم جے برنز نے حال ہی میں پاکستان کا دورہ کیا ہے اور پاکستان کے آرمی چیف جنرل قمر جاوید باجوہ اور آئی ایس آئی کے چیف جنرل فیض حمید سے ملاقات کی ہے۔ اسی دورے کے دوران برنز نے عمران خان سے ملاقات کی درخواست کی تھی مگر انہوں نے ملنے سے انکار کر دیا۔ عمران خان نے اپنے بیان میں کہا تھا کہ وہ اپنے ہم۔منصب جو بائیڈن سے ہی ملاقات کریں گے۔
اس موقع پر سی آئی اے کے ڈائریکٹر کے دورے کو پاکستانی فوج کے لیے لابنگ قرار دیا جا رہا ہے۔ اگرچہ پارلیمنٹ میں عمران خان کی جماعت کی اکثریت نہیں ہےتاہم وہ پھر بھی اپنی مرضی کرتے ہیں۔ یامین کا کہنا تھا کہ آخر کار یہ ایک سیاسی فیصلہ ہوگا اور میرا خیال نہیں کہ فوج کو اس پر اعتراض ہوگا۔سی آئی اے کا پاکستان میں ڈرون آپریشن بہت غیر مقبول تھا۔ 2004 سے 2018 تک امریکہ نے پاکستان کے قبائلی علاقوں میں 400 سے زائد ڈرون حملے کیے ۔ بیورو آف انویسٹی گیٹو جرنلزم کے مطابق ان حملوں میں 950 سے اوپر سویلین بشمول 172 بچوں کے جاں بحق ہوئے۔ تاہم امریکہ نے صرف ایک مرتبہ سویلین ہلاکتوں کا اعتراف کیا جب 2015 میں ایک ڈرون حملے میں طالبان کی قید میں ایک اطالوی یرغمال اور اس ساتھ ایک اور غیر ملکی مارا گیا تھا۔
مسلح ڈرونز کا اپنا ہی ایک بیانیہ ہے۔ مثال کے طور پر پاکستان میں ڈرونز مستقل نگرانی اور سویلین کمیونٹیز کو خوفزدہ کرنے کے لیے استعمال ہوتے ہیں جب کہ کچھ غلط ہوجائے تو امریکہ اس کی ذمہ داری لینے پہ بھی تیار نہیں ہے۔ اپنے اقتدار میں آنے سے قبل عمران خان کی حکومت نے پاکستانی سرزمین پر امریکی فوجیوں کی موجودگی کو ہمیشہ تنقید کا نشانہ بنایا۔ تجزیہ کاروں کے مطابق عمران خان اپنے الفاظ کا پکا ہے اور جب سے وہ اقتدار میں آئے ہیں تب سے پاکستان کی سرزمین پر کوئی امریکی حملہ دیکھنے میں نہیں آیا۔ سی آئی اے نے پاکستان کے قبائلی علاقے میں آخری ڈرون حملہ جولائی 2018 میں کیا تھا اور اسی سال عمران خان نے انتخاب جیتا تھا۔ اگر عمران خان یہ سمجھتا ہے کہ ان کی کامیابی کے پیچھے امریکہ کو جواب دینا ہے تو پھر وہ کبھی بھی اپنی شہرت کو داؤ پر نہیں لگائیں گے۔
متبادل کی تلاش
امریکی حکام خواہش رکھتے ہیں کہ وہ افغانستان سے نکل جانے کے بعد بھی افغانستان کے پڑوسی ملک میں اپنے فوجی اثاثے تیار رکھے تاکہ وہ اس خطے پر اور القاعدہ و داعش پر نظر رکھ سکے۔ طالبان اس بات کو درست نہیں سمجھتے یہی وجہ ہے کہ طالبان نے پاکستان کو سختی سے خبردار کیا تھا کہ وہ امریکہ کو ہرگز اڈے فراہم نہ کرے۔ امریکی سنٹرل کمانڈ کمانڈر جنرل کینتھ ایف میکینزی نے میڈیا سے بات چیت کرتےہوئے یہ باور کرایا ہے کہ امریکی اڈے ہرگز طالبان کی پیش قدمی کی نگرانی کے لیے نہیں ہوں گے۔ ان کا کہنا تھا کہ ہمارا مقصد صرف القاعدہ اور داعش کی نقل و حرکت پر نظر رکھنا اور انہیں نشانہ بنانا ہے۔ اس حوالے سے پاکستان کے علاوہ کسی اور ملک کی تلاش امریکہ کے لیے ایک بہت بڑا چیلنج ثابت ہوگی۔
امریکی ڈرونز خطے میں دیگر ممالک جیسا کہ ترکی کے اڈوں سے بھی اڑ سکتے ہیں تاہم امریکہ چاہتا ہے کہ ڈرونز جس قدر قریب تعینات کیے جائیں اتنا ہی اچھا ہے۔ جتنا فاصلہ کم ہوگا اتنا ایندھن کا خرچ کم ہوگا اور اتنا ہی اڑان کا وقت کم اور فوری ایکشن اور کامیابی کے امکانات ہوں گے۔ چونکہ ڈرون آہستہ پرواز کرتے ہیں اس لیے فاصلے کا عنصر بہت اہم ہے۔ بعض وسط ایشیائی ریاستیں بھی اس کا حل ہیں مگر روس اس عمل کی بھرپور مخالفت کرے گا۔ ماضی میں تاجکستان نے امریکی جہازوں کو ایندھن بھرنے کے لیے اپنے دارالحکومت دوشنبے میں اترنے کی اجازت دے رکھی تھی۔ تاجک صدر ایمومالی رحمان روس کے بہت قریب ہیں اور وہ واحد غیر ملکی رہنما تھے جنہیں روس نے 6 مئی کی فوجی پریڈ میں شرکت کی دعوت دی تھی۔ امریکی دوستوں نے 2001 سے 2005 تک ازبکستان کی قرشی خان آباد اڈے کو بھی استعمال کیا ہے تاہم امریکہ کی جانب سے ازبک حکومت پر مقامی احتجاجوں کو دبانے پر مزمت کی وجہ سے ازبکستان نے یہ اڈہ واپس لے لیا تھا۔
خلیج وسطیٰ میں بحرین اور عمان بھی بہترین متبادل ہیں ۔ دونوں ممالک امریکہ کے نیٹو اتحادی برطانیہ کو اڈے فراہم کرتے ہیں لیکن ان ممالک کا افغانستان سے فاصلہ اس قدر ہے کہ ڈرون کو ایک طویل پروز کرنا پڑے گی۔ اگرچہ ریپر ڈرون کی مار اچھی خاصی ہے لیکن امریکہ ان کو افغانستان کے ہر ممکن قریب تعینات رکھنا چاہتا ہے کیونکہ امریکہ ان کو زیادہ سے زیادہ وقت ہوا میں رکھنا چاہتا ہے۔ اور اگر وہ زیادہ فاصلہ طے کریں گے تو ہوا میں کم وقت ہی رہ سکیں گے اور امریکی مقاصد ہرگز پورے نہیں ہوں گے۔
جمعرات، 17 جون 2021
شفقنا اردو
ur.shafaqna.com
پاکستان کی قومی اسمبلی کے بجٹ اجلاس کے دوران منگل کو حکومتی اور اپوزیشن ارکان گتھم گتھا ہو گئے۔ ارکان نے ایک دوسرے پر بجٹ کی کاپیوں سے حملے کیے اور جھگڑتے ہوئے ایک دوسرے کو گالیاں بھی دیں۔ سوشل میڈیا پر وائرل ہونے والی ویڈیوز میں ارکان قومی اسمبلی کو ایک دوسرے سے دست و گریبان ہوتے ہوئے دیکھا جا سکتا ہے۔ یہی نہیں حکومتی و اپوزیشن ارکان ایک دوسرے کو چور اور دیگر القابات سے بھی نوازتے رہے۔ پاکستان تحریک انصاف کے اسلام آباد سے رکن اسمبلی اور وزیرِ اعظم کے معاون خصوصی علی نواز اعوان کی ایک ویڈیو سب سے زیادہ وائرل ہو رہی ہے جس میں وہ مسلم لیگ (ن) کے شیخ روحیل اصغر کے بارے میں نازیبا کلمات ادا کر رہے ہیں۔ اس ویڈیو میں وہ گالیاں دینے کے ساتھ ساتھ ان پر حملہ آور ہونے کی کوشش کر رہے ہیں اور دیگر ارکان اسمبلی انہیں روک رہے ہیں۔ ویڈیو کے آخر میں علی نواز اعوان نے بجٹ کی کتاب بھی اپوزیشن ارکان پر دے ماری۔کئی ارکانِ اسمبلی سیٹیاں اور باجے لے کر ایوان میں پہنچے۔ اس ہنگامے کے دوران سکیورٹی اہل کار بھی اراکین کو روکنے میں ناکام رہے۔
بجٹ اجلاس میں ہنگامہ آرائی اس قدر زیادہ تھی کہ قومی اسمبلی کی سیکیورٹی کے لیے سینیٹ سیکرٹریٹ سے مدد طلب کرنا پڑی۔ ایوان میں ہنگامہ آرائی سے نمٹنے کے لیے اضافی سارجنٹ ایٹ آرمز کی خدمات قومی اسمبلی کے سپرد کر دی گئی ہیں۔ منگل کو ہونے والے اجلاس کے دوران اپوزیشن اور حکومتی ارکان نے ایک دوسرے پر بجٹ کی کاپیاں پھینکیں۔ اس دوران کاپیوں کے بنڈل لگنے سے ایک سارجنٹ اور حکمراں جماعت پاکستان تحریک انصاف (پی ٹی آئی) کی رکن ملیکہ بخاری زخمی ہوگئیں۔ اس بارے میں سوشل میڈیا پر حکومت کے حامی اور مخالفین کے درمیان بھی جنگ دیکھنے میں آئی اور دونوں طرف کے افراد ایک دوسرے کو تنقید کا نشانہ بناتے رہے۔ وفاقی وزیرِ اطلاعات فواد چوہدری نے ٹوئٹر پر رکنِ اسمبلی علی گوہر بلوچ کی ایک ویڈیو شیئر کی اور دعویٰ کیا کہ لڑائی کا آغاز علی گوہر کے نعروں سے شروع ہوا تھا اور (ن) لیگ کے ایم این ایز نے تمام پارلیمانی اقدار کو بالائے طاق رکھتے ہوئے گالیاں دیں، جس پر پی ٹی آئی کے نوجوان ارکان جذباتی ہو گئے اور پھر بجٹ کی کتابیں پھینکنے کا سلسلہ شروع ہوا۔
اس سلسلے کی ابتدا اس وقت ہوئی جب اپوزیشن رہنما شہباز شریف تقریر کے لیے کھڑے ہوئے تو بظاہر بہت حلیم الطبع ، نرم مزاج اور پڑھے لکھے نظر آنے والے شاہ محمود قریشی نے چور چور کے نعرے لگانے شروع کردیے۔ اب یہ بات کون جان سکتا ہے کہ شاہ محمود قریشی کا یہ جارحانہ رویہ نہ جانے ان کی یا حکومت کی کون سی پریشانی یا بدحواسی کا شاخسانہ ہے۔ اسپیکر اسد قیصر نے گزشتہ روز حسب روایت اپوزیشن لیڈر شہباز شریف کو بجٹ پر بحث کا آغاز کرنے کی دعوت دی تھی۔ جوں ہی انہوں نے تقریر کا آغاز کیا وزیر خارجہ شاہ محمود قریشی اپنی نشست پر کھڑے ہوگئے اور ’چور چور ‘ کے نعرے لگاتے ہوئے اپوزیشن لیڈر کو تقریر سے روکنے لگے۔ حکمران جماعت کے دیگر ارکان نے ڈیسک بجا کر اور شور مچاکر ان کا ساتھ دیا اور شدید ہنگامہ آرائی کے سبب اسپیکر کو اسمبلی کا اجلاس بیس منٹ کے لئے ملتوی کرنا پڑا۔ وزیر خارجہ اور حکومتی ارکان کا کہنا تھا کہ وہ اس وقت تک اپوزیشن لیڈر شہباز شریف اور پیپلز پارٹی کے چئیرمین بلاول بھٹو زرداری کو تقریر نہیں کرنے دیں گے جب تک اپوزیشن تحریری طور سے یہ یقین دہانی نہ کروائے کہ وہ بھی عمران خان کی تقریر کو خاموشی اور اطمینان سے سنیں گے۔ مختصر وقفہ طویل ہوگیا بالآخر اسپیکر کو چند گھنٹے بعد اجلاس آج تک کے لئے ملتوی کرنا پڑا۔ اس دوران حکومتی و اپوزیشن ارکان بجٹ سیشن کی کارروائی جاری رکھنے کے لئے کسی افہام و تفہیم پر متفق نہیں ہوسکے۔
اس پس منظر میں جب آج قومی اسمبلی کا بجٹ سیشن دوبارہ شروع ہؤا اور شہباز شریف اپنی نامکمل تقریر کرنے کے لئے کھڑے ہوئے تو ایک بار پھر سرکاری بنچوں سے شور شرابہ، ہنگامہ آرائی اور برا بھلا کہنے کا سلسلہ شروع ہوگیا۔ مسلم لیگ کے متعدد ارکان نے اس دوران اپنے لیڈر شہباز شریف کے گرد گھیرا ڈال لیا تھا اور سرکاری بنچوں سے آنے والی مغلظات کا جواب دیا جانے لگا۔ تھوڑی ہی دیر میں بات ہاتھا پائی اور ایک دوسرے پر بجٹ کی کتابیں پھینکنے تک پہنچ گئی۔
بجٹ سیشن کسی بھی اسمبلی میں اہم ترین وقوعہ ہوتا ہے۔ اپوزیشن اور حکومتی ارکان اس اہم دستاویز کے مختلف پہلوؤں کو سامنے لاتے ہیں ۔ اس طرح لوگوں کو سرکاری مالی تجاویز کی خوبیوں اور خرابیوں کا پتہ چلتا ہے۔ بجٹ سیشن کے دوران عام طور سے حکومت اپوزیشن کو بات کرنے کا موقع دیتی ہے۔ جن ملکوں میں سیاسی افہام و تفہیم کاکلچر موجود ہے وہاں اپوزیشن کی جائز تجاویز کو مان لیا جاتا ہے تاکہ قومی بجٹ اتفاق رائے سے منظور ہوجائے۔ لیکن پاکستان جیسے جن ملکوں میں یہ مہذب پارلیمانی مزاج ابھی تک فروغ نہیں پاسکا ، وہاں بھی اپوزیشن کو دل کا غبار نکالنے اور تنقید کرنے کا موقع دیا جاتاہے تاکہ بجٹ پر رائے دہی کے وقت زیادہ ہنگامہ نہ ہو اور حکومت مالی بل منظور کروانے میں کامیاب ہوجائے۔ پارلیمنٹ میں مالی بل کی ناکامی کسی بھی حکومت کے خلاف عدم اعتماد کا ووٹ سمجھی جاتی ہے۔ کوئی بھی حکومت کسی وقتی اشتعال اور ہیجان کے باعث اس قسم کا خطرہ مول لینے کے لئے تیار نہیں ہوتی۔ اس لئے بجٹ سیشن میں خاص طور سے حکومتی بنچوں کی طرف سے شدت کا مظاہرہ دیکھنے میں نہیں آتا۔
موجودہ حکومت متنازعہ امور کو زور ذبردستی اور ایک خاص پارلیمانی حکمت عملی کے ذریعے منظور کروانے کی شہرت رکھتی ہے۔ عام طور سے تحریک انصاف کی حکومت آرڈی ننس کے ذریعے کام چلاتی ہے اور جب انتہائی مجبوری میں پارلیمنٹ سے قانون منظور کروانا پڑے تو متنازع قانون پر بحث کی نوبت نہیں آنے دیتی اور ہنگامہ آرائی میں قانون منظور کروانے کی کوشش کی جاتی ہے۔ ایسا ہی ایک متنازع قانون بھارتی جاسوس کلبھوشن یادیو کو اپیل کا حق دینے کے لئے حال ہی میں منظور کروایا گیا ہے۔ اس قانون کو 20 دیگر قوانین کے ساتھ ملاکر اکٹھا منظور کروایا گیا تھا۔ اپوزیشن کے شدید احتجاج ، کورم کی کمی کے دعوؤں اور قانون کی کمزوریوں کی نشاندہی کے باجود حکومت نے اس معاملہ پر بحث نہیں ہونے دی۔ اس پس منظر میں اب بجٹ بل کے حوالے سے حکمت عملی میں حکومت کا خوف محسوس کیا جاسکتا ہے۔
اس معاملہ کا دوسرا اہم اور افسوسناک پہلو البتہ یہ ہے کہ حکومت ایک طرف بجٹ پر بحث سے کترا رہی ہے تو دوسری طرف اسے بجٹ منظور کروانے کے لئے اکثریت حاصل کرلینے کا کامل یقین ہے۔ ورنہ انتہائی قلیل اکثریت کے ساتھ اقتدار سنبھالے ہوئے کوئی حکومت معمول کے پارلیمانی ماحول میں ایسا اشتعال انگیز رویہ اختیار نہیں کرے گی جو اس وقت تحریک انصاف نے اپنایا ہے۔ اس طرز عمل سے تو یہی اندازہ کیا جاسکتا ہے کہ حکومت کو یقین دلوایا گیا ہے کہ کچھ بھی ہوجائے بجٹ دستاویز منظور ہوجائے گی اور اس مرحلے پر عمران خان کی حکومت کو کوئی خطرہ نہیں ہے۔ یہ بالکل ایسے ہی ہوگا جیسے سینٹ انتخابات کے موقع پر ہوا تھا ۔ اس وقت تو اپوزیشن متحد تھی اور اب تو ویسے بھی پی ڈی ایم کے حصے بخرے ہوچکے ہیں۔ ایسی صورتحال میں یہ ہرگز ممکن نہیں ہے کہ بجٹ منظور نہ ہو۔ خیر قومی اسمبلی میں جو کچھ ہوا یہ انتہائی افسوس ناک امر تھا ۔ اس سے قبل اسطرح کے واقعات ہوچکے ہیں مگر جس شدت سے کل کا واقعہ ہوا ہے اس کی تاریخ میں مثال نہیں ملتی۔ یہ پاکستانی تاریخ کا انتہائی سیاہ ترین دن تھا۔
بدھ، 16 جون 2021
شفقنا اردو
ur.shafaqna.com
پاکستان کے وزیر خارجہ شاہ محمود قریشی نے کہا ہے کہ افغان امن عمل میں کسی بگاڑ کا ذمے دار پاکستان نہیں ہو گا کیوں کہ افغان امن عمل کو آگے بڑھانے کی ذمے داری تمام افغان فریقوں پر عائد ہوتی ہے۔پیر کو اسلام آباد میں دو روزہ پاک، افغان غیر سرکاری مذاکرات کے افتتاحی اجلاس سے خطاب کرتے ہوئے شاہ محمود قریشی نے کہا کہ افغان امن عمل میں پیش رفت نہ ہونے کا ذمے دار پاکستان کو ٹھیرانا کسی صورت بھی سود مند نہیں ہو گا۔ شاہ محمود قریشی کا کہنا تھا کہ پاکستان خلوصِ دل سے افغانستان میں قیامِ امن کے لیے کوشاں ہے۔
وزیرِ خارجہ کے بقول پاکستان کے خلاف الزام تراشی کا یہ سلسلہ اب ختم ہونا چاہے۔ خیال رہے کہ حالیہ دنوں میں افغانستان کی قومی سلامتی کے مشیر کے پاکستان مخالف بیانات کے بعد دونوں ممالک کے تعلقات ایک بار پھر سردمہری کا شکار ہیں۔ شاہ محمود قریشی کا کہنا تھا کہ افغان صدر اشرف غنی امریکہ جا رہے ہیں۔ لہذٰا وہ اُمید کرتے ہیں کہ یہ دورہ افغان امن عمل کے لیے فائدہ مند ہو گا۔ اس بارے میں افغان حکومت کاابھی کوئی بیان سامنے آیا ہے کہ صدر اشرف غنی کب واشنگٹن کا دورہ کریں گے۔ ان کا کہنا تھا کہ اگر واشنگٹن کے دورے کا مقصد نئی الزام تراشیاں اور افغانستان میں تمام خرابیوں اور امن عمل آگے نہ بڑھنے کے لیے مورد الزام ٹھہرانا ہے تو اس کا فائدہ نہیں ہوگا۔میرے نزدیک امن کے راستے کی بڑی رکاوٹ عدم اعتماد ہے،ہمیں ماضی سے نکل کر آگے بڑھنا ہوگا۔اگر ہم آج ایک دوسرے کے ساتھ مخلص نہیں ہوں گے تو ہمیں مشکلات کا سامنا کرنا پڑے گا۔
شاہ محمود قریشی کا یہ بیان ایسے وقت میں سامنے آیا ہے جب افغانستان سے غیر ملکی فورسز کے انخلا کا عمل تیزی سے جاری ہے جب کہ دوسری جانب گزشتہ برس افغان حکومت اور طالبان کے درمیان شروع ہونے والے مذاکرات کا عمل تعطل کا شکار ہے۔اس صورتِ حال میں خطے کے ممالک اور بعض دیگر حلقوں کی طرف سے ان خدشات کا اظہار کیا جا رہا ہے کہ افغان تنازع کے سیاسی تصیفے کے نہ ہونے کی صورت میں افغانستان کی سیکیورٹی صورتِ حال بدل سکتی ہے۔ تجزیہ کاروں کے مطابق یہی وجہ ہے کہ پاکستانی حکام بار بار یہ انتباہ کر رہے ہیں کہ اگر امن عمل کو نقصان پہنچا تو اس کا ذمے دار پاکستان نہیں ہو گا۔ درحقیقت یہ کوئی نئے خدشات نہیں ہیں۔ اس سے قبل بھی پاکستان پر یہ الزامات لگتے رہے ہیں کہ پاکستان اپنے مفادات کے لیے مبینہ طور پر افغان طالبان کی حمایت کرتا رہا ہے۔پاکستان اس خدشے میں بجا ہے کہ اگر افغانستان میں امن مذاکرات کامیاب نہیں ہوتے تو اس کا ذمے دار پاکستان کو ٹھیرایا جا سکتا ہے۔ کیونکہ پاکستان کے بارے میں یہ کہا جاسکتاہے کہ پاکستان نے جان بوجھ کر طالبان پر اثرو رسوخ استعمال نہیں کیا لیکن یہ دنیا کو یہ بات ضرور دیکھنی چاہیے کہ اب طالبان اپنے بہت سارے فیصلے اپنی منشا اور مفاد کے مطابق کرتے ہیں اور پاکستان کو کسی خاطر میں نہیں لاتے۔
شاہ محمود قریشی نے یہ بیان ایک ایسے وقت میں دیا ہے جب طالبان افغانستان کے مختلف اضلاع پر تیزی سے قبضہ کرتے جار ہے ہیں۔حالیہ چنچ ہفتوں کے دوران افغانستان کے کئی علاقے طالبان کے کنٹرول میں چلے گئے ہیں۔ علاقوں پر قبضے میں شدت امریکی اور مغربی دفاعی اتحاد کی افواج کے انخلا کے اعلان کے بعد سے پیدا ہوئی ہے۔ رواں برس یکم مئی کے بعد اب تک سترہ اضلاع پر طالبان قبضہ کر چکے ہیں۔ غیر ملکی فوجوں کا انخلا اسی سال مکمل ہو جائے گا۔ افغانستان کو ان دنوں شدید عدم استحکام کا سامنا ہے اور اس باعث سلامتی کی مجموعی صورت حال کمزور سے کمزور تر ہوتی جا رہی ہے۔ جمعہ گیارہ جون سے اب تک تیرہ سے زائد افراد کی ہلاکت کی اطلاعات ہیں، جن میں سات سویلین ہیں۔ ایسی صورتحال میں امن کے عمل کو ڈاوانوا ڈول کرنا کسی بھی فریق کے حق میں درست نہیں ہے۔ اور اس صورتحال پر پاکستان کا بیان اس حقیقت کی طرف اشارہ کررہا ہے کہ معاملات تیزی سے پاکستان کے ہاتھ سے بھی نکلے جارہے ہیں۔
ان حالات میں طالبان ایک بار پر ملک پر قبضہ کرکے اپنی حکومت قائم کرنا چاہتے ہیں۔ جبکہ موجودہ افغان حکومت اور دیگر طاقت ور عناصر طالبان کی مکمل سیاسی خود مختاری کو ملک میں شروع ہونے والی سیاسی اصلاحات اور اقتدار میں سب گروہوں کی شراکت کے حوالے سے خطرناک سمجھتے ہیں۔ ان کا خیال ہے کہ طالبان پاکستان کی پشت پناہی کی وجہ سے منہ زور ہیں اور بین الافغان مذاکرات میں سنجیدہ رویہ کا مظاہرہ نہیں کرتے۔ اس نظریہ کے مطابق افغان طالبان کا خیال ہے کہ ایک بار غیر ملکی فوجوں کا انخلا مکمل ہونے کے بعد وہ عسکری لحاظ سے اتنے طاقت ور ہوں گے کہ کوئی دوسرا گروہ ان کا مقابلہ نہیں کرسکے گا۔ کسی حد تک افغان طالبان یہ طرز عمل اختیار کرنے میں درست بھی ہو سکتے ہیں۔
ان کا یہ اندازہ بھی جائز ہوگا کہ امریکی افواج کے انخلا کے بعد افغان سیکورٹی فورسز کابل کی حفاظت کے قابل نہیں ہوں گی اور وہ بھرپور حملہ کر کے دارالحکومت پر قبضہ کرسکتے ہیں۔ اس طرح ایک بار پھر وہ اسلامی افغان امارات قائم کرنے میں کامیاب ہوجائیں گے۔ پاکستان کو شاید اس صورت حال کا اندازہ ہے۔ دنیا کے ساتھ وابستہ مفادات، امریکہ کے ساتھ تعلقات اور اندرونی طور پر عسکری گروہوں کے عزائم کے تناظر میں اسلام آباد کی یہی خواہش ہوگی کہ افغانستان میں قیام امن کا عبوری دور باہمی افہام و تفہیم سے طے ہوجائے۔ مگر جب تک افغان حکومت اور امریکہ اس حوالے سے کوئی ٹھوس قدم نہیں اٹھاتے تب تک طالبان کسی طور بھی ان حملوں سے باز نہیں آئیں گے۔ حقیقت یہ ہے کہ اشرف غنی پاکستان پر کسی طور اعتبار کرنے پر تیار نہیں ہیں۔ وہ سمجھتے ہیں کہ پاکستان ان کو ہٹا کر طالبانکو حکومت سونپنا چاہتا ہے جن کہ پاکستان بھی اشرف غنی پر اعتماد نہیں کرتا اور شاہ محمود قریشی کے حالیہ بیانات اس کا بین ثبوت ہیں۔
امریکہ کی سربراہی میں عالمی اتحاد نے افغانستان سے انخلا کا اعلان کرکے اپنے تئیں اپنی ذمہ داری پوری کردی ہے۔ اب وہ یہی سمجھتے ہیں کہ پاکستان ہی افغان طالبان کو کسی مناسب سمجھوتہ تک لانے اور عبوری حکومت کے قیام پر آمادہ کرسکتا ہے۔ دوسری طرف زمینی حقائق یہ ہیں کہ افغان طالبان کو فتوحات حاصل ہورہی ہیں۔ انہوں نے متعدد نئے علاقوں پر قبضہ کیا ہے اور بیرونی افواج کو ملک چھوڑنے پر آمادہ کرنے کے لئے مذاکرات اور معاہدہ کے ذریعے اپنی سیاسی پوزیشن بھی مستحکم کی ہے۔ پاکستان کا کام طالبان کو مذاکرات کی میز پر لانا تھا۔ اب اگر امریکی حکومت اشرف غنی کےپروپیگنڈے کا شکار ہوکر امن عمل کو ایک ٹھوش شکل نہیں دیتی تو افغانستان ایک مرتبہ پھر خطرناک خانہ جنگی کا شکار ہوجائے گا۔ جس کا خمیازہ امریکہ سے زیادہ پاکستان کو بھگتنا پڑے گا۔ حقیقت یہ ہے کہ یہ امن عمل پاکستان کے گلے کا ڈھول بن چکا ہے جس کو نہ تو پاکستان گلے سے اتار سکتا ہے اور نہ ہی بجائے بغیر رہ سکتا ہے۔
منگل، 15 جون 2021
شفقنا اردو
ur.shafaqna.com
یوں لگ رہا ہے کہ پاکستان جمہوری تحریک کے ٹوٹنے کےبعد پاکستانی سیاست میں جو خاموشی آئی تھی وہ ایک اور جنگ کا پیش خیمہ بننے والی ہے۔ یوں تو پاکستان پیپلز پارٹی پی ڈی ایم سے اپنی راہیں جد کر چکی تھی مگر بجٹ پر ایک مرتبہ پھر شہباز شریف اور بلاول کو ساتھ دے کر حکومت کو خطرے کی گھنٹیاں سنائی دینے لگی ہیں یہی وجہ ہے کہ وفاق نے ایک مرتبہ پھر اپنی توپوں کا رخ سندھ کی طرف کر دیا ہے۔ سندھ حکومت پر دباؤ ڈالنے کے لیے وفاقی وزیر اطلاعات و نشریات چوہدری فواد حسین نے حال ہی میں کہا ہے کہ ہر 5 سال کے بعد ایک شخص کو ربر اسٹمپ کے طور پر سندھ کے وزیراعلیٰ ہاؤس میں بٹھا دیا جاتا ہے جس کی تاریں زرداری خاندان کے پاس ہوتی ہیں جو اسے کٹھ پتلی کے طور پر استعمال کرتے ہیں۔ وفاقی وزیر نے کہا کہ گورنر راج کی آئین میں گنجائش نہیں، یہ جمہوری کام نہیں، سندھ میں آئین کی دفعہ 140 اے نافذ ہونی چاہیے جس کی ذمہ داری سپریم کورٹ کی ہے۔ واضح رہے کہ آرٹیکل 140(اے) صوبائی حکومت کو اپنے دائرہ اختیار میں مقامی حکومتوں کے قیام کا پابند بناتا ہے۔
وفاقی وزیر اطلاعات نے کہا کہ ہر برس گرمی میں کراچی میں بجلی کا شدید بحران ہوتا ہے لیکن وفاقی حکومت کے خصوصی انتظامات کی بدولت کراچی کے شہریوں کو گرمی میں لوڈشیڈنگ بھگتنی نہیں پڑی اور اس کے باعث آنے والے دباؤ کے نتیجے میں پنجاب اور خیبرپختونخوا میں ٹرپنگ ہوئی۔ انہوں نے کہا کہ وزیراعلیٰ سندھ مراد علی شاہ ذوالفقار علی بھٹو اور بینظیر بھٹو کی وفاق کی سیاست سے خود کو علیحدہ کرتے ہوئے قوم پرست سیاست کررہے ہیں جس کی وجہ سے یہاں تعصب پھیلایا جاتا ہے حالانکہ کراچی اور سندھ کے شہریوں کو سہولت فراہم کرنے کے لیے پورا پاکستان تکلیف برداشت کرتا ہے۔ وفاقی وزیر اطلاعات نے سندھ پر جو حملے کیے ہیں وہ ہرگز ہرگز بلا جواز نہیں ۔ اگرچہ تحریک انصاف اس وقت اندرونی تقسیم کا شکار ہے مگر شہباز اور بلاول ملاقات نے ان کے لیے خطرے کی گھنٹی بجا دی ہے۔
بجٹ کے موقع پر بہت سارے لوگوں کو یہ خوش آئند منظر دیکھنے میں آیا، جب لیڈر آف دی اپوزیشن شہباز شریف پارلیمنٹ کے باہر میڈیا سے گفتگو کر رہے تھے تو پیپلز پارٹی کے چیئرمین بلاول بھٹو زرداری بھی ان کے ساتھ کھڑے تھے۔ یقینا یہ منظر حکومتی کارندوں اور وزیر اعظم کے لیے خوش آئند نہیں تھا۔ خیر کفر ٹوٹا خدا خدا کر کے۔ اپوزیشن کی یہ دونوں جماعتیں جو پہلے تو پی ڈی ایم میں ایک دوسرے کی حلیف تھیں لیکن یہ سیاسی رومانس زیادہ عرصے تک نہیں چل سکا اوردونوں جماعتوں کی توپوں کا رخ ایک دوسرے کی طرف ہو گیا۔ مسلم لیگ (ن) کے سینئر نائب صدر شاہد خاقان عباسی اس وقت بارش کا پہلا قطرہ ثابت ہوئے جب انہوں نے پی ڈی ایم کے سیکرٹری جنرل کے طور پر پیپلز پارٹی اور عوامی نیشنل پارٹی کو شوکاز نوٹس بھیج دیا کہ آپ کوسینیٹ میں اپوزیشن لیڈر کے انتخابات میں بلوچستان عوامی پارٹی ”باپ“ کے ووٹ لینے کیوں پڑے جبکہ اسے اسٹیبلشمنٹ کی پارٹی سمجھا جاتا ہے۔ ایسا کر کے آپ نے پی ڈی ایم کے فیصلے کی خلاف ورزی کی ہے۔
ویسے یہ بات انتہائی دلچسپ ہے کہ وفاقی وزیر اطلاعات نے سپریم کورٹ کا رخ کراچی کی طرف موڑنے کی کوشش کی ہے۔ وفاقی وزیر کا یہ بیان دو حوالے سے حیرت انگیز ہے۔ ایک تو یہ کہ حکومت جو کام خود کرنے کے قابل نہیں ، اس کا بوجھ سپریم کورٹ کی طرف موڑنے کی کوشش کررہی ہے۔ یعنی وفاقی حکومت سندھ کے نام نہاد آئینی بحران سے نمٹنے کے لئے سپریم کورٹ کو اس کا فرض یاد دلارہی ہے۔ فواد چوہدری نے اسی پر اکتفا نہیں کیا بلکہ مزید تفصیل میں جاتے ہوئے یہ بھی بتا دیاہے کہ عدالت عظمیٰ آئین کی شق 140 اے کے تحت بلدیاتی ادارے قائم کرنے کا حکم دے تاکہ فنڈز مقامی سطح پر تقسیم ہوسکیں اور عوامی بہبود کے منصوبے پایہ تکمیل تک پہنچیں۔ یعنی حکومت سیاسی مجبوریوں کی وجہ سے خود تو سندھ کی حکومت گرانے اور صدارتی فرمان کے ذریعے صوبے کا انتظام سنبھالنے کی ’صلاحیت یا حوصلہ ‘ نہیں رکھتی لیکن اب وہ سپریم کورٹ سے چاہتی ہے کہ وہ اس کے لئے اس مسئلہ کو حل کردے۔
فواد چوہدری کے بیان کا ایک اہم پہلو یہ بھی ہے کہ وہ سندھ حکومت پر فنڈز کی خرد برد اور سیاسی نااہلی کے متعدد الزامات عائد کرنے کے بعد سپریم کورٹ کے ذریعے صوبے میں فوری طور سے بلدیاتی انتخابات کروانا چاہتے ہیں۔ لیکن اس معاملہ کے اس پہلو پر غور کرنے پر آمادہ نہیں ہیں کہ بلدیاتی انتخابات کے سلسلہ میں صرف سندھ حکومت ہی سے کوتاہی نہیں ہورہی بلکہ پنجاب، خیبر پختون خوا اور بلوچستان میں بھی بلدیاتی انتخابات نہیں کروائے گئے۔ ان میں سے دو صوبوں میں تحریک انصاف کی حکومت ہے جبکہ بلوچستان میں وہ حکومت کا حصہ ہے۔ تحریک انصاف کے انتخابی منشور میں بلدیاتی انتخابات کروانے اور فعال لوکل باڈیز سسٹم متعارف کروانے کا وعدہ کیا گیا تھا لیکن دیگر وعدوں کی طرح وہ یہ وعدہ پورا کرنے میں بھی کامیاب نہیں ہوئی۔ نہ جانے فواد چوہدری کس منہ سے سپریم کورٹ کو سندھ میں وہ کام کروانے کا مشورہ دے رہے ہیں جو ان کی پارٹی ملک کے باقی تین صوبوں میں کروانے میں ناکام ہے۔ اس حوالے سے آئے دن نئے نئے سبز باغ ضرور دکھائے جاتے ہیں لیکن عملی طور سے اختیارات کی مقامی سطح تک تقسیم کے لئے کام کرنے سے گریز کیا جارہا ہے۔
جہاں ایک طرف حکومت کو یہ خدشہ ہے کہ پیپلز پارٹی کہیں دوبارہ پی ڈی ایم کی طرف مارچ نہ شروع کر دے وہیں ایک بہت بڑا ڈر یہ بھی ہے کہ آصف زرداری کی سیاست نے اسٹبلشمنٹ کو تحریک انصاف کا متبادل فراہم کیا ہے۔ پیپلز پارٹی سے تحریک انصاف کی لڑائی اب صرف سندھ میں اقتدار کے معاملہ تک محدود نہیں ہے بلکہ عمران خان اور ان کے قریبی رفقا کو یہ اندیشہ بھی لاحق ہوگا کہ اب وہ تن تنہا اسٹبلشمنٹ کے ’لاڈلے‘ نہیں ہیں۔ یہی وجہ ہے کہ فواد چوہدری اور حکومتی مشینری اندرونی خوف اور دباؤ کی وجہ سے پیپلز پارٹی کو اس پوزیشن میں لانا چاہتی ہے کہ وہ دوبارہ پی ڈی ایم کے ساتھ مل جائے اور ایک مرتبہ پھر اسٹیبلشمنٹ کی نظروں میں معتوب ہوجائے۔ یقینا پاکستان پیپلز پارٹی حکومتی جماعت کے ان حملوں کا ٹھوس توڑ رکھتی ہوگی۔ اب دیکھنا ہے کہ کون کسے پچھاڑتا ہے۔
پیر، 14 جون 2021
شفقنا اردو
ur.shafaqna.com
Newer Posts