وزیراعظم عمران خان نے کہا ہے کہ اگر افغانستان میں کارروائی کے لیے پاکستان امریکی اڈوں کی میزبانی کو تیار ہوجائے تو خانہ جنگی شروع ہونے کی صورت میں دوبارہ دہشت گردوں کے انتقام کا ہدف بن سکتا ہے۔
امریکی اخبار واشنگٹن پوسٹ میں لکھے ایک مضمون میں وزیراعظم نے کہا کہ ‘ہم اس کے متحمل نہیں ہوسکتے، ہم پہلے ہی بھاری قیمت ادا کرچکے ہیں، اگر امریکا 20 سال بعد بھی تاریخ کی سب سے طاقتور فوجی مشین کے ساتھ افغانستان میں جنگ نہیں جیت سکا تو یہ امریکا ہمارے ملک کے اڈوں سے کیسے کرسکے گا؟
انہوں نے کہا کہ پاکستان، افغانستان میں امن کے لیے امریکا کے ساتھ شراکت داری کے لیے تیار تھا لیکن امریکی افواج کے انخلا کے باعث ہم مزید تنازع کا خطرہ مول لینے سے گریز کریں گے۔
وزیراعظم نے لکھا کہ پاکستان اور امریکا کے ‘طویل عرصے سے مسائل کے شکار اس ملک میں یکساں مفادات ہیں یعنی سیاسی تصفیہ، استحکام معاشی ترقی اور دہشت گردوں کی جنت نہ بننے دینا’۔
انہوں نے کہا کہ ہم افغانستان پر کسی عسکری غلبے کی مخالفت کریں گے جس کا نتیجہ صرف دہائیوں تک جاری رہنے والی خانہ جنگی کی صورت میں نکلے گا کیوں کہ طالبان پورے ملک پر فتح حاصل نہیں کرسکتے اور کامیابی کے لیے انہیں کسی حکومت میں شامل ہونا پڑے گا۔
ان کا کہنا تھا کہ ماضی میں پاکستان نے متحارب افغان فریقین میں انتخاب کر کے غلطی کی لیکن ملک نے اس تجربے سے سبق حاصل کیا ہے، ہمارا کوئی پسندیدہ نہیں اور ہم کسی بھی حکومت کے ساتھ مل کر کام کریں گے جس کو افغان عوام کا اعتماد حاصل ہو، تاریخ نے ثابت کیا ہے کہ افغانستان کو باہر سے کنٹرول نہیں کیا جاسکتا۔
پاکستان پر افغان جنگ کے اثرات
افغانستان میں جنگوں سے پاکستان کس طرح متاثر ہوا اس بات کو اجاگر کرتے ہوئے وزیراعظم نے کہا کہ 70 ہزار سے زائد پاکستانی جاں بحق ہوئے، امریکا نے امداد میں 20 ارب ڈالر دیے جبکہ پاکستانی معیشت کو ڈیڑھ سو ارب ڈالر سے زائد کا نقصان پہنچا اور سیاحت اور سرمایہ کاری ختم ہوگئی۔
انہوں نے کہا کہ امریکی کوششوں میں شامل ہونے کے بعد پاکستان کو ایک شراکت دار کے طور پر نشانہ بنایا گیا جس کا نتیجہ تحریک طالبان پاکستان اور دیگر عسکری گروہوں کی جانب سے ہمارے ملک کے خلاف دہشت گردی کی صورت میں نکلا۔
امریکی ڈرون حملوں جس کے بارے میں، میں نے خبردار کیا تھا، انہوں نے جنگ نہیں جیتی لیکن امریکا کے لیے نفرت پیدا کی اور دونوں ممالک کے خلاف دہشت گردوں کی صفوں میں اضافہ کیا۔
انہوں نے لکھا کہ امریکا نے پاکستان پر افغان سرحد کے ساتھ نیم خودمختار علاقوں میں پہلی مرتبہ فوج بھیجنے کے لیے دباؤ ڈالا، اس غلط فہمی میں کہ اس سے شورش کا خاتمہ ہوگا۔
تحریر جاری رکھتے ہوئے انہوں نے کہا کہ لیکن ایسا نہیں ہوا بلکہ اس سے قبائلی اضلاع کی نصف آبادی دربدر ہوگئی، صرف شمالی وزیرستان میں 10 لاکھ افراد دربدر ہوئے، اربوں ڈالر کا نقصان ہوا اور گاؤں کے گاؤں تباہ ہوئے۔
انہوں نے کہا کہ شہریوں کے کولیٹرل ڈیمج کے نتیجے میں پاک فوج کے خلاف خود کش حملے کیے گئے اور جتنے امریکی فوجی عراق اور افغانستان دونوں میں ہلاک ہوئے اس سے زیادہ پاکستانی فوجی شہید ہوئے جبکہ ہمارے خلاف مزید دہشت گرد گروہوں نے سر اٹھایا، صرف خیبر پختونخوا میں 500 پولیس اہلکار جاں بحق ہوئے۔
وزیراعظم نے کہا کہ اگر افغانستان میں سیاسی تصیفے کے بجائے مزید خانہ جنگی ہوئی تو پاکستان میں پناہ گزینوں کی تعداد بڑھے گی اور سرحدی علاقے مزید بدحال ہوں گے۔
امن کے لیے مذاکرات
وزیراعظم نے اس بات کو اجاگر کیا کہ افغانستان میں امریکا اور پاکستان کے مفادات یکساں ہیں۔
انہوں نے لکھا کہ ‘ہم خانہ جنگی نہیں بات چیت کے ذریعے امن چاہتے ہیں، ہمیں استحکام اور دونوں ممالک کے خلاف دہشت گردی کے خاتمے کی ضرورت ہے، ہم ایسے سمجھوتے کی حمایت کرتے ہیں جو گزشتہ 2 دہائیوں میں افغانستان میں ترقیاتی فوائد کو محفوظ بنائے، ہم معاشی ترقی، تجارت میں اضافے اور وسطی ایشیا میں رابطے چاہتے ہیں تاکہ ہماری معیشت اوپر اٹھے اور اگر مزید خانہ جنگی ہوئی تو ہم نیچے کی جانب چلے جائیں گے۔
ان کا کہنا تھا کہ اس لیے ہم نے طالبان کو مذاکرات کی میز پر لانے کے لیے پہلے امریکا اور اس کے بعد افغان حکومت کے ساتھ بہت بھاری سفارتکاری کی، ہم جانتے ہیں اگر طالبان نے عسکری فتح کا اعلان کرنے کی کوشش کی تو اس کا انجام خونریزی ہوگا۔
وزیراعظم نے کہا کہ ‘ہم اُمید کرتے ہیں افغان حکومت بھی مذاکرات میں مزید لچک دکھائے گی اور پاکستان پر الزام لگانا بند کرے گی کیوں کہ ہم وہ سب کررہے ہیں جس سے ہم عسکری کارروائی سے محفوظ رہ سکتے ہیں۔
انہوں نے کہا کہ یہی وجہ ہے کہ پاکستان، روس، چین اور امریکا کے مشترکہ بیان کا حصہ بنا جس میں قرار دیا گیا کہ اگر کابل پر کوئی حکومت مسلط کرنے کی کوشش کی گئی تو چاروں ممالک اس کی مخالفت کریں گے۔
انہوں نے مزید کہا کہ اس مشترکہ بیان میں افغانستان کے چاروں پڑوسی اور اشتراک میں شامل ممالک نے پہلی مرتبہ ایک آواز میں کہا کہ سیاسی تصفیہ کیسا ہونا چاہیے، اس سے خطے میں امن و ترقی کے لیے ایک نیا علاقائی معاہدہ بھی ہوسکتا ہے جس میں دہشت گردی کے ابھرنے والے خطرات کا تدارک کرنے کے لیے افغان حکومت کے ساتھ مل کر کام کرنا اور خفیہ معلومات کا تبادلہ شامل ہے۔
وزیراعظم کا کہنا تھا کہ ‘افغانستان کے ہمسایہ ممالک وعدہ کریں گے کہ وہ اپنی سرزمین افغانستان یا کسی بھی ملک کے خلاف استعمال نہیں ہونے دیں اور افغانستان بھی خود یہی وعدہ کرے گا۔
مضمون کے اختتام میں انہوں نے لکھا کہ اقتصادی روابط اور علاقائی تجارت کا فروغ افغانستان میں طویل المدتی امن اور سلامتی کے لیے اہم ہے اور مزید عسکری کارروائیاں بیکار ہوں گی۔
انہوں نے کہا کہ اگر ہم یہ ذمہ داری اٹھا لیں تو افغانستان جسے ‘گریٹ گیم’ اور مقامی دشمنیوں کے حوالے سے جانا جاتا تھا وہ علاقائی تعاون کا نمونہ بن سکتا ہے۔
منبع: ڈان نیوز
وفاقی وزیر دفاع پرویز خٹک نے مہنگائی کو اپوزیشن کا پروپیگنڈا قرار دیتے ہوئے کہا ہے کہ ملک میں کہیں غربت نہیں جبکہ جس ملک میں مہنگائی نہیں ہوگی تو وہ ملک رک جائے گا۔
قومی اسمبلی میں خطاب کرتے ہوئے پرویز خٹک نے کہا کہ ہمیں عالمی مالیاتی ادارے (آئی ایم ایف) کے پاس جانے کی ضرورت نہیں تھی لیکن اس بلا میں ان کی کارکردگی سے پھنسے ہوئے ہیں۔
انہوں نے کہا کہ دو سال میں آہستہ آہستہ قرضوں اور آئی ایم ایف سے ہمیشہ کے لیے جان چھوٹے گی، حکومت محنت کر رہی ہے اور اس ملک میں تبدیلی آرہی ہے۔
ان کا کہنا تھا کہ ملک میں معیشت بہتر ہورہی ہے، صنعت چل رہی ہے، ہم جب آئے تھے تو کارخانے تباہ تھے اور معیشت برباد تھی لیکن اب کارخانے چل پڑے ہیں اور ہماری حکومت نے ان کو ٹیکسز، بجلی، درآمدات میں مراعات دیں۔
وفاقی وزیر نے کہا کہ میں نے بغیر کسی منشور، پروگرام اور اصلاحات کے حکومتیں دیکھی ہیں، وزیراعظم اور وزیراعلیٰ بیٹھ جاتا ہے، یہ سوچتا بھی نہیں ہے کہ ملک میں تعلیم کی کیا حالت ہے، صحت اور غریبوں کے کیا حالات ہیں تو یہ سب چیزیں نظر انداز کرتے ہیں۔
انہوں نے کہا کہ کل ہماری اولاد سوال کرے گی، اگر ہم اپنا حق پورا ادا نہیں کریں گے تو عوام اور خدا بھی پوچھے گا، ہم نے اپنے صوبے میں حق ادا کردیا ہے اور اس کا نتیجہ سامنے ہے۔
انہوں نے کہا کہ صرف سرکاری نوکریوں سے روزگار نہیں ہوتا، مجھے دکھائیں اس وقت کون بے روزگار ہے، آپ کو مزدور نہیں ملتا، آپ کو گھروں میں نوکر نہیں ملتا کیونکہ لوگ صرف سرکاری نوکری چاہتے ہیں اور کوئی محنت کرنا نہیں چاہتا۔
وفاقی وزیر نے کہا کہ 38 سال قبل میں سیاست میں آیا تو ہمارے علاقے اور سارے گاؤں کچے تھے، آج کوئی مجھے کچا مکان دکھا دے، کہاں غربت آگئی، کسی کے پاس گاڑیاں نہیں تھیں، موٹر سائیکل نہیں تھے لیکن آج ہر ایک اچھی زندگی گزار رہا ہے۔
انہوں نے کہا کہ یہ بالکل غلط پروپیگنڈا ہے کہ لوگ بھوکے ہوگئے ہیں، میرے صوبے میں آؤ اور مجھے کچا مکان دکھا دو تو میں کہوں گا کہ یہ ملک پیچھے جا رہا ہے۔
ان کا کہنا تھا کہ اگر انہوں نے معیشت پڑی ہو تو یہ آیا ہے کہ دنیا میں ہر جگہ مہنگائی بڑھی ہے، امریکا اور یورپ میں بھی مہنگائی جاری ہے لیکن اس کا ایک فارمولا ہے، اگر عوام کا معیار زندگی نیچے جائے اور مہنگائی آئے تو تباہی اور اگر عوام کا معیار زندگی بہتر ہورہا ہے اور ان کے پاس پیسہ ہے تو وہ ملک میں تباہی نہیں ترقی ہے۔
انہوں نے کہا کہ مہنگائی اور لوگوں کی زندگی آپس میں جڑی ہوئی ہے، دنیا میں آج دیکھیں، امریکا اور یورپ میں کون سی چیز سستی ہوئی، ان کی آمدن بڑھ رہی اور ملک بھی ترقی کر رہا ہے۔
پرویز خٹک نے کہا کہ جس ملک میں مہنگائی نہیں ہو، سب کچھ رک جائے تو وہ ملک رک جائے گا، نہ کوئی اگائے گا، نہ کوئی صنعت چلائے گا اور کاروبار نہیں ہوگا تو کس طرح ملک چلے گا۔
انہوں نے کہا کہ یہ عجیب ‘فینومینا’ شروع کیا ہوا ہے کہ مہنگائی اور غربت ہے، میں چیلنج کرتا ہوں کہ میرے صوبے میں آئیں، مجھے غریب تلاش کرکے دیں تو میں کہوں گا تم بڑا سچ بول رہے ہو۔
وزیر دفاع نے کہا کہ یہ سب ڈراما ہے، اپوزیشن کا یہ ڈراما اب نہیں چلے گا، اب لوگ سمجھ دار ہوگئے ہیں۔
اس موقع حکمران جماعت کے ایک رکن نے پرویز خٹک کو بتایا کہ کرک میں غربت ہے تو انہوں نے کہا کہ ہمارے رکن کہہ رہے تو میں مانتا ہوں کرک میں غربت ہوگی۔
وفاقی وزیر نے اپوزیشن کی جانب سے سوالات پر کہا کہ ہم نے ان کی باتیں سنیں، اگر ان کو برداشت نہیں ہے تو چلے جائیں میں اپنی تقریر پوری کروں گا۔
انہوں نے کہا کہ میں اس فورم سے شہباز شریف کو چیلنج کرتا ہوں کہ آئیں مناظرہ کرتے ہیں کہ آپ کی 20 سالہ کارکردگی اور میری 5 سال اور موجودہ 3 سال کی کارکردگی کا جائزہ لیں۔
منبع: ڈان نیوز
وزیراعظم عمران خان نے کہا ہے کہ ایک مرتبہ جب مسئلہ کشمیر حل ہوجائے گا تو جوہری ہتھیاروں کی کوئی ضرورت نہیں رہے گی۔
یہ بات انہوں نے ایچ بی او پر ایکسیئز پروگرام میں صحافی جوناتھن سوان کو ایک انٹرویو دیتے ہوئے کہی۔
سوال پوچھا گیا کہ انٹیلیجنس تجزیہ کار کہتے ہیں کہ دنیا بھر میں پاکستان کے پاس جوہری ہتھیار سب سے تیزی سے بڑھ رہے ہیں، ایسا کیوں؟
جس کے جواب میں وزیراعظم کا کہنا تھا کہ ‘مجھے نہیں معلوم کہ وہ یہ بات کہاں سے لے آئے، پاکستان کے جوہری ہتھیار دفاعی ہیں تا کہ ہم اپنے آپ کو محفوظ رکھ سکیں میرا نہیں خیال کہ یہ بڑھ رہے ہیں’۔
وزیراعظم نے مزید کہا کہ ‘جہاں تک مجھے معلوم ہے یہ جارحانہ چیز نہیں، کوئی بھی ملک جس کا پڑوسی اس سے 7 گنا زیادہ بڑا ہو وہ پریشان ہوگا’۔
بات کو جاری رکھتے ہوئے انہوں نے کہا کہ وہ ‘جوہری ہتھیاروں کے مکمل خلاف تھے اور ہمیشہ سے رہے ہیں، ہم نے بھارت کے ساتھ 3 جنگیں لڑیں اور جب سے ہمارے پاس جوہری دفاع آیا دونوں ممالک کے درمیان کوئی جنگ نہیں ہوئی، ہمارے ہاں سرحدی جھڑپیں ہوئیں لیکن جنگ کا سامنا نہیں کرنا پڑا’۔
انہوں نے مزید کہا کہ جس وقت کشمیر کا مسئلہ حل ہوجائے گا دونوں ہمسایے مہذب لوگوں کی طرح رہنے لگیں گے ہمیں جوہری ہتھیار رکھنے کی ضرورت نہیں پڑے گی۔
چین کے ایغور مسلمانوں کا معاملہ
وزیراعظم سے سوال پوچھا گیا کہ وہ کیوں مغرب میں اسلاموفوبیا کے حوالے سے خاصہ بڑھ چڑھ کر بات کرتے ہیں لیکن چین میں ایغور مسلمانوں کی نسل کشی پر خاموش ہیں؟ جس کے جواب میں انہوں نے کہا کہ چین کے ساتھ تمام معاملات پر ‘بند دروازوں کے پیچھے’ بات چیت ہوتی ہے۔
انہوں نے مزید کہا کہ چین سب سے مشکل وقت میں ہمارے سب سے بہترین دوستوں میں سے ایک رہا ہے، جب ہم واقعی مشکلات کا شکار تھے چین ہماری مدد کو آیا، وہ جیسے ہیں ہم ان کا احترام کرتے ہیں اور ہمارا جو بھی مسئلہ ہو اس پر بند دروازوں کے پیچھے بات کرتے ہیں۔
وزیراعظم نے کہا کہ ‘میں دنیا میں دیکھتا ہوں کہ فلسطین، لیبیا، صومالیہ، شام اور افغانستان میں کیا ہورہا ہے تو کیا میں ہر چیز کے بارے میں بات کرنا شروع کردوں؟ میں اپنی سرحد پر اور اپنے ملک میں جو کچھ ہورہا ہے اس پر توجہ رکھتا ہوں۔
بات کو جاری رکھتے ہوئے انہوں نے سوال کیا کہ جب مقبوضہ کشمیر کے عوام کو نظرانداز کیا جارہا تھا تو مغربی دنیا میں یہ اتنا بڑا مسئلہ کیوں تھا؟ یہ کہیں زیادہ متعلقہ ہے، ایغوروں کے ساتھ شاید جو کچھ ہورہا ہو اس کے مقابلے ایک لاکھ کشمیری جاں بحق ہوچکے ہیں، مقبوضہ وادی ایک ‘کھلی جیل’ میں تبدیل ہوچکی ہے۔
وزیراعظم نے کہا کہ ‘یہ مسئلہ کیوں نہیں ہے؟ ساتھ ہی انہوں نے کہا کہ وہ اسے ‘منافقت’ سمجھتے ہیں۔
انہوں نے کہا کہ وہ ان چیزوں پر زیادہ توجہ دے رہے ہیں جن سے ملک اور اس کی سرحدوں کا تعلق ہے، ایک لاکھ کشمیریوں کا مرنا میرے لیے زیادہ تشویش کا باعث ہے کیوں آدھا کشمیر پاکستان میں ہے۔
مسلم ریاستوں کے رہنماؤں کو اسلاموفوبیا کے خلاف متحد ہونے کے لیے ارسال کردہ خط کے بارے میں بات کرتے ہوئے عمران خان نے کہا کہ اسلامی دنیا اور مغربی معاشروں کے درمیان رابطوں کا بڑا فقدان ہے، یہ 9/11 کے بعد ہوا جب ‘اسلامی’ دہشت گردی کا لفظ استعمال میں آیا۔
انہوں نے کہا کہ جس لمحے آپ اسلامی دہشت گردی کہتے ہیں، مغرب کا عام آدمی سمجھتا ہے کہ ایسا کچھ مذہب میں ہے جو دہشت گردی کا باعث بنتا ہے، 9/11 کے بعد جب کہیں کسی دہشت گرد حملے میں مسلمان ملوث ہوتا دنیا بھر کے ایک ارب 30 کروڑ مسلمانوں کو نشانہ بنایا جاتا۔
امریکی افواج کا افغانستان سے انخلا
جب ان سے سوال کیا گیا کہ کیا وہ افغانستان سے امریکی افواج کے انخلا پر ‘خوش’ ہیں؟ جس پر وزیراعظم نے کہا کہ ایک طریقے سے خوش ہوں کیوں کہ افغانستان کا کوئی عسکری حل نہیں نکلنا تھا۔
بات کو جاری رکھتے ہوئے انہوں نے کہا کہ لیکن تشویش کے احساسات بھی ہیں کیوں کہ ایک سیاسی تصفیے کے بغیر خانہ جنگی کا امکان ہے۔
وزیراعظم نے کہا کہ ان کی نظر میں ایک سیاسی تصفیے کا مطلب طالبان اور افغان قیادت کی اتحادی حکومت ہے، اس کے سوا کوئی حل نہیں۔
جب ان سے سوال پوچھا گیا کہ کیا امریکا نے انخلا کی تاریخ کا اعلان کر کے غلطی کی؟ تو وزیراعظم نے کہا کہ انہوں نے اپنے آپ کو بڑے بکھیڑے میں ڈال دیا ہے، انہیں کوئی ٹائم فریم دینا تھا لیکن جب انہوں نے ایک ٹائم فریم دیا طالبان نے اسے فتح سمجھا۔
انہوں نے مزید کہا کہ جہاں تک پاکستان کی بات ہے تو جو کوئی بھی افغانستان کے عوام کی نمائندگی کرے گا وہ اس کے ساتھ معاملہ کرے گا۔
صحافی نے سوال کیا کہ کیا آپ کو اس بات سے تشویش نہیں کہ لوگوں کا یہ گروہ (طالبان) آپ کے بالکل قریب طاقت جمع کررہا ہے۔
جس پر وزیراعظم بولے کہ دیکھیں میں طالبان کا ترجمان نہیں، میرے لیے یہ کہنا کہ انہیں کیا کرنا چاہیے کیا نہیں بے معنی ہے لیکن اگر طالبان نے مکمل فتح پانے کی کوشش کی تو بہت زیادہ خون خرابہ ہوگا اور جو ملک افغانستان کے بعد اسے سب سے زیادہ بھگتے گا وہ پاکستان ہوگا۔
انہوں نے کہا کہ پاکستان میں 30 لاکھ افغان پناہ گزین موجود ہیں، امریکا کے جانے سے قبل سیاسی تصفیہ لازمی ہونا چاہیے۔
امریکا کے ساتھ تعلقات
سی آئی اے ڈائریکٹر ولیم برنز کے حالیہ دورے کے بارے میں بات کرتے ہوئے وزیراعظم نے کہا کہ 9/11 کے بعد سے دونوں ممالک کی انٹیلیجنس ایجنسیز ‘مسلسل رابطے’ میں ہیں تاہم انہوں نے سی آئی اے سربراہ سے ملاقات سے انکار کیا۔
صحافی نے سوال کیا کہ ‘کیا آپ امریکی حکومت کو پاکستان میں سی آئی اے رکھنے کی اجازت دیں گے تا کہ وہ القاعدہ، داعش یا طالبان کے خلاف سرحد پار انسداد دہشت گردی کی کارروائیاں کرسکے؟
جس کے جواب میں وزیراعظم نے کہا کہ ‘ہرگز نہیں، کسی بھی صورت ہم اپنے اڈوں کے استعمال کی اور نہ ہی پاکستانی حدود سے افغانستان میں کسی بھی طرح کی کارروائی کی اجازت دیں گے’۔
انہوں نے کہا کہ ‘پاکستان نے 70 ہزار لاشیں برداشت کی ہیں جو امریکی جنگ میں حصہ لینے والے کسی بھی ملک میں سب سے زیادہ ہے، ہم اپنی سرزمین سے مزید عسکری کارروائیوں کے متحمل نہیں ہیں، ہم تنازع میں نہیں امن میں حصہ دار بنیں گے۔
جب ان سے سوال کیا گیا کہ کیا پاکستان امریکی فضائیہ کو طالبان کے خلاف فضائی حملے کرنے کے لیے اپنی فضائی حدود استعمال کرنے کی اجازت دے گا؟ تو انہوں نے کہا کہ پاکستان ‘کسی تنازع کا حصہ نہیں بنے گا’۔
صحافی کی جانب سے اصرار کرنے پر انہوں نے کہا کہ اس پر بات چیت نہیں ہوئی ہے، ‘امریکی افغانستان پر بم کیوں برسائیں گے جب اس کا 20 سالوں میں کوئی فائدہ نہیں ہوا؟’
صحافی نے پوچھا کہ کیا امریکی صدر جوبائیڈن نے جب سے منصب سنبھالا ہے ان سے آپ کی بات چیت ہوئی؟ جس پر وزیراعظم نے کہا کہ ‘نہیں بات چیت نہیں ہوئی’، صحافی نے پوچھا کہ کیا اس کی کوئی وجہ ہے؟ جس پر وزیراعظم نے کہا کہ جب ان کے پاس وقت ہو وہ مجھ سے بات کرسکتے ہیں لیکن اس وقت یہ واضح ہے کہ ان کی ترجیحات کچھ اور ہیں۔
صحافی نے سوال کیا کہ آپ جو بائیڈن سے کیا بات کریں گے؟ جس پر وزیراعظم نے کہا کہ جب مقبوضہ کشمیر کی بات آتی ہے امریکا پر بڑی ذمہ داری عائد ہوتی ہے، ‘اگر امریکا عزم اور خواہش کرے تو مسئلہ کشمیر حل ہوسکتا ہے’۔
پاکستان میں جنسی تشدد کے مسائل
وزیراعظم سے ان کے ریپ کو فحاشی کے ساتھ منسلک کرنے کے بیان کے بارے میں سوال کیا گیا جس پر انہوں نے کہا کہ ‘یہ سراسر بکواس ہے میں نے ایسا نہیں کیا، میں نے تو پردے کے تصور پر بات کی تھی پردے کا تصور یہ ہے کہ معاشرے میں فتنے سے گریز کیا جائے۔
انہوں نے کہا کہ پاکستان ایک مکمل مختلف معاشرہ ہے ‘اگر آپ معاشرے میں فتنے کو پروان چڑھائیں گے اور ان نوجوانوں کے پاس کہیں اور جانے کا راستہ نہیں ہوگا تو اس کے اثرات مرتب ہوں گے’۔
جب ان سے سوال پوچھا گیا کہ ‘کیا آپ سمجھتے ہیں کہ خواتین جو پہنیں اس کا کوئی اثر ہوتا ہے، کیا یہ فتنے کا حصہ ہے؟’
جس پر وزیراعظم نے کہا کہ ‘اگر خواتین بہت مختصر لباس پہنیں گی اس کا مردوں پر اثر ہوگا تاوقتیکہ وہ روبوٹ ہوں، میرا مطلب عمومی سمجھ کی بات ہے کہ اگر آپ کا معاشرہ ایسا ہو کہ جہاں لوگوں نے ایسی چیزیں نہ دیکھی ہوں تو اس کا ان پر اثر ہوگا۔
جب صحافی نے بحیثیت بین الاقوامی کرکٹ اسٹار کے ان کا ماضی یاد دلایا تو وزیراعظم نے کہا کہ ‘یہ میرے بارے میں نہیں میرے معاشرے کے بارے میں ہے، میری ترجیح یہ ہے کہ میرے معاشرے کا رویہ کیا ہے اس لیے جب ہم دیکھیں گے کہ جنسی جرائم بہت زیادہ بڑھ گئے ہیں تو ہم بیٹھیں گے اور اسے روکنے کے بارے میں بات چیت کریں گے، اس کا میرے معاشرے پر اثر پڑ رہا ہے’۔
منبع: ڈان نیوز
وزیرخارجہ شاہ محمود قریشی نے انتالیہ میں ترک وزیر خارجہ میولوت چاؤش اوغلو سے ملاقات کی اور افغان امن عمل پر تبادلہ خیال کیا گیا۔
ترجمان دفترخارجہ زاہد حفیظ چوہدری کی جانب سےجاری بیان میں کہا گیا کہ دونوں ممالک کے وزرائے خارجہ کے درمیان انتالیہ میں باہمی ملاقات ہوئی۔
بیان میں کہا گیا کہ وزیرخارجہ شاہ محمود قریشی نے ترک وزیرخارجہ کو حال ہی میں انتالیہ ڈپلومیسی فورم کے کامیاب انعقاد پر مبارک باد دی جہاں بڑی تعداد میں عالمی رہنماؤں نے شرکت کی تھی۔
انہوں نے کہا کہ فورم میں عالمی سطح پر موجود کئی مسائل پر تبادلہ خیال کیا گیا اور عالمی رہنماؤں کو آپس میں ملنے کا موقع بھی ملا۔
دفترخارجہ کا کہنا تھا کہ دوطرفہ بہترین تعلقات کا فائدہ اٹھاتے ہوئے دونوں فریقین نے اعلیٰ سطح کا اسٹریٹجک کوآپریشن کونسل کے اجلاس کی تیاریوں کے بارے میں بات کی جو رواں برس ترکی میں منعقد ہوگا۔
دونوں ممالک کے وزرائے خارجہ افغان امن عمل میں حالیہ پیش رفت اور افغانستان سے بین الاقوامی فوج کی واپسی پر بھی بات کی۔
شاہ محمود قریشی نے ترکی کی قیمتی کوششوں اور افغانستان میں مختلف فریقین تک رسائی کرنے سمیت دیگر اقدامات کو سراہا۔
اس موقع پر وزیرخارجہ نے افغانستان میں امن کے قیام اور پرامن، محفوظ اور مستحکم افغانستان کے لیے پاکستان کی انتھک کوششوں کو اجاگر کیا۔
ان کا کہنا تھا کہ امید ہے کہ افغان فریقین موقع سے فائدہ اٹھائیں گے اور سیاسی طور پر مذاکرات سے معاملات کا حل نکال لیں گے۔
خیال رہے کہ وزیر خارجہ شاہ محمود قریشی کا گزشتہ تین ماہ کے دوران ترکی کا یہ تیسرا دورہ ہے جو ترک وزیر خارجہ کی دعوت پر کر رہے ہیں۔
دفترخارجہ کا کہنا تھا کہ دونوں ممالک کے درمیان اعلیٰ سطح کی ملاقات دوطرفہ تعلقات کی مضبوطی کا عکاس ہے۔
یاد رہے کہ وزیرخارجہ شاہ محمود قریشی گزشتہ ماہ فلسطین کے معاملے پر ترکی گئے تھے، جہاں ترک وزیرخارجہ کے علاوہ صدر رجب طیب اردوان سے ملاقات کی تھی۔
شاہ محمود قریشی نے فلسطین اور مقبوضہ کشمیر کے مسئلے پر رجب طیب اردوان کے ‘واضح موقف’ کی تعریف کی تھی اور مسئلہ کشمیر کے حوالے سے تمام بین الاقوامی فورمز پر پاکستان کی ‘مستقل اور زبردست مدد’ کے لیے ترک صدر کا شکریہ بھی ادا کیا تھا۔
وزیر خارجہ نے اپنے ترک ہم منصب سے فلسطینیوں کے خلاف اسرائیلی جارحیت روکنے میں مدد کے لیے عالمی برادری کو متحرک کرنے کے طریقوں پر تبادلہ خیال کیا تھا۔
منبع: ڈان نیوز
نئے ورلڈ آرڈر میں پاکستان کے مقام کا تعین کا اندازہ کوئی بھی شخص کر سکتا ہے۔ پاکستان کی حالیہ پالیسی ظاہر کرتی ہے کہ ایک ایسی ریاست جو مذہب کو تمام چیزوں سے بالاتر تصور کرتی ہے وہ چین اور امریکہ کے مابین متوازن رستے کی تلاش میں ہے۔ ایک ایسا ایٹمی ملک جس کا نظام تعلیم سائنس کی بجائے رٹا اور قرآن کو حفظ کرنے پر مشتمل ہو یقینی طور پر بیجنگ اور واشنگٹن کے لیے کسی خاص اہمیت کا حامل نپیں ہے۔ پاکستان ایک طویل عرصے سے چین کے ساتھ گہرے دوستانہ تعلقات اور سٹرٹیجک پارٹنرشپ کا دعوی کرتا ہے تاہم اب پاکستان ایک آزادانہ رستے کی تلاش میں ہے۔ اسلام آباد اور بیجنگ کے مابین تعلقات میں اضافہ اس وقت دیکھنے میں آیا جب چین نے پاک چین اقتصادی راہدری کے منصوبے میں 60 بلین ڈالر کی خطیر سرمایہ کاری کی۔ جو کہ چین کے بیلٹ اینڈ روڈ منصوبے کی بنیاد ہے۔ جس میں توانائی، ٹرانسپورٹیشن اور انفرا سٹرکچر کے بہت سارت منصوبے شامل ہیں۔ بیلٹ اینڈ روڈ منصوبے کے تحت توانائی، انفراسٹرکچر اور ٹرانسپورٹیشن جیسے منصوبوں کے بوجھ تلےدبے پاکستان کو بہت احتیاط سے کام لینا ہوگا۔
اس بات کو مدنظر رکھتے ہوئے کہ سی پیک شاید پاکستان کو میری ٹائم اور لینڈ ٹرانسپورٹیشن مرکز بنا سکے پاکستان نے حال ہی میں سعودی عرب کے ساتھ گوادر میں 10 بلین ڈالر کی آئل ریفائنری پیٹرو کیمیکل کمپلیکس بنانے کا معاہدہ کیا ہے۔دونوں ممالک کراچی کی بندرگاہ کو متبادل کے طور پر دیکھ رہے ہیں۔ گوادر پورٹ کئی سالوں سے پیچیدگیوں کا شکار ہے۔ بندرگاہ کی تعمیر کئی مرتبہ روکی جا چکی ہے جس کی ایک وجہ صوبہ بلوچستان کی بلوچ قوم پرست آبادی کی بڑھتی ہوئی ناراضی ہے ۔ مقامی افراد کی جانب سے احتجاج کے بعد بندرگاہ کے گرد باڑ لگانے کا عمل روک دیا گیا تھا۔
کراچی میں ریفائنری کی تعمیر چین کی اس امید کو زک پہنچا سکتی ہے کہ گوادار بحیرہ عرب کی اولین بندرگاہ بن کر ابھرے۔ اس کے علاوہ گوادر بندرگاہ پر شبہات کی وجہ سے ہی زمینی طور پر گھرے ہوئے ممالک تاجکستان اور افغانستان چاہ بہار کی طرف دیکھ رہے ہیں۔ ابتدائی طور پر سعودی ولی عہد محمد بن سلمان کے 2019 میں دورہ پاکستان کے دوران اس ریفائنری کی تعمیر گوادر کے مقام پر ہی ہونا طے پائی تھی۔ تاہم بعد میں سعودی عرب نے ائک فزیبیلٹی رپورٹ میں دعوی کیا کہ گوادر میں پائپ لائن اور ٹرانسپورٹیشن انفرا سٹرکچر کی قلت کی وجہ سے ریفائنری کا قیام ممکن نہیں ہے اور اس طرح یہ ریفائنری کراچی سے الگ ہو جائے گی جو کہ تیل کی سپلائی کا گڑھ ہے۔
اسی طرح امریکہ کے افغانستان سے مکمل انخلا کے بعد پاکستان ممکنہ طور پر افغانستان پر نظر رکھنے کے لئے امریکی افواج کو اڈے بھی فراہم کر دے۔ اگرچہ ابھی تک امریکہ اور پاکستان اس پر متفق نہین ہوسکے تاہم اگر ایسا ہو گیا تو چین اس پر لازمی اپنا رد عمل دے گا۔ اسی طرح پاکستان کی سرحد چین کےشورش زدہ صوبے زنجیانگ کے ساتھ لگتی ہےجو کہ ایغور ترک مسلمانوں کا گڑھ ہے۔ چین کو خدشہ ہے کہ پاکستانان چند ممالک میں سے ہے جہاں شروع کے ایام میں ایغور مسلمانوں کے خلاف چینی مظالم پر آواز اٹھائی گئی تھی، وہاں سے جنگجو گروپ دوبارہ پاکستان کو لانچنگ پیڈ بنا کر چین میں پرتشدد کارروائیاں نہ شروع کر دیں۔
پاکستان کے حوالے سے چین اور امریکہ میں یہ تاثر دوبارہ ابھر رہا ہے کہ پاکستان میں جنگجو دوبارہ سر اٹھا رہے ہیں کیوں کہ پاکستان نے جو تعلیمی اصلاحات نافذ کی ہیں اس کے تحت پرائمری سطح سے لے کر جامعات تک اسلامی سلیبس کا نفاذ کیا جائے گا۔ نقادوں کا دعوی ہے کہ اس سلیبس میں 30 فیصد حصہ مذہب پر مشتمل ہوگا۔
حکومتی جماعت کے ایک رکن پارلیمنٹ محمد بشیر خان کا کہنا ہے کہ پاکستان ایک نظریاتی اسلامی ملک ہے اور ہمیں مذہبی تعلیم کی ضرورت ہے۔ میں محسوس کرتا ہوں کہ ہمارا سلیبس ابھی تک مکمل طور پر اسلامی نہیں ہے اور ہمیں اس کی اسلامائزیشن کی مزید کوشش کرنی چاہیے اور اپنے شہریوں کی اخلاقی اور نظریاتی تربیت کے لیےزیادہ سے زیادہ مذہبی مواد کی تعلیم دینی چاہیے۔ پارلیمنٹ ممبر کی اس گفتگو سے یہ ظاہر ہوتا ہے کہ پاکستان امت مسلمہ میں قیادت کے کردار کے لیے کوشاں ہے جیسا کہ سعودی عرب، عرب امارات ، ترکی ، ایران اور انڈونیشیا سافٹ مذہبی قوت کے حصول کے لیے کوشاں ہیں۔
تعلیمی اصلاحات درحقیقت عمران خان کی امت مسلمہ کے ترجمان بننے کی کوششوں کو مہمیز دے گی۔ وزیر اعظم عمران خان نے حال ہی میں فرانسیسی صدر ایمانویل میکرون پر اسلامو فوبیا کو ہوا دینے کا الزام لگایا ہے اور مطالبہ کیا ہے کہ فیس بک مسلمان مخالف خیالات پر پابندی عائد کرے۔ نقادوں کا کہنا کہ اس طرح کا نصاب ایک ایسے معاشرے کی تشکیل کا سبب بنے گا جو کہ عدم برداشت کا نمونہ ہوگا۔
ممتاز ماہر تعلیم روبینہ سہگل کا کہنا ہے کہ جب ریاست خود کو کسی ایک فقے یا مذہب کی ایک تشریح کے ساتھ خود کو جوڑتی ہے تو یہ فرقہ وارانہ فسادات کا رستہ کھول دیتی ہےجو کہ تشدد میں بدل سکتا ہے۔ حقیقت یہ ہے کہ ایک ایسا یکساں نصاب جو کہ صنفی بنیاد ، فرقہ وارانہ اور طبقاتی بنیادوں پر ہو محض سماجی اختلافات، اقلیتوں کے حقوق کو کمزور کرنے اور وفاقیت کے اصول کو پامال کرنے کا سبب بنے گی۔
سابق سینیٹر فرحت اللہ بابر نے خبردار کیا ہے کہ یکساں نصاب تعلیم مدارس کے اساتذہ کا تعلیمی اداروں میں داخلے کا رستہ ہموار کرے گا۔ یہ بات واضح ہے کہ اکثر مدارس کے طلبا کی تعلیم فرقہ وارانہ بنیادوں پر ہے تو تصور کریں کہ ان مدارس کے اساتذہ اگر مین سٹریم تعلیمی اداروں میں داخل ہو گئے تو کیا ہوگا
پیر، 21 جون 2021
شفقنا اردو
ur.shafaqna.com
وزیر خارجہ شاہ محمود قریشی نے افغانستان میں رونما ہونے والی سیاسی صورتحال پر خصوصی انٹرویو دیتے ہوئے انکشاف کیا ہے کہ بھارت نے افغانستان کی سرزمین کو پاکستان میں تخریبی سرگرمیوں کے لیے استعمال کیا ہے۔
سرکاری نیوز ایجنسی ‘اے پی پی’ کی رپورٹ کے مطابق افغان ٹی وی ‘طلوع’ کو انٹرویو میں وزیر خارجہ نے افغانستان میں امریکی فوجیوں کے انخلا کے بعد سیاسی صورتحال، افغان مفاہمتی عمل اور اس میں پاکستان کے کردار پر بات کی۔
ایک سوال کے جواب میں انہوں نے کہا کہ بھارت کی جانب سے کابل کی سرزمین کو پاکستان میں شر انگیزی کے لیے استعمال کرنے پر سخت تکلیف ہوتی ہے۔
وزیر خارجہ نے اس امر کی تردید کی کہ امریکی افواج کے انخلا کے بعد افغانستان میں کارروائیوں کے لیے پاکستانی سرزمین استعمال ہوگی۔
پاک افغان تعلقات کے حوالے سے انہوں نے اس عزم کا اعادہ کیا کہ پاکستان ایک خود مختار ، جمہوری اور پرامن افغانستان کا خواہاں ہے ۔
وزیر خارجہ نے کہا کہ افغانستان میں اس وقت جو صورت حال ہے اس کا ذمہ دار پاکستان نہیں ہے۔
انہوں نے پاکستان میں طالبان کے ٹھکانوں کی موجودگی کے امکان کو یکسر مسترد کرتے ہوئے کہا کہ ان کی قیادت کی جڑیں افغانستان میں ہیں۔
‘افغانستان میں دوبارہ خانہ جنگی کا امکان نہیں’
وزیر خارجہ شاہ محمود قریشی نے افغانستان کے ساتھ شراکت کے لیے آمادگی کا اظہار کرتے ہوئے کہا کہ ‘ہم امن کے لیے شراکت داری پر یقین رکھتے ہیں’۔
انہوں نے خطے میں امریکی افواج کی واپسی اور انتظامی امور پر افغان دھڑوں میں اختلاف کی بنیاد پر دوبارہ خانہ جنگی کے امکان کو مسترد کردیا۔
انہوں نے کہا کہ ہم افغانستان میں امن کی شراکت داری کے لیے تیار ہیں اور توقع ہے کہ لینڈلاک ملک میں ایک اور خانہ جنگی نہیں ہوگی۔
وزیر خارجہ شاہ محمود قریشی نے پرامن، محفوظ اور مستحکم افغانستان کے لیے پاکستان کے عزم کا اعادہ کرتے ہوئے کہا کہ افغانستان میں امن کے لیے واحد راستہ افغانوں میں مفاہمت، بقائے باہمی اور بات چیت ہے۔
انہوں نے افغانستان میں مستقبل بنیادوں پر امن کی اہمیت پر زور دیتے ہوئے کہا کہ اس مقصد کے حصول کے لیے تمام افغان رہنماؤں کو لچک کا مظاہرہ کرنا چاہیے۔
شاہ محمود قریشی نے واضح کیا کہ ہم افغانستان میں امن اور اس کے استحکام کے خواہاں ہیں اور سمجھتے ہیں اس طرح علاقائی روابط کو فروغ ملے اور دونوں ممالک کے لیے معاشی ترقی کےلیے ضروری ہے۔
انہوں نے کہا کہ افغانستان میں اقتصادی سلامتی، سرمایہ کاری، دوطرفہ اور علاقائی تجارت امن اور استحکام نہ صرف افغانستان بلکہ ہماری بھی خواہش ہے اور یہ ہمارے لیے بھی ناگزیر ہے۔
منبع: ڈان نیوز
وزیراعظم عمران خان نے امریکی خفیہ ادارے سی آئی اے کو افغانستان میں کارروائیوں کے لیے پاکستانی اڈے استعمال کرنے کے امکان کو سختی سے مسترد کر دیا ہے۔پاکستانی وزیراعظم نے امریکی نیوز ویب سائٹ ایکسیس (Axios) کو دیے گئے خصوصی انٹرویو میں کہا: ’افغانستان سے امریکی افواج کے انخلا کے بعد پاکستان سرحد پار سے انسداد دہشت گردی مشنز کے لیے امریکہ کو اپنی سرزمین پر اڈے استعمال کرنے کی ہرگز اجازت نہیں دے گا۔‘اس سے قبل پاکستانی وزیر خارجہ شاہ محمود قریشی بھی متعدد بار کہہ چکے ہیں کہ افغانستان سے امریکی فوج کے انخلا کے بعد کوئی فوجی اڈے پاکستان منتقل نہیں ہوں گے۔
واضح رہے کہ رواں برس 11 ستمبر تک افغانستان سے تمام امریکی افواج کے انخلا کا وقت قریب پہنچ چکا ہے اور ایسی صورت حال میں عدم استحکام کے شکار اس ملک میں انسداد دہشت گردی اور انٹیلی جنس صلاحیتوں کو برقرار رکھنا جو بائیڈن انتظامیہ کے لیے ایک اہم سوال بن گیا ہے لہذا اس صورت حال میں پاکستانی اڈوں کی امریکہ کے لیے اہمیت بڑھ جاتی ہے۔غیر ملکی افواج کا حتمی انخلا ایک ایسے وقت میں ہو رہا ہے جب کئی صوبوں میں طالبان اور افغان فورسز کے مابین لڑائی کی شدت میں اضافہ ہوا ہے۔ ایسے میں خدشہ ہے کہ انخلا کے بعد طالبان افغانستان فوج پر غلبہ پا لیں گے کیوں کہ ان کا زیادہ تر انحصار نیٹو کی حمایت، ان کی انٹیلی جنس، رسد اور خصوصاً امریکی فضائی مدد پر تھا۔یہی وجہ ہے کہ بائیڈن انتظامیہ پاکستان کے علاوہ وسطی ایشیا میں بھی افغانستان کے اندر دہشت گردوں کے نیٹ ورکس پر نظر رکھنے اور انٹیلی جنس برقرار رکھنے کے لیے اڈووں کی تلاش میں ہے۔
دوسری جانب پاکستان کا جمعہ کو کہنا تھا کہ افغانستان کے دارالحکومت کابل میں بین الاقوامی ہوئی اڈے کی سیکیورٹی کے لیے اسلام آباد کے تعاون کی کوئی تجویز زیرِ غور نہیں ہے۔ پاکستان کے دفترِ خارجہ کے ترجمان زاہد حفیظ چوہدری کا یہ بیان ایک ایسے وقت میں سامنے آیا ہے جب ترکی کے صدر رجب طیب ایردوان نے گزشتہ ہفتے نیٹو اجلاس کے موقع پر پریس کانفرنس میں کہا تھا کہ ترکی کو غیر ملکی فورسز کے انخلا کے بعد افغانستان میں سیکیورٹی مشن کے لیے امریکہ کے ساتھ ساتھ پاکستان اور ہنگری کا تعاون بھی درکار ہو گا۔زاہد حفیظ چوہدری نے جمعرات کو معمول کی نیوز بریفنگ کے دوران صحافیوں کو بتایا کہ کابل ایئر پورٹ کی سیکیورٹی کے لیے پاکستان کا تعاون فراہم کرنے کی تجویز زیرِ غور نہیں ہے۔ البتہ افغان امن عمل کے لیے اسلام آباد مناسب کردار ادا کرنے لیے پُر عزم ہے۔اس حوالے سے مبصرین کا کہنا ہے کہ پاکستان اور ترکی کے قریبی تعلقات کے باوجود غیر ملکی افواج کے انخلا کے بعد افغانستان میں اسلام آباد کا کسی بھی سیکیورٹی مشن کے لیے فوجی تعاون فراہم کرنے کا امکان کم ہی ہے۔
وزیر اعظم کی طرف سے افغانستان میں دہشت گردی کی نگرانی کے لئے امریکہ کو کسی بھی قسم کی سہولت دینے سے دوٹوک انکار کوبھی افغان طالبان کے اس مؤقف کی تائید کے طور پر ہی دیکھا جانا چاہئے کہ طالبان افغان سرزمین کو کسی دوسرے ملک کے خلاف استعمال کرنے کے خلاف ہیں۔ اسی طرح ہمسایہ ممالک کو بھی افغانستان میں مداخلت کی پالیسی سے گریز کرنا چاہئے ورنہ اس کے سنگین نتائج سامنے آئیں گے۔ افغان طالبان کا یہ بیان ان امریکی کوششوں کے بعد سامنے آیا تھا جن کے مطابق امریکہ افغانستان سے فوجوں کے انخلا کے بعد پاکستان سے دہشت گردی کی نگرانی کے لئے بعض سہولتوں کا تقاضہ کررہا ہے۔ امریکی وزارت دفاع کے نمائیندے نے امریکی سینیٹ کو مطلع کیا تھا کہ پاکستان اس مقصد کے لئے فضائی و زمینی دسترس دینے پر آمادہ ہے۔
اس بیان کو عام طور سے یوں سمجھا گیا تھا کہ پاکستان پھر سے امریکہ کو فضائی و زمینی اڈے فراہم کرسکتا ہے تاکہ وہ افغانستان سے نکلنے کے بعد بھی وہاں دہشت گردی کے تدارک کے لئے ضروری کارروائی کرسکے۔ پاکستانی وزارت خارجہ نے اس امریکی بیان پر براہ راست تو کوئی تبصرہ نہیں کیا تھا لیکن ان خبروں کی تردید کی گئی تھی کہ پاکستان میں امریکہ کو فوجی اڈے فراہم کئے جاسکتے ہیں۔ شاہ محمود قریشی نے سینیٹ سے خطاب میں واضح کیا تھا کہ امریکہ کو پاکستان میں اڈے دینے کا کوئی منصوبہ نہیں ہے۔
اس حوالے سے البتہ یہ بات نوٹ کی جانی چاہئے کہ دفتر خارجہ نے امریکہ کو اڈے دینے کے بارے میں قیاس آرائیوں کو افسوسناک قرار دیتے ہوئے جو بیان جاری کیا تھا اس میں یہ بھی کہا گیا تھا کہ پاکستان اور امریکہ کے درمیان 2001سے ایئر لائن آف کمیونی کیشن (اے ایل او سی) اور گراؤنڈ لائنز آف کمیونی کیشن (جی ایل او سی) کوآپریشن کا معاہدہ موجود ہے۔ پاکستان نے امریکہ کے ساتھ کوئی نیا معاہدہ نہیں کیا۔ پاکستان سے افغانستان کی نگرانی کے سوال پر ہونے والی سیاسی بیان بازی کے باوجود اس بات کی وضاحت سامنے نہیں آسکی ہے کہ 2001 میں امریکہ کے ساتھ فضائی اور زمینی تعاون کے جو معاہدے کئے گئے تھے، وہ بدستور کیوں برقرار ہیں اور کیا ان معاہدوں کے تحت امریکہ افغانستان میں کارروائی کے لئے پاکستان کی فضائی حدود یا زمینی مواصلات استعمال کرنے کا مجاز نہیں ہوگا؟
وزیر خارجہ یا وزیر اعظم کی طرف سے امریکہ کو اڈے نہ دینے اور پاکستانی سرزمین سے افغانستان میں حملہ کرنے کی اجازت نہ دینے کی بات درست بھی ہو تو ان معاہدوں کی موجودگی میں کوئی نہ کوئی بیچ کا راستہ ضرور موجود ہوگا جس کے بارے میں نہ تو بات کی جارہی ہے اور نہ ہی اس کی تفصیلات منظر عام پر ہیں۔ تاآنکہ پاکستان 20 سال پرانے ان دونوں معاہدوں کو ختم کرنے کا اعلان کردے۔ تب ہی ان سرکاری بیانات کو درست مانا جاسکے گا کہ پاکستان افغانستان پر حملے کے لئے امریکہ کو کوئی سہولت نہیں دے گا۔
سوال یہ ہے کہ پاکستان اگر امریکہ کو اڈے نہ بھی فراہم کرے اور امریکہ اپنے بحری بیڑوں یا بھارتی اڈوں کو استعمال کرتے ہوئے افغانستان کی نگرانی کرے اور کسی انتہائی صورت میں وہیں سے مناسب عسکری کارروائی کرے تو کیا ان معاہدوں کی موجودگی میں امریکہ کو ایسے حملوں کے لئے پاکستانی فضائی حدود استعمال کرنے سے انکار کیا جاسکے گا؟ اگر ایسا نہیں ہوسکتا تو پاکستان کی طرف سے امریکہ کو اڈے نہ دینے کی پرجوش باتیں بے معنی اور غیر متعلقہ ہوجائیں گی۔ اگر امریکہ کو ایسی ضمانت بھی فراہم نہیں کی جارہی تو افغان امن کے لئے خدمات کے عوض امریکہ سے ’مراعات‘ کی جو امیدیں باندھی گئی ہیں ، ان کا کیا ہوگا۔ حالات کی خرابی کے بارے میں افغان طالبان کی دھمکی کو بھی اس امکان کی روشنی میں پرکھنے کی ضرورت ہے۔ اس قسم کے کسی منصوبہ میں پاکستان کی شمولیت کی سب سے بھاری قیمت بھی پاکستان کو ہی ادا کرنا پڑے گی۔
شمالی وزیرستان میں سیکیورٹی فورسز کے ساتھ فائرنگ کے تبادلے میں کالعدم تحریک لبیک پاکستان (ٹی ایل پی) کے دو دہشت گرد ہلاک جبکہ پاک فوج کا ایک جوان شہید ہوگیا۔
پاک فوج کے شعبہ تعلقات عامہ آئی ایس پی آر کی جانب سے جاری پریس ریلیز میں بتایا گیا کہ وزیرستان کے علاقے اسپین وام میں خفیہ اطلاعات پر سیکیورٹی فورسز نے آپریشن کیا۔
انہوں نے بتایا کہ سیکیورٹی فورسز نے دہشت گردوں کی موجودگی کی اطلاع پر آپریشن کیا۔
آئی ایس پی آر کے مطابق دہشت گردوں کے ساتھ فائرنگ کے تبادلے میں 2 دہشت کرد ہلاک ہوگئے۔
انہوں نے بتایا کہ ٹی ٹی پی کے ہلاک ہونے والے دونوں دہشت گرد اسپین وام میں فعال تھے اور سیکیورٹی فورسز کے خلاف دہشت گردی کی کارروائیوں میں ملوث تھے۔
آئی ایس پی آر کے مطابق دہشت گردوں سے مقابلے میں نائک نزاکت حسین شہید ہوگئے۔
انہوں نے بتایا کہ شہید ہونے والا 32 سالہ جوان اٹک کا رہائشی تھا۔
خیال رہے کہ رواں برس فروری میں شمالی وزیرستان کے علاقے میر علی میں سیکیورٹی فورسز کے ساتھ فائرنگ کے تبادلے میں 4 دہشت گرد ہلاک ہوگئے تھے۔
سیکیورٹی فورسز کو میر علی میں ایک کمپاؤنڈ میں دہشتگردوں کی موجودگی کا علم ہوا تھا، جس پر جیسے ہی اہلکاروں نے علاقے کو گھیرے میں لیا، دہشت گردوں نے فائرنگ شروع کردی۔
اس سے قبل یعنی 2 فروری کو سیکیورٹی فورسز نے پاک-افغان سرحد کے قریب لوئر دیر میں کارروائی کے دوران 3 دہشت گردوں کو ہلاک کردیا تھا۔
یاد رہے کہ وزیرستان خاص طور پر اس کے شمالی حصے میں سیکیورٹی فورسز اور عسکریت پسندوں کے مابین اکثر جھڑپیں ہوتی رہتی ہیں، جس میں سیکیورٹی فورسز نے حالیہ مقابلوں کے دوران متعدد اہم دہشت گردوں کو ہلاک کیا ہے تاہم اس دوران کئی جوانوں نے مملکت خداداد کی خاطر جانوں کا نذرانہ بھی پیش کیا ہے۔
قبل ازیں 24 جنوری کو سیکیورٹی فورسز نے قبائلی ضلع شمالی وزیرستان کے علاقے میرعلی او خیسور میں کارروائی کرکے دو اہم کمانڈروں سمیت 5 دہشت گردوں کو ہلاک کردیا تھا۔
18 جنوری کو خیبرپختونخوا کے قبائلی ضلع جنوبی وزیرستان میں سیکیورٹی فورسز کے آپریشن کے دوران 2 دہشت گرد ہلاک ہوگئے تھے جبکہ ایک کو زخمی حالت میں گرفتار کرلیا گیا تھا۔
آئی ایس پی آر نے بتایا تھا کہ ہلاک دہشت گرد تحریک طالبان پاکستان (ٹی ٹی پی) سجنا گروپ کے سرگرم اراکین اور آئی ای ڈی ماہر، دہشت گردوں کے ٹرینر، موٹی ویٹر تھے اور سیکیورٹی فورسز پر حملوں میں ملوث تھے۔
اس سے قبل 15 جنوری کو میرعلی سب ڈویژن کے علاقے عزیز خیل میں چیک پوسٹ کے قریب سیکیورٹی اہلکار پر نامعلوم مسلح افراد کے حملے میں لانس نائیک عباد علی نے جام شہادت نوش کیا تھا۔
منبع: ڈان نیوز
اسلام آباد: پاکستان نے قومی اسمبلی سے منظور شدہ قانون سازی سے متعلق ہندوستانی حکومت کے بیان کی تردید کرتے ہوئے کہا ہے کہ پاکستان کلبھوشن یادیو کیس میں عالمی عدالت انصاف کے فیصلے پر عمل درآمد کے لیے تمام بین الاقوامی ذمے داریوں کو پورا کررہا ہے اور بھارت نے عالمی عدالت انصاف کے فیصلے کو غلط انداز میں پیش کیا۔
سرکاری خبر رساں ایجنسی اے پی پی کے مطابق دفتر خارجہ نے قومی اسمبلی سے منظور شدہ انٹرنیشنل کورٹ آف جسٹس (نظرثانی اور ازسرنو غور) بل کے حوالے سے بھارتی وزارت خارجہ کے ترجمان کے بیان پر افسوس کا اظہار کیا۔
دفتر خارجہ سے جاری بیان کے مطابق ترجمان زاہد حفیظ نے کہا کہ بھارتی حکومت نے عالمی عدالت انصاف کے فیصلے کو غلط انداز میں پیش کرنے کی کوشش کی۔
انہوں نے کہا کہ اس فیصلے کے پیراگراف 147 میں واضح طور پر بتایا گیا ہے کہ پاکستان اس بات کا پابند ہے کہ بذات خود انتخاب کر کے کلبھوشن یادیو کی سزا پر نظرثانی کرے۔
ان کا مزید کہنا تھا کہ عالمی عدالت انصاف کے فیصلے کے پیراگراف 146 کے مطابق پاکستان عالمی عدالت انصاف (نظرثانی اور ازسرنو غور) کے آرڈیننس 2020 کے تحت بھارتی جاسوس کلبھوشن یادیو کو پاکستان کی اعلیٰ عدالتوں کے ذریعے میں نظرثانی اپیل کا حق فراہم کرنے کا پابند ہے۔
دفتر خارجہ کے ترجمان نے کہا کہ انٹرنیشنل کورٹ آف جسٹس (نظرثانی اور ازسرنو غور) بل کی قومی اسمبلی سے منظوری عالمی عدالت انصاف کے فیصلے کو برقرار رکھنے کے پاکستان کے عزم کی ایک مرتبہ پھر عکاسی کرتی ہے۔
زاہد حفیظ چوہدری نے کہا کہ عالمی عدالت انصاف کے فیصلے کے (پیرا 118) میں بھی ہندوستان سے مطالبہ کیا گیا ہے کہ وہ نیک نیتی کے ساتھ کام کرے اور کمانڈر کلبھوشن یادیو کے لیے قانونی نمائندگی کا بندوبست کرے۔
انہوں نے کہا کہ افسوس کی بات ہے کہ ہندوستان ایک وکیل کے تقرر کو روکنے کے لیے دانستہ مہم چلارہا ہے۔
دفتر خارجہ کے ترجمان نے کہا کہ حکومت پاکستان کو اسلام آباد ہائی کورٹ کے سامنے کارروائی شروع کرنی پڑی تاکہ عدالت کو کلبھوشن یادیو کے لیے وکیل مقرر کرنے کی درخواست کی جا سکے، عدالت نے بار بار بھارت کو اس سلسلے میں اپنا مؤقف واضح کرنے کے لیے مدعو کیا ہے لیکن بھارت جان بوجھ کر اس معاملے پر سیاست جاری رکھے ہوئے ہے۔
انہوں نے مزید کہا کہ بھارتی حکومت خود پاکستان کی جانب سے فراہم کردہ قانونی معاونت سے انکار کرتی رہی ہے اور اس طرح کے بیانات پاکستان کی کوششوں کو نقصان پہنچانے اور کمانڈر کلبھوشن یادیو سے متعلق عالمی عدالت انصاف کے فیصلے کو بدنام کرنے کے ان کے مذموم عزائم کی عکاسی کرتے ہیں۔
بھارتی جاسوس کلبھوشن یادیو کو اپیل کا حق فراہم اور عالمی عدالت انصاف کے فیصلے کو مؤثر بنانے کے لیے 11 جون کو قومی اسمبلی سے نظر ثانی کا بل آرڈیننس 2020 منظور کرلیا گیا تھا۔
وفاقی وزیرِ قانون فروغ نسیم نے اس بل کا دفاع کرتے ہوئے کہا تھا کہ یہ بل بھارت کے عزائم کے خلاف لائے ہیں، کلبھوشن کو قونصلر رسائی مسلم لیگ (ن) کے دور میں نہیں دی گئی اور اگر ہم یہ قانون نہ لاتے تو بھارت، سلامتی کونسل میں چلا جاتا۔
ان کا کہنا تھا کہ عالمی عدالت انصاف نے واضح طور پر اپیل کا قانون لانے کا حکم دیا تھا اور اگر ہم یہ بل نہ لاتے تو بھارت ہمارے خلاف عالمی عدالت کی توہین کا مقدمہ درج کرواتا۔
واضح رہے کہ کلبھوشن یادیو کیس میں آئی سی جے کے فیصلے کے فوراً بعد ہی حکومت نے گزشتہ سال مئی میں ایک آرڈیننس کے ذریعے قانون نافذ کردیا تھا۔
اپوزیشن کی جماعتوں کی جانب سے کی جانے والی سخت مزاحمت کے باوجود قومی اسمبلی کی قائمہ کمیٹی برائے قانون و انصاف نے بھی گزشتہ سال 21 اکتوبر کو اس بل کو منظوری دے دی تھی۔
منبع: ڈان نیوز
Newer Posts