وزیراعظم عمران خان نے کہا ہے کہ اگر افغانستان میں کارروائی کے لیے پاکستان امریکی اڈوں کی میزبانی کو تیار ہوجائے تو خانہ جنگی شروع ہونے کی صورت میں دوبارہ دہشت گردوں کے انتقام کا ہدف بن سکتا ہے۔
امریکی اخبار واشنگٹن پوسٹ میں لکھے ایک مضمون میں وزیراعظم نے کہا کہ ‘ہم اس کے متحمل نہیں ہوسکتے، ہم پہلے ہی بھاری قیمت ادا کرچکے ہیں، اگر امریکا 20 سال بعد بھی تاریخ کی سب سے طاقتور فوجی مشین کے ساتھ افغانستان میں جنگ نہیں جیت سکا تو یہ امریکا ہمارے ملک کے اڈوں سے کیسے کرسکے گا؟
انہوں نے کہا کہ پاکستان، افغانستان میں امن کے لیے امریکا کے ساتھ شراکت داری کے لیے تیار تھا لیکن امریکی افواج کے انخلا کے باعث ہم مزید تنازع کا خطرہ مول لینے سے گریز کریں گے۔
وزیراعظم نے لکھا کہ پاکستان اور امریکا کے ‘طویل عرصے سے مسائل کے شکار اس ملک میں یکساں مفادات ہیں یعنی سیاسی تصفیہ، استحکام معاشی ترقی اور دہشت گردوں کی جنت نہ بننے دینا’۔
انہوں نے کہا کہ ہم افغانستان پر کسی عسکری غلبے کی مخالفت کریں گے جس کا نتیجہ صرف دہائیوں تک جاری رہنے والی خانہ جنگی کی صورت میں نکلے گا کیوں کہ طالبان پورے ملک پر فتح حاصل نہیں کرسکتے اور کامیابی کے لیے انہیں کسی حکومت میں شامل ہونا پڑے گا۔
ان کا کہنا تھا کہ ماضی میں پاکستان نے متحارب افغان فریقین میں انتخاب کر کے غلطی کی لیکن ملک نے اس تجربے سے سبق حاصل کیا ہے، ہمارا کوئی پسندیدہ نہیں اور ہم کسی بھی حکومت کے ساتھ مل کر کام کریں گے جس کو افغان عوام کا اعتماد حاصل ہو، تاریخ نے ثابت کیا ہے کہ افغانستان کو باہر سے کنٹرول نہیں کیا جاسکتا۔
پاکستان پر افغان جنگ کے اثرات
افغانستان میں جنگوں سے پاکستان کس طرح متاثر ہوا اس بات کو اجاگر کرتے ہوئے وزیراعظم نے کہا کہ 70 ہزار سے زائد پاکستانی جاں بحق ہوئے، امریکا نے امداد میں 20 ارب ڈالر دیے جبکہ پاکستانی معیشت کو ڈیڑھ سو ارب ڈالر سے زائد کا نقصان پہنچا اور سیاحت اور سرمایہ کاری ختم ہوگئی۔
انہوں نے کہا کہ امریکی کوششوں میں شامل ہونے کے بعد پاکستان کو ایک شراکت دار کے طور پر نشانہ بنایا گیا جس کا نتیجہ تحریک طالبان پاکستان اور دیگر عسکری گروہوں کی جانب سے ہمارے ملک کے خلاف دہشت گردی کی صورت میں نکلا۔
امریکی ڈرون حملوں جس کے بارے میں، میں نے خبردار کیا تھا، انہوں نے جنگ نہیں جیتی لیکن امریکا کے لیے نفرت پیدا کی اور دونوں ممالک کے خلاف دہشت گردوں کی صفوں میں اضافہ کیا۔
انہوں نے لکھا کہ امریکا نے پاکستان پر افغان سرحد کے ساتھ نیم خودمختار علاقوں میں پہلی مرتبہ فوج بھیجنے کے لیے دباؤ ڈالا، اس غلط فہمی میں کہ اس سے شورش کا خاتمہ ہوگا۔
تحریر جاری رکھتے ہوئے انہوں نے کہا کہ لیکن ایسا نہیں ہوا بلکہ اس سے قبائلی اضلاع کی نصف آبادی دربدر ہوگئی، صرف شمالی وزیرستان میں 10 لاکھ افراد دربدر ہوئے، اربوں ڈالر کا نقصان ہوا اور گاؤں کے گاؤں تباہ ہوئے۔
انہوں نے کہا کہ شہریوں کے کولیٹرل ڈیمج کے نتیجے میں پاک فوج کے خلاف خود کش حملے کیے گئے اور جتنے امریکی فوجی عراق اور افغانستان دونوں میں ہلاک ہوئے اس سے زیادہ پاکستانی فوجی شہید ہوئے جبکہ ہمارے خلاف مزید دہشت گرد گروہوں نے سر اٹھایا، صرف خیبر پختونخوا میں 500 پولیس اہلکار جاں بحق ہوئے۔
وزیراعظم نے کہا کہ اگر افغانستان میں سیاسی تصیفے کے بجائے مزید خانہ جنگی ہوئی تو پاکستان میں پناہ گزینوں کی تعداد بڑھے گی اور سرحدی علاقے مزید بدحال ہوں گے۔
امن کے لیے مذاکرات
وزیراعظم نے اس بات کو اجاگر کیا کہ افغانستان میں امریکا اور پاکستان کے مفادات یکساں ہیں۔
انہوں نے لکھا کہ ‘ہم خانہ جنگی نہیں بات چیت کے ذریعے امن چاہتے ہیں، ہمیں استحکام اور دونوں ممالک کے خلاف دہشت گردی کے خاتمے کی ضرورت ہے، ہم ایسے سمجھوتے کی حمایت کرتے ہیں جو گزشتہ 2 دہائیوں میں افغانستان میں ترقیاتی فوائد کو محفوظ بنائے، ہم معاشی ترقی، تجارت میں اضافے اور وسطی ایشیا میں رابطے چاہتے ہیں تاکہ ہماری معیشت اوپر اٹھے اور اگر مزید خانہ جنگی ہوئی تو ہم نیچے کی جانب چلے جائیں گے۔
ان کا کہنا تھا کہ اس لیے ہم نے طالبان کو مذاکرات کی میز پر لانے کے لیے پہلے امریکا اور اس کے بعد افغان حکومت کے ساتھ بہت بھاری سفارتکاری کی، ہم جانتے ہیں اگر طالبان نے عسکری فتح کا اعلان کرنے کی کوشش کی تو اس کا انجام خونریزی ہوگا۔
وزیراعظم نے کہا کہ ‘ہم اُمید کرتے ہیں افغان حکومت بھی مذاکرات میں مزید لچک دکھائے گی اور پاکستان پر الزام لگانا بند کرے گی کیوں کہ ہم وہ سب کررہے ہیں جس سے ہم عسکری کارروائی سے محفوظ رہ سکتے ہیں۔
انہوں نے کہا کہ یہی وجہ ہے کہ پاکستان، روس، چین اور امریکا کے مشترکہ بیان کا حصہ بنا جس میں قرار دیا گیا کہ اگر کابل پر کوئی حکومت مسلط کرنے کی کوشش کی گئی تو چاروں ممالک اس کی مخالفت کریں گے۔
انہوں نے مزید کہا کہ اس مشترکہ بیان میں افغانستان کے چاروں پڑوسی اور اشتراک میں شامل ممالک نے پہلی مرتبہ ایک آواز میں کہا کہ سیاسی تصفیہ کیسا ہونا چاہیے، اس سے خطے میں امن و ترقی کے لیے ایک نیا علاقائی معاہدہ بھی ہوسکتا ہے جس میں دہشت گردی کے ابھرنے والے خطرات کا تدارک کرنے کے لیے افغان حکومت کے ساتھ مل کر کام کرنا اور خفیہ معلومات کا تبادلہ شامل ہے۔
وزیراعظم کا کہنا تھا کہ ‘افغانستان کے ہمسایہ ممالک وعدہ کریں گے کہ وہ اپنی سرزمین افغانستان یا کسی بھی ملک کے خلاف استعمال نہیں ہونے دیں اور افغانستان بھی خود یہی وعدہ کرے گا۔
مضمون کے اختتام میں انہوں نے لکھا کہ اقتصادی روابط اور علاقائی تجارت کا فروغ افغانستان میں طویل المدتی امن اور سلامتی کے لیے اہم ہے اور مزید عسکری کارروائیاں بیکار ہوں گی۔
انہوں نے کہا کہ اگر ہم یہ ذمہ داری اٹھا لیں تو افغانستان جسے ‘گریٹ گیم’ اور مقامی دشمنیوں کے حوالے سے جانا جاتا تھا وہ علاقائی تعاون کا نمونہ بن سکتا ہے۔
منبع: ڈان نیوز
تہران: ایران کے نو منتخب صدر ابراہیم رئیسی نے امریکی ہم منصب سے ملاقات، میزائل پروگرام اور خطے کے عسکری گروپوں کی حمایت ترک کرنے کے معاملے پر مذاکرات سے انکار کردیا۔
عالمی خبر رساں ادارے کے مطابق ایران کے نئے صدر ابراہیم رئیسی نے پہلی پریس کانفرنس میں صدر بائیڈن کو جوہری معاہدے میں شمولیت کا مشورہ دیتے ہوئے کہا کہ ایران پرعائد پابندیاں ختم کر کے امریکا اپنی سنجیدگی ثابت کرسکتا ہے اور اس سے کم پر کوئی بات چیت نہیں ہوگی۔
نومنتخب ایرانی صدر سے جب یہ سوال پوچھا گیا کہ کیا وہ اپنے امریکی ہم منصب سے ملاقات کریں گے تو ابراہیم رئیسی نے کہا کہ ’’نہیں‘‘۔ اسی طرح میزائل پروگرام کے حوالے سے پوچھے گئے سوال کے جواب میں ایرانی صدر نے کہا کہ میزائل پروگرام پر کوئی سمجھوتہ نہیں ہوگا۔
ایران کے نئے صدر کے بارے میں عالمی قوتوں نے اُن کے سخت گیر نظریات کے باعث پہلے ہی تشویش کا اظہار کیا تھا اور اپنی پہلی پریس کانفرنس میں ہی صدر ابراہیم رئیسی نے سخت مؤقف اختیار کیا ہے۔
ایران کے نئے صدر کے اس بیان پر تاحال وائٹ ہاؤس کی جانب سے کوئی ردِعمل سامنے نہیں آیا۔ امریکا نے 1988 میں 5 ہزار سے زائد سیاسی قیدیوں کو پھانسی کی سزا دینے کے الزام پر ابراہیم رئیسی پر پابندی عائد کردی تھی جب وہ ڈیتھ پینل میں بطور پراسیکیوٹر شامل تھے۔
امریکا نے جوہری معاہدے کی خلاف ورزی کی، نو منتخب ایرانی صدر
نو منتخب ایرانی صدر ابراہیم رئیسی کا کہنا ہے کہ امریکا نے جوہری معاہدے 2015 کی خلاف ورزی کی، یورپین یونین وعدوں کی پاسداری میں ناکام رہی۔
نو منتخب ایرانی صدر نے نیوز کانفرنس کرتے ہوئے کہا کہ امریکا ایران پر عائد تمام امریکی پابندیاں اٹھانے کا پابند ہے۔
انہوں نے کہا کہ امریکا جوہری ڈیل میں واپس آئے، ایران پر عائد تمام پابندیاں اٹھائے۔ ان کا کہنا تھا کہ بیلسٹک میزائل پروگرام پر مذاکرات نہیں ہوسکتے۔
نومنتخب ایرانی صدر نے کہا کہ دنیا کےساتھ باہمی رابطو ں کےخواہاں ہیں، پڑوسی ممالک سےتعلقات میں بہتری ترجیحات میں شامل ہے۔خارجہ پالیسی جوہری معاہدے تک محدودنہیں ہوگی، پوری دنیا سے بات چیت کرینگے۔
انہوں نے کہا کہ ایرانی عوام کی امنگوں کو جوہری ڈیل سے نہیں جوڑ سکتے۔ امریکی صدر جو بائیڈن سے ملاقات کرنے کے سوال کا جواب انہوں نے نفی میں دیا۔
منبع: ایکسپریس نیوز
تل ابیب: اسرائیل کے نومنتخب وزیر اعظم نفتالی بینیٹ بھی اپنے پیشرو نیتن یاہو کی طرح فلسطینیوں کو دھمکی دینے پر اتر آئے۔
عالمی خبر رساں ادارے کے مطابق اسرائیل کے وزیراعظم نفتالی بینیٹ نے کہا ہے کہ صبر کا پیمانہ لبریز ہوچکا اب غزہ سے مزید راکٹ فائر کرنے کو برداشت نہیں کریں گے۔
وزیراعظم نفتالی بینیٹ نے مزید کہا کہ غزہ میں موجود دہشت گرد تنظیموں کے خلاف کارروائی جاری رکھیں گے اور کسی دباؤ میں نہیں آئیں گے تاہم غزہ کی پٹی کے رہائشیوں کے ساتھ کسی قسم کا تنازع نہیں چاہتے۔ جو ہم پر حملہ نہیں کرتے انہیں نقصان نہیں پہنچائیں گے۔
پہلے سیکیورٹی اجلاس کے بعد ایک بیان میں انہوں نے زور دیتے ہوئے کہا کہ ہم غزہ کی پٹی کے رہائشیوں کے ساتھ کسی تنازع میں ملوث نہیں ہونا چاہتے۔ جوہم پر حملہ نہیں کرتے ہم ان کا کوئی نقصان نہیں کریں گے۔
وزیراعظم نفتالی بینیٹ نے اسرائیلی کے دو لاپتہ فوجیوں کی بازیابی اور یہودیوں کی آباد کاری کے عزم کا اظہار کرتے ہوئے کہا کہ کسی بھی اسرائیلی شہری پر حملے کو برداشت نہیں کیا جائے گا اور سخت جواب دیا جائے گا۔
اسرائیل کے نو منتخب وزیراعظم نے ایران میں ابراہیم رئیسی کے نئے صدر منتخب ہونے کو دنیا کے لیے ویک اپ کال قرار دیتے ہوئے کہا کہ دنیا ایران کے خطرے کو پہنچانے، قاتلوں کی حکومت اب جوہری ہتھیار بنائے گی۔
منبع: ایکسپریس نیوز
وفاقی وزیر اطلاعات و نشریات فواد چوہدری نے واضح طور پر کہا ہے کہ معصوم لوگوں کو قتل کرنے والے دہشت گرد ہیں۔
سماجی رابطے کی ویب سائٹ ٹوئٹر پر ٹوئٹ میں فواد چوہدری نے کہا کہ ‘معصوم لوگوں کو قتل کرنے والوں کے حوالے سے کسی سطح پر کوئی ابہام نہیں ہے’۔
انہوں نے کہا کہ ‘یہ دہشت گردی ہے اور قصوروار دہشت گرد ہیں، ہم نے اپنی سرزمین پر دہشت گردی کی تکلیف برداشت کی ہے اور ان سب کا دکھ سمجھ سکتے ہیں، جنہوں نے بزدلانہ حملوں میں اپنے پیاروں کو کھو دیا’۔
فواد چوہدری کا یہ بیان وزیر خارجہ شاہ محمود قریشی کے افغان ٹی وی ‘طلوع’ کو دیئے گئے انٹرویو کے دوران اسامہ بن لادن کو دہشت گرد قرار دینے سے گریز کرنے کے ایک روز بعد سامنے آیا ہے۔
جب انٹرویو لینے والے نے وزیر اعظم عمران خان کی طرف سے اسامہ بن لادن کو ‘شہید’ قرار دینے کا حوالہ دیا تو شاہ محمود قریشی نے کہا کہ ‘یہ ایک مرتبہ پھر سیاق و سباق سے ہٹ کر ہے، ان کی بات کو سیاق و سباق سے ہٹ کر پیش کیا گیا اور میڈیا کے مخصوص حصے نے ایسا کیا’۔
جب وزیر خارجہ سے پوچھا گیا کہ وہ وزیر اعظم کی بات سے عدم اتفاق کریں گے تو انہوں نے کچھ دیر کے لیے توقف کرنے کے بعد کہا کہ ‘میں چاہوں گا کہ اس بات سے آگے بڑھوں’۔
واضح رہے کہ گزشتہ سال پارلیمنٹ میں خطاب میں وزیر اعظم عمران خان نے امریکا سے تعلقات کے حوالے سے بات کرتے ہوئے کہا تھا کہ پاکستان کو، دہشت گردی کے خلاف جنگ میں واشنگٹن کی مدد کے باوجود کافی ‘تذلیل’ کا سامنا کرنا پڑا اور پھر افغانستان میں امریکا کی ناکامی کا الزام بھی اس پر لگا دیا گیا۔
انہوں نے واقعہ، جسے انہوں نے پاکستان کے لیے باعث ‘شرمندگی’ قرار دیا، یاد کرتے ہوئے کہا کہ ‘امریکیوں نے ایبٹ آباد آکر اسامہ بن لادن کو قتل، شہید کردیا، اس کے بعد کیا ہوا؟ پوری دنیا نے ہمیں ملامت کیا اور ہمارے خلاف بات کی’۔
اس وقت اپوزیشن نے وزیر اعظم کے اس بیان پر شدید تنقید کی تھی۔
پیپلز پارٹی کے چیئرمین بلاول بھٹو زرداری نے کہا تھا کہ عمران خان کا بیان ان کی پرتشدد انتہا پسندی کو سراہنے کی تاریخ کے مطابق ہے’۔
ان کا کہنا تھا کہ ‘ان کی حکومت میں ہی آرمی پبلک اسکول پشاور کے حملے میں ملوث ملزمان فرار ہوئے اور ڈینیئل پرل کے قتل میں ملوث ملزمان کو ریلیف ملا’۔
علاوہ ازیں پیپلز پارٹی کی رہنما شیری رحمٰن نے کہا تھا کہ ‘اسامہ بن لادن کی وجہ سے ہمارا ملک آج تک دہشتگردی کا شکار ہے، وہ کارساز، لیاقت باغ اور دیگر دہشت گردی کے حملوں میں ملوث رہا’۔
انہوں نے افسوس کا اظہار کرتے ہوئے کہا تھا کہ اسامہ بن لادن کی وجہ سے ملک آج اس حالت میں ہے اور آپ (وزیراعظم عمران خان) اسمبلی کے فلور پر اسے ہیرو بنا کر پیش کر رہے ہیں، آپ آنے والی نسلوں اور دنیا کو کیا جواب دینگے؟
تاہم وزیر اعظم کے معاون خصوصی برائے سیاسی روابط ڈاکٹر شہباز گِل نے وزیر اعظم کا دفاع کرتے ہوئے کہا تھا کہ ‘انہوں نے لفظ شہید کے علاوہ اسامہ بن لادن کے لیے دو بار قتل کا لفظ استعمال کیا’۔
ان کا کہنا تھا کہ ‘مقامی اور بین الاقوامی سطح پر ان کے بیان کو غیر ضروری طور پر متنازع بنانے کی کوشش کی جارہی ہے، جبکہ وزیر اعظم کا دہشت گردی کے خلاف عزم غیر متزلزل ہے’۔
منبع: ڈان نیوز
وفاقی وزیر دفاع پرویز خٹک نے مہنگائی کو اپوزیشن کا پروپیگنڈا قرار دیتے ہوئے کہا ہے کہ ملک میں کہیں غربت نہیں جبکہ جس ملک میں مہنگائی نہیں ہوگی تو وہ ملک رک جائے گا۔
قومی اسمبلی میں خطاب کرتے ہوئے پرویز خٹک نے کہا کہ ہمیں عالمی مالیاتی ادارے (آئی ایم ایف) کے پاس جانے کی ضرورت نہیں تھی لیکن اس بلا میں ان کی کارکردگی سے پھنسے ہوئے ہیں۔
انہوں نے کہا کہ دو سال میں آہستہ آہستہ قرضوں اور آئی ایم ایف سے ہمیشہ کے لیے جان چھوٹے گی، حکومت محنت کر رہی ہے اور اس ملک میں تبدیلی آرہی ہے۔
ان کا کہنا تھا کہ ملک میں معیشت بہتر ہورہی ہے، صنعت چل رہی ہے، ہم جب آئے تھے تو کارخانے تباہ تھے اور معیشت برباد تھی لیکن اب کارخانے چل پڑے ہیں اور ہماری حکومت نے ان کو ٹیکسز، بجلی، درآمدات میں مراعات دیں۔
وفاقی وزیر نے کہا کہ میں نے بغیر کسی منشور، پروگرام اور اصلاحات کے حکومتیں دیکھی ہیں، وزیراعظم اور وزیراعلیٰ بیٹھ جاتا ہے، یہ سوچتا بھی نہیں ہے کہ ملک میں تعلیم کی کیا حالت ہے، صحت اور غریبوں کے کیا حالات ہیں تو یہ سب چیزیں نظر انداز کرتے ہیں۔
انہوں نے کہا کہ کل ہماری اولاد سوال کرے گی، اگر ہم اپنا حق پورا ادا نہیں کریں گے تو عوام اور خدا بھی پوچھے گا، ہم نے اپنے صوبے میں حق ادا کردیا ہے اور اس کا نتیجہ سامنے ہے۔
انہوں نے کہا کہ صرف سرکاری نوکریوں سے روزگار نہیں ہوتا، مجھے دکھائیں اس وقت کون بے روزگار ہے، آپ کو مزدور نہیں ملتا، آپ کو گھروں میں نوکر نہیں ملتا کیونکہ لوگ صرف سرکاری نوکری چاہتے ہیں اور کوئی محنت کرنا نہیں چاہتا۔
وفاقی وزیر نے کہا کہ 38 سال قبل میں سیاست میں آیا تو ہمارے علاقے اور سارے گاؤں کچے تھے، آج کوئی مجھے کچا مکان دکھا دے، کہاں غربت آگئی، کسی کے پاس گاڑیاں نہیں تھیں، موٹر سائیکل نہیں تھے لیکن آج ہر ایک اچھی زندگی گزار رہا ہے۔
انہوں نے کہا کہ یہ بالکل غلط پروپیگنڈا ہے کہ لوگ بھوکے ہوگئے ہیں، میرے صوبے میں آؤ اور مجھے کچا مکان دکھا دو تو میں کہوں گا کہ یہ ملک پیچھے جا رہا ہے۔
ان کا کہنا تھا کہ اگر انہوں نے معیشت پڑی ہو تو یہ آیا ہے کہ دنیا میں ہر جگہ مہنگائی بڑھی ہے، امریکا اور یورپ میں بھی مہنگائی جاری ہے لیکن اس کا ایک فارمولا ہے، اگر عوام کا معیار زندگی نیچے جائے اور مہنگائی آئے تو تباہی اور اگر عوام کا معیار زندگی بہتر ہورہا ہے اور ان کے پاس پیسہ ہے تو وہ ملک میں تباہی نہیں ترقی ہے۔
انہوں نے کہا کہ مہنگائی اور لوگوں کی زندگی آپس میں جڑی ہوئی ہے، دنیا میں آج دیکھیں، امریکا اور یورپ میں کون سی چیز سستی ہوئی، ان کی آمدن بڑھ رہی اور ملک بھی ترقی کر رہا ہے۔
پرویز خٹک نے کہا کہ جس ملک میں مہنگائی نہیں ہو، سب کچھ رک جائے تو وہ ملک رک جائے گا، نہ کوئی اگائے گا، نہ کوئی صنعت چلائے گا اور کاروبار نہیں ہوگا تو کس طرح ملک چلے گا۔
انہوں نے کہا کہ یہ عجیب ‘فینومینا’ شروع کیا ہوا ہے کہ مہنگائی اور غربت ہے، میں چیلنج کرتا ہوں کہ میرے صوبے میں آئیں، مجھے غریب تلاش کرکے دیں تو میں کہوں گا تم بڑا سچ بول رہے ہو۔
وزیر دفاع نے کہا کہ یہ سب ڈراما ہے، اپوزیشن کا یہ ڈراما اب نہیں چلے گا، اب لوگ سمجھ دار ہوگئے ہیں۔
اس موقع حکمران جماعت کے ایک رکن نے پرویز خٹک کو بتایا کہ کرک میں غربت ہے تو انہوں نے کہا کہ ہمارے رکن کہہ رہے تو میں مانتا ہوں کرک میں غربت ہوگی۔
وفاقی وزیر نے اپوزیشن کی جانب سے سوالات پر کہا کہ ہم نے ان کی باتیں سنیں، اگر ان کو برداشت نہیں ہے تو چلے جائیں میں اپنی تقریر پوری کروں گا۔
انہوں نے کہا کہ میں اس فورم سے شہباز شریف کو چیلنج کرتا ہوں کہ آئیں مناظرہ کرتے ہیں کہ آپ کی 20 سالہ کارکردگی اور میری 5 سال اور موجودہ 3 سال کی کارکردگی کا جائزہ لیں۔
منبع: ڈان نیوز
وفاقی وزیر توانائی حماد اظہر نے کہا ہے کہ مشترکہ مفادات کونسل نے قومی توانائی پالیسی 2021 کی منظوری دے دی ہے۔
اسلام آباد میں وزیراعظم کے معاون خصوصی وقار مسعود کے ہمراہ پریس کانفرنس کرتے ہوئے وزیر توانائی حماد اظہر نے کہا کہ وزیراعظم عمران کی زیر صدارت مشترکہ مفادات کونسل کا اجلاس ہوا جہاں متفقہ طور پر قومی توانائی پالیسی کی منظوری دے دی گئی۔
انہوں نے کہا کہ ماضی میں ہم نے دیکھا کہ ماضی میں توانائی کے شعبے میں صلاحیت میں توسیع کی گئی وہ کسی منطق اور کسی منصوبہ کے بغیر کی گئی اور یہ نہیں دیکھا گیا کہ ہماری بجلی کس ایندھن کی بنیاد پر ہے۔
ان کا کہنا تھا کہ بجلی کا اکثر انتظام درآمدی ایندھن پرکیا گیا اور اس کی لاجسٹکس کورونا جیسے حالات میں ٹیرف میں مشکلات کھڑی کردیتی ہے۔
وفاقی وزیر کا کہنا تھا کہ نہ یہ دیکھا گیا کہ کس سال کتنی کھپت ہوگی اور سارے منصوبے ایک ساتھ ملا دیے گئے اور نہ بھی نہیں دیکھا گیا کہ یہ منصوبے کہاں لگائے جارہے ہیں۔
ان کا کہنا تھا کہ اب اس پالیسی کے تحت سارے صوبوں کے ساتھ مل کر تمام اصول وضع کیے گئے ہیں کہ شفاف طریقے سے، کم قیمت کی بنیاد پر کھلے عام ٹینڈر کے ذریعے منصوبے منظور پر مسترد کردیے جائیں گے اور یہ پاور منصوبے میں شامل ہوں گے۔
انہوں نے کہا کہ اسی پالیسی کے اندر قابل تجدید توانائی خصوصی اہداف موجود ہیں، اس میں ہائیڈرل منصوبے، طویل مدتی منصوبے بھی شامل ہوں گے کیونکہ ماضی میں ہم نے ایک کمی دیکھی کہ طویل مدتی معاملات نہیں دیکھے گئے۔
حماد اظہر کا کہنا تھا کہ ماضی میں دیکھا گیا کہ اگلے سال بجلی چاہیے، جس مرضی قیمت اور جس مرضی ایندھن پر بجلی ہو لیکن اب یہ 10 کی پالیسی ہے تو اس میں ہم مقامی ایندھن بنانے کی پالیسی وضع کی گئی ہے۔
انہوں نے کہا کہ اس کے اندر شفافیت کا کردار بھی ہے، اب ایسے نہیں کہ کوئی آئے گا اور آپ کو ڈالر انڈیکس ریٹرنز کی بنیاد پر ٹیرف ہاتھ میں پکڑا دے گا، جی ٹو جی انتظامات ضمانت جیسے پہلو نہیں ہوں گے۔
ان کا کہنا تھا کہ اب آزاد مسابقتی پرسیس کے ذریعے نجی سرمایہ کاروں کو موقع دیا جائے گا، اسی طرح جی ٹو جی کے لیے علیحدہ سیکشن رکھا ہے۔
وزیرتوانائی نے کہا کہ پالیسی کے ایک،ایک لفظ پر تفصیلی بات کی گئی اور مشترکہ مفادات کونسل کے 4 اجلاس صرف اس معاملے پر ہوئے، 100 سے زائد اجلاس صوبوں، مختلف اسٹیک ہولڈرز اور مختلف شعبوں کے ساتھ پچھلے دو ماہ کے دوران ہوئے۔
انہوں نے کہا کہ اب اس پالیسی کے نیچے 10 سے 12 ذیلی پالیسیاں بنیں گی اور وہ ایک قومی بجلی منصوبے کا حصہ بن جائے گی اور اس منصوبے کو ایک کمپیوٹرماڈل کے ذریعے بن جائے گی جب مشترکہ مفادات کونسل اس کی منظوری دے گی۔
ان کا کہنا تھا کہ اس پالیسی پر 2005 سے حکومتوں کی خواہشات تھیں لیکن نہیں لائی گئیں، اس کی مختلف وجوہات ہوسکتی ہیں لیکن آج تاریخی موقع ہے کہ ہم ایک قومی بجلی پالیسی بنانے میں کامیاب ہوئے ہیں۔
انہوں نے کہا کہ اس اثرات درحقیقت 5 یا 10 سال بعد نظر آئیں گے جب ہماری آنے والی نسل کو سستی اورماحول دوست بجلی ملے گی۔
حماد اظہر نے کہا کہ اس وقت ہمارا سب سے بڑا مسئلہ بجلی کی پیداوار نہیں ہے بلکہ مالی مسئلہ بن چکا ہے، ہم نے مہنگے ایندھن پر مہنگے معاہدے کیے تو اب ان پر بجلی گھروں کو 800 ارب یا 1500 ارب سالانہ دینے میں دقت آتی ہے۔
انہوں نے کہا کہ دوسرا بڑا مسئلہ ٹرانسمیشن کا ہے کہ آپ بجلی گھر جتنے مرضی بنائیں لیکن آپ کے 24 ہزار میگاواٹ کی ترسیل کی صلاحیت نہیں ہے، البتہ پچھلے 2 سال میں ترسیل 4 ہزار زیادہ کردی گئی ہے، جو 20 ہزار تھی اب 24 ہزار ہوگئی ہے۔
ان کا کہنا تھا کہ ابھی اس میں مزید 10 ہزار میگاواٹ مانگ رہی ہے اور اس سال ہم نے ریکارڈ فنڈز رکھے ہیں جو ترسیل میں جائیں گے جو پچھلے تین سال کے مجموعی فنڈز سے زیادہ ہیں۔
وفاقی وزیر توانائی نے کہا کہ توانائی کے شعبے کی مشکل تو بہت بڑی ہے، ایک طرف گردشی قرضے ہیں، ایک طرف ترسیل کا فرسودہ نظام ہے لیکن جہاں ہم روزانہ کی بنیاد پر ان مسائل پرقابو پا رہے ہیں وہی مستقبل کے لیے منصوبہ بندی کے تحت بجلی کی پیداوار، ترسیل اور ٹیرف کو ٹھیک سمت میں لے چلیں گے۔
حماد اظہر نے کہا کہ اس پالیسی میں جو اصول طے ہوگئے ہیں، ان اصولوں کی بنیاد پر ایک جامع منصوبہ بنایا جائے گا جو اسے بھی زیادہ ایک جامع دستاویز ہوگی، جس کے اندر زیادہ تفصیل ہوگی۔
منبع: ڈان نیوز
اٹلانٹا: الابامہ میں منطقہ حارہ کے دباؤ سے آنے والے طوفان کے نتیجے میں 12 افراد اپنی جان سے ہاتھ دھو بیٹھے۔
طوفان نے امریکا کی جنوب مشرقی ریاست کو اپنی لپیٹ میں لے لیا جس کے نتیجے میں سیلاب اور آندھیوں کے جھکڑ سے درجنوں مکانات تباہ ہوگئے۔
مونٹگومری کے جنوب میں 35 میل کے فاصلے پر 15 گاڑیوں کے ٹکرانے سے 10 افراد ہلاک ہوگئے۔
بٹلر کاؤنٹی کے کورونر وینی گارلوک نے بتایا کہ گاڑیاں گیلی سڑکوں پر پھسلیں جن میں استحصال اور بدسلوکی کا شکار بچوں کی دیکھ بھال کرنے والی ایک فلاحی تنظیم کی گاڑی میں سوار 4 سے 17 سال کی عمر کے 8 بچے ہلاک ہوگئے۔
ان کا کہنا تھا کہ 2 افراد الگ گاڑی میں ہلاک ہوئے جن میں 29 سالہ کوڈی فوکس اور 9 ماہ کی آریانا فوکس شامل ہیں، دونوں کا تعلق میرین کاؤنٹی سے تھا جبکہ متعدد افراد زخمی بھی ہوئے۔
علاوہ ازیں ٹسکلوسا شہر کے باہر ایک گھر پر درخت گرنے کے نتیجے میں 24 سالہ شخص اور 3 سالہ بچہ ہلاک ہوگیا۔
مذکورہ اموات شمالی الابامہ اور جیارجیا میں ہفتے کی شام ہوئی شدید بارشوں کے نتیجے میں ہوئیں اور مسی سپی گالف کاسٹ سے آنے والے طوفان سے قبل 12 انچ (30 سینٹی) میٹر بارش ریکارڈ کی گئی۔
بعد ازاں اتوار کے روز جیارجیا، جنوبی کیرولائنا کے کئی علاقوں، شمالی کیرولائنا کے ساحل، جنوب مشرقی الابامہ کے علاقوں اور فلوریڈا میں سیلابی انتباہ نصب کردیے گئے۔
ہلاک ہونے والے آٹھوں بچے گلف شور کے ساحل پر ایک ہفتہ گزار کر واپس آرہے تھے کہ گاڑی میں تباہ ہونے کے بعد آگ لگ گئی۔
تنظیم کے سی ای او مائیکل اسمتھ نے کہا کہ یہ میری زندگی کا بدترین سانحہ ہے، میں نے جو دیکھا اسے الفاظ میں بیان نہیں کیا جاسکتا، ہم بچیوں کو اپنی بیٹیوں کی طرح پیار کرتے تھے۔
منبع: ڈان نیوز
وزیراعظم عمران خان نے کہا ہے کہ ایک مرتبہ جب مسئلہ کشمیر حل ہوجائے گا تو جوہری ہتھیاروں کی کوئی ضرورت نہیں رہے گی۔
یہ بات انہوں نے ایچ بی او پر ایکسیئز پروگرام میں صحافی جوناتھن سوان کو ایک انٹرویو دیتے ہوئے کہی۔
سوال پوچھا گیا کہ انٹیلیجنس تجزیہ کار کہتے ہیں کہ دنیا بھر میں پاکستان کے پاس جوہری ہتھیار سب سے تیزی سے بڑھ رہے ہیں، ایسا کیوں؟
جس کے جواب میں وزیراعظم کا کہنا تھا کہ ‘مجھے نہیں معلوم کہ وہ یہ بات کہاں سے لے آئے، پاکستان کے جوہری ہتھیار دفاعی ہیں تا کہ ہم اپنے آپ کو محفوظ رکھ سکیں میرا نہیں خیال کہ یہ بڑھ رہے ہیں’۔
وزیراعظم نے مزید کہا کہ ‘جہاں تک مجھے معلوم ہے یہ جارحانہ چیز نہیں، کوئی بھی ملک جس کا پڑوسی اس سے 7 گنا زیادہ بڑا ہو وہ پریشان ہوگا’۔
بات کو جاری رکھتے ہوئے انہوں نے کہا کہ وہ ‘جوہری ہتھیاروں کے مکمل خلاف تھے اور ہمیشہ سے رہے ہیں، ہم نے بھارت کے ساتھ 3 جنگیں لڑیں اور جب سے ہمارے پاس جوہری دفاع آیا دونوں ممالک کے درمیان کوئی جنگ نہیں ہوئی، ہمارے ہاں سرحدی جھڑپیں ہوئیں لیکن جنگ کا سامنا نہیں کرنا پڑا’۔
انہوں نے مزید کہا کہ جس وقت کشمیر کا مسئلہ حل ہوجائے گا دونوں ہمسایے مہذب لوگوں کی طرح رہنے لگیں گے ہمیں جوہری ہتھیار رکھنے کی ضرورت نہیں پڑے گی۔
چین کے ایغور مسلمانوں کا معاملہ
وزیراعظم سے سوال پوچھا گیا کہ وہ کیوں مغرب میں اسلاموفوبیا کے حوالے سے خاصہ بڑھ چڑھ کر بات کرتے ہیں لیکن چین میں ایغور مسلمانوں کی نسل کشی پر خاموش ہیں؟ جس کے جواب میں انہوں نے کہا کہ چین کے ساتھ تمام معاملات پر ‘بند دروازوں کے پیچھے’ بات چیت ہوتی ہے۔
انہوں نے مزید کہا کہ چین سب سے مشکل وقت میں ہمارے سب سے بہترین دوستوں میں سے ایک رہا ہے، جب ہم واقعی مشکلات کا شکار تھے چین ہماری مدد کو آیا، وہ جیسے ہیں ہم ان کا احترام کرتے ہیں اور ہمارا جو بھی مسئلہ ہو اس پر بند دروازوں کے پیچھے بات کرتے ہیں۔
وزیراعظم نے کہا کہ ‘میں دنیا میں دیکھتا ہوں کہ فلسطین، لیبیا، صومالیہ، شام اور افغانستان میں کیا ہورہا ہے تو کیا میں ہر چیز کے بارے میں بات کرنا شروع کردوں؟ میں اپنی سرحد پر اور اپنے ملک میں جو کچھ ہورہا ہے اس پر توجہ رکھتا ہوں۔
بات کو جاری رکھتے ہوئے انہوں نے سوال کیا کہ جب مقبوضہ کشمیر کے عوام کو نظرانداز کیا جارہا تھا تو مغربی دنیا میں یہ اتنا بڑا مسئلہ کیوں تھا؟ یہ کہیں زیادہ متعلقہ ہے، ایغوروں کے ساتھ شاید جو کچھ ہورہا ہو اس کے مقابلے ایک لاکھ کشمیری جاں بحق ہوچکے ہیں، مقبوضہ وادی ایک ‘کھلی جیل’ میں تبدیل ہوچکی ہے۔
وزیراعظم نے کہا کہ ‘یہ مسئلہ کیوں نہیں ہے؟ ساتھ ہی انہوں نے کہا کہ وہ اسے ‘منافقت’ سمجھتے ہیں۔
انہوں نے کہا کہ وہ ان چیزوں پر زیادہ توجہ دے رہے ہیں جن سے ملک اور اس کی سرحدوں کا تعلق ہے، ایک لاکھ کشمیریوں کا مرنا میرے لیے زیادہ تشویش کا باعث ہے کیوں آدھا کشمیر پاکستان میں ہے۔
مسلم ریاستوں کے رہنماؤں کو اسلاموفوبیا کے خلاف متحد ہونے کے لیے ارسال کردہ خط کے بارے میں بات کرتے ہوئے عمران خان نے کہا کہ اسلامی دنیا اور مغربی معاشروں کے درمیان رابطوں کا بڑا فقدان ہے، یہ 9/11 کے بعد ہوا جب ‘اسلامی’ دہشت گردی کا لفظ استعمال میں آیا۔
انہوں نے کہا کہ جس لمحے آپ اسلامی دہشت گردی کہتے ہیں، مغرب کا عام آدمی سمجھتا ہے کہ ایسا کچھ مذہب میں ہے جو دہشت گردی کا باعث بنتا ہے، 9/11 کے بعد جب کہیں کسی دہشت گرد حملے میں مسلمان ملوث ہوتا دنیا بھر کے ایک ارب 30 کروڑ مسلمانوں کو نشانہ بنایا جاتا۔
امریکی افواج کا افغانستان سے انخلا
جب ان سے سوال کیا گیا کہ کیا وہ افغانستان سے امریکی افواج کے انخلا پر ‘خوش’ ہیں؟ جس پر وزیراعظم نے کہا کہ ایک طریقے سے خوش ہوں کیوں کہ افغانستان کا کوئی عسکری حل نہیں نکلنا تھا۔
بات کو جاری رکھتے ہوئے انہوں نے کہا کہ لیکن تشویش کے احساسات بھی ہیں کیوں کہ ایک سیاسی تصفیے کے بغیر خانہ جنگی کا امکان ہے۔
وزیراعظم نے کہا کہ ان کی نظر میں ایک سیاسی تصفیے کا مطلب طالبان اور افغان قیادت کی اتحادی حکومت ہے، اس کے سوا کوئی حل نہیں۔
جب ان سے سوال پوچھا گیا کہ کیا امریکا نے انخلا کی تاریخ کا اعلان کر کے غلطی کی؟ تو وزیراعظم نے کہا کہ انہوں نے اپنے آپ کو بڑے بکھیڑے میں ڈال دیا ہے، انہیں کوئی ٹائم فریم دینا تھا لیکن جب انہوں نے ایک ٹائم فریم دیا طالبان نے اسے فتح سمجھا۔
انہوں نے مزید کہا کہ جہاں تک پاکستان کی بات ہے تو جو کوئی بھی افغانستان کے عوام کی نمائندگی کرے گا وہ اس کے ساتھ معاملہ کرے گا۔
صحافی نے سوال کیا کہ کیا آپ کو اس بات سے تشویش نہیں کہ لوگوں کا یہ گروہ (طالبان) آپ کے بالکل قریب طاقت جمع کررہا ہے۔
جس پر وزیراعظم بولے کہ دیکھیں میں طالبان کا ترجمان نہیں، میرے لیے یہ کہنا کہ انہیں کیا کرنا چاہیے کیا نہیں بے معنی ہے لیکن اگر طالبان نے مکمل فتح پانے کی کوشش کی تو بہت زیادہ خون خرابہ ہوگا اور جو ملک افغانستان کے بعد اسے سب سے زیادہ بھگتے گا وہ پاکستان ہوگا۔
انہوں نے کہا کہ پاکستان میں 30 لاکھ افغان پناہ گزین موجود ہیں، امریکا کے جانے سے قبل سیاسی تصفیہ لازمی ہونا چاہیے۔
امریکا کے ساتھ تعلقات
سی آئی اے ڈائریکٹر ولیم برنز کے حالیہ دورے کے بارے میں بات کرتے ہوئے وزیراعظم نے کہا کہ 9/11 کے بعد سے دونوں ممالک کی انٹیلیجنس ایجنسیز ‘مسلسل رابطے’ میں ہیں تاہم انہوں نے سی آئی اے سربراہ سے ملاقات سے انکار کیا۔
صحافی نے سوال کیا کہ ‘کیا آپ امریکی حکومت کو پاکستان میں سی آئی اے رکھنے کی اجازت دیں گے تا کہ وہ القاعدہ، داعش یا طالبان کے خلاف سرحد پار انسداد دہشت گردی کی کارروائیاں کرسکے؟
جس کے جواب میں وزیراعظم نے کہا کہ ‘ہرگز نہیں، کسی بھی صورت ہم اپنے اڈوں کے استعمال کی اور نہ ہی پاکستانی حدود سے افغانستان میں کسی بھی طرح کی کارروائی کی اجازت دیں گے’۔
انہوں نے کہا کہ ‘پاکستان نے 70 ہزار لاشیں برداشت کی ہیں جو امریکی جنگ میں حصہ لینے والے کسی بھی ملک میں سب سے زیادہ ہے، ہم اپنی سرزمین سے مزید عسکری کارروائیوں کے متحمل نہیں ہیں، ہم تنازع میں نہیں امن میں حصہ دار بنیں گے۔
جب ان سے سوال کیا گیا کہ کیا پاکستان امریکی فضائیہ کو طالبان کے خلاف فضائی حملے کرنے کے لیے اپنی فضائی حدود استعمال کرنے کی اجازت دے گا؟ تو انہوں نے کہا کہ پاکستان ‘کسی تنازع کا حصہ نہیں بنے گا’۔
صحافی کی جانب سے اصرار کرنے پر انہوں نے کہا کہ اس پر بات چیت نہیں ہوئی ہے، ‘امریکی افغانستان پر بم کیوں برسائیں گے جب اس کا 20 سالوں میں کوئی فائدہ نہیں ہوا؟’
صحافی نے پوچھا کہ کیا امریکی صدر جوبائیڈن نے جب سے منصب سنبھالا ہے ان سے آپ کی بات چیت ہوئی؟ جس پر وزیراعظم نے کہا کہ ‘نہیں بات چیت نہیں ہوئی’، صحافی نے پوچھا کہ کیا اس کی کوئی وجہ ہے؟ جس پر وزیراعظم نے کہا کہ جب ان کے پاس وقت ہو وہ مجھ سے بات کرسکتے ہیں لیکن اس وقت یہ واضح ہے کہ ان کی ترجیحات کچھ اور ہیں۔
صحافی نے سوال کیا کہ آپ جو بائیڈن سے کیا بات کریں گے؟ جس پر وزیراعظم نے کہا کہ جب مقبوضہ کشمیر کی بات آتی ہے امریکا پر بڑی ذمہ داری عائد ہوتی ہے، ‘اگر امریکا عزم اور خواہش کرے تو مسئلہ کشمیر حل ہوسکتا ہے’۔
پاکستان میں جنسی تشدد کے مسائل
وزیراعظم سے ان کے ریپ کو فحاشی کے ساتھ منسلک کرنے کے بیان کے بارے میں سوال کیا گیا جس پر انہوں نے کہا کہ ‘یہ سراسر بکواس ہے میں نے ایسا نہیں کیا، میں نے تو پردے کے تصور پر بات کی تھی پردے کا تصور یہ ہے کہ معاشرے میں فتنے سے گریز کیا جائے۔
انہوں نے کہا کہ پاکستان ایک مکمل مختلف معاشرہ ہے ‘اگر آپ معاشرے میں فتنے کو پروان چڑھائیں گے اور ان نوجوانوں کے پاس کہیں اور جانے کا راستہ نہیں ہوگا تو اس کے اثرات مرتب ہوں گے’۔
جب ان سے سوال پوچھا گیا کہ ‘کیا آپ سمجھتے ہیں کہ خواتین جو پہنیں اس کا کوئی اثر ہوتا ہے، کیا یہ فتنے کا حصہ ہے؟’
جس پر وزیراعظم نے کہا کہ ‘اگر خواتین بہت مختصر لباس پہنیں گی اس کا مردوں پر اثر ہوگا تاوقتیکہ وہ روبوٹ ہوں، میرا مطلب عمومی سمجھ کی بات ہے کہ اگر آپ کا معاشرہ ایسا ہو کہ جہاں لوگوں نے ایسی چیزیں نہ دیکھی ہوں تو اس کا ان پر اثر ہوگا۔
جب صحافی نے بحیثیت بین الاقوامی کرکٹ اسٹار کے ان کا ماضی یاد دلایا تو وزیراعظم نے کہا کہ ‘یہ میرے بارے میں نہیں میرے معاشرے کے بارے میں ہے، میری ترجیح یہ ہے کہ میرے معاشرے کا رویہ کیا ہے اس لیے جب ہم دیکھیں گے کہ جنسی جرائم بہت زیادہ بڑھ گئے ہیں تو ہم بیٹھیں گے اور اسے روکنے کے بارے میں بات چیت کریں گے، اس کا میرے معاشرے پر اثر پڑ رہا ہے’۔
منبع: ڈان نیوز
تل ابيب: اسرائیل کے نئے وزیر خارجہ یائیر لپید متحدہ عرب امارات کا دو روزہ سرکاری دورہ کریں گے جس کے دوران وہ سفارت خانے کا افتتاح بھی کریں گے۔
عالمی خبر رساں ادارے کے مطابق اسرائیل کے حال ہی میں منتخب ہونے والے وزیر خارجہ یائیر لپید 29 جون کو دو روزہ دورے پر متحدہ عرب امارات پہنچیں گئے۔ یہ کسی بھی اسرائیلی وزیر خارجہ کا امارات کا پہلا دورہ ہونے کے باعث تاریخی دورہ ہوگا۔
اسرائیلی وزیر خارجہ یائیر لپید دو روزہ دورے کے دوران ابوظہبی میں پہلے سفارت خانے اور دبئی میں قونصل خانے کا بھی افتتاح کریں گے اور اپنے اماراتی ہم منصب سے خصوصی ملاقات کریں گے جس میں امن معاہدے پر عمل درآمد کی رفتار پر تبادلہ خیال کیا جائے گا۔
اسرائیلی وزیر خارجہ کی جانب سے جاری بیان میں کہا گیا ہے متحدہ عرب امارات کے ساتھ اتحاد کے ثمرات سے دونوں ممالک کے شہری ہی نہیں بلکہ پورا مشرق وسطیٰ فائدہ اٹھائے گا۔
واضح رہے کہ امریکا کے سابق صدر ڈونلڈ ٹرمپ کی ثالثی میں متحدہ عرب امارات، بحرین، سوڈان، مراکش اور کوسوو نے اسرائیل سے سفارتی تعلقات بحال کرلیے ہیں تاہم ان میں سب سے پہلے اسرائیلی سفارت خانہ امارات میں کھلنے جا رہا ہے۔
منبع: ایکسپریس نیوز
Newer Posts