صحت وتعلیم

عالمی ادارہ صحت (ڈبلیو ایچ او) کا کہنا ہے کوویکس پروگرام کے تحت وافر مقدار میں ویکسی نیشن فراہم نہ کیے جانے کے سبب غریب ملکوں کو کورونا سے بچاؤ کی ویکسین کی کمی کا سامنا ہے۔

ڈبلیو ایچ او کے سینئر مشیر نے کہا ہے کہ کوویکس پروگرام کے تحت 131 ملکوں کو 9 کروڑ خوراک کی فراہمی ناکافی ہے۔

انہوں نے کہا کہ آبادیوں کو وائرس سے بچانے کے لئے یہ ناکافی ہےجبکہ کچھ افریقی ملکوں میں تیسری لہر کا سامنا ہے۔

افریقی صدر کا کہنا ہے کہ افریقہ میں 40 ملین ڈوزز لگائی گئیں،یہ 2 فیصد سے بھی کم آبادی کو لگائی گئی ہے۔

عالمی ادارہ صحت اور دیگر عالمی تنظیموں کی سربراہی میں قائم کوویکس پروگرام کے تحت ابتدا میں 2021 ءکے اختتام تک دنیا بھر میں 2 ارب خوراکیں پہنچانے کا ہدف رکھا گیا تھا، لیکن ویکسین بنانے میں تاخیر، سپلائی میں پریشانی کی وجہ سے قلت پیدا ہو رہی ہے۔

دوسری جانب یوگنڈا، زمبابوے، بنگلادیش بھی ویکسین ختم ہونے کا اعلان کرچکے ہیں۔

منبع: جنگ نیوز

پاکستان میں اساتذہ اور طلبہ کی سہولت کے لیے میٹرک کے امتحانات کی تیاری کے لیے ‘ایگزام پریپ ماسٹر’ کے نام سے آن لائن پلیٹ فارم متعارف کرادیا گیا۔

نالج پلیٹ فارم کی جانب سے تیار کیا گیا ایگزام پریپ ماسٹر مکمل طور پر مفت پلیٹ فارم ہے جس کے ذریعے نویں اور دسویں کے طلبہ جو اسلام آباد یا پنجاب کے تعلیمی بورڈز میں زیر تعلیم ہیں اور جولائی 2021 میں امتحان دیں گے، وہ اس سے مستفید ہوسکتے ہیں۔

خیال رہے کہ نالج پلیٹ فارم، جدید سہولیات سے آراستہ ایک آن لائن تعلیمی پلیٹ فارم ہے جو پاکستان میں طلبہ کو سیکھنے کے جدید مواقع فراہم کرتا ہے۔

چیف ایگریکٹو آفیسر ‘نالج پلیٹ فارم’ طلحہ منیر خان نے کہا کہ کورونا وائرس کی وجہ سے طلبہ کی میٹرک کے امتحانات کی تیاری کے انداز میں تبدیلی دیکھنے میں آئی ہے اور بہت کم یا کلاسز نہ ہونے کی وجہ سے طلبہ کے پاس امتحانات کی تیاری کے بہت کم وسائل دستیاب ہیں۔

انہوں نے کہا کہ اس مسئلے کو حل کرنے کے لیے، نالج پلیٹ فارم نے طلبہ اور اساتذہ کے لیے ایک موزوں حل متعارف کرایا ہے تاکہ مختصر وقت میں میٹرک کے امتحان کی تیاری کی جاسکے۔

طلحہ منیر خان نے کہا کہ ہم اس مشکل وقت میں طلبہ اور اساتذہ کو سہولت فراہم کرنے کے لیے کوشاں ہیں اور اس طرح کی مزید سہولیات متعارف کرائیں گے تاکہ اساتذہ اور طلبہ جدید طریقوں کے ذریعے تعلیم حاصل کر سکیں۔

ایگزام پریپ ماسٹر میں امتحانات کی تیاری کے لیے سوالات اور ان کے جواب، چیٹ شیٹس اور پرانے پیپرز دستیاب ہیں۔

اس پلیٹ فارم کے ذریعے طلبہ خود اپنا ٹیسٹ لے سکتے ہیں اور جان سکتے ہیں کہ امتحان کے لیے ان کی کتنی تیاری ہو چکی ہے۔

طلبہ کی امتحان میں تیاری کے لیے 2 فرضی ٹیسٹ ہیں جن میں ہر مضمون کے 20 سوال شامل ہیں جبکہ ہر ہفتے اضافی ٹیسٹ بھی شامل کیے جائیں گے جن کی رپورٹ بھی فوری موصول ہوگی۔

اس پلیٹ فارم کو گھر بیٹھے موبائل، لیپ ٹاپ اور ٹیبلٹ کے ذریعے استعمال کیا جاسکتا ہے۔

نالج پلیٹ، پاکستان میں جدید آن لائن تعلیم کا ادارہ ہے، جو 450,000 سے زائد طلبہ اور 1000 سے زائد اسکولوں کے ساتھ کام کر رہا ہے۔

منبع: ڈان نیوز

بیجنگ: چین نے اعلان کیا ہے کہ اس نے دنیا کی سب سے بڑی کورونا وائرس ویکسینیشن مہم کے دوران اپنی ایک ارب آبادی کو ویکسین لگادی۔

کورونا وائرس سے عالمی سطح پر ہلاکتوں کی تعداد اب 38 لاکھ سے زائد ہوچکی ہے اور بہت سارے ممالک اب بھی وبا کا مقابلہ کر رہے ہیں لیکن چند ممالک میں ویکسین مہم میں ایسی سرگرمیاں بھی سامنے آئی ہیں جن کا چند ماہ قبل تصور بھی نہیں کیا جاسکتا تھا۔

چین کی جانب سے یہ اعداد و شمار ایسے وقت میں سامنے آئے جب عالمی سطح پر ویکسین لگانے والے افراد کی تعداد ڈھائی ارب سے زائد ہوچکی ہے۔

وائرس کے خلاف کامیاب لڑائی میں چین کی ویکسینیشن کی مہم ابتدائی طور پر سست روی کا شکار رہی تھی تاہم اس کے بعد اس میں تیزی دیکھنے میں آئی۔

شفافیت کی کمی اور ویکسین کے اسکینڈلز بھی بہت سارے لوگوں میں مزاحمت کا باعث بنے ہیں۔

رواں ماہ کے آخر تک حکام نے چین کی 40 فیصد آبادی یا تقریباً ایک ارب 40 کروڑ افراد کو مکمل طور پر ویکسین لگانے کا ہدف طے کیا ہے۔

چند صوبوں میں لوگوں کو اس ویکسین لگوانے کی ترغیب دینے کے لیے مفت ویکسین دی جارہی ہے۔

اسی طرح وسطی انہوئی صوبے کے رہائشیوں کو ویکسین لگوانے پر مفت انڈے دیے گئے ہیں جبکہ بیجنگ کی عوام کو شاپنگ کوپن دیے گئے۔

جہاں وائرس کے خلاف چین کی کامیابی قابل ستائش ہے وہیں اس کے برعکس برازیل ہفتے کے روز 5 لاکھ سے زائد اموات رپورٹ کرنے والا امریکا کے بعد دوسرا ملک بن گیا ہے۔

اس دوران بھارت میں یہ خدشات سامنے آئے ہیں کہ لوگ کووڈ 19 کے خطرے کو سنجیدگی سے نہیں لے رہے ہیں۔

ڈاکٹروں کو خدشات لاحق ہیں کہ شاپنگ مالز اور مارکیٹوں میں ایک مرتبہ پھر صارفین کی بڑی تعداد کے نتیجے میں بھارت وبا پر پائی گئی کامیابی کھو دے گا۔

نئی دہلی کے ایک مال میں ایک صارف نے بتایا کہ وہ ’اندر سے تنگ آچکی ہیں‘۔

اسی طرح 26 سالہ سیلز ایگزیکٹو سوریلی گپتا نے کہا کہ ’مجھے ایک وقفے کی ضرورت ہے، آپ کب تک بند رہیں گے؟‘

منبع: ڈان نیوز

کورونا وائرس کی بہت زیادہ متعدی قسم ڈیلٹا جسے بی 1617.2 کے نام سے بھی جانا جاتا ہے، دسمبر 2020 میں بھارت میں دریافت ہوئی تھی۔

اب یہ قسم بھارت اور برطانیہ میں سب سے زیادہ کیسز کا باعث بننے والی قسم ہے جبکہ امریکا میں امکان ظاہر کیا جارہا ہے کہ وہاں بھی جلد اس کا غلبہ ہوگا۔

ڈیلٹا قسم 6 ماہ کے دوران 80 ممالک تک پہنچ چکی ہے اور متعدد ممالک میں کیسز میں اضافے کے بعد سفری پابندیوں کا باعث بی ہے۔

اس نئی قسم کے پھیلاؤ کی زیادہ رفتار اور ویکسینز کی افادیت میں ممکنہ کمی کے باعث اس کے اثرات کے بارے میں جاننا اب بہت اہم ہوچکا ہے۔

اب تک ہم اس کے بارے میں جو جان چکے ہیں وہ درج ذیل ہے۔

یہ بہت تیزی سے پھیل سکتی ہے

جیسا اوپر درج کیا جاچکا ہے کہ یہ اب تک 80 ممالک تک پہنچ چکی ہے اور برطانیہ میں یہ کیسز کی تعداد کے حوالے سے ایلفا قسم کو پیچھے چھوڑ چکی ہے۔

حالانکہ ایلفا قسم بھی بہت زیادہ متعدی ہے مگر ڈیلٹا قسم کے بارے میں اب تک کے ڈیٹا سے عندیہ ملتا ہے کہ یہ کورونا کی سابقہ اقسام سے 43 سے 90 فیصد تک زیادہ متعدی ہے۔

ماہرین کا ماننا ہے کہ ایلفا کے مقابلے میں ڈیلٹا قسم کے پھیلاؤ کی رفتار 30 سے 100 فیصد زیادہ ہوسکتی ہے۔

محققین ابھی تک یہ نہیں جان سکے کہ یہ نئی قسم دیگر کے مقابلے میں اتنی زیادہ متعدی کیوں ہے، ان کے خیال میں اس سم کے پروٹین میں آنے والی تبدیلیوں نے اس کے لیے انسانی خلیات میں داخلہ آسان بنادیا ہے۔

ایک ابتدائی تحقیق میں عندیہ دیا گیا کہ اس قسم میں ایک ایسی میوٹٰشن ہوئی ہے جس سے ایک بار انسانی خلیات سے منسلک ہونے کے بعد وہ زیادہ بہتر طریقے سے مدغم ہوجاتی ہے۔

اگر یہ حقیقی معنوں میں خلیات سے آسانی سے مدغم ہوسکتی ہے تو یہ زیادہ سے زیادہ خلیات کو متاثر کرسکتی ہے اور مدافعتی نظام کو بے بس کرسکتی ہے۔

عالمی ادارہ صحت کی چیف سائنسدان ڈاکٹر سومیا سوامی ناتھن کے مطابق ڈیلٹا قسم جلد دنیا بھر میں کورونا کی بالادست قسم بن سکتی ہے۔

انہوں نے کہا کہ ڈیٹا سے عندیہ ملتا ہے کہ یہ قسم ایلفا کے مقابلے میں 60 فیصد زیادہ متعدی ہے۔

کم عمر افراد کو زیادہ متاثر کرتی نظر آتی ہے

برطانیہ میں تحقیقی رپورٹس سے معلوم ہوا ہے کہ 50 سال سے کم عمر افراد اس نئی قسم سے ڈھائی گنا زیادہ بیمار ہورہے ہیں۔

علامات کی شدت زیادہ سنگین ہے

ڈیلٹا سے بیمار ہونے والے افراد میں ہسپتال میں داخلے کا امکان زیادہ ہوسکتا ہے۔

تحقیقی رپورٹس سے عندیہ ملا ہے کہ ایلفا کے مقابلے میں ڈیلٹا سے متاثر ہونے والے افراد میں ہسپتال کے داخلے کا خطرہ دگنا زیادہ ہوتا ہے۔

چین میں ڈاکٹروں نے بتایا ہے کہ ڈیلٹا سے متاثر افراد وبا کے آغاز میں کووڈ کا شکار ہونے والے افراد کے مقابلے میں زیادہ بیمار ہوتے ہیں، جبکہ ان کی حالت زیادہ تیزی سے بگڑتی ہے۔

بھارت بھر میں مریضوں کا علاج کرنے والے 6 ڈاکٹروں کے مطابق معدے میں درد، قے، متلی، کھانے کی اشتہا ختم ہونا، سننے کی حس سے محرومی اور جوڑوں میں درد کووڈ کی اس قسم کے مریضوں کو درپیش چند مسائل ہیں۔

بھارت میں اس قسم سے متاثر افراد میں بلیگ فنگس کے کیسز بھی بڑھ چکے ہیں جو اب تک 8 ہزار 800 کووڈ 19 کے مریضوں یا ان کو شکست دینے والے میں سامنے آئے ہیں۔

علامات بھی مختلف

برطانیہ کی زوئی کووڈ 19 سیمپم اسٹڈی ایپ کے ڈیٹا سے معلوم ہوا ہے کہ وہاں ڈیلٹا کے شکار مریضوں کی عام علامات بھی دیگر اقسام سے مختلف ہیں۔

اس ایپ کے ڈیٹا کے مطابق ڈیلٹا کے شکار افراد میں سردرد، گلے کی سوجن، ناک بہنا اور بخار سب سے عام علامات ہیں۔

کھانسی ان مریضوں میں زیادہ عام علامت نہیں جبکہ سونگھنے کی حس سے محرومی سرفہرست 10 عام علامات میں شامل ہی نہیں۔

محققین نے خدشہ ظاہر کیا ہے کہ ڈیلٹا کی علامات کو بگڑے ہوئے نزلے کی علامات سمجھا جاسکتا ہے اور لوگوں کی جانب سے کوئی احتیاط نہیں کی جائے گی، جس سے اس کے پھیلاؤ میں مزید مدد ملے گی۔

خود کو کیسے بچائیں؟

ایسا خیال تو کیا جارہا ہے کہ یہ نئی قسم ویکسینشن سے پیدا ہونے والی اینٹی باڈیز کے خلاف مزاحمت کرسکتی ہے۔

مگر ابتدائی تحقیق کے مطابق فائر ویکسین کی 2 خوراکوں کے استعمال سے ڈیلٹا سم سے 79 فیصد تک تحفظ مل سکتا ہے اور بیمار ہونے پر علامات سے تحفظ کی شرح 88 فیصد تک ہوسکتی ہے۔

ایسٹرازینیکا ویکسین کی 2 خوراکوں سے ڈیلٹا سے بیمار ہوکر ہسپتال پہنچنے کا خطرہ 92 فیصد تک کم ہوسکتا ہے۔

اب تک ویکسینیشن والے کسی فرد میں اس نئی قسم سے ہلاکت کو رپورٹ نہیں کیا گیا۔

منبع: ڈان نیوز

کووڈ 19 سے دماغ کو طویل المعیاد نقصان پہنچنے کا امکان مرتب کرسکتا ہے اور یہی وجہ ہے کہ کووڈ کے کچھ مریض سونگھنے اور چکھنے کی حسوں سے محروم ہوتے ہیں۔

یہ بات برطانیہ میں ہونے والی ایک نئی طبی تحقیق میں سامنے آئی۔

تحقیق میں کورونا وائرس کی وبا سے قبل 40 ہزار افراد کے دماغی امیج ٹیسٹنگ کے ڈیٹا تک رسائی حاصل کی گئی۔

2021 میں ان میں سے سیکڑوں افراد کو ایک بار پھر دماغی اسکینز کے لیے مدعو کیا گیا اور 800 نے اسے قبول کرلیا۔

ان میں سے 404 افرد میں کووڈ 19 کی تشخیص ہوئی تھی، جن میں سے 394 افراد کے وبا سے قبل اور بعد کے دماغی اسکینز قابل استعمال تھے۔

پہلے اور بعد کے دماغی اسکینز کے موازنے سے کووڈ 19 کے متاثرین کے دماغ کے گرے میٹر (grey matter) کے ان حصوں پر نمایاں اثرات کو دریافت کیا گیا جو سونگھنے اور چکھنے کی حسوں سے دماغ کو منسلک کرتے ہیں۔

تحقیق کے مطابق نتائج سے دماغ کے بائیں حصے میں سونگھنے اور چکھنے کی حسوں والے حصوں میں نقصانات کو دریافت کیا گیا۔

سونگھنے اور چکھنے کی حسوں سے محرومی کووڈ کی چند عام ترین علامات میں سے ایک ہے اور اب تک کی تحقیق سے عندیہ ملتا ہے کہ مریضوں میں اس کا دورانیہ 5 ماہ تک بھی برقرار رہ سکتا ہے۔

نتائج سے عندیہ ملتا ہے کہ کووڈ کی معمولی شدت بھی دماغ کے گرے میٹر کے مختلف حصوں کو نقصان پہنچاسکتی ہے۔

اس کے مقابلے میں بیماری سے محفوظ رہنے والے افراد کے دماغ کے ان حصوں میں کسی قسم کی تبدیلی دیکھنے میں نہیں آئی۔

محققین نے کہا کہ اس حوالے سے مید تحقیق کی ضرورت ہے تاکہ تعین کیا جاسکے کہ کووڈ 19 کو شکست دینے والے مریضوں میں ہونے والا دماغی نقصان دیگر حصوں تک تو نہیں پہنچتا اور کیا یہ واقعی وائرس کا نتیجہ ہے یا اس کی وجہ کوئی اور ہے۔

اس تحقیق کے نتائج ابھی کسی طبی جریدے میں شائع نہیں ہوئے بلکہ پری پرنٹ سرور پر جاری کیے گئے۔

اس سے قبل مئی 2021 میں امریکا کی جارجیا اسٹیٹ یونیورسٹی کی تحقیق میں بتایا گیا تھا کہ کووڈ کے مریضوں کے دماغ میں گرے میٹر (gray matter) کا حجم کم ہوسکتا ہے۔

امریکا کی جارجیا اسٹیٹ یونیورسٹی کی اس تحقیق میں اٹلی کے ایک ہسپتال میں کووڈ کے مریضوں کو درپیش دماغی و اعصابی علامات کی جانچ پڑتال کے لیے ہونے والے سی ٹی اسکینز کا تجزیہ کیا گیا۔

تحقیق میں ان مریضوں کے گرے میٹر کے حجم کا تجزیہ کیا گیا جو دماغ کی باہری تہہ میں موجود ہوتا ہے۔

مجموعی طور پر 120 مریضوں کے سی ٹی اسکینز کو تحقیق میں دیکھا گیا جن میں سے 58 کووڈ 19 کے مریض تھے اور دونوں گروپس کے نتائج کا موازنہ کیا گیا۔

کووڈ کے ایسے مریض جن کو آکسیجن کی تھراپی کی ضرورت پڑی ان کے گرے میٹر کا حجم کم ہوگیا۔

گرے میٹر کے حجم میں کمی کو سنگین معذوری سے بھی منسلک کیا جاتا ہے۔

تحقیق میں دریافت کیا گیا کہ جن افراد کے گرے میٹر کے حجم میں کمی آئی ان میں ذہنی ہیجان بڑھ گیا، جس کے نتیجے میں مریضوں میں چڑچڑاپن بڑھ گیا۔

محققین نے بتایا کہ کووڈ 19 کے مریضوں میں دماغی پیچیدگیوں کے کیسز میں اضافہ ہوا ہے، گرے میٹر کے حجم میں کمی کا سامنا چند دیگر امراض جیسے شیزوفرینیا میں بھی ہوتا ہے۔

انہوں نے کہا کہ مستقبل میں ماہرین کو گرے میٹر کے حجم میں کمی سے طویل المعیاد بنیادوں پر مرتب اثرات کا تعین کرنا ہوگا یا علاج کے آپشنز کی جانچ پڑتال کرنا ہوگی۔

ان کا کہنا تھا کہ کووڈ بلاواسطہ دماغی حصوں کو نقصان پہنچاتی ہے اور ممکنہ طور پر بخار یا آکسیجن کی کمی اس کا باعث بنتے ہیں۔

منبع: ڈان نیوز

کووڈ 19 ویکسین کی قلت کے بارے میں دعوے کو مسترد کرنے کے چند روز بعد ہی وفاقی حکومت نے بین الاقوامی سپلائرز کی جانب سے فوری طور پر ادائیگی کرنے کے دباؤ کا حوالہ دیتے ہوئے کہا ہے کہ اسے ویکسین کی تازہ خریداری میں چیلنجز درپیش ہیں۔

حکام اور ذرائع نے کہا کہ اس صورتحال نے ملک بھر میں ویکسی نیشن کے اہم پروگرام کو سست کردیا ہے اور صرف سندھ میں اس کے روزانہ کے ہدف میں تقریباً 50 فیصد تک کی کمی آگئی ہے۔

رواں ہفتے وزیر اعظم کے معاون خصوصی برائے صحت ڈاکٹر فیصل سلطان نے ان دعوؤں کو مسترد کردیا تھا کہ کووڈ 19 ویکسین کی شدید قلت کے دوران لوگ وقت پر اپنی دوسری خوراک لگوانے میں ناکام ہو رہے ہیں اور کہا تھا کہ ملک میں تقریباً 20 لاکھ ویکسین دستیاب ہیں۔

تاہم ان کی وزیر منصوبہ بندی، ترقی اور خصوصی اقدامات اسد عمر اور وزیر برائے اقتصادی امور ڈویژن (ای اے ڈی) عمر ایوب کے ساتھ وفاقی وزیر خزانہ شوکت ترین سے ملاقات میں الگ کہانی سامنے آئی۔

اجلاس کے بعد جاری بیان میں کہا گیا کہ ویکسین کی بڑھتی ہوئی طلب کو مدنظر رکھتے ہوئے حکومت فوری اقدامات کر رہی ہے اور فیصلہ کیا گیا ہے کہ کریڈٹ لائنز کے ساتھ ساتھ ملک کے ترقیاتی شراکت داروں سے استفادہ کیا جائے گا، تاکہ ویکسین کی سپلائی چین کو جاری رکھنے اور سپلائرز کو بروقت ادائیگی کو یقینی بنایا جاسکے۔

بیان میں کہا گیا کہ ‘وزیر خزانہ شوکت ترین نے اسد عمر اور عمر ایوب خان کے ساتھ وزیر اعظم کے معاون خصوصی برائے صحت ڈاکٹر فیصل سلطان سے ملاقات کی اور ملک میں کووڈ 19 ویکسین کی دستیابی کی صورتحال کا جائزہ لیا’۔

اسد عمر نے این سی اوسی کے چیئرمین کی حیثیت سے بریفنگ دیتے ہوئے بتایا کہ این سی اوسی کے فورم سے ہر ہفتے کووڈ کی صورتحال کا جائزہ لیا جاتا ہے اور تمام متعلقہ فریقین کے تعاون سے پوری کوشش کی جاتی ہے کہ ویکسین کی فراہمی میں کوئی رکاوٹ نہ آئے۔

وزارت اقتصادی امور کی جانب سے وفاقی وزیر کو ویکسین کی خریداری کے لیے ترقیاتی شراکت داروں کی جانب سے دستیاب کریڈٹ لائن پر بریفنگ دی گئی۔

صورتحال نے حکام کو ہر ممکن اختیارات پر نظرثانی کرنے اور بالآخر مؤثر اور نتیجے پر مبنی انتخاب کے اختیارات پر زور دیا ہے۔

وزیر خزانہ نے کہا کہ بروقت ویکسین کی خریداری اور فراہمی کے ذریعے اپنے شہریوں کی حفاظت حکومت کی اولین ترجیحات میں شامل ہیں۔

انہوں نے وزارت اقتصادی امور کو ترقیاتی شراکت داروں کے ساتھ کریڈٹ لائن کی سہولت لینے کے لیے اقدامات شروع کرنے کی ہدایت کی، تاکہ ویکسین فراہم کرنے والے اداروں کو بروقت ادائیگی ممکن ہو سکے۔

انہوں نے کہا کہ پاکستانیوں کی صحت پر کوئی سمجھوتہ نہیں کیا جائے گا۔

شوکت ترین نے وزارت خزانہ کو سپلائی شیڈول کے مطابق فنڈز کی فراہمی کی بھی ہدایت کی۔

رواں ہفتے کے آغاز میں ایک روز میں ایک لاکھ 30 ہزار افراد کو ویکسین لگانے کی سطح عبور کرنے کے بعد دو روز قبل ملک بھر میں ویکسین مراکز نے صرف 55 ہزار 728 افراد کو ویکسین لگائی جن میں 46 ہزار 113 وہ تھے جن کو دوسری خوراک دی گئی تھی۔

اس طرح صرف 9 ہزار 615 افراد نے اپنی پہلی خوراک حاصل کی۔

پیپلز پارٹی کے رکن صوبائی اسمبلی اور صوبائی ویکسین ایڈمنسٹریشن سیل کے رکن قاسم سومرو کا کہنا ہے کہ ہم نے صوبے بھر میں تقریباً 400 حفاظتی ویکسین کے مراکز قائم کیے ہیں، تاہم اس بحران کے پیدا ہونے کے بعد ہم نے کئی اسٹیشنز پر پروگرام معطل کردیا ہے اور بڑے شہری مراکز پر زیادہ توجہ مرکوز کی ہے، تاہم اس کے ذریعے ہم صرف اگلے دو روز کا انتظام کر سکتے ہیں، وفاقی حکومت نے ایک یا دو دن میں سپلائی بحال کرنے کی یقین دہانی کرائی ہے، دیکھتے ہیں کیا ہوتا ہے’۔

منبع: ڈان نیوز

حکومت سندھ نے کورونا کیسز میں خاطر خواہ کمی کے بعد پرائمری اسکول 21 جون، تفریحی پارکس اور درگاہیں 28 جون سے کھولنے کا فیصلہ کیا ہے۔

وزیر اعلیٰ سندھ سید مراد علی شاہ کی زیر صدارت کورونا وائرس پر صوبائی ٹاسک فورس کا اجلاس منعقد ہوا۔

اجلاس میں صوبائی وزرا ڈاکٹر عذرا پیچوہو، سعید غنی، ناصر شاہ، مشیر مرتضیٰ وہاب، پارلیمانی سیکریٹری قاسم سراج سومرو، چیف سیکریٹری، آئی جی پولیس، ایڈیشنل آئی جی کراچی، ڈاکٹر باری، ڈاکٹر فیصل ، ڈاکٹر سارہ، ڈاکٹر قیصر سجاد اور دیگر متعلقہ افسران نے شرکت کی۔

اجلاس کو بتایا گیا کہ صوبے میں کورونا وائرس کی تشخیصی شرح 3.9 فیصد ہوگئی ہے اور کیسز میں کمی آرہی ہے۔

وزیر اعلیٰ سندھ نے کہا کہ یہ کمی تب تک ہوتی رہے گی جب تک عوام ایس او پیز پر عمل کرتے رہیں گے۔

اجلاس کو بریفنگ میں بتایا گیا کہ کراچی میں تشخیص کی شرح 8.08 اور حیدرآباد 4.3 فیصد ہے، جبکہ جون میں 263 کورونا مریض انتقال کر گئے۔

مراد علی شاہ نے کہا کہ ابھی ضلع شرقی اور ضلع جنوبی میں کیسز بہت زیادہ ہیں۔

اجلاس کو بتایا گیا کہ اب تک صوبے کو ویکسینز کی 32 لاکھ 43 ہزار 988 خوراکیں موصول ہوئیں، جن میں سے 28 لاکھ 73 ہزار 857 استعمال ہو چکی ہیں۔

وزیر اعلیٰ نے کہا کہ ویکسین کی کمی کے باعث ویکسی نیشن سینٹرز اتوار کو بند رہیں گے۔

اجلاس کو آگاہ کیا گیا کہ روس کی اسپوتنک ویکسین جون کے آخری ہفتے میں آجائیں گی، سائنوویک کی 15 لاکھ خوراکیں 21 جون، کین سائنو کی 7 لاکھ اور پاک ویک کی 4 لاکھ خوراکیں 23 جون کو ملیں گی۔

اجلاس میں فیصلہ کیا گیا کہ صوبے میں پرائمری اسکول 21 جون سے کھول دیے جائیں گے۔

ٹاسک فورس نے درگاہیں، امیوزمنٹ پارکس اور انڈور جمز 28 جون سے کھولنے کا بھی فیصلہ کیا۔

واضح رہے کہ سندھ میں 15 جون سے چھٹی سے آٹھویں جماعت کی کلاسز 50 فیصد حاضری کے ساتھ کھول دی گئی تھیں۔

اجلاس میں فیصلہ کیا گیا تھا کہ ہفتے میں 2 دن کی بندش کے بجائے این سی او سی کے فیصلے کے مطابق کاروبار بند کیا جائے گا۔

وزیر اعلیٰ نے کہا تھا کہ اب صرف اتوار کے دن کاروبار بند ہوگا اور باقی دن کاروباری سرگرمیاں جاری رہیں گی۔

منبع: ڈان نیوز