پاکستان سپر لیگ (پی ایس ایل) کے چھٹے ایڈیشن کے پہلے ایلیمنیٹر میں پشاور زلمی نے سنسنی خیز مقابلے کے بعد 5وکٹوں سے فتح حاصل کر کے دفاعی چیمپیئن کراچی کنگز کو ایونٹ سے باہر کردیا۔
ابوظبی میں کھیلے گئے لیگ کے پہلے ایلمنیٹر میں پشاور زلمی نے ٹاس جیت کر کراچی کنگز کو بیٹنگ کی دعوت دی۔
اوپنرز شرجیل خان اور بابر اعظم نے اپنی ٹیم کو 41 رنز کا آغاز فراہم کیا جس کے بعد 26 رنز بنانے والے شرجیل اپنی وکٹ سے محروم ہو گئے۔
ابھی کراچی کنگز اس دھچکے سے سنبھلی بھی نہ تھی کہ اگلے اوور میں عمید آصف نے نیوزی لینڈ سے آئے مارٹن گپٹل کو کامران اکمل کے ہاتھوں کیچ کرا دیا۔
بابر نے دانش کے ساتھ مل کر اسکور کو 73 تک پہنچانے کی کوشش کی لیکن تیزی سے رنز نہ بننے کے باعث پڑنے والے دباؤ کی وجہ سے دانش عزیز بڑا شاٹ کھیلنے کی کوشش میں وکٹ گنوا بیٹھے۔
بابر اعظم پوری اننگز میں جدوجہد کرتے نظر آئے اور کسی بھی موقع پر کھل کر بیٹنگ نہ کر سکے جس کا اندازہ اس بات سے لگایا جاسکتا ہے کہ انہوں نے آؤٹ ہونے سے قبل 45 گیندوں پر صرف 53 رنز بنائے۔
اس مرحلے پر پریرا نے تیزی سے کھیلنے کا بیڑا اٹھایا اور خالد عثمان کے ایک اوور میں 22 رنز بٹورنے کے ساتھ ساتھ 18 گیندوں پر 37 رنز کی اننگز کھیلی لیکن عمید آصف نے انہیں چلتا کردیا جبکہ چیڈوک والٹن نے صرف 9رنز بنائے۔
اختتامی اوورز میں عماد وسیم سمیت کراچی کنگز کے ٹیل اینڈرز نے جارحانہ بیٹنگ کا مظاہرہ کیا جس کی بدولت دفاعی چیمپیئن ٹیم مقررہ اوورز میں 7 وکٹوں کے نقصان پر 175 رنز بنانے میں کامیاب رہی۔
176 رنز کے ہدف کے تعاقب میں حضرت اللہ زازئی کی جارحانہ بیٹنگ کی بدولت پشاور زلمی کو اوپنرز نے 49نز کا اچھا آغاز فراہم کیا لیکن ایک ہی اوور میں دو چوکے لگانے کے بعد کامران اکمل افغان اسپنر نور احمد کو وکٹ دے بیٹھے۔
دوسرے اینڈ سے زازئی نے عمدہ بیٹنگ جاری رکھتے ہوئے اپنی نصف سنچری مکمل کی لیکن امام الحق 17 گیندے کھیلنے کے باوجود صرف 11 رنز بنا کر تھسارا پریرا کو وکٹ دے بیٹھے۔
پریرا نے عمدہ باؤلنگ کا سلسلہ جاری رکھتے ہوئے اپنے اگلے اوور میں زازئی کی اہم وکٹ حاصل کی جنہوں نے 38 گیندوں پر 5 چھکوں اور 10 چوکوں کی مدد سے 77رنز بنائے۔
شعیب ملک کا ساتھ دینے عثمان خالد آئے اور دونوں نے سنبھل کر بیٹنگ کرتے ہوئے 52 رنز کی شراکت قائم کر کے اپنی ٹیم کو ہدف کے انتہائی قریب پہنچا دیا لیکن پھر دونوں ہی بلے باز بالترتیب 30 اور 17 رنز بنانے کے بعد آؤٹ ہو گئے۔
آخری اوور میں زلمی کو فتح کے لیے 7 رنز درکار تھے لیکن کراچی کنگز کے فیلڈرز نے دو اہم کیچ ڈراپ کر کے اپنی ٹیم کی فتح کی امیدوں پر پانی پھیر دیا اور زلمی نے سنسنی خیز مقابلے کے بعد میچ میں 5وکٹوں سے فتح اپنے نام کر لی۔
اس فتح کے ساتھ ہی دفاعی چیمپیئن کراچی کنگز کے پاکستان سپر لیگ میں سفر کا خاتمہ ہو گیا جبکہ پشاور زلمی کا فائنل میں رسائی کے لیے کل اسلام آباد یونائیٹڈ سے میچ ہو گا۔
میچ کے لیے دونوں ٹیمیں ان کھلاڑیوں پر مشتمل تھیں۔
کراچی کنگز: عماد وسیم (کپتان)، بابراعظم، شرجیل خان، مارٹن گپٹل، شیڈوک والٹن، تھسارا پریرا، عماد وسیم، دانش عزیز، نور احمد، محمد عامر، محمد الیاس، ارشد اقبال۔
پشاور زلمی: وہاب ریاض (کپتان)، کامران اکمل، حضرت اللہ زازئی، امام الحق، صہیب مقصود، روومین پاول، شرفین ردرفورڈ، خالد عثمان، عمید آصف، محمد عرفان، محمد عمران۔
منبع: ڈان نیوز
پاکستان سپر لیگ (پی ایس ایل) کے چھٹے ایڈیشن کے کوالیفائر میں ملتان سلطانز نے اسلام آباد یونائیٹڈ کو 31 رنز سے شکست دے کر پہلی مرتبہ ایونٹ کے فائنل میں جگہ بنا لی۔
ابوظبی میں کھیلے گئے کوالیفائر میں فائنل میں جگہ بنانے کے لیے دو مرتبہ کی چیمپیئن اسلام آطباد یونائیٹڈ کا مقابلہ ملتان سلطانز سے تھا اور سلطانز نے ٹاس ٹاس جیت کر پہلے بیٹنگ کا فیصلہ کیا۔
ملتان سلطانز نے بیٹنگ کا آغاز کیا تو اننگز کے دوسرے ہی اوور میں عاکف جاوید کی گیند پر کپتان محمد رضوان آؤٹ قرار دیے گئے۔
شان مسعود کا ساتھ دینے صہیب مقصود آئے جنہوں نے آتے ہیں جارحانہ انداز اپنایا اور اوپننگ بلے باز کے ساتھ مل کر ٹیم کی نصف سنچری مکمل کرائی۔
دونوں کھلاڑیوں نے 53 رنز کی شراکت قائم کی لیکن اس سے قبل کہ یہ شراکت مزید طول پکڑتی، شاداب خان نے 25 رنز بنانے والے شان مسعود کا کام تمام کردیا اور پھر ایک گیند بعد آؤٹ آف فارم رائلی روسو کو بھی چلتا کردیا۔
جانسن چارلس اور صیہب مقصود نے مشکل مرحلے پر 63 رنز کی شراکت قائم کی اور اپنی ٹیم کی معقول مجموعے تک رسائی کی راہ ہموار کی، ویسٹ انڈین بلے باز 41 رنز بنانے کے بعد آؤٹ ہوئے۔
صہیب مقصود نے 3 چھکوں اور 7 چوکوں کی مدد سے 59 رنز کی اننگز کھیلی لیکن فہیم اشرف نے ان کی اننگز کا خاتمہ کردیا۔
صہیب کے آؤٹ ہونے کے بعد سلطانز کی بڑے مجموعے تک رسائی کی امیدیں دم توڑتی نظر آ رہی تھیں لیکن خوشدل شاہ نے ایک ہی اوور میں 4 چھکے لگا کر یونائیٹڈ کے اوسان خطا کردیے
انہوں نے میچ کے 19ویں اوور میں عاکف جاوید کو لگاتار 4 چھکے لگائے اور ایک اوور میں 29 رنز بنائے اور یہی اوور آخر میں جا کر میچ میں اصل فرق ثابت ہوا۔
اننگز کے آخری اوور میں محمد وسیم نے بہترین گیند بازی کا مظاہرہ کرتے ہوئے صرف 6 چھ رنز دیے اور ملتان سلطانز نے مقررہ اوورز میں 5 وکٹوں کے نقصان پر 180 رنز بنائے، خوشدل 42 رنز بنا کر ناقابل شکست رہے۔
181 رنز کے ہدف کے تعاقب میں پہلے ہی اوور میں سہیل تنویر نے کولن منرو کی اہم وکٹ حاصل کر لی۔
محمد اخلاق نے دو چوکوں کی مدد سے 10 رنز بنائے لیکن عمران خان کی براہ راست تھرو نے ان کی اننگز کا خاتمہ کردیا جبکہ کپتان شاداب خان کھاتا کھولے بغیر ہی پویلین لوٹ گئے۔
اس موقع پر افتخار احمد اور عثمان نے اسکور کو 54 تک پہنچایا لیکن بلیسنگ مزربانی کی ایک اٹھتی ہوئی گیند کو افتخار سمجھ نہ سکے اور 16 رنز بنانے کے بعد وکٹ کیپر کو کیچ دے بیٹھے۔
یونائیٹڈ ابھی اس نقصان سے سنبھلی بھی نہ تھی کہ اگلے اوور میں عمران طاہر کی ایک گیند پر غیرذمے دارانہ شاٹ کے نتیجے میں آصف علی اسٹمپ ہو گئے اور یونائیٹڈ 61 رنز پر پانچویں وکٹ گنوا بیٹھی۔
عثمان خواجہ نے نئے بلے باز حسین طلعت کے ساتھ مل کر 50 رنز سے زائد کی شراکت قائم کی اور ساتھ ساتھ اپنی نصف سنچری بھی مکمل کر لی۔
بہترین بلے بازی کا مظاہرہ کرنے والے آسٹریلین بلے باز نے 40 گیندوں پر 70 رنز کی اننگز کھیلی لیکن دوسرے اینڈ سے انہیں کوئی مدد نہ مل سکی اور سہیل تنویر نے اپنے اسپیل کے آخری اوور میں ان کی مزاحمت کا خاتمہ کر کے اپنی ٹیم کو اہم کامیابی دلا دی۔
حسن علی نے عمران طاہر کو چھکا لگایا اور دوبارہ اسی کوشش میں باؤنڈری پر کیچ ہو گئے۔
بڑھتے ہوئے رن ریٹ کے دباؤ کو یونائیٹڈ کے ٹیل اینڈرز جھیل نہ سکے اور یکے بعد دیگرے وکٹیں گنواتے رہے جس کے نتیجے میں پوری ٹیم 149 رنز پر ڈھیر ہوگئی۔
ملتان سلطانز نے میچ میں 31 رنز سے کامیابی حاصل کر کے پہلی مرتبہ پاکستان سپر لیگ کے فائنل میں جگہ بنا لی۔
میچ میں 17 رنز کے عوض تین وکٹیں لے کر اسلام آباد یونائیٹڈ کی اہم وکٹیں لینے والے سہیل تنویر کو بہترین کھلاڑی کے ایوارڈ سے نوازا گیا۔
آج کے میچ میں شکست کے باوجود اسلام آباد یونائیٹڈ کے پاس فائنل میں رسائی کا ایک موقع موجود ہے اور آج کراچی کنگز اور پشاور زلمی کے درمیان میچ کے فاتح کا مقابلہ کل یونائیٹڈ سے ہو گا اور اس میچ میں فاتح ٹیم فائنل میں جگہ بنا لے گی۔
میچ کے لیے دونوں ٹیمیں ان کھلاڑیوں پر مشتمل تھیں۔
اسلام آباد یونائیٹڈ: شاداب خاب(کپتان)، عثمان خواجہ، کولن منرو، حسین طلعت، افتخار احمد، آصف علی، محمد اخلاق، حسن علی، محمد وسیم، فہیم اشرف، عاکف جاوید۔
ملتان سلطانز: محمد رضوان(کپتان)، شان مسعود، صہیب مقصود، رائلی روسو، جانسن چارلس، خوشدل شاہ، سہیل تنویر، بلیسنگ مزربانی، شاہنواز دھانی، عمران طاہر، عمران خان۔
منبع: ڈان نیوز
پاکستان سپر لیگ (پی ایس ایل) پلے آف مرحلے میں پہنچ چکی اور کوئٹہ گلیڈی ایٹرز کے ساتھ ساتھ لاہور قلندرز کی بھی گھر واپسی ہوچکی ہے۔ پلے آف مرحلے میں پہنچنے والی ٹیموں کے کیا امکانات ہیں، وہ کیا کرسکتی ہیں اور کیسے کرسکتی ہیں، آئیے اس حوالے سے جائزہ لیتے ہیں۔
اس ٹورنامنٹ میں جہاں اسلام آباد یونائیٹڈ نے بہترین کھیل پیش کرتے ہوئے 8 میچ جیتے اور کوئٹہ گلیڈی ایٹرز کی ٹیم نہایت خراب کھیل پیش کرنے کے بعد صرف 2 میچ جیت سکی وہیں باقی چاروں ٹیموں کے درمیان فرق صرف نیٹ رن ریٹ کا رہا۔ کوالیفائر کھیلنے والی ملتان سلطانز اور پلے آف مرحلے سے باہر ہوجانے والے قلندرز نے 5، 5 میچ ہی جیتے لیکن اصل فرق نیٹ رن ریٹ کا ہی رہا۔
اسلام آباد یونائیٹڈ
اس وقت پوائنٹس ٹیبل پر اسلام آباد یونائیٹڈ 16 پوائنٹس کے ساتھ سرِفہرست ٹیم ہے اور پی ایس ایل میں ایسا پہلی مرتبہ ہوا ہے کہ کسی ٹیم نے لیگ مرحلے میں 10 میں سے 8 میچ جیتے ہوں۔
بیٹنگ
ابوظہبی میں اسلام آباد یونائیٹڈ کی مہم کا آغاز لاہور قلندرز کے ہاتھوں شکست سے ہوا جہاں راشد خان، جیمز فالکنر اور حارث رؤف کی باؤلنگ کا اسلام آباد یونائیٹڈ کے پاس کوئی جواب نہیں تھا۔ اس شکست سے سوال اٹھا کہ کیا اسلام آباد یونائیٹڈ کے بیٹسمین ابوظہبی کی سست وکٹوں پر سیٹ ہوپائیں گے؟
تاہم اس سوال کا جواب اگلے ہی میچ میں آگیا جب ایک چھوٹے ہدف کے تعاقب میں اسلام آباد یونائیٹڈ کے اوپنرز نے کوئٹہ گلیڈی ایٹرز کے باؤلروں کا بھرکس نکال دیا۔ بس پھر اس کامیابی کے بعد اس ٹیم نے پیچھے مڑ کر نہیں دیکھا۔ لاہور قلندرز کے خلاف ان کے ابتدائی بیٹسمین ناکام ہوئے تو آصف علی اور افتخار احمد نے ٹیم کو ایک معقول اسکور تک پہنچا دیا اور جب کراچی کنگز کے خلاف ایک بڑے ہدف کا تعاقب کرنا تھا تو کالن منرو اور افتخار احمد نے کراچی کے باؤلروں کو آڑے ہاتھوں لیا۔
اس میچ کے بعد جب اسلام آباد یونائیٹڈ کی جگہ پلے آف مرحلے میں کنفرم ہوگئی تو انہوں نے اگلے 2 میچوں میں اپنے کئی اہم کھلاڑیوں کو آرام دینے کا فیصلہ کیا، لیکن اس کے باوجود ایک میچ میں اسلام آباد یونائیٹڈ نے پاکستان سپر لیگ کا سب سے بڑا اسکور بنا دیا اور دوسرے میں ملتان سلطانز کو ایک بہترین آغاز کے باوجود ایک کمتر اسکور پر ڈھیر کردیا۔
اگر اسلام آباد یونائیٹڈ کی بیٹنگ کی بات کی جائے تو دونوں اوپنر کالن منرو اور عثمان خواجہ بہترین فارم میں ہیں اور تیزی سے اسکور بنا رہے ہیں۔ مڈل آرڈر میں افتخار احمد اور آصف علی بھی جارحانہ اور بڑی اننگز کھیل رہے ہیں۔ ان کا ساتھ برینڈن کنگ اور شاداب خان بھی دے رہے ہیں۔
باؤلنگ
باؤلنگ کو دیکھا جائے تو شاید میچ سے پہلے اسلام آباد یونائیٹڈ کی انتظامیہ اس پریشانی میں مبتلا ہوگی کہ کسے کھلایا جائے اور کسے باہر بٹھایا جائے۔
نوجوان کھلاڑیوں کی بات کی جائے تو عاکف جاوید عمدہ باؤلنگ کر رہے ہیں لیکن محمد وسیم ان سے بھی آگے ہیں۔ فہیم اشرف انجری سے واپسی کرچکے جبکہ حسن علی پچھلے 4، 5 ماہ سے زندگی کی بہترین فارم میں ہیں۔ فواد احمد بھی اچھی باؤلنگ کرچکے جبکہ آل راؤنڈرز میں افتخار اور حسین طلعت بھی موجود ہیں۔ ہاں البتہ کپتان شاداب خان کی باؤلنگ فارم ٹیم انتظامیہ کے لیے کسی حد تک پریشان کن ہے، جس پر تیزی سے کام کرنے کی ضرورت ہے.
ملتان سلطانز
بیٹنگ
ملتان سلطانز کی بات کی جائے تو انہوں نے سابق کپتان شان مسعود کی صورت میں موجودہ کپتان محمد رضوان کے لیے ایک بہترین اوپننگ پارٹنر ڈھونڈ لیا ہے۔ شان مسعود کافی تیزی سے اسکور بنا رہے ہیں اور اس مرحلے پر ان کی بیٹنگ ملتان سلطانز کے لیے کسی نعمت سے کم نہیں ہوگی۔ محمد رضوان پچھلے 6 ماہ سے بہترین ٹی20 کرکٹ کھیل رہے ہیں اور پلے آف میں بھی ملتان سلطانز کو ان کی بہترین اننگ کی ضرورت ہوگی، ایک ایسی اننگ جس میں وہ زیادہ وقت کریز پر گزار سکیں اور ایک بڑا اسکور کریں۔
اوپنرز کے علاوہ صہیب مقصود بھی اس وقت بہترین بیٹنگ کر رہے ہیں اور اگر وہ کریز پر 8، 10 اوورز گزار گئے تو وہ وقت باؤلرز کے لیے اچھا نہیں رہے گا۔ صہیب مقصود نے جس طرح ٹورنامنٹ میں تمام بیٹسمینوں کے لیے عذاب بنے رہنے والے جمیز فالکنر کا سامنا کیا ہے وہ باقی بیٹسمینوں کے لیے ایک اچھی مثال ہے۔
ملتان سلطانز کا مسئلہ یہ ہے کہ ان کی بیٹنگ ٹاپ آرڈر پر ہی تقریباً ختم ہوجاتی ہے۔ ملتان سلطانز کی جانب سے نہ ہی ان کے غیر ملکی کھلاڑی رائیلی روسو اور جانسن چارلس زیادہ اسکور بنا سکے ہیں اور نہ ہی پاکستانی بیٹسمین خوشدل شاہ۔ ملتان سلطانز کے ٹاپ آرڈر کو ان کے مڈل آرڈر کی جانب سے کچھ مدد کی لازمی ضرورت رہے گی۔
باؤلنگ
ملتان سلطانز کی باؤلنگ بہت عمدہ فارم میں ہے۔ شاہنواز دھانی ٹورنامنٹ میں اب تک سب سے زیادہ وکٹیں لے چکے ہیں اور ساتھ ہی وکٹیں لینے کے بعد خوشی کے اظہار کے منفرد انداز کی وجہ سے کھلاڑیوں، صحافیوں اور سوشل میڈیا پر خوب نام بنا رہے ہیں۔ پھر ساتھی باؤلرز عمران خان اور سہیل تنویر نے بھی دھانی کا بہت عمدہ ساتھ دیا ہے۔
زمبابوے سے آئے بلیسنگ مذرمبانی بھی ان کا اچھا ساتھ دے رہے ہیں اور پھر عمران طاہر تو ہیں ہی ایک خاص باؤلر۔ 42 سال کی عمر میں بھی ان کا جادو ایسا ہے کہ عثمان قادر کے لیے ٹیم میں جگہ بنانا ناممکن ہوچکا ہے۔ ملتان سلطانز کی ٹیم کراچی میں صرف ایک ہی میچ جیت پائی تھی لیکن ابوظہبی میں تو جیسے ٹیم کی کایا ہی پلٹ گئی اور اس نے پہلے چاروں میچ جیت لیے۔
دونوں ٹیمیں کافی متوازن ہیں لیکن موجودہ فارم کو دیکھتے ہوئے اسلام آباد یونائیٹڈ کو واضح برتری حاصل ہے۔ ٹی20 فارمیٹ میں جیت ہار کی پیشگوئی کرنا تو ممکن نہیں ہے لیکن اسلام آباد یونائیٹڈ کی ٹیم جس طرح کی کرکٹ کھیل رہی ہے، اسے دیکھ کر لگتا یہی ہے کہ وہ پلے آف کی طرح فائنل میں پہنچنے والی بھی پہلی ٹیم بن جائے گی۔ دونوں ٹیمیں ڈیٹا اینالسز اور بھرپور پلاننگ سے چلنے والی ٹیمیں ہیں، اب دیکھنا ہوگا کہ کون سی ٹیم بہتر پلان کے ساتھ میدان میں اترتی ہے۔
پشاور زلمی
پوائنٹس ٹیبل پر تیسرے نمبر پر پشاور زلمی کی ٹیم موجود ہے جس نے اس ٹورنامنٹ میں ابھی تک ملا جلا کھیل پیش کیا ہے۔ زلمی نے بھی ملتان سلطانز اور لاہور قلندرز کی طرح 5 میچ ہی جیتے ہیں لیکن نہ وہ ملتان سلطانز کی طرح بہترین کھیل پیش کرتے نظر آئے اور نہ ہی لاہور قلندرز کی طرح ناکام لگے۔
باؤلنگ
مختصر یہ کہ اس ٹیم میں مستقل مزاجی دیکھنے کو نہیں ملی۔ اس ٹیم کے باؤلر ایک میچ میں نہایت بہترین کارکردگی دکھا رہے ہوتے تو اگلے میچ میں ان کی ایسی پٹائی ہوتی کہ وہ باؤلر ہی نہ لگتے۔
ایک میچ میں کوئٹہ گلیڈی ایٹرز کو 136 تک محدود کرنے والے باؤلر اگلے ہی میچ میں ملتان سلطانز کے خلاف سخت مشکل کا شکار تھے۔ ایک جانب یہ باؤلرز کراچی کنگز کو صرف 108 رنز تک محدود کرنے میں کامیاب رہے تو اگلے ہی میچ میں پاکستان سپر لیگ کی تاریخ کا سب سے بڑا اسکور کھا گئے۔ محمد عرفان کے علاوہ تمام باؤلرز ایک دن بہترین باؤلنگ کرنے کے بعد اگلے ہی دن بدترین باؤلنگ کرتے نظر آئے۔ محمد عمران جس طرح کی باؤلنگ کراچی میں کرتے نظر آئے ویسی باؤلنگ ابوظہبی میں نہ کرسکے۔
وہاب ریاض پشاور زلمی کی جانب سے سب سے زیادہ وکٹیں حاصل کرچکے ہیں اور کراچی کنگز کے خلاف پچھلے میچ میں وہاب نے بابر اعظم کو صفر پر پویلین بھیج کر کراچی کنگز کی بیٹنگ کی تباہی کا آغاز کیا تھا۔ اگر پلے آف مقابلے میں بھی وہاب اپنی ٹیم کو ایسا آغاز دے سکیں تو یہ پشاور زلمی کے لیے جیت کا باعث بن سکتا ہے۔ محمد عرفان زیادہ وکٹیں تو حاصل نہیں کر پائے لیکن وہ بہت کفایتی باؤلنگ کا مظاہرہ کر رہے ہیں اور 4 کفایتی اوورز پشاور زلمی کے لیے نہایت اہم ثابت ہوسکتے ہیں۔ پشاور زلمی کی ٹیم اس ٹورنامنٹ میں باؤلنگ میں کافی تبدیلیاں کرتی رہی ہے، اب دیکھنا یہ ہوگا کہ اس میچ میں وہ کس کمبینیشن کے ساتھ جانا پسند کرتے ہیں۔
بیٹنگ
بیٹنگ کی بات کریں تو پشاور زلمی کے لیے سب سے اچھی خبر کامران اکمل کی فارم میں واپسی ہے۔ کامران اکمل ہمیشہ سے پشاور زلمی کے بہترین بیٹسمین رہے ہیں لیکن اس بار وہ ٹورنامنٹ کا آغاز اچھا نہیں کرسکے تھے۔ کوئٹہ گلیڈی ایٹرز کے خلاف کامران اکمل کی فارم میں واپسی پشاور زلمی کے لیے بہت اہم ہے اور وہ اس کے بعد سے 3 اہم اننگز کھیل چکے ہیں۔
دوسری طرف پشاور زلمی کو ان کے اوپننگ پارٹنر کی تلاش ہے۔ حیدر علی کی ناکامیوں کے بعد حضرت اللہ زازائی کو آزمایا گیا جو کراچی کنگز کے خلاف تو خوب کھیلے لیکن اسلام آباد یونائیٹڈ کے خلاف ایک بڑے ہدف کے تعاقب میں جہاں ان کی ہٹنگ کی سخت ضرورت تھی وہ جلد ہی پویلین لوٹ گئے اور حیدر علی کی جگہ آنے والے امام الحق بھی ناکام رہے۔
بیٹنگ میں پشاور زلمی کے لیے ایک اور اچھی بات شعیب ملک کا اچھا کھیلنا بھی ہے۔ شعیب ملک پچھلے 5 میچوں میں 2 بہترین نصف سنچریاں بنا چکے ہیں لیکن پریشانی کی بات یہ ہے کہ باقی میچوں میں وہ مکمل طور پر ناکام رہے ہیں۔ پشاور زلمی کے لیے پریشانی کی ایک اور بات ڈیوڈ ملر، فیبئن ایلن اور شرفین ردرفورڈ کی عدم دستیابی بھی ہے جو جنوبی افریقہ اور ویسٹ انڈیز کے درمیان کھیلی جانے والی ٹی20 سیریز کے لیے کیریبیئن روانہ ہوچکے ہیں۔
کراچی کنگز
کراچی میں ہونے والے میچ ختم ہوئے تو کراچی کنگز کی ٹیم پوائنٹس ٹیبل پر سرِفہرست تھی لیکن ابوظہبی آمد کے بعد اگلے تینوں میچوں میں شکست کے بعد کراچی کنگز کو پلے آف مرحلے میں رسائی کے لیے نہ صرف اگلے دونوں میچ جیتنا تھے بلکہ لاہور قلندرز یا ملتان سلطانز کی شکست کی دعائیں بھی کرنا تھیں۔ حالات نے پلٹا کھایا اور نہ صرف کراچی کنگز نے اپنے دونوں میچوں میں فتح حاصل کی وہیں لاہور قلندرز کو مسلسل شکستوں کا سامنا کرنا پڑا اور نیٹ رن ریٹ پر کراچی کنگز نے پلے آف مرحلے کے لیے کوالیفائی کرلیا۔
لیکن کیا کراچی کنگز کی ٹیم ابوظہبی میں پشاور زلمی کا مقابلہ کر پائے گی؟
بیٹنگ
کراچی کنگز کی جانب سے بابر اعظم پی ایس ایل کے ایک سیزن میں 500 سے زائد رنز بنانے والے پہلے بیٹسمین بن گئے ہیں۔ ساتھ ہی بابر اعظم نے پاکستان سپر لیگ میں 2 ہزار رنز بنانے والے پہلے کھلاڑی بننے کا اعزاز بھی حاصل کرلیا ہے۔ بابر اچھا اسکور بنا رہے ہیں اور وہ ابوظہبی میں ہونے والے 5 میچوں میں 3 نصف سنچریاں بھی بنا چکے ہیں لیکن اس دوران نہ تو بابر اعظم اچھے اسٹرائیک ریٹ سے کھیل سکے ہیں اور نہ ہی ان کے ساتھی بیٹسمینوں نے ان کا ساتھ دیا ہے۔
جب یہ دونوں باتیں ایک ہی میچ میں ممکن ہوئیں تو پھر کراچی کنگز کے باؤلرز اور فیلڈرز نے ان کا ساتھ نہیں دیا۔ لاہور قلندرز کے خلاف عماد وسیم کی کچھ عمدہ ہٹس اور نور احمد کی عمدہ باؤلنگ اور کوئٹہ گلیڈی ایٹرز کے خلاف دانش عزیز کا کھیلا گیا ایک اوور کراچی کنگز کی فتح کا باعث بن گیا اور یوں کراچی کنگز نے پلے آف مرحلے کے لیے کوالیفائی کرلیا ورنہ امکان کافی کم لگ رہا تھا۔
شرجیل خان کراچی میں کافی تیز اسکور بناتے رہے لیکن ابوظہبی میں نہ وہ تیز کھیل پائے اور نہ ہی بڑا سکور بنا پائے۔ کوئٹہ گلیڈی ایٹرز کے خلاف میچ میں بھی 2 گیندوں پر 2 چھکے لگانے سے قبل شرجیل کا اسٹرائیک ریٹ 100 ہی تھا اور جب ان کی ہٹس لگنے لگی تو وہ پویلین سدھار گئے۔ کراچی کنگز کے لیے ایک اور مسئلہ مارٹن گپٹل کی بیٹنگ فارم ہے جو کہیں موجود ہی نہیں ہے۔ ساتھ ہی محمد نبی کی جگہ آنے والے نجیب اللہ زادران بھی صرف ایک ہی میچ میں اچھا کھیل پیش کرسکے ہیں۔
پشاور زلمی کے خلاف بابر کے صفر پر آؤٹ ہوجانے کے بعد کراچی کنگز کے یہ بیٹسمین صرف 108 رنز ہی بنا سکے تھے۔ اس کا واضح مطلب ہے کہ کراچی کنگز کی کامیابی کے لیے بابر اعظم کو ایک بڑی اننگ کھیلنا ہوگی لیکن ساتھ ہی یہ بھی یقینی بنانا ہوگا کہ یہ رنز اچھے اسٹرائیک ریٹ سے بنائے جائیں۔
باؤلنگ
محمد عامر اب تک کسی میچ میں کفایتی اور کسی میں کم کفایتی باؤلنگ کرتے نظر آئے ہیں لیکن کراچی کنگز کے لیے اہم مسئلہ یہی ہے کہ محمد عامر پچھلے 5 میچوں میں کوئی وکٹ حاصل نہیں کر پائے۔ مخالف بیٹسمین عامر کو سیٹ ہونے کے لیے استعمال کر رہے ہیں اور نوجوان باؤلر کے خلاف تیز کھیلنے کی کوشش کر رہے ہیں اور وہ اس میں زیادہ تر کامیاب بھی رہی ہیں۔
ارشد اقبال، محمد الیاس یا عباس آفریدی جیسے نوجوان باؤلرز ہوں یا وقاص مقصود اور عامر یامین جیسے تجربہ کار باؤلرز کراچی کنگز کی جانب سے محمد عامر کے سوا کسی کو مسلسل مواقع نہیں دیے گئے ہیں اور نہ ہی یہ باؤلرز ملنے والے مواقع سے فائدہ اٹھانے میں کامیاب ہوئے ہیں۔
پھر کپتان عماد وسیم کی جانب سے اسپنرز کا استعمال بھی ہمیشہ سے ایک معمہ ہی رہا ہے۔ اپنے بہترین اسپنرز کو وہ کبھی باؤلنگ دینا بھول جاتے ہیں اور کبھی ان کا کوٹا پورا نہیں کروا پاتے اور اس بار اپنی باؤلنگ کے ساتھ بھی ایسا ہی کر رہے ہیں۔ لیکن آخری لیگ میچ میں عماد اچھی کپتانی کا مظاہرہ کرتے نظر آئے اور اب انہیں ایک اور بہترین اسپنر نور احمد کی خدمات حاصل ہوگئی ہیں، دیکھتے ہیں عماد ان کا کیسے فائدہ اٹھا پاتے ہیں۔
کراچی کنگز اور پشاور زلمی کے درمیان ہوئے لیگ میچوں میں دونوں ٹیموں کو ایک ایک فتح حاصل ہوئی ہے لیکن آخری میچ میں زلمی نے جس انداز میں کنگز کو شکست دی تھی وہ کافی بڑی شکست تھی۔ دونوں ٹیموں کے درمیان ایک سخت مقابلے کی توقع ہے جہاں دونوں ٹیموں میں سے فاتح کی پیش گوئی کرنا بہت مشکل ہے اور اس کی وجہ دونوں ٹیموں کا گروپ مرحلے میں خلافِ توقع کھیل ہے۔ لیکن یہ کہا جاسکتا ہے کہ پشاور زلمی کو کراچی کنگز پر پچھلے میچ میں ایک بڑی فتح کے بعد نفسیاتی برتری ضرور حاصل ہے۔
منبع: ڈان نیوز
پاکستان کرکٹ بورڈ (پی سی بی) نے کہا ہے کہ خواتین کی قومی ٹیم اور اے کرکٹ ٹیم مختصر طرز کرکٹ کی سیریز کے لیے ویسٹ انڈیز کا دورہ کرے گی۔
پی سی بی کی جانب سے جاری اعلامیے میں کہا گیا کہ دونوں ٹیمیں 23 جون کو لاہور سے انٹیگا کے لیے روانہ ہوں گی۔
پاکستان ویمنز کرکٹ ٹیم دورہ ویسٹ انڈیز میں 3 ٹی ٹوئنٹی اور 5 ون ڈے انٹرنیشنل میچز کھیلے گی۔
پی سی بی کے مطابق اس دوران دونوں ممالک کی خواتین کی اے کرکٹ ٹیموں کے مابین 3 ٹی ٹوئنٹی اور 3 ون ڈے میچوں کی سیریز بھی کھیلی جائے گی اور سیریز کے تمام میچز انٹیگا میں ہوں گے۔
خیال رہے پاکستان کی مردوں کی قومی ٹیم بھی 5 ٹی ٹوئنٹی انٹرنیشنل اور 2 ٹیسٹ میچوں پر مشتمل سیریز کے لیے 21 جولائی کو ویسٹ انڈیز پہنچے گی۔
قومی خواتین کرکٹ ٹیم کا گزشتہ 4 ماہ کے دوران یہ تیسرا بین الاقوامی دورہ ہے، اسے قبل قومی خواتین کرکٹ ٹیم نے3 ون ڈے اور 3 ٹی ٹوئنٹی میچوں پر مشتمل سیریز کے لیے جنوبی افریقہ کا دورہ کیا تھا، جس کے بعد قومی خواتین کرکٹ ٹیم زمبابوے روانہ ہوئی تھی تاہم پروازیں معطل ہونے کے باعث یہ دورہ مختصر کردیا گیا تھا۔
پی سی بی کا کہنا ہے کہ کورونا وائرس کی عالمی وبا کے باعث دنیا بھر میں رائج سفری پابندیوں کے باوجود بورڈ کا قومی خواتین کرکٹ ٹیم کے ان بین الاقوامی دوروں کو حتمی شکل دینے کا مقصد قومی کھلاڑیوں کو رواں سال شیڈول آئی سی سی ویمنز ورلڈکپ کوالیفائر کی ہر ممکن تیاری کروانا ہے۔
پاکستان اور ویسٹ انڈیز کی خواتین ٹیموں کے درمیان آخری دوطرفہ سیریز 2019 میں کھیلی گئی تھی، جس میں ایک روزہ سیریز پاکستان جبکہ ٹی ٹوئنٹی سیریز ویسٹ انڈیز نے جیت لیا تھا۔
دونوں ٹیموں کے درمیان آخری بین الاقوامی کرکٹ میچ آئی سی سی ویمنز ٹی ٹوئنٹی کرکٹ ورلڈکپ2020 میں کھیلا گیا تھا، جس میں پاکستان کو کامیابی نصیب ہوئی تھی۔
پی سی بی نے کہا کہ قومی خواتین کرکٹ ٹیموں اور خصوصاََ قومی خواتین اے کرکٹ ٹیم کے دورہ ویسٹ انڈیز سے ملک میں خواتین کرکٹ کو فروغ ملے گا اور ان ٹیموں میں ان کھلاڑیوں کو شامل کیا گیا ہے جو گزشتہ چند ماہ سے قومی خواتین کرکٹ کے پول کا حصہ ہیں۔
پی سی بی کے چیف ایگزیکٹو وسیم خان کا کہنا تھا کہ انہیں قومی خواتین اور قومی خواتین اے کرکٹ ٹیموں کے دورہ ویسٹ انڈیز کے اعلان کی بڑی خوشی ہے۔
وسیم خان نے کہا کہ قومی خواتین کرکٹ ٹیم کو رواں سال آئی سی سی ویمنز ورلڈکپ کوالیفائر میں شرکت کرنی ہے، لہٰذا یہ دورہ ہماری خواتین کھلاڑیوں کو نہ صرف صلاحیتیں نکھارنے کا موقع فراہم کررہا ہے بلکہ اس سے انہیں میچ پریکٹس بھی ملے گی۔
انہوں نے کہا کہ خواتین کرکٹرز کے کھیل میں بہتری لانے کے لیے ہر ممکن سہولیات اور مواقع فراہم کرنا ہی پی سی بی کی حکمت عملی ہے اور اسے عملی جامہ پہنانے کے لیے اقدامات کیے جارہے ہیں۔
منبع: ڈان نیوز
پاکستان سپر لیگ (پی ایس ایل) کے چھٹے ایڈیشن کے میچ میں اسلام آباد یونائیٹڈ نے ملتان سلطانز کو 4 وکٹوں سے شکست دے کر پوائنٹس ٹیبل پر اپنی پہلی پوزیشن مزید مستحکم کر لی ہے اور 8 میچز میں فتح کے ساتھ راؤنڈ مرحلے کا اختتام کیا۔
ابوظبی میں کھیلے گئے آخری لیگ میچ میں اسلام آباد یونائیٹڈ نے ٹاس جیت کر پہلے باؤلنگ کا فیصلہ کیا جو ابتدا میں زیادہ اچھا ثابت نہ ہوا۔
ملتان سلطانز کے اوپنرز شان مسعود اور محمد رضوان نے اپنی ٹیم کو 93 رنز کا شاندار آغاز فراہم کیا خصوصاً شان بھرپور فارم میں نطر آئے اور 6 چوکوں اور 3 چھکوں کی مدد سے 59 رنز بنائے۔
اس شراکت کا خاتمہ شان کے آؤٹ ہونے کے ساتھ ہوا جو افتخار کو وکٹ دے کر چلتے بنے۔
اسلام آباد یونائیٹڈ کو اگلی وکٹ کے لیے زیادہ انتظار نہیں کرنا پڑا اور فواد احمد نے ایک ہی اوور میں محمد رضوان اور صہیب مقصود کا کام تمام کردیا۔
رائلی روسو کی ناکامیوں کا سلسلہ اس میچ میں بھی جاری رہا اور وہ صرف دو رنز بنانے کے بعد شاداب خان کو وکٹ دے بیٹھے۔
اس مرحلے پر جانسن چارلس کا ساتھ دینے حماد اعظم آئے اور دونوں کھلاڑیوں نے پانچویں وکٹ کے لیے 27 رنز جوڑے لیکن 137 کے اسکور پر دونوں ہی کھلاڑی یکے بعد دیگرے پویلین لوٹ گئے۔
یونائیٹڈ کو سلطانز کے ٹیل اینڈرز کو چلتا کرنے میں زیادہ دیر نہ لگی اور پوری ٹیم اننگز کی آخری گیند پر 149 رنز پر ڈھیر ہو گئی۔
اسلام آباد یونائیٹڈ کی جانب سے محمد وسیم 4 وکٹوں کے ساتھ سب سے کامیاب باؤلر رہے جبکہ فواد احمد اور فہیم اشرف نے دو، دو کھلاڑیوں کو آؤٹ کیا۔
اوپنرز نے اسلام آباد کو 39 رنز کا آغاز فراہم کر کے فتح کی راہ ہموار کی، جس کے بعد محمد اخلاق کی 26 رنز کی برق رفتار اننگز کے آگے فل اسٹاپ لگ گیا۔
عمر امین ملنے والے موقع سے فائدہ نہ اٹھا سکے اور محمد رضوان کے بہترین کیچ کے نتیجے میں صرف 13 رنز بنا کر شاہنواز دھانی کی دوسری وکٹ بن گئے۔
اس مرحلے پر کپتان شاداب خان کا ساتھ دینے حسین طلعت آئے اور دونوں نے مل کر اسکور کو 92 تک پہنچا دیا، شاداب 35 رنز بنانے کے بعد وکٹ گنوا بیٹھے۔
آصف علی نے روایتی جارحانہ انداز اپنایا اور حسین طلعت کے ساتھ مل کر 41 رنز جوڑ کر اپنی ٹیم کو فتح کی دہلیز پر پہنچا دیا، انہوں نے 25 رنز بنائے جبکہ برینڈن کنگ پانچ رنز بنا سکے۔
اننگز کے آخری اوور میں حسین طلعت کی 34 رنز کی اننگز بھی تمام ہوئی لیکن یونائیٹڈ نے اعصاب قابو میں رکھتے ہوئے دو گیندوں قبل میچ میں فتح حاصل کر لی۔
محمد وسیم کو میچ کا بہترین کھلاڑی قرار دیا گیا.
اس کے ساتھ ہی پی ایس ایل کے چھٹے ایڈیشن کے راؤنڈ میچز کا اختتام ہو گیا ہے اور ایونٹ میں یونائیٹڈ 8 فتوحات کے ساتھ 16 پوائنٹس لے کر سرفہرست جبکہ سلطانز دوسرے نمبر پر ہیں۔
واضح رہے کہ میچ کے لیے اسلام آباد یونائیٹڈ کی ٹیم میں متعدد تبدیلیاں کی گئی تھیں اور آل راؤنڈر فہیم اشرف کی ٹیم میں واپسی ہوئی تھی۔
ملتان سلطانز نے بھی اپنی ٹیم میں چند اہم تبدیلیاں کرتے ہوئے باؤلرز کو آرام کا موقع فراہم کیا تھا۔
میچ کے لیے دونوں ٹیمیں ان کھلاڑیوں پر مشتمل تھیں۔
اسلام آباد یونائیٹڈ: شاداب خان(کپتان)، عمر امین، برینڈن کنگ، محمد اخلاق، حسین طلعت، افتخار احمد، آصف علی، فہیم اشرف، محمد وسیم، علی خان اور فواد احمد۔
ملتان سلطانز: محمد رضوان(کپتان)، شان مسعود، صہیب مقصود، رائلی روسو، جانسن چارلس، حماد اعظم، عثمان قادر، سہیل خان، بلیسنگ مزربانی، محمد عمر اور شاہنواز دھانی۔
منبع: ڈان نیوز
بالآخر آخری دن میں فیصلہ ہو ہی گیا کہ پاکستان سپر لیگ (پی ایس ایل) 2021ء میں کون اگلے مرحلے میں پہنچے گا اور کون واپسی کی فلائٹ لے گا؟
جب پی ایس ایل 6 کا دوسرا مرحلہ متحدہ عرب امارات میں شروع ہوا تھا تو کراچی کنگز پوائنٹس ٹیبل پر سب سے اوپر تھے اور لاہور قلندرز کامیابیوں کے جھنڈے گاڑ رہے تھے، لیکن پھر سب کچھ بدل گیا۔ آخری دن آیا تو مقابلے تو کراچی، کوئٹہ، اسلام آباد اور ملتان کی ٹیموں کے تھے، لیکن اصل ’شکست‘ لاہور قلندرز نے پائی کہ جو کراچی کی کوئٹہ کے خلاف کامیابی کی بدولت پی ایس ایل کی دوڑ سے باہر ہوگیا۔ وہ لاہور کہ جس نے ابتدائی 6 میچوں میں صرف ایک شکست کھائی تھی، مسلسل 4 مرتبہ شکست سے دوچار ہوا اور یوں لاکھوں دل توڑ دیے۔
کون کس نمبر پر؟
کراچی کی کوئٹہ کے خلاف جیت اور پھر آخری مقابلے میں اسلام آباد کی ملتان پر فتح کے ساتھ پوائنٹس ٹیبل حتمی صورت اختیار کرچکا ہے۔ اسلام آباد یونائیٹڈ مسلسل 5 فتوحات کے بعد پہلے نمبر پر ہے۔ اپنے 10 میچوں میں اسلام آباد کو صرف 2 میں شکست ہوئی جبکہ باقی 8 میچوں میں کامیابی حاصل کرکے 16 پوائنٹس حاصل کیے۔
اب کون کس سے کھیلے گا؟
دلچسپ بات یہ ہے کہ اسلام آباد کے بعد 4 ٹیموں یعنی ملتان سلطانز، پشاور زلمی، کراچی کنگز اور لاہور قلندرز، سب کے پوائنٹس برابر ہیں، یعنی 10، 10 اور فیصلہ صرف نیٹ رن ریٹ پر ہوا ہے۔
پہلے کوالیفائر میں اسلام آباد اور ملتان کا مقابلہ ہوگا، جہاں جیتنے والا براہِ راست فائنل تک رسائی پائے گا جبکہ شکست خوردہ ٹیم انتظار کرے گی کہ پہلے ایلیمنیٹر میں کراچی کنگز اور پشاور زلمی میں سے کون جیتتا ہے۔ جہاں شکست کھانے والا تو ٹورنامنٹ سے باہر ہوجائے گا وہیں فاتح ٹیم پہلے کوالیفائر کی شکست خوردہ ٹیم سے ایک اور مقابلہ کرے گی۔
اس میچ میں کامیاب رہنے والی ٹیم فائنل میں جگہ پائے گی۔ یہی وہ فارمیٹ ہے جو سالہا سال سے پی ایس ایل میں چل رہا ہے اور پورے سیزن میں محنت کرکے پوائنٹس ٹیبل پر ٹاپ 2 پوزیشنیں سنبھالنے والی ٹیموں کو بہترین موقع دیتا ہے۔
کراچی کنگز بمقابلہ کوئٹہ گلیڈی ایٹرز
پہلے مرحلے کے آخری روز پہلا مقابلہ کراچی کنگز اور کوئٹہ گلیڈی ایٹرز کے مابین تھا جو کراچی کے لیے تو اہم تھا ہی، لیکن لاہور کے بھی ‘دیدے لال’ تھے۔ کوئٹہ تو پہلے ہی ٹائٹل کی دوڑ سے باہر ہوچکا تھا لیکن کراچی کے لیے یہاں کامیابی بہت ضروری تھی۔ شکست کی صورت میں دفاعی چمپیئن کنگز کو باہر کا راستہ دکھا دیا جاتا اور قلندروں کو اگلے مرحلے تک جانے کا موقع مل جاتا۔ لیکن کوئٹہ نے یہاں ‘ہم تو ڈوبے ہیں صنم، تم کو بھی لے ڈوبیں گے’ کے مصداق شکست کھائی اور یوں قلندرز کو بھی واپسی کا ٹکٹ تھما دیا۔
کراچی و کوئٹہ کا مقابلہ تو گرما گرم تھا ہی، لیکن گرم موسم نے بھی خوب قیامت ڈھائی ہوئی تھی۔ سخت گرمی میں کراچی کنگز کا آغاز کچھ خاص نہیں تھا۔ 9 اوورز میں 76 رنز ہی بنے البتہ وکٹ کوئی نہیں گری تھی، اس لیے بہت امکان تھا کہ آگے رن ریٹ بڑھے گا، مگر اہم ترین مرحلے پر کنگز کے بلے باز ایک ایک کرکے نوجوان عریش علی خان کا شکار ہوتے رہے۔ وہ اپنا پہلا میچ کھیل رہے تھے اور گویا آتے ہی چھا گئے۔ انہوں نے 4 اوورز میں 28 رنز دے کر 4 وکٹیں حاصل کیں جن میں شرجیل خان، مارٹن گپٹل اور عماد وسیم کی وکٹیں بھی شامل تھیں۔
15ویں اوور تک کراچی صرف 99 رنز بنا پایا اور اس کی اننگ 150 رنز تک بھی پہنچتی نظر نہ آتی تھی۔ یہ وہ وقت تھا جب ایک اور نوجوان دانش عزیز نے اپنی آمد کا اعلان کیا۔ انہوں نے صرف 13 گیندوں پر 45 رنز بنائے اور گویا میچ کا پانسہ ہی پلٹ دیا۔ دانش نے اننگ کے 19ویں اوور میں آسٹریلیا کے جیک ورلڈمٹ کو 33 رنز مارے، جن میں ایک نو بال سمیت 4 گیندوں پر مسلسل 4 چھکے بھی شامل تھے۔
دانش کی دھواں دار بیٹنگ نے کراچی کی اننگ کو گویا پر لگا دیے۔ وہ پی ایس ایل میں سب کم از کم گیندوں پر نصف سنچری کے ریکارڈ کو نہیں توڑ پائے لیکن وہ کراچی کو 176 رنز کے مناسب ٹوٹل تک پہنچانے میں ضرور کامیاب ہوئے۔ ان کی طوفانی بیٹنگ کی بدولت کراچی نے آخری 5 اوورز میں 77 رنز کا اضافہ کیا جو فیصلہ کُن ثابت ہوا۔
جواب میں کوئٹہ کے کپتان سرفراز احمد کی 33 گیندوں پر 51 رنز کی اننگ کے سوا کوئی دوسرا بلے باز کراچی کی باؤلنگ کا مقابلہ نہیں کر پایا۔ نتیجتاً 20 اوورز کا کھیل ختم ہونے پر کوئٹہ کے 162 رنز ہی بن پائے۔
اس شکست کے ساتھ ہی کوئٹہ کی مایوس کُن مہم کا اختتام ہوا۔ پی ایس ایل کے پہلے 4 سیزنز میں 3 فائنل کھیلنے والے گلیڈی ایٹرز کا یہ انجام دیکھنا بہت افسوسناک تھا۔ رواں سال تو اس نے اپنے 10 میچوں میں سے صرف 2 میں کامیابی حاصل کی اور آخری نمبر پر رہے۔
قلندرز کے بلنڈرز
کوئٹہ کے ساتھ ساتھ افسوس لاہور کا بھی رہا، بلکہ زیادہ دکھ انہی کا تھا کیونکہ قلندرز نے رواں سیزن کا آغاز بہت ہی عمدہ کیا تھا۔ ابتدائی 6 میچوں میں سے 5 میں کامیابی سمیٹنے کے بعد وہ ٹاپ آف دی ٹیبل تھے۔ لیکن پھر انہیں نجانے کس کی ’نظر‘ لگ گئی۔
لیگ کے امارات پہنچنے کے بعد انہوں نے پہلے میچ میں اسلام آباد یونائیٹڈ کے خلاف کامیابی حاصل کی اور پھر یکے بعد دیگرے مسلسل 4 میچوں میں شکست کھائی۔ یعنی اس حالت کا قصور وار کوئٹہ نہیں بلکہ خود قلندرز ہی تھے۔ کارکردگی کا اندازہ اس بات سے لگائیں کہ ملتان سلطانز کے خلاف اپنے آخری میچ میں جہاں لاہور کے لیے کامیابی بہت ضروری تھی، وہاں وہ 80 رنز کے بھاری مارجن سے ہارے اور یوں اپنے نیٹ رن ریٹ کو شدید نقصان پہنچایا۔
جاندار ٹیموں کا شاندار مقابلہ
کوئٹہ کے خلاف کراچی کی کامیابی اور لاہور کے اخراج کے بعد اسلام آباد اور ملتان کا مقابلہ بے معنی رہ گیا تھا لیکن پھر بھی انہوں نے پوائنٹس ٹیبل پر اپنی پوزیشن پکی کرنے کے لیے سر دھڑ کی بازی لگا دی۔ 150 رنز کے تعاقب میں اسلام آباد کو آخری اوور میں کامیابی نصیب ہوئی۔
دونوں ٹیمیں مسلسل 4، 4 فتوحات کے ساتھ میدان میں اتری تھیں، یعنی یہ ‘دیووں کا مقابلہ’ تھا اور اگلے مرحلے سے پہلے دونوں کو اپنی بالادستی ثابت کرنا تھی۔ اس لیے ٹکر کا مقابلہ دیکھنے کو ملا۔
گوکہ ملتان کو آخری مقابلے میں شکست ہوئی لیکن یہ بات کہنا غلط نہیں ہوگی کہ امارات کے میدان سلطانوں کو بہت راس آئے۔ کراچی میں کھیلے جانے والے پی ایس ایل کے پہلے مرحلے میں ملتان اپنے 5 میں سے صرف ایک میچ میں کامیابی حاصل کر پایا تھا لیکن امارات پہنچتے ہی گویا ان کے نصیب کھل گئے۔ مسلسل 4 فتوحات کے ساتھ سلطانز دوسرے نمبر پر آگئے اور اب 21 جون کو ایک مرتبہ پھر اسلام آباد کے خلاف کوالیفائر کھیلیں گے۔ اگر وہ اس مقابلے میں اپنی پچھلی دونوں شکستوں کا بدلہ لینے میں کامیاب ہوجاتے ہیں تو پہلی بار فائنل میں ہوں گے اور اگر ہار بھی گئے تو انہیں ایلیمنیٹر کھیلنے کا موقع ضرور ملے گا۔
مجموعی طور پر امارات میں ہونے والا مرحلہ اسلام آباد اور ملتان دونوں کے لیے اچھا رہا۔ دونوں نے یہاں ایک، ایک شکست کھائی اور باقی تمام میچ جیتے جبکہ کراچی کنگز نے مسلسل 3 شکستوں کے بعد آخری دونوں مقابلے جیت کر اپنے اعزاز کے دفاع کی مہم کو زندہ رکھا ہوا ہے۔ پشاور زلمی ملے جلے نتائج کے ساتھ اگلے مرحلے تک آیا ہے، اس لیے اسے ذرا احتیاط کے ساتھ کھیلنے کی ضرورت ہوگی کیونکہ اب اس کے پاس غلطی کی کوئی گنجائش نہیں ہے۔
منبع: ڈان نیوز
پاکستان سپر لیگ (پی ایس ایل) میں دفاعی چیمپیئن کراچی کنگز نے کوئٹہ گلیڈی ایٹرز کو شکست دے کر پلے آف مرحلے کے لیے کوالیفائی کرلیا ہے اور لاہور قلندرز کی ٹیم ایونٹ سے باہر ہو گئی ہے۔
ابوظہبی میں کھیلے گئے لیگ کے 29ویں میچ میں کراچی کنگز نے گلیڈی ایٹرز کے خلاف ٹاس جیت کر پہلے بیٹنگ کا فیصلہ کیا جو درست ثابت ہوا۔
اوپنر بابر اعظم اور شرجیل خان نے ذمے دارانہ بیٹنگ کرتے ہوئے اپنی ٹیم کو اچھا آغاز فراہم کیا اور 71 رنز کی شراکت قائم کی۔
اس شراکت کا خاتمہ اس وقت ہوا جب بابر 23 رنز بنانے کے بعد عبدالناصر کی وکٹ بن گئے۔
ابھی کراچی کنگز کی ٹیم اس نقصان سے سنبھلی بھی نہ تھی کہ مارٹن گپٹل پانچ رنز بنانے کے بعد پویلین لوٹ گئے تاہم کنگز کو اصل دھچکا اس وقت لگا جب ایک گیند کے بعد ہی 45 رنز بنانے والے شرجیل خان بھی چلتے بنے۔
نجیب اللہ زدران نے عارش علی کو چھکا لگا کر خطرناک عزائم ظاہر کیے ہی تھے کہ اگلی گیند پر کٹ کھیلنے کی کوشش میں ان کی اننگز بھی اختتام کو پہنچی.
عماد وسیم بھی صرف تین رن بنا سکے اور عارش خان کی میچ میں چوتھی وکٹ بن گئے۔
کراچی کنگز کی ٹیم 121 رنز پر پانچ وکٹیں گنوا چکی تھی اور ایسا لگتا تھا کہ شاید ٹیم 150 رنز بھی اسکور نہ کر سکے لیکن دانش عزیز نے عمدہ بیٹنگ کا مظاہرہ کر کے گلیڈی ایٹرز کے ارمان خاک میں ملا دیے۔
نوجوان بلے باز نے صرف 13 گیندوں پر 5 چھکوں اور دو چوکوں کی مدد سے 45 رنز کی شاندار اننگز کھیلی اور جیک ولڈرمتھ کے ایک اوور میں 33 رنز بنائے۔
کراچی کنگز نے مقررہ اوورز میں 7 وکٹوں کے نقصان پر 176 رنز بنائے، چیڈوک والٹن نے 34 رنز بنائے۔
گلیڈی ایٹرز کی جانب سے عارش علی خان چار وکٹوں کے ساتھ سب سے کامیاب باؤلر رہے۔
ہدف کے تعاقب میں گلیڈی ایٹرز کے اوپنرز نے ٹیم کو 32 رنز کا آغاز فراہم کیا لیکن وہ درکار رن ریٹ کے مطابق تیز رفتاری سے اسکور کرنے میں ناکام رہے۔
صائم ایوب آؤٹ ہونے والے پہلے کھلاڑی تھے جو 19 رنز بنانے کے بعد پویلین لوٹے۔
اسکور 48 تک پہنچا تو جیک ویدرلڈ بھی 25 رنز بنا کر چلتے بنے جبکہ عثمان خان اور اعظم خان بالترتیب بھی صرف 15، 15 رنز بنا کر پویلین لوٹ گئے۔
91 رنز پر چار وکٹیں گرنے کے بعد سرفراز احمد کا ساتھ دینے حسان خان آئے اور دونوں نے 32 رنز کی ساجھے داری قائم کی لیکن اس مرحلے پر 24 رنز بنانے والے نوجوان بلے باز بدقسمتی سے رن آؤٹ ہو کر چلتے بنے، انہوں نے 15 گیندوں پر 24 رنز بنائے۔
اختتامی اوورز میں سرفراز احمد نے جارحانہ بیٹنگ سے اپنی ٹیم کو فتح کی دہلیز تک پہنچانے کی کوشش کی لیکن بڑھتے ہوئے رن ریٹ کے سبب ان کی یہ کوشش ناکامی سے دوچار ہوئی اور کراچی کنگز نے میچ میں 14 رنز سے فتح حاصل کر لی۔
کوئٹہ گلیڈی ایٹرز کی ٹیم مقررہ اوورز میں 6 وکٹوں کے نقصان پر 162 رنز بنا سکی، سرفراز نے ناقابل شکست 51 رنز کی اننگز کھیلی۔
اس فتح کے ساتھ ہی کراچی کنگز نے پلے آف مرحلے کے لیے کوالیفائی کر لیا ہے جبکہ کوئٹہ گلیڈی ایٹرز کے بعد لاہور قلندرز کی ٹیم بھی ایونٹ سے باہر ہو گئی ہے۔
دانش عزیز کو عمدہ بیٹنگ پر میچ کا بہترین کھلاڑی قرار دیا گیا.
میچ کے لیے دونوں ٹیمیں ان کھلاڑیوں پر مشتمل تھیں۔
کراچی کنگز: عماد وسیم (کپتان)، شرجیل خان، بابراعظم، مارٹن گپٹل، نجیب اللہ زدران، چیڈوک والٹن، نور احمد، دانش عزیز، محمد عامر، محمد الیاس اور ارشد اقبال۔
کوئٹہ گلیڈی ایٹرز: سرفراز احمد(کپتان)، جیک ویدرلڈ، صائم ایوب، عثمان خان، اعظم خان، عبدالناصر، حسان خان، عارش علی خان، جیل ولڈرمتھ، خرم شہزاد اور نسیم شاہ۔
منبع: ڈان نیوز
پاکستان سپر لیگ(پی ایس ایل) میں دفاعی چیمپیئن کراچی کنگز نے کوئٹہ گلیڈی ایٹرز کو شکست دے کر پلے آف مرحلے کے لیے کوالیفائی کر لیا ہے اور لاہور قلندرز کی ٹیم ایونٹ سے باہر ہو گئی ہے۔
ابوظبی میں کھیلے گئے لیگ کے 29ویں میچ میں کراچی کنگز نے گلیڈی ایٹرز کے خلاف ٹاس جیت کر پہلے بیٹنگ کا فیصلہ کیا جو درست ثابت ہوا۔
اوپنر بابر اعظم اور شرجیل خان نے ذمے دارانہ بیٹنگ کرتے ہوئے اپنی ٹیم کو اچھا آغاز فراہم کیا اور 71 رنز کی شراکت قائم کی۔
اس شراکت کا خاتمہ اس وقت ہوا جب بابر 23 رنز بنانے کے بعد عبدالناصر کی وکٹ بن گئے۔
ابھی کراچی کنگز کی ٹیم اس نقصان سے سنبھلی بھی نہ تھی کہ مارٹن گپٹل پانچ رنز بنانے کے بعد پویلین لوٹ گئے تاہم کنگز کو اصل دھچکا اس وقت لگا جب ایک گیند بعد ہی 45 رنز بنانے والے شرجیل خان بھی چلتے بنے۔
نجیب اللہ زدران نے عارش علی کو چھکا لگا کر خطرناک عزائم ظاہر کیے ہی تھے کہ اگلی گیند پر کٹ کھیلنے کی کوشش میں ان کی اننگز بھی اختتام کو پہنچی.
عماد وسیم بھی صرف تین بنا سکے اور عارش خان کی میچ میں چوتھی وکٹ بن گئے۔
کراچی کنگز کی ٹیم 121 رنز پر پانچ وکٹیں گنوا چکی تھی اور ایسا لگتا تھا کہ شاید ٹیم 150 رنز بھی اسکور نہ کر سکے لیکن دانش عزیز نے عمدہ بیٹنگ کا مظاہرہ کر کے گلیڈی ایٹرز کے ارمان خاک میں ملا دیے۔
نوجوان بلے باز نے صرف 13 گیندوں پر 5 چھکوں اور دو چوکوں کی مدد سے 45 رنز کی شاندار اننگز کھیلی اور جیک ولڈرمتھ کے ایک اوور میں 33رنز بنائے۔
کراچی کنگز نے مقررہ اوورز میں 7 وکٹوں کے نقصان پر 176 رنز بنائے، چیڈوک والٹن نے 34 رنز بنائے۔
گلیڈی ایٹرز کی جانب سے عارش علی خان چار وکٹوں کے ساتھ سب سے کامیاب باؤلر رہے۔
ہدف کے تعاقب میں گلیڈی ایٹرز کے اوپنرز نے ٹیم کو 32 رنز کا آغاز فراہم کیا لیکن وہ درکار رن ریٹ کے مطابق تیز رفتاری سے اسکور کرنے میں ناکام رہے۔
صائم ایوب آؤٹ ہونے والے پہلے کھلاڑی تھے جو 19 رنز بنانے کے بعد پویلین لوٹے۔
اسکور 48 تک پہنچا تو جیک ویدرلڈ بھی 25 رنز بنا کر چلتے بنے جبکہ عثمان خان اور اعظم خان بالترتیب بھی صرف 15، 15 رنز بنا کر پویلین لوٹ گئے۔
91 رنز پر چار وکٹیں گرنے کے بعد سرفراز احمد کا ساتھ دینے حسان خان آئے اور دونوں نے 32 رنز کی ساجھے داری قائم کی لیکن اس مرحلے پر 24 رنز بنانے والے نوجوان بلے باز رن بدقسمتی سے رن آؤٹ ہو کر چلتے بنے، انہوں نے 15 گیندوں پر 24رنز بنائے۔
اختتامی اوورز میں سرفراز احمد نے جارحانہ بیٹنگ سے اپنی ٹیم کو فتح کی دہلیز تک پہنچانے کی کوشش کی لیکن بڑھتے ہوئے رن ریٹ کے سبب ان کی یہ کوشش ناکامی سے دوچار ہوئی اور کراچی کنگز نے میچ میں 14 رنز سے فتح حاصل کر لی۔
کوئٹہ گلیڈی ایٹرز کی ٹیم مقررہ اوورز میں 6وکٹوں کے نقصان پر 162 رنز بنا سکی، سرفراز نے ناقابل شکست 51 رنز کی اننگز کھیلی۔
اس فتح کے ساتھ ہی کراچی کنگز نے پلے آف مرحلے کے لیے کوالیفائی کر لیا ہے جبکہ کوئٹہ گلیڈی ایٹرز کے بعد لاہور قلندرز کی ٹیم بھی ایونٹ سے باہر ہو گئی ہے۔
میچ کے لیے دونوں ٹیمیں ان کھلاڑیوں پر مشتمل تھیں۔
کراچی کنگز: عماد وسیم (کپتان)، شرجیل خان، بابراعظم، مارٹن گپٹل، نجیب اللہ زدران، چیڈوک والٹن، نور احمد، دانش عزیز، محمد عامر، محمد الیاس اور ارشد اقبال۔
کوئٹہ گلیڈی ایٹرز: سرفراز احمد(کپتان)، جیک ویدرلڈ، صائم ایوب، عثمان خان، اعظم خان، عبدالناصر، حسان خان، عارش علی خان، جیل ولڈرمتھ، خرم شہزاد اور نسیم شاہ۔
منبع: ڈان نیوز
پاکستان کرکٹ ٹیم کے ہیڈ کوچ مصباح الحق کا کہنا ہے کہ محمد عامر اگر ریٹائرمنٹ واپس لے کر اچھی کارکردگی دکھاتے ہیں تو ان کے لیے دروازے کھلے ہیں۔
انگلینڈ اور ویسٹ انڈیز کے دوروں کے لیے روانگی سے قبل لاہور میں پریس کانفرنس کرتے ہوئے مصباح الحق نے کہا کہ ‘محمد عامر سے کوئی ذاتی مسئلہ نہیں ہے، میری کپتانی میں ہی اس نے کم بیک کیا، عامر کی کارکردگی اور انجریز ان کے ٹیم سے ڈراپ ہونے کی وجہ تھی، مجھے نہیں پتہ محمد عامر کا کیوں مسئلہ بنایا گیا’۔
انہوں نے کہا کہ ‘عامر نے خود انٹرنیشنل کرکٹ سے ریٹائرمنٹ لے لی، اگر وہ ریٹائرمنٹ واپس لیتے ہیں اور ان کی کارکردگی اچھی ہو تو ان کی سلیکشن کے بارے میں مجھے کوئی مسئلہ نہیں، ان کے لیے دروازے کھلے ہیں’۔
ایک سوال کے جواب میں ان کا کہنا تھا کہ ‘اس میں کوئی شک نہیں ہے کہ مڈل آرڈر پر ہمیں تحفظات ہیں، ہمیں امید ہے کہ ہم اس شعبے کی خامیوں پر قابو پالیں گے، اعظم خان کو لانے کے لیے کوئی دباؤ نہیں تھا، پانچ چھ نمبر پر جن کو موقع دیا گیا وہ پرفارم نہیں کر سکے، اعظم خان کو ان کی صلاحیتوں اور اسٹرائیک ریٹ کی وجہ سے موقع دیا گیا اور انہیں فٹنس بہتر بنانے کے لیے ٹارگٹ دیے گئے ہیں جن پر وہ کام کر رہے ہیں’۔
مصباح الحق نے کہا کہ ‘ہونا تو یہی چاہیے تھا کہ اِن فارم بیٹسمینوں کو دیکھ کر ٹیموں کا اعلان کیا جاتا لیکن لاجسٹک اور کووڈ کی وبا کی وجہ سے کچھ مسائل کے باعث ایسا ممکن نہ ہو سکا، اگر لاجسٹک اور وبا کے باعث دوسرے مسائل ہمیں اجازت دیتے ہیں تو دیکھیں گے کہ ان فارم بیٹسمینوں کو کیسے اور کب واپس لایا جاسکتا ہے’۔
انہوں نے کہا کہ ‘جو کھلاڑی منتخب ہوئے ہیں وہ باصلاحیت ہیں صرف انہیں اعتماد دینے کی ضرورت ہے، ان دنوں وہ ضرور آؤٹ آف فارم ہیں لیکن وہ باصلاحیت ہیں، ہماری کوشش ہوگی کہ انگلینڈ میں انٹر اسکواڈ میچز اور ٹریننگ میں ان کے ساتھ کام کریں اور انہیں اعتماد دیں اور خامیوں کو دور کریں’۔
ان کا کہنا تھا کہ ‘فرنچائز کرکٹ اور انٹرنیشنل کرکٹ میں فرق ہوتا ہے، ضروری نہیں جو پی ایس ایل کی کنڈیشنز میں پرفارم نہیں کر رہا وہ انگلینڈ اور ویسٹ انڈیز جاکر بھی کارکردگی نہ دکھائے’۔
قومی ٹیم کے ہیڈ کوچ نے کہا کہ ‘فرنچائز اپنے حساب سے ٹیمیں منتخب کرتی ہیں لیکن یہ بات درست ہے کہ جو کھلاڑی قومی ٹیم میں ہوں انہیں موقع ملنا چاہیے تاکہ وہ زیادہ سے زیادہ سیکھیں’۔
انہوں نے کہا کہ ‘شاہنواز دھانی کے کھیل میں بہتری آئی ہے لیکن کچھ کھلاڑیوں کو کسی وجہ سے موقع نہیں مل پاتا جیسے عثمان قادر ہیں، ان کی ٹیم میں ورلڈ کلاس عمران طاہر شامل ہیں اور ایک ہی اسپنر کھیل سکتا ہے جس کی وجہ سے عثمان قادر کو موقع نہیں مل رہا’۔
ایک سوال کے جواب میں انہوں نے کہا کہ ‘پاکستان ٹیم کی فیلڈنگ کا معیار دورہ نیوزی لینڈ کے بعد بہتر ہوا ہے لیکن ڈومیسٹک کی سطح پر مزید کام کرنے کی ضرورت ہے، فیلڈنگ کی جتنی پریکٹس کریں گے اتنی بہتر ہو گی’۔
ان کا کہنا تھا کہ ‘ابوظبی میں پی ایس ایل کھیلی جارہی ہے جہاں ٹی ٹوئنٹی ورلڈ کپ کھیلے جانے کا امکان ہے، اس لیے پاکستان کے کھلاڑیوں کو کنڈیشنز سے ہم آہنگ ہونے کا موقع ملے گا۔’
انہوں نے کہا کہ ‘انگلینڈ اور ویسٹ انڈیز کے خلاف سیریز بہت اہم ہیں، دونوں ٹیمیں بہترین ہیں اور ہم جتنی اچھی ٹیموں کے خلاف کھیلیں گے ورلڈ کپ کی تیاریوں کے لیے فائدہ ہوگا’۔
منبع: ڈان نیوز
Newer Posts